Read Doyayo LUKA 11 Bible Online

LUKA 11 - Doyayo bible

LUKA 11

¹Ɔ̧tza ma Yeesu gi Bɛt zɔ̧k a lɛlza du. Yɔ da̧a̧s Bɛt zɔ̧kɔ, walɛsɛrɛ ɔ̧ɔ̧ wɔ zaaɔ gbun raage: a Waar i, goksiwi Bɛt zɔ̧ki anyɔ Yohana goks walɛsɛrɛ ɔ̧ɔ̧ wɔ be.

²Yeesu raahi: a gɔ nɛ gi zɔ̧ko, raanɛ: a Baa, an nuŋg mɔ gi ɗɔbɔ. An waar ums mɔ gi zaa.

³Gaawi leesɛ an gi riiwi ɔ̧t nuŋg sɛw;

⁴bitsiwi hinha̧a̧l wi an wii yɔ wi bitsig dood wɔ hi gɔsiw be. Bɔmɔ ka̧wi a maatil du.

⁵Yeesu wɛɛ raahi ɓɛ: a zaa nɛ gbun gi gin saami, gi rekɔ gi zɛŋg yɛms teesdu gi raage: a sa̧a̧ɔ, gaabe kok kiml taarɛ,

⁶saam be za fu̧u̧z a rɔbs lɛlɛ, zaa gi be raa du. Wɛɛ be taan hinza an be gaage.

⁷Wɛɛ saamɔ bɔ gi ta̧a̧zig luk du: a bɔmɔ mɔɔsibe, luk gbɔnɔ bɔ gbooy da̧a̧da̧, be kusigkus hi waat be. Bé ɗɛ̄ɛ̄ an be ɗund be gaam hinza gɛ.

⁸Be dɔgsinɛ: an mɔ̄k nɛ an gi ɗukɔ gi gaa saamɔ hinza gɛ si̧, yɔ sa̧a̧mɔ bɔ gi gbosig gbɔnɔ ɓaaki gi gig mɔɔsugo, wal bɔ yɔ ɗukɔ yɔ gaa saamɔ hinyɔ ha̧a̧g sɛw.

⁹Yɛrɛ bee be gin raako: a ɛrinɛ, hi gaanɛ, ɓɛɛnɛ nɛ zɛmɔ, ɓàànɛ hi gborsinɛ.

¹⁰Ya̧a̧nɛ, za̧a̧nyɔ ɛrɔ, gi dagɔ; za̧a̧nyɔ tɛbɔ, gi zɛmɔ; za̧a̧nyɔ ɓaa, hi gborsige.

¹¹Bɔ baaɔ a nɛ teesdu waaɔ gi ɛrig koko gi gaag beto? Zaabe waaɔ bɔ gi ɛrig dutu gi gaag beksɛ?

¹²Zaabe gi ɛrig kɔba̧a̧rɛ gi gaag kel nɔ?

¹³Nɛɛ dood bɔbtin wɛ! Nɛ mɛɛ ma waat nɛ hii hinrɔb gaako, gi gis Baa nɛ yɔ bɛtha gii gi ɔs dood wɔ hi ɛrig Mɔkilɔ gaak ya?

¹⁴Ɔ̧tza ma Yeesu gi ninik loorɛ su̧u̧k a doo za muul du. Yɔ loorɛ bɔ tuu, doo su̧u̧k bɔ booya̧a̧. Wɛɛ yɔ dood saal wɔ hi gbɛn anbɔ hinɔ kɔmsihi gɛrsɛ.

¹⁵Yɔ anbɔ dood zaadɛ hi raa: a loorɛha̧a̧l wɔ waar ya̧ bɔ Belzebil bɔ gii gig tɛŋk gaako an gi ninin loorɛha̧a̧l zaadɛ wɔ.

¹⁶Wɛɛ yɔ dood zaadɛ wɔ ha̧a̧hi an hi ton Yeesu dɔglɛ, hi warige an gi gɔsihi gɛrs za an hi mɛɛn a Bɛt gii yaazige.

¹⁷Hɔnɛyɔ Yeesu mɛɛ mɔkilya̧, raahi: a à waar ums za gɛ̧ɛ̧, hi gɔk nɔk a hi teesdu, waar umsɔ yɔ ha̧a̧tir a hɛbt bɔ gedu. Raa gi ɗund gabs a raa zaa zulha.

¹⁸À Saydanu gɛ̧ɛ̧ zulɔ, waar umsɔ bɔ yɔ er ma ri nɔ? Yɔ nɛ raak a be ninik loorɛha̧a̧l wɔ hi waar ya̧ bɔ nuŋgɔ a Belzebil yɔ.

¹⁹Yɛrɛ beya, à bé ninik loorɛ wɔ hi waar ya̧ Belzebil bɔ giya, fɔkya nɛ wɔ hi tuusig loorɛ wɔ hi nɔ be? Nɛ yɔ anbɔ fɔkya nɛ wɔ hii hi gbaasin dɔglɛ.

²⁰Yɛrɛ bé ninik loorɛha̧a̧l wɔ hi Bɛt tɛŋkɔ fɛŋgi, yɔ anbɔ gi zuunik a Bɛt wáátɔ zaaza a nɛɛge.

²¹À doo za tɛŋkya gin taabɔ hi daŋgɔ naan du, gi oonik raaɔ, wɔdɔ hi kɔm rɔbtɔnɔ.

²²Yɛrɛ za̧a̧n za yɔ daaringe tɛŋk gi zaa a ge gi gɔsig gabs gi ɗɛɛge, yɔ wɔɔl wɔdɔ wɔ da gi gbaak nɛ kpoosɔ hage gi muulɔ oonuko, yɔ wɛɛ yɔ wɔɔl rɔɔsɔ wɔ sɛw hi tɛŋko yɔ gɛ̧ɛ̧s doodɛ.

²³Za̧a̧nyɔ taa hi bee gɛ, gi lɔlhɛ̧ɛ̧nikya beenɛ; wɛɛ za̧a̧nyɔ ɗaasib mɔksig gɛ, gi hɛksighɛksɔ.

²⁴Loorɛha̧a̧l za gi tuu a za̧a̧n za ge, daa a lɛlyɔ koot ge an gi tɛk holumlɛlɛ. Yɔ zɛm lɛl gɛ, raa: a be wɛɛ a luk yɔ be da be tuuz nɛ gedu.

²⁵Yɔ bɛɛ wɛɛko, zɛm luk bɔ hi hɛdɔ, hi wɛɛ hi gɛmsig rɔbtɔnɔ.

²⁶Yɔ anbɔ, wɛɛ rek looz loorɛha̧a̧l zaadɛ wɔ hi bɔbtɔ hi daar gii nɔɔn-erɛ hi gul a luk bɔ gedu hi ɗɔɔtɔ. Yɔ anbɔ za̧a̧n bɔ ɗɔɔtilɔ ha̧tir daar doos bɔ lɛl kpɔkkrɔ.

²⁷Yɔ Yeesu gi dɔk hin anbɔ, nis za ɓooya̧a̧ a saal tees bɔ gedu, raa: a hat gi a nis yɔ mɔɔmɔ gi wɛɛ gi gaamɔ wa̧a̧l ge!

²⁸Yeesu wɛɛ goo: a hinyɔ daarɔ, hat gi a za̧a̧nyɔ kɛm Bɛt dɔglɔ gi wɛɛ gi fɔb ge!

²⁹Anyɔ dood saal hi kitugo a Yeesu dɔŋdi, Yeesu yɛɛl raaki: a dood wɔ hi gi ɔ̧ti gi zulɛ hi ha̧a̧lɔ; hi ɛrk gɛrs yɔ gi zuunik a Bɛt gi wooko! Taa an hi zunsihi gɛrs za gbun be, gɛ Zonas ɔnɛ bɔ hi zuunɔ.

³⁰Anyɔ Zonas wɛɛs Niniiviya wɔ hinmɛɛnikya, gbunɔ gii Za̧a̧n Waa bɔ gi wɛɛs dood wɔ ɔ̧ti gi zul hinmɛɛnikya anbɔ be.

³¹Nis waar bɔ fu̧u̧z a ɔ̧tkazig naanyɛ̧li gi ɗuk a dɔgl-gbaak ɔ̧ti a dood wɔ ɔ̧tigi zul hi muutdu gi gɛ̧ɛ̧nihi dɔglɛ. Nis bɔ fu̧u̧z a waal doorumlɛlɛ an gi zaa gi kɛm Sulemaanu dɔglɔ hinmɛɛkya bɔ. Yɛrɛ za̧a̧nyɔ daar Sulemaanu hi gbɔ-lumsɛ gi hɛdi.

³²Walɛ Niniiviya wɔ hi ɗukɔ a dɔgl-gbaak ɔ̧ti a dood wɔ ɔ̧tigi zul hi muutdu hi gɛ̧ɛ̧nihi dɔglɛ. Gɔ gi anbɔ hi zɛmr kpoosya̧ Bɛt dɔgl yɔ Zonas dɔksihi gi dɔŋgo. Yɛrɛ za̧a̧nyɔ daarin Zonas gbɔlumsɛ gi hɛdi.

³³Za̧a̧n za gɔ kpōō laa a pitila du gi gbaa a yaatil lɛl du gɛ; zaa be kūbt a dɔn du gɛ. Gɔ hi wiig a wiisɔ bɔ gedu an dood gɔ hi guzugo hi gbɛn lɛlgaalɛ.

³⁴Lɔl gii gi muul pitilayɔ. Lɔl mɔ gigi rɔbtɔnɔ, muul mɔ sɛw gi a lɛlgaal du. Yɛrɛ lɔl mɔ gi yɔ̧ɔ̧, muul mɔ gi lɛlwil du.

³⁵Yɔ anbɔ, oom zul mɔ bɛttɔnɔ an bɔhi zɛm lɛlgaal bɔ gi mɔ muul du gi wɛɛ lɛlwilɔ.

³⁶Yɛrɛ an muul mɔ sɛw dag lɛlgaalɛ lɛlza gi taa a lɛlwil du gɛ, muul sɛw gi gaa an pitila yɔ gɔ gaa mɔ muulɛ.

³⁷Yɔ Yeesu gi ya̧a̧booko, Farisaya za zɔ̧ge an gi re gi lehin a gi raa du. Yeesu re gulɔ gi hinleko.

³⁸Farisaya bɔ gbɛnig nɛ̄ɛ̄ naanɔ an gi le lees bɔ gɛ, yɔɔgyɔ.

³⁹Waar Yeesu raage: a nɛya, Farisaya wɛ, nɛ nɛɛtig wɔd hinyɔ̧nikya bɔ hi dak hinlenikya bɔ kuuya̧, wɛɛ nɛ nɛɛt buuya̧ wɔ gɛ; yɛrɛ luurɛ hi bɔbsɛ hi hi̧i̧s nɛ kpoos du.

⁴⁰Nɛya, dood yoo wɛrɛ! Bɛt yɔ kim kuuha, kı̄m buudu hɛw gɛ ya?

⁴¹Hinyɔ daarɔ, gaan ya̧a̧rya wɔ hinyɔ gi a nɛ mɛmɗak du hi hinyɔ gi a nɛ leesdak du gaasɛ. Gɔ gi anbɔ hin sɛw gi gáásinɛ.

⁴²Yɛrɛ ya̧a̧rhant gisinɛ, nɛɛ Farisaya wɛ! Anyɔ nɛ ɓek hinyɔ gɔ hi gaa Bɛt dimgaasɛ: an kalde kpas wɛ, hi kpas wɔ hi gi yɛ̧ɛ̧sɛ, hi biskpas wɔ gɔ hi lehi, nɛ wɛɛ nɛ bis hinwook hi gbɔnɔ hi Bɛt ha̧a̧tigɔ be. Hin wɛrɛ hii bɛr nɛ an nɛ woo, wɛɛ bɔnɛ ɔɔ hin zaadɛ wɔ hi zɛ̧ɛ̧r nɛ wookɔ.

⁴³Farisaya wɛ, ya̧a̧rhant gisinɛ! Anyɔ ha̧a̧nɛ ɗɔɔtillɛl rɔbɛ biitir wɔ a mɔk-silluk wɔ hi du. Wɛɛ gin ha̧a̧k an hi zagl di hi boonɛ a luum wɔ ha.

⁴⁴Ya̧a̧rhant gisinɛ! Anyɔ nɛ gi an loor yɔ dood gɔ hi gbɛnig gɛ hi ɛmbik hage hi taa mɛɛko.

⁴⁵Bɛtmaakdɔkya za raage: a Hingokya , hin wɛrɛ mɔ dɔktugo, mɔ niik wii hɛw.

⁴⁶Yeesu wɛɛ ta̧a̧: a hɔɔ, ya̧a̧rhant gis nɛɛ hɛw, Bɛtmaakdɔkya wɛ! Nɛ gbaasig dood hinɗɔmn yɔ gɔ gi yɛ̧rihi a zulha. Wɛɛ nɛya, nɛ ɓi̧i̧ hinɗɔmn bɔ hi naanwal nɛ mɔɔt nɛ zaŋ gɛ.

⁴⁷Ya̧a̧rhant gisinɛ! Anyɔ nɛ wɔŋk Bɛtya̧a̧kɛŋkya wɔ baa nɛ hi gbɔ̧hi nɛ loorya̧. Anyɔ hii hi gbɔm nɛ Bɛtya̧a̧kɛŋkya wɔ be, nɛɛ be, nɛ gi loorya̧ wɔ wɔŋko,

⁴⁸yɔ anbɔ nɛ zuunik a yɔ nɛ gbɛn baa nɛ wɔ woosya̧ wɛɛ bɛsinbɛs hɛw.

⁴⁹Ya̧a̧ gii Bɛt hinmɛɛkɔ gi raa: a be yààsihi Bɛtya̧a̧kɛŋkyaadɛ; hi gbɔm zaadɛ be, hi zɛksil zaadɛ be.

⁵⁰Yɔ anbɔ hi gbaas dood dɔ̧ɔ̧t wɔ ɔ̧ti gi zul dɔglɛ a Bɛtya̧a̧kɛŋkya wɔ ga̧a̧mya̧ wɔ hi gubr hɛbtdi hi dɔŋg sɛw, ga̧a̧m yɔ baar guk a waalyɛɛliki.

⁵¹Gi yɛɛl dɔgl-gbaak a Abɛl ga̧a̧m muulɛ gi tuur a Zakariya ɔnɛ bɔ muulɔ. Zakariya yɔ hi gbɔŋge a Bɛtluk lɛl bɔ ge hi Bɛtmaaksɛŋk bɔ teesya̧ bɔ gedu. Hɔɔ, yɔ anbɔ be raasinɛ, dood wɔ ɓɔri hi gbaasihi dɔgl a zulgbɔŋk wɔ dɔŋgɔ sɛw.

⁵²Ya̧a̧rhant gisinɛ, nɛɛ Bɛtmaakdɔkya wɛ hi Farisaya wɛ! Anyɔ nɛ́ ha̧s hinmɛɛk gboorins bɔ, wɛɛ nɛ gūl hi zul nɛ gedu gɛ, wɛɛ nɛ̍ a̧a̧n wɔ ha̧a̧hi nɛ gulk be.

⁵³Yɔ Yeesu tuuz a duhɔ, Bɛtmaakdɔkya wɔ hi Farisaya wɔ hi yɛɛlig ɓɔ̧ɔ̧k hi dɔglɛ. Hi ɛrig hin kittɔnɔ.

⁵⁴Hi goo an hi tolig hi dɔglɛ an hi lag dɔgl zaadɛ ha̧a̧l a gi ya̧a̧ du an kuudu hi gbaasig dɔgl hi wa̧a̧nige.