Read Doyayo LUKA 18 Bible Online

LUKA 18 - Doyayo bible

LUKA 18

¹Yeesu dɔksihi ya̧a̧daaniki an gi raasihi a gi an hi waa Bɛt zɔ̧ki, bɔhi mɔɔ.

²Raahi anyɔ lɛ: a doo za dɔgl-yɛ̧ɛ̧kya gi a waal za gbɔɔl du, hoobhā̧a̧g Bɛt gɛ, wɛɛ dɔglɔ taadu hi doo.

³A waal gbɔɔl bɔ gedu hɛw, kuur nɛɛ za gɔ gi waak zaak a ge gig raako: a gbaasiwi dɔglɛ hi za̧a̧nyɔ ha̧a̧g gbaatingo hi beya.

⁴Dɔglyɛ̧ɛ̧kya bɔ in dɔglɔ am be; kuudu wɛɛ mɔk a gi kpoos du: a an hoob taab Bɛt ha̧a̧k gɛ, wɛɛ dɔgl be gi taa du hi doo si̧,

⁵yɛrɛ nis yɛrɛ gib waak mɔɔsugo ɔbe yɛ̧ɛ̧sig dɔgl bɔ an bɔgi waab zaak mɔɔsugo.

⁶Waar Yeesu wɛɛ raa: a kɛn hinyɔ dɔglyɛ̧ɛ̧kya ha̧a̧l-wookya bɔ dɔgɔ .

⁷Yɔ anbɔ Bɛt taa an gi yɛ̧ɛ̧s dood wɔ herihi hi kaak a ge yɛms du hi lurk du sɛw dɔgl ya? Gi ɔɔhi hi am ket ya? Lab gɛ.

⁸Be gisin dɔko: yɔ yɛ̧ɛ̧sihi dɔglya̧ nɔɔktɔnɔ. Yɛrɛ Za̧a̧n Waa bɔ gɔ gi zaa, gı̄ zɛŋk dood wɔ hɛbtdi hi gi ɗɔbsig ya?

⁹Yeesu wɛɛ dɔg ya̧a̧daanik zaa ɓɛ: a dood wɔ hi seek muulya̧ an hi doo riiti a Bɛt muutdu hi wɛɛ hi bɔ̧ɔ̧k dood zaadɛ hi zulɛ:

¹⁰a dood eerɛ hi dɔɔ a Bɛtluk du an hi zɔ̧ Bɛto. Doo za gbunu gi Farisayayɔ, zaa gbun bɔ be gi tooszekyayɔ.

¹¹Farisaya bɔ erɔ zɔ̧bs zulɔ an yɛrɛ lɛ: a Bɛto, yɛrɛ be baanumɔ anyɔ be taa an dood zaadɛ. Ya̧nɛ hi gi dood luurɛ ha̧a̧lɛ, rɔɔsɗɔkumyaadɛ, ha̧a̧lgɔkyaadɛ, mansyaadɛ, zaabe an tooszekya yɛrɛ.

¹²Be lilikhin ɔ̧t eerɛ a dimaas nuŋg sɛw, be gim gaas gaak a hinyɔ be dak gedu sɛw.

¹³Hɔnɛ tooszekya bɔ er gi hɛmlɔ, mɔ̄k nɛ an gi pɛɛ lɔlɔ bɛtha hɛw gɛ; dɛm hɔŋgɔ dɔgɔ: a Bɛto, mɛɛsibe ya̧a̧rɛ, beya be hinha̧a̧lyayɔ. Da̧a̧s gɔ anbɔ.

¹⁴Be raasinɛ: yɔ wal eesum bɔrɔ gi tiik gi raa du, Bɛt bitsig hinha̧a̧lɔ da̧a̧da̧, taa Farisaya bɔ ɔnɛ. Ya̧a̧nɛ, za̧a̧ni tɔɔs zulɔ, hi tiisige, wɛɛ za̧a̧ni tiis zulɔ be, hi dɔɔsige.

¹⁵Hɔnɛ dood hi kams Yeesu waatyɛ̧s wɔ hɛw an gi ki̧i̧hi gi rɔbsihi. Hɔnɛyɔ walɛsɛrɛ wɔ hi gbɛn anbɔ hi za̧br dood wɔ hi kamzig waatyɛ̧s wɔ.

¹⁶Yɔ anbɔ Yeesu wɛɛ elihi raahi: a ɔɔn ya̧a̧mwaat wɔ hi zaa a beege, bɔnɛ a̧a̧nihi. Bɛt wáátɔ gi a dood wɔ hi gi an ya̧a̧mwaat hi, ya̧a̧nɛ.

¹⁷Be gisin raak rɔbo: za̧a̧nyɔ ta̧a̧ Bɛt wáátɔ an ya̧a̧mwaa gɛ, taa gulik gedu nɛ zaŋ.

¹⁸Yahuduya za waar war Yeesu : a Hingokya rɔbo, be woo nɔ an be dag za̧a̧tig faa nɔ?

¹⁹Yeesu ta̧a̧ge: nɔ mɔ elib a rɔbo? Doo za taa rɔbo, gɛ Bɛt gi gbun kpɔd.

²⁰Mɔ mɛɛ Bɛtmaak wɔ hinɔ dɔgɔ: a bɔmɔ naamansi, bɔmɔ gbɔmzulɛ, bɔmɔ looluurɛ, bɔmɔ gɔ̧ɔ̧s doo ya̧a̧, ɗɔbsum baa mɔ hi nàà mɔ.

²¹Wal bɔ dɔgɔ: a yɔ be gi ya̧a̧mi tuur ɓɔryɔ be woo hin wɔrɔ sɛw.

²²Yɔ Yeesu lag anbɔ labɔ, raage: a wagsum hin gbun ɓɛ. Rekum mɔ zebtir hinwɔ mɔ gin sɛw. Gɛ̧ɛ̧sum ya̧a̧rya wɔ tus bɔ, mɔ dag rɔɔs yɔ gi a bɛtha, kuudu mɔ zaa mɔ fɔbzibe.

²³Anyɔ wal bɔ gin rɔɔs gbɔɔltɔnɔ be, yɔ kɛm dɔgl wɔrɔ miimɔ.

²⁴Yɔ Yeesu gbɛnig gi mimɔ, dɔgɔ: a ɓaaɓa an doo rɔɔsya gi gul a Bɛt wáát du.

²⁵Ɓaaɓa an gɛloba gi gul a zel gɔ̧ɔ̧s du. Ɓaaɓa zaŋ be an doo rɔɔsya gi gul a Bɛt wáát ɗu.

²⁶Dood wɔ hi gisig dɔglɔ kɛŋko hi raa: a nɛ bɔ ɗɛɛ an gi za̧a̧ ma ɔnɛ nɔ?

²⁷Yeesu ta̧a̧: a hinyɔ ɗɛɛ doodɛ, ɗɛɛ Bɛt ɔnɛ gɛ.

²⁸Piyɛr raa: a yɛrɛ wi ɔɔ hin sɛw wi fɔbz mɔya.

²⁹Yeesu wɛɛ raahi: a be gisin raak rɔbo: a za̧a̧nyɔ ɗukɔ gi ɔɔ raaɔ, zaabe nisɔ, hindaɔ wɔ, hi yɛ̧ɛ̧dɛ ɔ̧ɔ̧, baatɔ hi nɔɔtɔ, zaabe waatɔ a Bɛt wáát dɔŋgo,

³⁰gi dag hin wɔrɔ ɓɔryɔ gi daar gbɔɔltɔnɔ, gi wɛɛ gi dag za̧a̧tig faa a ɔ̧tyɔ gɔ gi zaa kuudu gedu.

³¹Yeesu el walɛsɛrɛ ɔ̧ɔ̧ wɔ koobl daa eerɛ a gi dɔŋdi raahi: a yɛrɛ wɛ dɔɔk a Urusalima. Wɛɛ hinyɔ Bɛtya̧a̧kɛŋkya wɔ hi bi̧i̧ a Za̧a̧n Waa bɔ gi zulha sɛw gi wooyyɔ .

³²Yɔ anbɔ hi looge hi gaage dood wɔ hi taa Yahuduya gɛ naan du hi kpɛ̧ɛ̧lige, hi niige, hi wɛɛ hi tulsig set muulɛ.

³³Hi lɛmnig kpooti, hi gbɔŋge. Wɛɛ kuudu ɔ̧t taarɛ gi rɛmlɔ gi ɗukɔ.

³⁴Yɔ anbɔ walɛsɛrɛ wɔ hi kɛm hinza gedu gɛ. Hinɔ gisihi dɔgl yaatilya yɔ hi kɛm gbɔnɔɔ lɛl gɛ giya.

³⁵Anyɔ Yeesu re gi sɛ̧ɛ̧bik a Zeeriko, yɔ̧ɔ̧r za ɗɔɔt a gbɔnɔya̧ gi hinzɔ̧kugo.

³⁶Yɔ kɛm dood saal hi daako, ɛr hinɔ.

³⁷Hi raasig a Yeesu Nazarɛdya bɔ gii gi daako.

³⁸Yɔ̧ɔ̧r bɔ ɓooya̧a̧: a Yeesu Dawda waawalɔ, mɛɛsibe ya̧a̧rɛ!

³⁹Wɔ hi gi dork nɛko hi ya̧a̧lig an gi waksɔ, gii wɛɛ ɓooya̧a̧ ha̧a̧ltɔnɔ ɓɛ: a Dawda waawalɔ, mɛɛsibe ya̧a̧rɛ!

⁴⁰Yeesu erɔ, raahi a hi kamsig wal bɔ. Yɔ wal bɔ sɛ̧ɛ̧bɔ, ɛrige:

⁴¹a ha̧a̧m an be woosum nɔ? Gii wɛɛ ta̧a̧: a Waar i, ha̧a̧be an be gbɛnlɔlɛ.

⁴²Yeesu wɛɛ raage: a gbɛnumlɔlɛ, ɗɔbsig mɔ za̧a̧sumza̧a̧sɔ.

⁴³Ɓɔrbɔ wal bɔ gbɛnlɔlɛ, wɛɛ fɔ Yeesu gi baanik Bɛt nɔɔha. Dood wɔ hi gbɛn hin bɔrɔ sɛw anbɔ, hi baan Bɛt gɔ.