Read Doyayo LUKA 24 Bible Online

LUKA 24 - Doyayo bible

LUKA 24

¹A dimaas ɔ̧t biitir bɔ gedu nɛɛd wɔ hi tuu hi rek a Yeesu loor lɛl bɔ ge bi̧i̧ltɔnɔ. Hi kam kurum ki̧i̧l-hɛmntya wɔ hi gɛms nɛko.

²Yɔ hi tuurɔ hi zɛm loorbet bɔ kibl bɛrko.

³Hi gulɔ hí zɛ̄m Waar Yeesu wɔrkɔ bɔ gɛ.

⁴Yɔ hinɔ yɔɔhi, yaala walɛ eerɛ hi midsihi, hi gbandil buudɛ gaatɛ fɛr a muulɛ.

⁵Yɔ hi gbɛn walɛ wɔ hoob gi ha̧a̧hi, hi tiis muutya̧ hɛbtdi. Walɛ wɔ hi warihi: a nɛ ɓɛɛk za̧a̧nyɔ gi za̧a̧til a wɔrkɛ tees du nɔ? Taa nɛ dihɛ zaŋ, yɛrɛ rɛml ɗuukɔ.

⁶Mɔkin nɛ mɛɛ hinyɔ da dɔksinɛ, yɔ da gi nɛ a Galile:

⁷a gi an Za̧a̧n Waa bɔ gi gaay ma a dood hinha̧a̧lya naan du, hi dooge a dɔ̧ɔ̧r ha gi wɔrɔ, gi wɛɛ gi rɛml gi ɗukɔ a ɔ̧t taasimɛ.

⁸Nɛɛd wɔ hi wɛɛ hi mɔk hi mɛks hinyɔ Yeesu da dɔksihi nɛko.

⁹Yɔ hi ɔɔ loor bɔ, hi wɛɛ hi dɔks Yeesu walɛsɛrɛ ɔ̧ɔ̧ koobl daa gbun wɔ hi dood zaadɛ hin wɔrɔ sɛw.

¹⁰Nɛɛd wɔ hi fɔks Yeesu walɛsɛrɛ ɔ̧ɔ̧ wɔ hin wɔrɔ nuŋgya̧ gɛrɛ: Mariyama yɔ fu̧u̧ a Magdala, hi Yowana, hi Yakuba nɔɔtɔ Mariyama, hi nɛɛd zaadɛ wɔ hi gi nɛ hi hiya.

¹¹Yeesu walɛsɛrɛ ɔ̧ɔ̧ wɔ be hi see dɔgl wɔrɔ hi fɔksihi an hinyorkyɔ, hi ɗɔ̄bs nɛɛd wɔ dɔglya̧ gɛ.

¹²Hɔnɛyɔ anbɔ Piyɛr ɗundɔ nɔɔ rek a loorlɛl bɔ ge. Yɔ tuurɔ, hu̧u̧r sèè loor bɔ, gbɛn hi̧i̧l wɔ hii loor du kpɔd, wɛɛ wɛɛ gi lɛlɛ. Hin wɔrɔ sɛw kɔmsig gɛrsɛ.

¹³A ɔ̧tɔge anbɔ yɔ walɛsɛrɛ wɔ eer hi rék a raa za bɔ nuŋgɔ a Emayus ge, hɛmlikɔ hi Urusalima gi kilomɛɛtre koobl daa gbunu,

¹⁴hi watingo hinyɔ daa a Yeesu zulha sɛw.

¹⁵Yɔ hi bookya̧a̧ hi watingo hin anbɔ lɛlgbunu, Yeesu hi zulɔ sɛ̧ɛ̧bɔ, retin hi hiya.

¹⁶Hi gbɛnige, wɛɛ hi mɛɛg gɛ, lɔlya̧ ruhirub gi muulɛ.

¹⁷Yeesu warihi: a nɛ ɛmb nɛ boozig nɔ a gbɔnɔ du hɛ nɔ? Wɔrɔ hi er hi mimto.

¹⁸Zaaya̧ gbun bɔ nuŋgɔ a Kiliyopas ta̧a̧ warige: a rɔ̀bɛ wɔ hi zaa a Urusalima sɛw hi mɛɛ hinyɔ daa hɔ lelbɔ, mɔɔ mɔ gbunu, mɔ mɛɛ gɛ ya?

¹⁹Wɛɛ ɛrihi: a nɔ nɛ daa? Hi wɛɛ hi googe: a hinyɔ daa a Yeesu Nazarɛdya bɔ gi zulha, za̧a̧nyɔ gi nɛ Bɛtya̧a̧kɛŋkya, woosɔ wɔ woo hi dɔglɔ wɔ boo hi gin tɛŋk gbɔɔltɔnɔ a Bɛt muut du hi dood sɛw.

²⁰Wɛɛ Bɛtmaakwookya wi gbɔlɛ wɔ hi waar ɛ wi wɔ hi wa̧a̧ge, hi gaag dood gbɔlɛ naan du an hi yɛ̧ɛ̧ dɔglɔ hi gbɔŋge, hi doog a dɔ̧ɔ̧r ha.

²¹Winɛ wi ook nɛ a gii gi tuus Israhilaya wɔ zulya̧ aakil du. Hɔɔ, nɛɛko anyɔ ginɛ anbɔ sɛw, ɔ̧t taasum yɔ hin wɔrɔ hi daa du gii bɔ.

²²Wɛɛ ɓɛ nɛɛd zaadɛ a wi teesdu hi wɛɛsiw gɛrsɛ. Hi rek loorlɛlɛ a bi̧i̧l ɗɔbt du.

²³Yɔ hi rekɔ hi rɛŋks Yeesu wɔrkɔ bɔ rɛŋksɔ, hi wɛɛz hi dɔg a be gbɛn Bɛtwalɛ-sɛrɛ ɔ̧ɔ̧ hi midsib hɛw hi raasib a gi za̧a̧tilyɔ.

²⁴Dood zaadɛ wɔ hi gi hi wii hɛw hi rek a loorlɛl bɔ ge hi zɛm hin daa anyɔ nɛɛd wɔ hi dɔgɔ ; yɛrɛ giya, hi gbɛ̄nig lɛlɔ gedu gɛ.

²⁵Yeesu raahi: a hey! Nɛɛ dood wɔ nɛ taan zulɛ, nɛ wɛɛ nɛ gin kpoos ɓaatili nɛ ta̧a̧ ɗɔbsig hinyɔ Bɛtya̧a̧kɛŋkya hi dɔg sɛw gɛ!

²⁶Taa nɛ an Masihu gi ha̧a̧ya̧a̧r a hin wɔrɔ gedu sɛw an kuudu gi gul a gi gbɔlums du ya?

²⁷Yɔ anbɔ, Yeesu wadsihi hinyɔ hi bi̧i̧ a gi zulha a Bɛt ɗɛɛrwol du sɛw, yɛɛl a Muusa ɗɛɛrwol du, wɛɛ tuur a Bɛtya̧a̧kɛŋkya wɔ ɗɛɛrwolya̧ wɔ hi bi̧i̧ sɛw gedu.

²⁸Yɔ hi sɛ̧ɛ̧b a raaya̧di a lɛlyɔ hi rek nɛ ge, gɔ an gɔ gi taalɔ.

²⁹Hi wɛɛ hi zɔ̧ge hi ya̧a̧hɛmnti a kɔmmɔ hi wiya, ɔ̧t leegɔ, yɛms gi bulk be. Yeesu ta̧a̧ ya̧a̧ya̧ gulɔ, kɔm hi hiya an gi lehinɛ.

³⁰Yɔ gi yɛɛlik hinlek hi hiya, loo koko, baan Bɛto, ɓɛɛdɔ gɛ̧ɛ̧sihi.

³¹Yɔ anbɔ lɔlya̧ kpɛ̧ɛ̧rɔ hi wɛɛ hi mɛɛg gɔ ma ɓɔrɔ. Wɛɛ waglɛl a hi lɔlgbar tɛgrɛg.

³²Hi wɛɛ hi watinu: a yɔ gi wɛ ya̧a̧book a gbɔnɔ du gi wɛɛ gi gisɛ Bɛt ɗɛɛrwolɔ dɔgl wadugo, kpoos wɛ ɗuk hi hat gɛ ya?

³³Hi ɗund ɓɔrbɔ hi wɛɛ hi wɛɛ a Urusalima, hi zɛm Yeesu walɛsɛrɛ ɔ̧ɔ̧ koobl daa gbun wɔ hi dood zaadɛ wɔ hi gi hi hiya hi mɔksɔ;

³⁴zaadɛ wɔ hi dɔgɔ: a hi rɔbo, Waar Yeesu rɛml ɗundɔ. Zuns Simɔŋ muutɔ.

³⁵Eerɛ wɔ be hi fɔ̀k hinyɔ tursihi a gbɔnɔ du hi Yeesu mɛksigɔ bɔ hi mɛksige yɔ gi ɓɛɛdik koko an gi gɛ̧ɛ̧sihi.

³⁶Yɔ walɛsɛrɛ ɔ̧ɔ̧ wɔ hi dɔgl bɔrɔ booko, Yeesu hi zulɔ mid er hi teesdu raahi: a an boolum gi gi hi nɛya!

³⁷Hɔnɛyɔ anbɔ kol tuuhi, hoob wɛɛ ha̧a̧hi, hi rum a hi gbɛnik loorɛyɔ.

³⁸Yeesu wɛɛ warihi: a zul nɛ dɔɔsin saasa nɔ? Nɔ nɛ faakhin nɛ kpoos du?

³⁹Seen naan be hi dɔɔ be wɔ. Bee ma yɔ. Ki̧i̧nbe nɛ see. Loorɛ taan yɔ̧kti, taan lɛŋko anyɔ nɛ gbɛn be ginɔ.

⁴⁰Yɔ raa anbɔ, zunsihi naanɔ wɔ hi dɔɔɔ wɔ.

⁴¹Hɔnɛ an gɔ hi ɗɔbsɔ, hi dag hat daarinhi lɛl be, hi ɗɛɛ gɛ; hin wɛɛ wɛɛsihi gɛrs yɛ̧ltɔnɔ be. Yɔ anbɔ, Yeesu warihi: a nɛ gin lees hɛdi ya?

⁴²Hi loo dut nɔɔmiki hi gaage.

⁴³Gii wɛɛ loo tɔb a hi lɔlgbarɔ.

⁴⁴Kuudu wɛɛ raahi: a hinyɔ be da be raasin nɛ gɛrɛ, yɔ be da be gi hi nɛya: gi nɛ an hinyɔ hi bi̧i̧ a Muusa maakdɔgl du hi a Bɛtya̧a̧kɛŋkya wɔ hi ɗɛɛrwol du a be zulha hi a Zaabura du sɛw gi wooyyɔ . Yɛrɛ wooy da̧a̧da̧.

⁴⁵Yɔ anbɔ wɛɛ kpɛ̧rsihi zulya̧ an hi kɛm hinyɔ hi bi̧i̧ a Bɛt ɗɛɛrwol du.

⁴⁶Wɛɛ raahi: a hi bi̧i̧ an yɛrɛ lɛ: a Masihu gi ha̧a̧ya̧a̧rɛ, gi wɔrɔ, gi wɛɛ gi rɛml gi ɗund ɔ̧t taasimɛ a wɔrkɛ tees du.

⁴⁷Gi an hi dɔks dood hɛbtdi sɛw kpoos zɛmriki hi hinha̧a̧l bisig dɔgl hi Bɛt dɔgl a gi nuŋg du, gi yɛɛl a Urusalima.

⁴⁸Nɛɛ gi hin wɔrɔ segyaadɛya̧.

⁴⁹Yɛrɛ be gisin yaazig hinyɔ Baa be raa nɛ a bé gaazɔ; yɛrɛ nɛya, kɔmbin a waal bɔrɔ gedu gi tuur an tɛŋkyɔ gi wɛɛha a bɛtha gi siz nɛ muulɛ.

⁵⁰Yeesu tuun walɛsɛrɛ ɔ̧ɔ̧ wɔ a waal gbɔɔl bɔ gedu renihi a Betani gbaŋgi. Yɔ hi tuur lɛlɔge pɛɛ naanɛ rɔbsihi.

⁵¹Yɔ gihi rɔbsig anbɔ hɛɛtin gɔ hi hiya, ɗund dɔɔ a bɛtha.

⁵²Walɛsɛrɛ ɔ̧ɔ̧ wɔ hi zagl di hi ɗɔbsige, hi wɛɛ a Urusalima hi hat gbɔɔltɔnɔ.

⁵³Gɔ ma anbɔ hi waak rek a Bɛtluk du ɔ̧t nuŋg sɛw hi baanik Bɛto. Anbɔ.