Read Doyayo LUKA 19 Bible Online

LUKA 19 - Doyayo bible

LUKA 19

¹Yeesu gul a Zeeriko, wɛɛ gi talk a waal gbɔɔl bɔ gedu.

²Wal za tooszekya gbɔɔl giro nuŋgɔ a Zakeyus, gi doo rɔɔsya.

³Gi ɓɛɛk an gi gbɛn Yeesu , wɛɛ ɗɛ̄ɛ̄ an gi gbɛnig a saal kit bɔ gedu gɛ, gii be, lɔɔbɔ.

⁴Nɔɔ dor doosɛ da kar a yɔmntnɔɔ ha an gi gbɛn Yeesu gɔ gi daako.

⁵Yɔ Yeesu tuur a lɛl bɔ ge raage: a Zakeyus, sizum nɔɔko. Yɛrɛ be yok a mɔ raa du nɛɛko.

⁶Zakeyus sil nɔɔktɔnɔ dagige hi hato.

⁷Yɔ dood hi gbɛn anbɔ hi dɔnt hi raako: a Yeesu rek sil a doo hin-ha̧a̧lya lɛl du!

⁸Zakeyus er a Waar Yeesu muutdu raage: a Waar i, yɛrɛ be gɛ̧ɛ̧k rɔɔs be teesdu hi ya̧a̧rya wɔ; gid be gɔs doo za hin gi bɛr gɛ, gid be loo doo za wɔd hi maato, be wɛnsig du dɔɔ nasɔ.

⁹Yeesu raage: a za̧a̧tig taazɔ a raa yɛrɛ gedu nɛɛko, anyɔ za̧a̧nɔ gi Abraham waaɔ hɛw.

¹⁰Ya̧a̧nɛ, Za̧a̧n Waa bɔ zaa an gi ɓɛɛ dood wɔ hi wagɔ gi za̧a̧sihi.

¹¹Yɔ dood wɔ hi lag dɔgl wɔrɔ, anyɔ hi sɛ̧ɛ̧bik a Urusalima gid hi mɔ̀k a gi an Bɛt wáátɔ gi midz ɓɔrsɛ̧ɛ̧lyɔ, Yeesu wɛɛ dɔgsihi ya̧a̧daaniki,

¹²raa a doo za nablɛ, rek a hɛbt za hɛmlɛ an gi dag waar umsɛ gi wɛɛ gi wɛɛza.

¹³El gbaarwalɛ ɔ̧ɔ̧ kooblɛ a zaadɛ teesdu, gaahi tus gaat yɔ hi gɔn hɛɛlmɔt gbunu gbunu hi sɛw, raahi: a zemnin wɔdɛ nɛ riŋgnɔ an nɛ dag zaaha, be wɛɛzugo.

¹⁴Hɔnɛ dood wɔ a waal bɔ gedu hi hɛ̧ɛ̧nig lɔlɛ, hi yaa dood a gi kuudu an hi re hi raa: a hā̧a̧w an wal bɔrɔ gi wɛɛ waar a wi zulha gɛ.

¹⁵Bɔrɔ yɔ dag waar ums bɔ wɛɛ wɛɛz a gi hɛbtdu, el woosɔya wɔ gaahi nɛ tusɛ an hi zemn wɔd hi riŋnɔ an gi mɛɛ hinyɔ hi dag ha gi daarɔ.

¹⁶Woosya biitir bɔ zaa raage: a ɗɛntyɔ, mɔ gaab nɛ tus gbunu, yɛrɛ be dag tus mɔ zaa kar ha kooblɛ.

¹⁷Ɗɛnt bɔ raage: a bɛɛrɔ, woosya rɔbo, anyɔ mɔ i̧i̧ tɛŋk mɔ a hin fɛŋwaa du, mɔ ɗɔɔtɔ mɔ wɛɛ waar a waal gbɔlɛ koobl zulha.

¹⁸Eesum bɔ zaa raage: a ɗɛntyɔ, tus mɔ gbun bɔ mɔ gaabe, be dag zaa karha nɔɔnɛ.

¹⁹Ɗɛnt bɔ raage: a mɔɔ hɛw ɗɔɔtum mɔ wɛɛ waar a waal gbɔlɛ nɔɔn zulha.

²⁰Zaabɔ zaa raage: a ɗɛntyɔ, tus mɔ gbun bɔ mɔ gaabe, be wɔbtɔ a gbandil du be gbaa gɛrɛ.

²¹Beya hoobha̧a̧b mɔɔ ha̧a̧, be mɛɛ a mɔ gi doo kpoos ɓaatilya; mɔ look hinyɔ mɔ gbaa gɛ, mɔ wɛɛ mɔ ɓɛrk tot yɔ mɔ lug gɛ.

²²Ɗɛnt bɔ raage: a hey! Woosya ha̧a̧lɛ! Bé gbaasum dɔgl a hinyɔ mɔ dɔg geha, Mɔ mɔk mɔ mɛɛ a be doo gabsyɔ, be look hinyɔ be gbaa gɛ, be ɓɛrk tot yɔ be lug gɛ mi!

²³Nɛ nɔ mɔ gbāā tus be bɔ belk a tus luk du an be zaa be loo hi zaa ha gɛ?!

²⁴Wɛɛ raa wɔ hi gidi: a loon tus bɔ gi ge, wɛɛn nɛ gaa za̧a̧nyɔ gin tus kooblɛ! [

²⁵Hi raage: a ɗɛntyɔ, gin tus koobl bɔ gin ma! ]

²⁶Wɛɛ ta̧a̧: a be gisin raako: hi gaa za̧a̧nyɔ ginɔ, wɛɛ za̧a̧nyɔ da gin nɛ fɛŋ be, hi ha̧s fɛŋgɔwaa bɔ da gin nɛ hɛw.

²⁷Yɛrɛ kamzin dood zaadɛ wɔ hi gib lɔlhɛ̧ɛ̧nuko, dood wɔ hā̧ā̧hi an be wɛɛ waar hi zulha gɛ, nɛ gbɔ̧hi be lɔlgbar hɛ.

²⁸Yeesu yɔ dɔg anbɔ wɛɛ dor a saal wɔ hi muutdu dɔɔ a Urusalima.

²⁹Yɔ Yeesu gi sɛ̧ɛ̧bik tuurik a Baytifaaze hi a Betani, a ga̧a̧t yɔ gɔ hi el a Kɔ̧ɔ̧b Ga̧a̧ti ge, yaa walɛsɛrɛ wɔ zaadɛya̧ eerɛ,

³⁰raahi: a rekin raat bɔ gi nɛ muutdu bɔ ge, gɔ nɛ gulɔ, nɛ zɛm hi ha̧b pɛɛzum waa za yɔ doo za kadir hage gɛ, nɛ pidige nɛ kamzig dihɛ.

³¹Doo za gi warinɛ a nɛ gig pidig nɔ? Nɛ ta̧a̧ge: a ha̧a̧ Ɗɛnt bɔ ga.

³²Walɛsɛrɛ wɔ hi yaahi tɔmsɛ, hi rek hi zɛm anyɔ Yeesu raahi .

³³Yɔ hi rek hi pidig pɛɛzum waa bɔ, pɛɛ-zumya wɔ hi warɔ: a nɛ gig pidig nɔ?

³⁴Hi ta̧a̧: a ha̧a̧ Ɗɛnt bɔ ga.

³⁵Hi kamz pɛɛzum waa bɔ hi ɓuu gbandilya̧ gi yɛl ha, hi kas Yeesu ɗɔɔt ha.

³⁶Yɔ gi reko, dood hi ɓuu gbandilya̧ a gbɔnɔ du.

³⁷Yɔ sɛ̧ɛ̧b tuurik a Urusalima, a Kɔ̧ɔ̧b Ga̧a̧t bɔ tiisɔ ge, fɔkya wɔ saalya̧ sɛw hi dag hat gbɔɔltɔnɔ. Hi yɛɛl Bɛt baanik hi ya̧a̧ɓolti, hi gɛrs gbɔlɛ wɔ hi gbɛn nɛ sɛw.

³⁸Hi dɔko: a an Waar Bɛt gi rɔbs Waar yɔ gi zaak a gi nuŋg du! Saŋtum gi a bɛtha, gbɔlums gi a Bɛt Yɔ Gi Gbɔɔl Gi Daarlɛl ge.

³⁹Farisaya zaadɛ wɔ hi gi a saal tees bɔ gedu hi raa Yeesu : a Hingokya , ya̧a̧lum fɔkya mɔ wɛrɛ!

⁴⁰Gii wɛɛ ta̧a̧: a be raasinɛ, an fɔkya be wɔ hi waks ya̧a̧boonɛ, bet wɔ yɔ hi kaaka.

⁴¹Anyɔ Yeesu re gi sɛ̧ɛ̧b a waal gbɔɔl bɔ dɔŋgɔdi gi gbɛnige, kaa gi zulha dɔgɔ:

⁴²a à mɔɔ hɛw, mɔ mɛɛ nɛ hinyɔ gɔ gaam saŋtum mɔ dɔgl a ɔ̧t wɛrɛ gedu nɛɛko, yɔ bɛsibe! Yɛrɛ ɓɔryɔ, hinɔ yaat a mɔ lɔlgbarɔ.

⁴³Ya̧a̧nɛ, ɔ̧tya̧ hi gisum zaako, dood wɔ hi book nɔk hi mɔɔ hi zaa gedu hi gɔ̧ɔ̧mɔ hi nɔk wɔdɛ, hi gɔ̧ɔ̧num wɔmto, hi kpɛ̧ɛ̧mɔ, hi ɓɔ̧ɔ̧m lɛl sɛw.

⁴⁴Anyɔ mɔ́ mɛ̄ks ɔ̧tyɔ Bɛt zaa du a mɔɔge an gi ɗaasum gɛ, hi nuumɔ hi waat mɔ hii duhɔ, hi taasum bet gòksil ɔɔk gbunu a zaa ha.

⁴⁵Yeesu re gul a Bɛtluk du, yɔ zɛm dood hinriŋsya wɔ duhɔ, yɛɛlihi niŋki.

⁴⁶Raa: a hi bi̧i̧ a Bɛt ɗɛɛrwol du: a luk be gi wɛɛ zɔ̧k luko. Yɛrɛ nɛɛ nɛ wɛɛn luurɛ wa̧lɔ.

⁴⁷Gi hingok ɔ̧t nuŋg sɛw a Bɛtluk du. Bɛtmaakwookya gbɔlɛ wɔ hi Bɛtmaak-dɔkya wɔ hi dood gbɔlɛ wɔ hi tɛk an hi gbɔm Yeesu.

⁴⁸Wɛɛ hi mɛɛ hinyɔ gɔ hi woo gɛ. Ya̧a̧nɛ dood sɛw hi gis Yeesu dɔglɔ waak kɛŋki; hā̧ā̧hi an dɔgl za gbun gi wagihi gɛ.