Read Doyayo LUKA 15 Bible Online

LUKA 15 - Doyayo bible

LUKA 15

¹Tooszekya wɔ hi hinha̧a̧l wookya wɔ sɛw hi sɛ̧ɛ̧buko an hi laks Yeesu dɔglɔ bɔ gi booko.

²Wɛɛ yɔ Farisaya wɔ hi Bɛtmaakdɔkya wɔ hi gbɛn anbɔ hi dɔntɔ hi raa: a wal yɛrɛ gɔ ta̧a̧ hinha̧a̧lya wɔ wɛɛ lehin hi hiya.

³Hɔnɛ Yeesu yɔ mɛɛ anbɔ, wɛɛ dɔgsihi ya̧a̧daanik yɛrɛ:

⁴a bɔ za̧a̧nɔ a nɛ teesdu gi gin tam yɔ̧ɔ̧lɔ nɔɔnɛ, zaa gbun gi wagɔ, yɔ ɔ̄ɔ̄ tam dumbili naanza daatɔ naanza wɔ a hɛtdɔŋ du, yɔ tɛbz bɔrɔ wag an gi midzig gɛ ya?

⁵À midzig be, yɔ pɛɛz baŋk ha yɔ kamz hi hato.

⁶Gɔ yɔ wɛɛz raa du, yɔ èl saamɔ wɔ hi naaza hii yɔ raahi: a dagin hat hi bee lɛlgbunu, anyɔ be midz tam be zaabɔ wagzɔ.

⁷Be gisin raako: hat gi gi anbɔ a bɛtha gid hinha̧a̧lya gbun gi zɛmr kpoosɔ, daar dood dumbili naanza daatɔ naanza wɔ hi gi hinrɔbɛ wookya wɔ hā̧ā̧hi kpoosya̧ zɛmrik gɛ.

⁸Bɔ nisɔ gi gin tus gaat kooblɛ, zaa gbun gi wagɔ, taa an gi kpoo laa a pitila du gi hɛd luk bɔ gi tɛb rɔbtɔnɔ an gi mid ya?

⁹À midige, yɔ el naaza wɔ hi waatingo lɛlgbunu, hi saamɔ hiya yɔ raahi: a yɛnwɛ dag hato anyɔ be mid tus be bɔ wag nɛko.

¹⁰Be gisin dɔk gbunɔ giya: a hat gi a Bɛtwalɛ-sɛrɛ ɔ̧ɔ̧ wɔ hi muutdu anbɔ lab be a hinha̧a̧lya bɔ zɛmr kpoosɔ gi dɔŋgo.

¹¹Yeesu wɛɛ dɔg ɓɛ: a wal za gin waat walɛ eerɛ.

¹²Wans bɔ ɛr baatɔ: a baa, gaabe rɔɔs yɔ gi nɛ zul benɛ. Baaya̧ loo rɔɔs bɔ gɛ̧ɛ̧sihi.

¹³Kuudu yɔ ɔ̧t zaadɛ hi talɔ, waawal wans bɔ mɔks rɔɔsɔ wɔ gin sɛw, tuu rek rɔ̀bs a waal hɛmlɛ, ha̧tirz rɔɔsɔ wɔ a zɛlk du sɛw, a lɛlɔge.

¹⁴Yɔ daan rɔɔsɔ wɔ gi da̧a̧ sɛwi, tɔs ha̧a̧l tuur gɔ hɛbt bɔ gedu, yaala yɛɛl ya̧a̧rha̧a̧ko.

¹⁵Rek wooswook gɔ a dood wɔ hi gi a hɛbt bɔ gedu zaaɔ ge. Za̧a̧n bɔ yaag gi bak du a gi re gi oosig habɔ wɔ.

¹⁶gii be, yɔ rekɔ, a̧a̧kil bɔ gig ha̧a̧k be ha̧a̧ge an gi tɔk hinza kos wɔ hab gɔ hi tɔko an gi hi̧i̧sin buuɔ; wɛɛ doo za mɔ̄k an gi gaag lees gɛ be.

¹⁷Yɔ mɔkilhin gi mid zulɔ, raa: a yɛrɛ baa be gin woosya kittɔnɔ, hi gin lees gbɔɔltɔnɔ, hi ɗɛ̄ɛ̄ an hi da̧a̧s gɛ be, bee be a̧a̧kig a hɛdi be!

¹⁸Ɔbe ɗukɔ be rek a baa be ge be raage: a baa, be woo hinha̧a̧l a Bɛt muutdu hi a mɔ muutdu.

¹⁹Be tuur doo rɔb an mɔ elib a be waa mɔɔn ma gɛ; yɛrɛ gbààbè an woosya mɔ zaa.

²⁰Wala bɔ ɗukɔ wɛɛ baatɔ ge. Yɔ gi zaak hɛmltɔnɔ baatɔ gi gbɛnige a lakyɔ̧ɔ̧rɛ, mɛɛsig ya̧a̧rɛ, nɔɔ rek dagige, kɔtige wɛɛ zɔŋge ya̧a̧gbarɔ.

²¹Waawal bɔ raage: a be woo hinha̧a̧l a Bɛt muutdu hi a mɔ muut du; bé tuur doo rɔb an hi elib a be waa mɔɔn ma gɛ.

²²Hɔnɛ baatɔ raa woosɔya wɔ: a kamzin dimnaan yɔ bɛr gi daar zaadɛ wɔ sɛw nɔɔko nɛ heksige, hi banawaa nɛ heksig a naan du hi taal a dɔɔ du.

²³Kamzin naabaa doolɛ, gbɛɛrinɛge an wɛ tɔbɔ wɛ dagin hato.

²⁴Ya̧a̧nɛ, waa be wal yɛrɛ da wɔɔrɔ, yɛrɛ wɛɛ rɛmlɔ, da waagɔ, be wɛɛ be zolige. Hi wɛɛ hi mɛ̀ɛ̀s ma naabo hi dagin hat gɔ.

²⁵Yɔ anbɔ waawal gbɔɔl bɔ da giz nɛ a bako gi zaak be. Yɔ sɛ̧ɛ̧b a raaya̧di gi lag hi ɓaak sumlɛ, hi waŋg ulko, hi hinnako.

²⁶El woosya zaa gbunu ɛrig hinyɔ gi daako.

²⁷Woosya bɔ raage: a yɛ̧ɛ̧ mɔ gii wɛɛzɔ; baa mɔ yɔ midig rɔbtɔnɔ ro gi gbɛɛr naabaa doolɛ an gi dagin hato.

²⁸Yɔ waa gbɔɔl bɔ lag anbɔ kpoosɔ nɔɔgnɔ, ha̧a̧g gulik raa du ma gɛ. Yɔ baatɔ lagɔ tuuz zaa zɔ̧ge an gi gul raa du.

²⁹Hɔnɛ waawal wɛɛ ta̧a̧ge: a baa, kɛmɔ! Be woosum woos wɛl kittɔnɔ. Hinyɔ mɔ raab sɛw, be wookwo; be tāl ya̧a̧ mɔɔn ɔ̧tza gɛ. Wɛɛ mɔ gaabe nɛ iswaa zaa an be gbɛɛrɔ be tɔb hi nabeza zaadɛ an wi dagn hat gɛ. Nɔ ma nɔ?

³⁰Yɛrɛ waa mɔ bɔ ha̧dzir rɔɔs mɔ a zɛlklɛlɛ hi nɛɛd kaatɛ ha̧a̧lɛ wɔ, gi wɛɛ gi wɛɛza, mɔ wɛɛ mɔ gbɛrs gii ma naabaa doolɛ!

³¹Baatɔ raage: a waa be walɔ, mɔ gi hi bee ɔ̧t nuŋg sɛw, wɛɛ hinyɔ be gin sɛw gi mɔɔnɛ.

³²Yɛrɛ yɛ̧ɛ̧ mɔ yɛrɛ wɔɔrɔ, gi wɛɛ gi rɛmlɔ, waagɔ gi wɛɛ gi midzɔ, yɔ anbɔ ginɛ an wɛ dag hato hi seet lɛlgbun sɛw.