Read Doyayo LUKA 13 Bible Online

LUKA 13 - Doyayo bible

LUKA 13

¹A ya̧a̧gbun bɔ gedu dood zaadɛ wɔ hi gi nɛ dihɔ hi fɔks Yeesu hinyɔ turs Galileya zaadɛ wɔ Pilatu gbɔmɔ gi wɔɔg ga̧a̧mya̧ hi maakya̧ nam wɔ ga̧a̧mya̧.

²Yeesu wɛɛ ta̧a̧hi: a nɛ mɔk a yɔ Galileya wɔrɔ hi yɔ̧ ya̧a̧r anbɔ, hinha̧a̧lya̧ daar Galileya zaadɛ wɔ ya̧nɛ daar ya?

³Ɛ̧-ɛ̧, yɛrɛ be dɔgsinɛ: nɛ́ zɛmr kpoos nɛ gɛ, nɛ sɛw, nɛ́ wag an Galileya wɔrɔ hi wag be.

⁴Yɛrɛ dood koobl daa gɛ̧ɛ̧s wɔ luk hɔɔt bɔ a Silowe ɛ̧bsihi muulɛ gi gbɔ̧hi, nɛ mɔk a hi daarin dood Urusalimaya zaadɛ wɔ sɛw hinha̧a̧l daarin ya?

⁵Lab gɛ. Be gisin dɔko: gid nɛ zɛmr kpoos nɛ gɛ, nɛ sɛw, nɛ wag an hiya.

⁶Yeesu raa ya̧a̧daanik yɛrɛ hɛw: a wal za da rɛɛ nɛ yɔmntnɔɔ a gi tɛ̧ɛ̧bak du. Wal bɔ zaa ma an gi hà̧b humlɔ bɔ, wɛɛ zɛm hum gɛ.

⁷Hɔnɛ wɛɛ raa tɛ̧ɛ̧bak-ookya bɔ: a yɛrɛ tuur wɛl taarɛ be zaak yɔmntnɔɔ bɔ humlɔ tɛko be zɛm gɛ, dɛ̧ɛ̧mɔge, gi yɛ̧ktig lɛl bɔ a nɔ tɔsi!

⁸Tɛ̧ɛ̧bak-ookya bɔ raage: a ɗɛntyɔ, ɔɔmɔg wɛl yɛrɛ gedu, be zɛɛ dɔŋgɔ be tuu naahut be yaa gedu,

⁹kinsa kuudu gi hum be, gi hum gɛ, mɔ́ dɛ̧ɛ̧ge.

¹⁰Yeesu gi nɛ hingok a mɔksilluk zaa gbun du a holum-ɔ̧ti.

¹¹Hɔnɛ nis za gidu gin loorɛ a muul du wɛɛnig zaŋgd wɛl kooblɛ daa gɛ̧ɛ̧sɛ. Gi waak totigi, ɗɛɛ an gi ɗund gi er ha gɛ zaŋ.

¹²Yɔ Yeesu gbɛnige, elig raage: a nisyɔ, gums yɛrɛ ha̧̍tir mɔ muulɛ, tuutu.

¹³Wɛɛ gbaasig naan muulɛ, ɓɔrbɔ nis bɔ wɛɛ yu̧u̧ er ha zab, baan Bɛto.

¹⁴Hɔnɛyɔ mɔksillukzulya bɔ gbɛn Yeesu gi za̧a̧s doo a holum-ɔ̧ti, nɔɔgnɔ, wɛɛ raa dood saal wɔ: a woosyɛms gi ɔ̧t nɔɔngbunu, zaan hi za̧a̧sin a ɔ̧t wɔrɔ lab gedu. Bɔnɛ zaa a holum-ɔ̧ti!

¹⁵Waar Yeesu ta̧a̧ge: a dood mɛlya ha̧a̧l wɛ, a nɛ teesdu rɛ, an bɔ sɛw gɔ pid naaɔ, zaabe pɛɛzimɔ, kāŋge yɔ̧nig mɛm a holum-ɔ̧t gɛ ya?

¹⁶Nis yɛrɛ gi a Àbraham zaŋgd du, Saydanu wɔg wɛl koobl daa gɛ̧ɛ̧sɛ a ba̧a̧ntus du. Nɛ taa an hi pidsig ba̧a̧ntus yɛrɛ a holum-ɔ̧t ya?

¹⁷Yɔ Yeesu dɔg hin bɔrɔ anbɔ, dood wɔ ha̧a̧hi gabs hi gii sɛw, seem ha̧a̧hiha̧. Wɛɛ dood saal sɛw hi dag hat a hin gbɔlɛ wɔ woo sɛw gi dɔŋgo.

¹⁸Yɔ anbɔ, Yeesu wɛɛ dɔgɔ: a Bɛt wáátɔ riitin hi nɔ? Be gòksinge nɔ?

¹⁹Bɛt wáátɔ riitin hi sitahi lɛŋksyɔ doo za loo gi re gi lug a gi bak du; lɛŋks bɔ pirɔ, hɔɔ wɛɛ tɛ̧ɛ̧. Nɔɔs wɔ a bɛtha hi zaa hi nɛbt zɛko hi waa ya̧a̧nɔ wɔ gedu.

²⁰Wɛɛ raa ɓɛ: a be gòksin Bɛt wáátɔ hi nɔ ɓɛ?

²¹Riitin hi hɛ̧ɛ̧t yɔ nis loo gi goo a goonis du dɔɔ taarɛ gi ya̧a̧g hi zumɛ an gi ɗuksige.

²²Yeesu daar waal gbɔlɛ wɔ hi raat dɛɛt wɔ gi hingoko yɔ gi rek a Urusalima.

²³Yɔ anbɔ za̧a̧nza ɛrige: a Hingokya , dood wɔ gɔ hi za̧a̧ hi gi kaasi ya? Yeesu ta̧a̧hi:

²⁴a tɛn hi tɛŋko an nɛ gul a gbɔnɔ ɓɔ̧ɔ̧yyik bɔrɔ gedu. Ya̧a̧nɛ, be gisin raako: a dood kittɔnɔ hí ɓɛɛ an hi gul gedu, wɛɛ hí ɗɛ̄ɛ̄ gɛ.

²⁵Za̧a̧n raatya bɔ gɔ gi ɗund gi kpɛ̧ɛ̧ gbɔnɔ bɔ, nɛɛ yɔ nɛ gi lakdi nɛ yɛɛl gbɔnɔ ɓaaki nɛ elɔ: a ɗɛntyɔ, ɗɛntyɔ, kpɛ̧rsiwi gbɔnɔ. Giigi ta̧a̧: a be mɛ̄ɛ̄ lɛlyɔ nɛ fu̧u̧z du gɛ.

²⁶Hɔnɛ nɛ wɛɛ nɛ yɛɛl raaki: a wi lehin hi mɔya, wi yɔ̧ hi mɔya, mɔ goks dood hin a wi gbɔnɔ nɔɔ wɔ hi du. Kɔmri mɔ raawi nɛɛk a mɔ mɛɛw gɛ?

²⁷Giigi wɛɛ gi ta̧a̧: a be dɔgsinɛ a be mɛɛ lɛlyɔ nɛ fu̧u̧z du gɛ. Sɔɔn du nɛ sɛw, nɛɛ dood hinha̧a̧lwookya wɛ.

²⁸A hɔ ro, nɛ gbuu kaalɛ, nɛ ɓals nuŋgo. Gɔ nɛ gbɛn Abraham hi Isaaku hi Yakuba hi Bɛtya̧a̧kɛŋkya wɔ sɛw a Bɛt wáát du, wɛɛ nɛɛ be hi bisin lakdi hɔ ma wɔdɔg.

²⁹Dood hí fu̧u̧z a ɔ̧tkazigi, a ɔ̧tleki, a ɔ̧tkazig naanrɔbo hi ɔ̧tkazig naanyɛ̧li hi ɗɔɔt hi hinlek a Bɛt wáát du.

³⁰Yɛrɛ kuudɛ wɔ zaadɛya̧ be hi wɛɛ doosɛ, doosɛ wɔ zaadɛya̧ be hi wɛɛ kuudɛ.

³¹A ɔ̧t gbun bɔ gedu Farisaya zaadɛ hi zaa hi raa Yeesu : a Hirudus gig ha̧a̧k an gi gbɔ̧mɔ; tuum, mɔ rekɔ.

³²Gii wɛɛ goohi: a rekin nɛ raas bɛrtɔkgɛ bɔrɔ a yɛrɛ be ninik loorɛha̧a̧lɛ, be wɛɛ be gi za̧a̧sig gumtil wɔ nɛɛko hi yoosugo, be da̧a̧s woos be a ɔ̧t taasum bɔ gedu.

³³Yɛrɛ gi an be ɛmb nɛɛko, yoosugo hi lɔrɔ. Ya̧a̧nɛ, ɗɛ̄ɛ̄ an Bɛtya̧a̧kɛŋkya gi wɔr a Urusalima lak gɛ.

³⁴Urusalima, Urusalima! Mɔ gbɔŋk Bɛtya̧a̧kɛŋkya wɔ, mɔ gbɔŋk dood wɔ Bɛt gɔ yaasinɛhi hi beto. Be tɛk dood mɔ wɔ dɔɔ kittɔnɔ kittɔnɔ an be mɔksihi an kɔɔnɔɔ gɔ gi buuk waatɔ a pakir du, wɛɛ nɛ iinɔ.

³⁵Nɛ yɛrɛ raat nɛ gi kɔm beemɛ. Be gisin dɔk rɔbo: nɛ taab zaa gbɛnko, gi tuur an nɛ dɔgɔ: a rɔbs gi a za̧a̧nyɔ gi zaak a Waar Bɛt nuŋg duge.