Read Doyayo LUKA 17 Bible Online

LUKA 17 - Doyayo bible

LUKA 17

¹Yeesu raa walɛsɛrɛ ɔ̧ɔ̧ wɔ: a hinwɔ gɔ hi mat dood a hinha̧a̧l du hí giro, hinza ɗɛɛ an gi ya̧a̧n gɛ. Yɛrɛ ya̧a̧rhant gis za̧a̧nyɔ mat dood a hinha̧a̧l du.

²An hi ha̧bs nɛ za̧a̧nɔ naal gbɔɔl durk du hi bisig a mɛmbal du yɔ bɛsig gi daarɔ, hi anyɔ gɔ gi mat ya̧a̧mwaa zaa gbun a hinha̧a̧l du.

³Oon zul nɛ! Yɛ̧ɛ̧ mɔ gi gɔ hinha̧a̧lɛ, biglumɔge, gid zɛmr kpoosɔ gi dɛmnaanɛ, bitsumɔg dɔglɔ.

⁴Wɛɛ gid gɔsum hinha̧a̧l dɔɔ nɔɔn-erɛ a ɔ̧t gbun bɔ gedu, gi wɛɛ gi zaak mɔɔge dɔɔ nɔɔn-er be gi naandɛŋko, gi raak a be zɛmr kpoos be, bitsumɔg dɔglɔ.

⁵Tɔmsya wɔ hi wɛɛ hi war Yeesu : a goksiwi ɗɔbsig bɔ zaaɔ du.

⁶Waar Yeesu raa: a an nɛ ɗɔbs kaasiwaanɔ an sitahi lɛŋksɛ, à nɛ raa yɔmntnɔɔ yɛrɛ a duyumɔ mɔ rek mɔ rɛɛy a mɛmbal gbɔɔl du, tɛ̧ɛ̧ bɔ yɔ lagsinɛ.

⁷Bɔ za̧a̧nɔ a nɛ teesdu gin woosɔya yɔ gisig hinbalko zaabe gi gisig tamɔ nɛɛko gi fu̧u̧z bako gi raage a zaam nɔɔko mɔ lehinɛ?

⁸Nɛ taa an gi raage: a gɛmtsibe leesɛ, loom woos gbandil mɔ mɔ hegɔ mɔ wonsib woosɛ gɔ be le gi da̧a̧, kuuɗu mɔɔ mɔ zaa mɔ le, mɔ yɔ̧ be ya?

⁹Za̧a̧nɔ yɔ baan woosɔya bɔ anyɔ woo hinyɔ raag ya?

¹⁰Yɔ anbɔ, nɛɛ be, gɔ nɛ woo hinyɔ Bɛt raanɛ sɛw gi da̧a̧, dɔginɛ: a be gi woosya hɛ̧ɛ̧ryɔ, be woo hinyɔ gi nɛ an be woo gii kpɔd.

¹¹Yɔ Yeesu gi rek a Urusalima, daa a Samariya teesdu hi Galile.

¹²Anyɔ gi gulik a raat za du, ɗobtilyaadɛ kooblɛ hi zaa hi dagige. Hi er hɛmltɔnɔ,

¹³hi ɓooya̧a̧ hi raage: a Yeesu , Hingokya , mɛɛsiwi ya̧a̧rɛ!

¹⁴Yɔ Yeesu gbɛnihi raahi: a rekin nɛ zuun muul nɛ a Bɛtmaakwookya wɔ hi. Wɛɛ yɔ hi gi reko, ɗobtilya̧ bɔ da̧a̧ gɔ.

¹⁵Zaaya̧ gbun bɔ bɛɛ gbɛnik ɗobtilɔ bɔ gi da̧a̧, wɛɛ wɛɛz a Yeesu ge gi baanik Bɛt nɔɔha hi ya̧a̧ɓooki.

¹⁶Zaa zagl a Yeesu dɔŋdi baanige. Walɔ gi doo Samariyayayɔ.

¹⁷Yeesu warɔ: a nɛ dood koobl hi za̧a̧ ma mi, yɛrɛ zaadɛ wɔ naanza hi gaay ma nɔ?

¹⁸Záá mɔ̄kɔ̄ an gi wɛɛz gi baan Bɛt gɛ, gɛ rɔ̀b yɛrɛ kpɔdi?

¹⁹Kuudu wɛɛ raa wal bɔ: a ɗukumɔ mɔ rekɔ, ɗɔbsig mɔ za̧a̧sumza̧a̧sɔ.

²⁰Farisaya wɔ hi war Yeesu : a Bɛt wáátɔ gi zaak bil nɔ? Gii ta̧a̧: a zaakɔ bɔ taa an hi gbɛnige;

²¹wɛɛ taa an hi dɔgɔ: a Bɛt wáátɔ gi hɛdi, zaabe a gi hɔ. Yɛrɛ Bɛt wáátɔ gigi ma a nɛ tees du.

²²Yeesu wɛɛ raa walɛsɛrɛ ɔ̧ɔ̧ wɔ: a ɔ̧t zaadɛ hi tuurɔ, a ɔ̧tya̧ gedu, gi ha̧a̧nɛ an nɛ gbɛn Za̧a̧n Waa bɔ ɔ̧tɔ wɔrɔ zaaɔ, wɛɛ taa an nɛ gbɛn be.

²³À ɔ̧tɔge hí raanɛ: a gi hɔ, zaabe gi hɛ. Gɔ hi raan anbɔ, bɔnɛ rekɔ, bɔnɛ fɔhi.

²⁴Ya̧a̧nɛ, bɛl ya̧bsɔ gɔ gi ya̧ko, gi wɛɛ gi gaak dɔŋdu an ɔ̧ti gi tuur a dɔŋg zaa, Za̧a̧n Waa bɔ gi gi anbɔ be a ɔ̧tyɔ gɔ gi zaak gedu.

²⁵Yɛrɛ gi an gi ha̧a̧ya̧a̧r gbɔɔltɔnɔ kete, dood wɔ hi gi ɔ̧ti gi zulɛ hi wɛɛ hi inige.

²⁶Hinyɔ tuur nɛ a Nɔwe waabilɔ bɔ gedu, hinɔ gii gi tuur a Za̧a̧n Waa bɔ ɔ̧tɔge be.

²⁷Dood hi hinleko, hi yɔ̧ko, hi wɛɛ hi lootingo, tuur a ɔ̧t yɔ Nɔwe gul a lɛmb duge. Mɛm gbɔɔl tuu hi̧i̧s hɛbto, gbɔm dood sɛw.

²⁸Hinyɔ tuur a Ludu waakɔ bɔ gedu, hinɔ gi tuur anbɔ be. Dood hi hinleko, hi yɔ̧ko, hi zek wɔdɛ, hi zebrik wɔdɛ, hi tɛ̧ɛ̧ rɛɛko, hi luk wɔŋko.

²⁹Yɛrɛyɔ Ludu tuu a Sodɔma, a ɔ̧t gbun bɔ gedu laa hobbuu naŋg a bɛtha an bɛlɛ gbɔm dood sɛw.

³⁰Hinɔ gi tuur anbɔ be a ɔ̧tyɔ Za̧a̧n Waa bɔ gɔ gi midz gedu.

³¹A ɔ̧tɔge za̧a̧nyɔ gɔ gi gi a luk zulha, bɔgi siz a luk du an gi loo wɔdɔ gi renɔ. Wɛɛ za̧a̧nyɔ gɔ gi gi a bako, bɔgi wɛɛz nɛ raa du zaŋ.

³²Mɔkin nɛ mɛɛ Ludu nistɔ dɔglɔ.

³³Za̧a̧nyɔ tɛb an gi za̧a̧s kolɔ, gi waksige. Za̧a̧nyɔ waks kolɔ be, gi za̧a̧sige.

³⁴Be gisin dɔko: a gɔ gi gi a yɛmsɔ gedu, dood wɔ hi kusig a sil ha hi eerɛ, hi loo gbunu, hi ɔɔ gbunu.

³⁵Gid nɛɛd eerɛ hi tot naŋk a naal ha lɛlgbunu hi eerɛ hi loo gbunu hi ɔɔ gbunu. [

³⁶Gid walɛ eerɛ hi hinbalik a bako, hi loo gbunu hi ɔɔ gbunu. ]

³⁷Walɛsɛrɛ ɔ̧ɔ̧ wɔ hi warige: a Waar i, hin wɔrɔ hi wooy lɛlɔ ay? Yeesu wɛɛ ta̧a̧hi: a lɛlyɔ hin wɔl gi ge, dukumnɔɔ hi mɔks lɛlɔge be.