Read Doyayo MARKUS 9 Bible Online

MARKUS 9 - Doyayo bible

MARKUS 9

¹Yeesu wɛɛ raahi ɓɛ: a be raasin hi rɔbo: dood zaadɛ wɔ hi gi ɗɔɔtig dihɛ hi taa wɔrk zaŋ hi gbɛn Bɛt wáát yɔ gɔ gi zaa hi tɛŋkɔ kete.

²Yɔ ɔ̧t nɔɔngbun talɔ, Yeesu loo Piyɛr hi Yakuba hi Yohana ka̧hi a ga̧a̧t za hɔɔt ha an hi kɔm hɔ mukya̧. Yɔ hi tuurɔ zɛmr muulɔ hi lɔlgbarɔ.

³Gbandilɔ wɔ hi wɛɛ gaattɔnɔ buutɔnɔ fɛr, buutigɔ bɔ, doo za gban buusigya a hɛbt di ɗɛ̄ɛ̄ an gi buus anbɔ gɛ.

⁴Eliya hi Muusa Bɛtya̧a̧kɛŋkya wɔrkɛ amntɛ wɔ hi midsihi, hi bookya̧a̧ hi Yeesu .

⁵Piyɛr raa Yeesu : a Hingokya , bɛr an wɛ gi dihɛ. Wi ɗuks duul taarɛ gbunu mɔnɛ, gbunu Muusa ɔ̧nɛ, wɛ zaa gbunu Eliya ɔ̧nɛ.

⁶Piyɛr mɛ̄ɛ̄ hinɔ gɔ gi raa gɛ, yɔ hoobha̧a̧ge hi hinyɔ gbɛnɔ a gi lɔlgbar du.

⁷Kuus za zaa wɛɛ yaatinihi zeksɔ, wɛɛ ya̧a̧ fu̧u̧z a kuus du gi raako: a yɛrɛ gi waa be yɔ ha̧a̧bge hi kpoos be sɛw giya, kɛmsinɛge!

⁸Yaala walɛsɛrɛ wɔ hi seek lɔl hi dɔŋdi, wɛɛ hí gbɛ̄n za̧a̧nza gɛ be. Yeesu gi gi gbun a hi tees du.

⁹Anyɔ hi sizig a ga̧a̧t bɔ hage, Yeesu raahi an yɛrɛ lɛ: a hinyɔ nɛ gbɛnɔ, bɔnɛ fɔks doo za. gi tuur an Za̧a̧n Waa bɔ, gi rɛml a wɔrkɛ tees du.

¹⁰Hi a̧a̧ dɔglɔ hi buudu, hi wɛɛ hi watingo hi teesdu: a nɔ hinɔ raakɔ a rɛmliki a wɔrk du be?

¹¹Hi wɛɛ hi war Yeesu : a Bɛtmaakdɔkya wɔ hi raa nɔ a gi an Eliya gi zaa kɛn nɔ?

¹²Gii wɛɛ goohi: a gi an Eliya gi zaa kɛn ro an gi gɛms hin sɛw. Bɛt ɗɛɛrwolɔ raa nɔ a Za̧a̧n Waa bɔ gi ha̧a̧ya̧a̧r gbɔɔltɔnɔ, dood hí sɔ̧ɔ̧g an doo gɛ nɔ?

¹³Yɛrɛ be raasin a Eliya zaaza ma, dood hi gɔsig hin anyɔ ha̧a̧hi, anyɔ hi bi̧i̧ dɔglɔ a gi zulha.

¹⁴Yɔ hi zaa a walɛsɛrɛ zaadɛ wɔ hi, hi gbɛn saal gbɔɔl gɔ̧ɔ̧hi, wɛɛ Bɛtmaakdɔkya zaadɛ hi hinfaltingo hi hiya.

¹⁵Yɔ saal wɔ hi bɛɛ Yeesu gbɛŋko, hi sɛw kɔmsihi an hinɔ duhidumɔ, hi nɔɔ hi rek a ge, hi booge.

¹⁶Yeesu ɛrihi: a nɛ faltingo nɔ hi hii nɔ?

¹⁷Doo za a saal bɔ gedu ta̧a̧ raage: a Hingokya , be kamsum waa be wal yɛrɛ gin loorɛha̧a̧l yɔ gig a̧a̧nik ya̧a̧-booki.

¹⁸Lɛlyɔ loorɛha̧a̧l bɔ gɔ yɛɛlig du, gbalig hɛbtdi; set itil tuu gi ya̧a̧gbar duuduk, wɛɛ gi ɓalsig nuŋggɔ, muulɔ gɔ koot ser. Be zɔ̧ walɛsɛrɛ mɔ wɔ an hi nin loorɛha̧a̧l bɔ, wɛɛ hí ɗɛ̄ɛ̄ gɛ.

¹⁹Yeesu raahi: a hey! nɛya, nɛɛ dood wɔ ɓɔryɔ hā̧a̧n ɗɔbsig gɛ. Be kɔm gi tuur bili hi nɛya? Be kɔm gi tuur bili an be mɔnɛ? Kamsin be walà bɔ.

²⁰Hi kamsigge. Yɔ loorɛha̧a̧l bɔ gbɛnig hɛɛd, bees waa bɔ ha̧a̧ltɔnɔ, matig a hɛbtdi, gi kiblik hi set itil ya̧a̧ du.

²¹Yeesu war baatɔ: a hin yɛrɛ yɛɛlig bili? Baatɔ ta̧a̧: a yɔ gi yɛ̧sɛ.

²²Gɔ anbɔ loorɛha̧a̧l bɔ gɔ matig laa du, zaabe a mɛm du hɛw an gi wɔrɔ. Gid mɔ ɗɛɛ hinza wooko, mɛɛsibe ya̧a̧rɛ, ɗaasiwi.

²³Yeesu raage: a mɔ raa nɔ a gid be ɗɛɛ nɔ? Za̧a̧nyɔ ɗɔbs Bɛto, hin sɛw ɗɛɛ an gi rekɔ.

²⁴Ɓɔrbɔ waa bɔ baatɔ ɓooya̧a̧ raa: a be ɗɔbsɔ, ɗaasibe anyɔ ɗɔbsig be rı̄ı̄ gɛ.

²⁵Yɔ Yeesu gbɛn saal wɔ hi maŋko, ya̧a̧l loorɛha̧a̧l bɔ raage: a loorɛha̧a̧l su̧u̧k bɔ hi lag bɔ, be raamɔ, tuum a waa yɛrɛ muul du, bɔmɔ wɛɛ mɔ wɛɛ gul a gi muul du zaŋ!

²⁶Loorɛha̧a̧l bɔ ɓoo kaalɛ, bees waa bɔ ha̧a̧ltɔnɔ tuu rekɔ. Wala bɔ kɔm sob an wɔɔrɔ. Yɔ anbɔ wɔ hi gi di kittɔnɔ hi raako: a wɔɔrɔ, wɔɔrɔ.

²⁷Yeesu wɛɛ wa̧a̧ naanɔ bɔ ɗuksige, wala bɔ ɗund erɔ.

²⁸Yɔ Yeesu gul raa du walɛsɛrɛ wɔ hi ɛrig yaaklɛlɛ: a nɔ wí ɗɛ̄ɛ̄ loorɛha̧a̧l bɔrɔ nink gɛ nɔ?

²⁹Wɛɛ ta̧a̧hi: a hi zɔ̧ki a Bɛt ge kpɔd an hi ɗɛɛ loorɛha̧a̧l wɔrɔ lab ninko.

³⁰Yɔ hi ɗuk hɔdi, hi tal a Galile. Yeesu hā̧a̧g an doo za gi mɛɛ lɛlyɔ gi du gɛ,

³¹anyɔ gis walɛsɛrɛ ɔ̧ɔ̧ wɔ hingoko, raahi a hi wa̧a̧ Za̧a̧n Waa bɔ a ɗood naan du; hi gbɔ̧nge. Gɔ gi wɔrɔ ɔ̧t taarɛ gi rɛml a wɔrk du gi ɗundɔ.

³²Walɛsɛrɛ ɔ̧ɔ̧ wɔ be hí kɛ̄m dɔgl bɔrɔ hinɔ gi raak gɛ. Anyɔ gɔ hi wɛɛ hi ɛrig hinɔ be, hoob ha̧a̧hiha̧.

³³Hi tuur a Kapɛrnayum. Yɔ Yeesu gi raa du, war walɛsɛrɛ ɔ̧ɔ̧ wɔ: a nɛ wadzingo nɔ hinɔ a gbɔnɔ di nɔ?

³⁴Anyɔ hi wadzin nɛ an hi mɛɛ za̧a̧nyɔ gi gbɔɔl gi daarlɛlɛ, yɔ hi kɛm anbɔ hi kɔm hititi.

³⁵Yeesu ɗɔɔtɔ, el walɛsɛrɛ ɔ̧ɔ̧ wɔ koobl daa eerɛ wɔ raahi: a za̧a̧n za gi ha̧a̧g an gi wɛɛ doosi, gi wɛɛ dood sɛw kuudya̧ hi dood sɛw woosyaya̧.

³⁶Wɛɛ loo ya̧a̧mwaa esig hi teesdu, kurig gi naan du raahi:

³⁷a za̧a̧nyɔ dag waat an yɛrɛ zaaya̧ gbun a be nuŋg du, dag beya hi zul be; wɛɛ za̧a̧nyɔ dag beya, dāg bee gɛ, dag za̧a̧nyɔ yaazib giya.

³⁸Yohana raage: a Hingokya , wi gbɛn doo za gi ninik loorɛha̧a̧l wɔ a hi nuŋg mɔ; anyɔ taa doo wɛnɛ gɛ be, wi ya̧a̧nigya̧a̧nɔ.

³⁹Yeesu wɛɛ ta̧a̧: a bɔnɛ ya̧a̧nige. Doo za taa an gi woo gɛrs a be nuŋg du, wɛɛ ɗɛ̄ɛ̄ an gi boo ha̧a̧l a be zulha ɓɔrbɔ gɛ.

⁴⁰Yɔ anbɔ za̧a̧nyɔ hā̧a̧g gabs hi wɛɛ gɛ, gii gi doo wɛnɛ.

⁴¹Wɛɛ za̧a̧nyɔ gɔ gi gaan mɛm a dakwaa du nɛ yɔ̧, anyɔ nɛ gi Kristu doo ɔnɛ, be raasin rɔbo, taa lɔɔk dɔɔrɔɔsɔ nɛ zaŋ.

⁴²Yɛrɛ za̧a̧nza gi mat waat wɛrɛ hi gib ɗɔbsig zaaya̧ gbun a hinha̧a̧l du, an hi wɔ̀bs nɛ za̧a̧nɔ naalnɔɔ a durk du, hi wɛɛ hi gbalig a mɛmbal gbɔɔl du gi wɔrɔ yɔ bɛsig gi daarɔ.

⁴³Naan mɔ gi gim matig a hinha̧a̧l du, dɛ̧ɛ̧mɔge. An mɔ gul a za̧a̧tig rɔb du hi naan gbunu daarɔ, hi anyɔ gɔ mɔ ɔɔ naan wɔ eerɛ mɔ ren a laazɛŋk du a lɛlyɔ laa gɔ nı̄m gedu gɛ. [

⁴⁴A duhɔ ga̧a̧r wɔ hi tɔk muul hí wɔ̄r gɛ, wɛɛ laa bɔ nı̄m gɛ be. ]

⁴⁵Dɔɔ mɔ gi gim matig a hinha̧a̧l du dɛ̧ɛ̧mɔge. An mɔ gul a za̧a̧tig rɔb du hi dɔɔ gbunu daarɔ, hi anyɔ gɔ mɔ ɔɔ dɔɔ wɔ eerɛ mɔ gbaliy a laazɛŋk du. [

⁴⁶A duhɔ ga̧a̧r wɔ hi tɔk muul hí wɔ̄r gɛ, wɛɛ laa bɔ nı̄m gɛ be. ]

⁴⁷Lɔl mɔ gi gim matig a hinha̧a̧l du, wigumɔge. An mɔ gul a Bɛt wáát du fɛŋki daarɔ, hi anyɔ gɔ mɔ ɔɔ lɔl wɔ eerɛ hi bisum a laazɛŋk du.

⁴⁸A duhɔ ga̧a̧r wɔ hi tɔk muul hí wɔ̄r gɛ, wɛɛ laa bɔ mm gɛ be.

⁴⁹Laa gi gbaay a dood muul sɛw anyɔ gɔ hi yaak manda bis du.

⁵⁰Manda gi hin rɔbo. À manda wags ti̧i̧tigɔ, yɔ hi wɛɛ hi ti̧i̧sig eesimɔ ri nɔ? Ginin manda a nɛ kpoos du. Waan rɔbtɔnɔ, bɔ gbāan gigi nɛ tees du.