Read Doyayo LUKA 23 Bible Online

LUKA 23 - Doyayo bible

LUKA 23

¹Dood wɔ hí mɔks a dɔglyɛ̧ɛ̧k luk bɔ gedu sɛw hi ɗukɔ hi kam Yeesu a Pilatu ge,

²yɔ hi tuurɔ hi yɛɛlig dɔgl gɛ̧ɛ̧niki: a wi zɛ̧m wal yɛrɛ gi ɗunsig dood wɛ Yahuduya wɔ zulɛ an hi ɗunds gabsɛ. Wɛɛ gihi a̧a̧nuko a bɔ hi too toos a Kaysara Waar Romaya bɔ ge. Gi raak zulɔ a gii Masihu bɔ, gii Waar gbɔɔlɛ.

³Waar Pilatu warig hin an yɛrɛ lɛ: a mɔɔ gi Yahuduya wɔ waar ya̧ ya? Gii ta̧a̧: a anyɔ mɔ raa.

⁴Pilatu wɛɛ raa Bɛtmaakwookya gbɔlɛ wɔ hi dood saal wɔ: a bé zɛ̄m dɔgl a̧a̧b yɔ gɔ gi mat wal yɛrɛ gɛ.

⁵Hi wɛɛ hi ɗuns ya̧a̧ya̧ lɛlgbunu: a gi sɔmbik doodɛ hi hingokɔ bɔ a Yahuduya hɛbt du sɛw, yɛɛl a Galile wɛɛ zaa tuurin a hɛdi.

⁶Yɔ Pilatu kɛm hi boo Galile dɔglɛ, warɔ a wal yɛrɛ gi Galileya ya?

⁷Yɔ bɛɛ lak a gi Hirudus hɛbt du, yaag a Hirudus ge; a ɔ̧tɔ ge be, Hirudus gi nɛ a Urusalima hɛw.

⁸Yɔ Hirudus bɛɛ Yeesu gbɛnko, dag hat gbɔɔltɔnɔ, gii da amntɔnɔ ha̧a̧g nɛ an gi gbɛn za̧a̧nɔ a hinyɔ hi book gi zulha dɔŋgɔ, gi mɔkig nɛ an gi gbɛnig gɛrs za hinmɛksingoya wookɔ.

⁹Wɛɛ ɛtig hin kittɔnɔ, Yeesu be ta̧a̧g nɛ hinza gbun mɔɔt gɛ.

¹⁰Bɛtmaakwookya gbɔlɛ wɔ hi Bɛtmaakdɔkya wɔ hi gi di hi gig hingɛ̧ɛ̧nik hi tɛŋko.

¹¹Hirudus hi laaya ɔ̧ɔ̧ wɔ hi wɛɛnig hintɔs, hi kpɛ̧ɛ̧lige, hi loo gbandil bɛti hi heksige hi wɛɛnig a Pilatu ge.

¹²A ɔ̧tɔ ge Pilatu hi Hirudus hi wɛɛtin saam gɔ. Doosɛ da boolumya̧ taaro.

¹³Pilatu mɔks Bɛtmaakwookya gbɔlɛ wɔ, hi waar ɛ gbɔlɛ wɔ, hi doodɛ, raahi:

¹⁴a yɛrɛ nɛ kamsib wal yɛrɛ a gi ɗunsig dood zulɛ an hi ɗunds gabsɛ. Yɛrɛ be watig hin a nɛ muutdu, wɛɛ be zol hinyɔ nɛ gɛ̧ɛ̧nig gbun gɛ;

¹⁵Hirudus be, zōl hinza a̧a̧b gɛ be, ya̧a̧nɛ gi wɛnzig wɛɛge. Yɛrɛya, wal yɛrɛ gɔ̄ hinza a̧a̧b an gi rii wɔrk gɛ.

¹⁶Yɔ anbɔ, gɔ be bɛɛg lɛk hɛ be bisig gi reekɔ. [

¹⁷Hɔnɛ, gɔ gi nɛ an Pilatu gi tutsihi luknɔya za gbun a Paska naab-ɔ̧t nuŋg sɛw. ]

¹⁸Yɔ anbɔ dood wɔ hi ɓoolya̧a̧ lɛlgbun sɛw: a gbɔm wal yɛrɛ, tutsiwi Barabas.

¹⁹(Wal bɔ hi yaag nɛ a luknɔ du a gabs zaayɔ ɗund a waal gbɔɔl du a dood teesdu hi a zulgbɔŋk dɔŋgo. )

²⁰Anyɔ Pilatu ha̧a̧g an gi bis Yeesu , wɛɛ boosihi bisigɔ dɔgl ɓɛ.

²¹Yɔ wɔrɔ hi lag anbɔ hi wɛɛ hi ɓooya̧a̧: a doomɔg a dɔ̧ɔ̧r ha! Doomɔg a dɔ̧ɔ̧r ha!

²²Pilatu wɛɛ ɛrihi dɔɔ taasimɛ: a wal yɛrɛ gɔ nɔ hin-a̧a̧bɔ nɔ? Nɛ benɛ be zōl dɔgl-a̧a̧b a ge an gi rii wɔrk gɛ. Gɔ bé lɛge be bisigbisɔ.

²³Hɔnɛ hi wɛɛ hi ɓooya̧a̧ ha̧a̧ltɔnɔ hi raag an gi doog dɔ̧ɔ̧r ha. Yɔ ya̧a̧ya̧ ɓoolik bɔ daar

²⁴Pilatu ta̧a̧ ma an gi woo hinyɔ dood hi gig ɛrk gɔ si̧.

²⁵Pilatu bis za̧a̧nyɔ ɗunds nɛ gabs gi gbɔm nɛ zulɛ hi wɛɛ hi yaag nɛ luknɔ du, za̧a̧nyɔ hi ɛrig nɛ giya. Wɛɛ gɔs Yeesu hinyɔ ha̧a̧hi kpir, gaage doodɔ naan du an hi gbɔŋge.

²⁶Yɔ hi gi kaŋk Yeesu an hi doog dɔ̧ɔ̧r ha, doo za giro nuŋgɔ a Simɔŋ, fu̧u̧ a Kirɛnɛ. Re nɛ bako gi wɛɛzugo, hi wa̧a̧ge hi pɛɛsig dɔ̧ɔ̧r bɔ an gi fɔmn Yeesu kuudu.

²⁷Dood saal kittɔnɔ hi fɔge, nɛɛd kittɔnɔ hi dɛmtig hɔŋya̧, hi gig kaako, hi gisig hekugo.

²⁸Hɔnɛyɔ Yeesu gbɛn anbɔ zɛmr hiige raahi: a waat siŋdɛ Urusalimaya wɛ, bɔnɛ kaasibe, kaasin zul nɛ hi waat nɛ wɔ.

²⁹Ya̧a̧nɛ ɔ̧t zaadɛ hi tuuruko, hi raa gedu: a hat gi a kirkilya wɔ hi, hi wɔ hi mɔɔ nɛ waa gɛ zaŋ hi, hi wɔ hi gaa nɛ waa wa̧a̧l gɛ zaŋ hi.

³⁰Hi wɛɛ hi yɛɛl gol wɔ raaki: a ɛ̧bzin wi zulha! Hi yɛɛl gol waat wɔ raaki: a yaatinwi!

³¹Ya̧a̧nɛ hi gɔsig tɛ̧ɛ̧ sekt za̧a̧til bɔ hin wɔrɔ, nɔ gɔ gi turs tɛ̧ɛ̧ koot ɔnɛ?

³²Hi wa̧a̧ hinbɔbtin wookya eerɛ wɔ gɔ hi gbɔ̧hi hi Yeesu lɛlgbunu hi ka̧hi.

³³Yɔ hi tuur a lɛlyɔ hi el nuŋgɔ a zullɛŋk lɛl ge, hi doo Yeesu gɔ a dɔ̧ɔ̧r ha hi hinbɔbtin wookya wɔ eerɛ; zaa gbunu a naanrɔbo, zaa bɔ be a naanyɛ̧li.

³⁴Yeesu zɔ̧b Bɛto, raa a Baaba, bitsumɔhi anyɔ hi mɛɛ hinyɔ hi wook gɛ. Laaya wɔ hi loo gbandilɔ wɔ hi gɛ̧ɛ̧ hi len subudyɔ.

³⁵Dood hi er hɔdi hi gig seeko; dood gbɔlɛ wɔ hi kpɛ̧ɛ̧lik Yeesu ha̧a̧ltɔnɔ hi dɔko: a za̧a̧s nɛ dood zaadɛ be, yɛrɛ gi gi Masihu bɔ Bɛt herig giya, za̧a̧sig zulɔ ma!

³⁶Laaya wɔ hɛw hi gig kpɛ̧ɛ̧lik be. Hi sɔɔ hi gbuusig bumhob haatil a ya̧a̧gbarɔ.

³⁷Hi dɔgɔ: a gid mɔ gi Yahuduya waar i be, za̧a̧sum zul mɔ ma!

³⁸Hi bi̧i̧ hinza a dɔ̧ɔ̧r ha a gi zullɛl ha an yɛrɛ lɛ: a ZA̧A̧N YƐRƐ GI YAHUDUYA WAAR YƆ.

³⁹Hinbɔbtin wookya wɔ hi doohi a dɔ̧ɔ̧r ha hi giya zaa gbun niige: a nɛ mɔɔ gi Masihu bɔ ma mi? Za̧a̧sum zul mɔ, wɛɛm mɔ za̧a̧s wii be!

⁴⁰Hɔnɛ naaza zaabɔ lag anbɔ za̧brig raage: a nɛ hi gbaas mɔɔ dɔgl an gii ma be mi, hoobha̧a̧mɔ Bɛt gɛ ya?

⁴¹Wɛnɛ hi gbaasɛ dɔgl hi gbɔnɔ, wɛ dak hinha̧a̧lyɔ wɛ woo dɔɔrɔɔsɔ giya. Gii ɔnɛ wōō hinza a̧a̧b gɛ. Hin bɔrɔ mɔ dɔg bɛr gɛ.

⁴²Wɛɛ raa Yeesu : a mɔkibe a ɔ̧tyɔ gɔ mɔ zaa a mɔ wáát du gedu.

⁴³Yeesu ta̧a̧ge: a be raasum rɔbo, nɛɛko mɔ gi hi bee a Bɛt dɔŋdi a waabil hɛmnt lɛl du.

⁴⁴Yɔ ɔ̧t tuur lurk tee, lɛl wil a waal bɔ gedu sɛw, am tuur a naaba̧a̧n du.

⁴⁵Ɔ̧t nimɔ, gbandil fɛɛt bɔ hi mal a Bɛtluk du taar tees du.

⁴⁶Yeesu ɓooya̧a̧ ha̧a̧ltɔnɔ raa: a Baaba, be wɛɛnik kol be a mɔ naan du. Yɔ dɔg anbɔ wɔr gɔ.

⁴⁷Yɔ laaya gbɔɔl Romaya bɔ gbɛn hinyɔ tuurɔ, baan Bɛto, raa: a hi rɔbo, wal yɛrɛ gi nɛ doo rɔbo.

⁴⁸Wɛɛ dood saal wɔ hi mɔks nɛ an hi see hinyɔ gi daako, yɔ hi gbɛn hinyɔ tuurɔ, hi ɓɛdɔ hi wɛɛ hi lɛlɛ hi dɛmtig hɔŋya̧ nɔɔha.

⁴⁹Dood zaadɛ kit wɔ hi mɛɛ Yeesu hi nɛɛd wɔ hi fɔbzig nɛ a da Galile hi er a lakyɔ̧ɔ̧rɛ hi seek hinyɔ gi daako.

⁵⁰Doo za giro nuŋgɔ a Yusufu, fu̧u̧z a Yahuduya waal za gbɔɔl bɔ nuŋgɔ a Arimate gedu, gi Yahuduya dood gbɔlɛ dɔglyɛ̧ɛ̧kya wɔ zaaya̧ gbunyɔ.

⁵¹Gi ook ɔnɛ Bɛt wáátɔ yɔ gɔ gi zaa giya, ɔ̄ks nɛ hinɔ a dɔglyɛ̧ɛ̧kya zaadɛ wɔ mɔkilya̧ hi hinya̧ yɔ hi woo gedu gɛ.

⁵²Rek a Waar Pilatu ge, ɛrig Yeesu muulɔ bɔ gi a dɔ̧ɔ̧r ha. Yɔ Pilatu gaag gbɔnɔ, rekɔ,

⁵³da sis Yeesu muulɔ bɔ a dɔ̧ɔ̧r ha wɔbtinge hi̧i̧lɛ, kam i̧i̧ge a loor yɔ su̧u̧ a hɛɛl du gedu, a lɛlyɔ hí ı̧̄ı̧̄dir nɛ za̧a̧n za ge ket gɛ.

⁵⁴Hinɔ daa a lees gɛmsig ɔ̧ti, holum-ɔ̧t bɔ sɛ̧ɛ̧b nɛ be.

⁵⁵Nɛɛd wɔ hi fu̧u̧z nɛ hi Yeesu a Galile hi fɔb Yusufu, hi gbɛn loor bɔ lɛlɔ hi Yeesu wɔrkɔ bɔ gbaakɔ bɔ hi gbaag a loor bɔ gedu.

⁵⁶Yɔ nɛɛd wɔ hi wɛɛ raa du hi gɛms kurum ki̧i̧lhɛmntya hi kurum sɔɔki. Kuudu yɔ holum-ɔ̧t tuurɔ hi hol gɔ anyɔ Bɛtmaak dɔgɔ .