Read Doyayo LUKA 21 Bible Online

LUKA 21 - Doyayo bible

LUKA 21

¹Yɔ Yeesu gi a Bɛtluk du pɛɛ lɔlɔ gbɛn dood rɔɔsya hi yaak tus gbɔɔltɔnɔ hi gaak Bɛt gaasɛ a tusyaak lɛl bɔ gedu.

²Yɔ wɛɛ gi gbɛn kuurnɛɛ ya̧a̧ryawaa za gi yaak tus dɛɛt eerɛ a tusyaak lɛl bɔ gedu, dɔgɔ:

³a be gisin dɔk rɔbo, kuur ya̧a̧ryawaa yɛrɛ gaa gaasɔ daar dood zaadɛ sɛw.

⁴Waar ɛ wɔ ya̧nɛ hi ɓeg tus kaasi a rɔɔsya̧ gbɔlɛ wɔ gedu hi gaa gaasɛ. Yɛrɛ kuur ya̧a̧rya bɔ ɔnɛ gaa hinyɔ gin nɛ sɛw an gi len zulɔ giya.

⁵Anyɔ dood zaadɛ hi book Bɛtluk bɔ dɔglɔ hi raak a bɛrkɔ hi betɔ bɛtɛ wɔ hi wɔmnɔ, hi gaas wɔ hi gaak Bɛto, Yeesu dɔgɔ:

⁶a ɔ̧t zaadɛ wɔ gɔ hi zaa gedu, hinyɔ nɛ gbɛnik yɔ, bet gbunu taa zɛ̧ɛ̧rik a bet zaa ha. Hi sɛw hí ɛ̧btirɔ.

⁷Dood wɔ hi warige: a Hingokya , hin wɔrɔ lab hinya̧ hí tuur bili? Hin wɔrɔ gɔ hi tuurɔ, hi mɛɛnik nɔ?

⁸Yeesu ta̧a̧: a oon zul nɛ an bɔhi maatin hi wagsin gbɔnɔ. Gɔ gi anbɔ dood kittɔnɔ hi zaa a be nuŋg du hi raa: a bee Masihu bɔ! Ɔ̧tɔ gi sɛ̧ɛ̧buko! Gɔ gi anbɔ bɔnɛ fɔhi.

⁹Gɔ nɛ kɛm nɔkdɔgl gi booko, hi ya̧a̧ɓooliki, bɔnɛ bee. Yɔ anbɔ, gi an hin wɔrɔ hii hi tuur biitiri. Yɛrɛ gɔ gi anbɔ hinɔ taa waalda̧a̧k kete.

¹⁰Wɛɛ dɔksihi: a hɛbt gi ɗund gabs a hɛbt za zulha; waar gi ɗund gabs a waar za zulha.

¹¹Hɛbt gi naml ha̧a̧ltɔnɔ. Tɔsɛ hi gums bɔbtin zaadɛ hi giro a waal zaadɛ sɔmsɔm. Hinwɔ gɔ hi ha̧a̧shoobo hi gɛrs zaadɛ hinmɛksingoya wɔ hi fu̧u̧z a bɛtha hi giro.

¹²Wɛɛ hin wɔrɔ gɔ hi sɛ̧ɛ̧bik tuuruko, hi wa̧a̧nɛ hi zɛksinɛ, hi gaan dood gbɔlɛ naan du hi gbaasin dɔglɛ a mɔksilluk wɔ hi du, hi wɛɛ hi yaan a luknɔ du. Hi ka̧n a waar ɛ gbɔlɛ wɔ hi muut du, hi a hɛbtzulya wɔ hi muutdu a be dɔŋgo.

¹³Hin bɔrɔ lab gii gi gaan gbɔnɔ an nɛ boo dɔgl be a dood muut du.

¹⁴Mɛɛn nɛ kpoos du, bɔ kol gi tuun gi dor a hinyɔ gɔ nɛ dɔks zul nɛ hin hage.

¹⁵Gɔ gi anbɔ bé gaan dɔglɛ hi hinmɛɛki an dood wɔ hi gin lɔlhɛ̧ɛ̧nik sɛw hi ɗɛɛ an hi faanɛ hi wɛɛ hi matinnɛ dɔgl gɛ.

¹⁶Baa nɛ, hi nàà nɛ, hinda nɛ, yɛ̧ɛ̧dɛ nɛ, nɛsɛ nɛ wɔ, hi sa̧a̧m nɛ wɔ hɛw, hi loonɛ hi gaan dood naan du. Hi wɛɛ hi gbɔm zaadɛ a nɛ tees du.

¹⁷Dood sɛw hi hɛ̧ɛ̧ninlɔlɛ a be nuŋg dɔŋgo.

¹⁸Yɛrɛ susug nɛ gbun zulha taa wako.

¹⁹Nɛ dag za̧a̧tig nɛnɛ hi hinmɔŋk nɛ.

²⁰Gɔ nɛ gbɛn laaya kit wɔ hi gɔ̧ɔ̧k Urusalima, mɛɛnɛ a ha̧tirgo ɔ̧ɔ̧ sɛ̧ɛ̧bɔ.

²¹Gɔ gi anbɔ dood wɔ hi gi a Yahuduya nɔɔhi hi dɔɔ ga̧a̧ti; wɔ hi gi a Urusalima du be tuuhi. Wɛɛ dood wɔ hi gi a yɔ̧ɔ̧rɛ, bɔhi wɛɛ a waal gbɔɔl bɔ gedu.

²²Ya̧a̧nɛ, ɔ̧tɔ gi gi ya̧a̧rhant ɔ̧tyɔ Bɛt gɔ gi wɛns dood hinha̧a̧lya̧ dɔɔrɔɔs gedu, bɔ lab gi an hinyɔ Bɛt ɗɛɛrwolɔ raa sɛw gi wooyyɔ .

²³A ɔ̧tɔge ya̧a̧rhant gi gi a nɛɛd budaa wɔ hi nɛɛd wɔ hi gaak waat wa̧a̧l hi zulha. Yɔ anbɔ kosgumn gbɔɔl gi gi a hɛbt bɔ gedu, hi Bɛt nɔɔtigɔ a Israhilaya wɔ hi zulha.

²⁴Hi gbɔmnihi daŋbɛsim lɔmti, hi wa̧a̧hi an luknɔyaadɛ a dɔ̧ɔ̧t zaadɛ hi teesdu sɛw, wɛɛ dood hɛbtya dɔɔm wɔ hi ɗa̧a̧ Urusalima dɔɔ du gi tuur an ɔ̧tya̧ gi da̧a̧.

²⁵Gɛrs hinmɛksingoya hí gi a ɔ̧t du, a sɛɛ du hi a sɛwaat du. A waal du, kosgumn gi giro. Dood hɛbtya wɔ hi gin hoobo anyɔ gɔ hi mɛɛ hinyɔ gɔ hi woo gɛ. Kol gi tuuhi a mɛmbal gbɔɔl namsɔ bɔ hi mɛmɗukil wɔ namsya̧ hi dɔŋgo.

²⁶Dood hi wɔrko a hinyɔ hi ook an gɔ gi turs hɛbt hi dɔŋgo. Tɛŋk wɔ bɛtha sɛw hi bee.

²⁷Gɔ ma anbɔ hi gbɛn Za̧a̧n Waa bɔ ma zaak gɔ a kuus ha hi tɛŋko hi gbɔlums gbɔɔlɛ.

²⁸Hin wɔrɔ gɔ hi yɛɛl tuuruko, ɗukinɛ nɛ ɗuks zul nɛ ha, anyɔ za̧a̧tig nɛ sɛ̧ɛ̧bɔ.

²⁹Yeesu wɛɛ dɔgsihi ya̧a̧daanik za: a seen yɔmntnɔɔ hi tɛ̧ɛ̧ wɔ sɛw.

³⁰Gɔ nɛ gbɛn kpas wɔ hi bɛɛ baako, nɛ mɛɛ nɛ kpoos du a ga̧a̧k sɛ̧ɛ̧bɔ.

³¹Gbunɔ, gɔ nɛ gbɛn hin wɔrɔ hi tuuruko, nɛ mɛɛ a Bɛt wáátɔ sɛ̧ɛ̧bɔ.

³²Be gisin raak rɔbo: hin wɔrɔ sɛw hi tuur kete, ɓɔr dood wɔ hi gi ɔ̧ti gi zul hi ɔɔ wɔrko.

³³Bɛtha hi hɛbtdi hi talɔ, yɛrɛ dɔgl be taa talko.

³⁴Oon zul nɛ, bɔ hinnak yɛ̧ltɔnɔ hi bumwɔniki hi zul-zɛksig yɔ waal du gi wɛɛn kpoos nɛ ɓaatili, bɔ hinɔ gi dunɛ a ɔ̧tɔ ge.

³⁵Ya̧a̧nɛ hinɔ gi zaak an zagri a dood wɔ hi waak a hɛbt fɛɛtigɔ ha hi zulha sɛw.

³⁶Yɔ anbɔ, oonɛ, zɔ̧n Bɛt ɔ̧t nuŋg sɛw an nɛ dag tɛŋko an nɛ wirɔ a hin wɔrɔ gɔ hi tuur gedu sɛw, wɛɛ an nɛ er a Za̧a̧n Waa bɔ gi muutdu.

³⁷Gɔ ɔ̧t du Yeesu gi hingok a Bɛtluk ɗu. Gɔ rek gi yok a ga̧a̧t za yɔ gɔ hi el nuŋgɔ a Kɔ̧ɔ̧b Ga̧a̧ti hage.

³⁸Wɛɛ gɔ bi̧i̧ltɔnɔ dood sɛw hi zaa a ge a Bɛtluk bɔ gedu hi gisig dɔglɔ kɛŋko.