Read Doyayo LUKA 3 Bible Online

LUKA 3 - Doyayo bible

LUKA 3

¹Yɔ Tibɛr gi waar gbɔɔl a Roma, a wɛl koobl daa nɔɔntums bɔ gedu, Pɔntiyu Pilatu gi doo nabl gɔ a Yahuduya hɛbt du, waar Hirudus be gi waar gɔ a Galile hɛbt du. Yɛ̧ɛ̧tɔ Filib be gi waar gɔ a Itura hɛbt du hi a Tarakoniti hɛbt du; Lisaniyas be gi waar gɔ a Abilɛn hɛbt du.

²Anas hi Kayafas hi gi Bɛtmaakwookya gbɔlɛ mɔɔtɛ gɔ be. A wɛlɔ gedu Bɛt dɔgl zaas Zakariya waawal Yohana a hɛtdɔŋ du.

³Yɔ anbɔ, ɛmb gul gɔ a waal wɔ hi sɛ̧ɛ̧b a Urdum dɔŋdi gedu sɛw hi Bɛtmɛm bɔ dɔglɔ an gi raahi hi zɛmr kpoosya̧, an Bɛt gi bitsihi hinha̧a̧lya̧.

⁴Anyɔ Bɛtya̧a̧kɛŋkya bɔ Esaya dɔgɔ gi bi̧i̧ a gi ɗɛɛrwol du: a hi kɛm za̧a̧n za gi ya̧a̧ɓoolik a hɛtdɔŋ du a Bɛt raa: a gɛmntsin Waar Bɛt gbɔnɔ, gɛmnsinge gbɔnɔ wɔ hi er bɛttɔnɔ.

⁵Mark wɔ hi gi lɛl dubt sɛw hi hi̧i̧sɔ. Ga̧a̧t sɛw hi lɛlɗundir wɛ sɛw hi yɔɔlɔ. Gbɔnɔ yɔ niŋktɔ hi esige. Wɛɛ gbɔnɔ ha̧a̧l wɔ hi bɛr daak gɛ, hi gɛmsihi hi bɛrɔ.

⁶Doo yɔ gi sɛw gi gbɛn za̧a̧sig yɔ Bɛt gɔ gi za̧a̧sɛ.

⁷Yɔ dood saal hi zaak a Yohana ge an gi hotinihi Bɛtmɛmɛ, Yohana raahi: a kpolum dɔ̧ɔ̧t wɛ, bɔ goksinɛ a nɛ nɔɔ Bɛt nɔɔtigɔ yɔ gɔ gi zaa nɔ?

⁸Woonwoos rɔb yɔ gɔ gi zuun a nɛ zɛmr kpoos nɛ nɛ ɔɔ woos nɛ amntɛ wɔ. Wɛɛ bɔnɛ yɛɛl zul nɛ raako a Abraham gii baa wɛ ro! Ya̧a̧nɛ be gisin raako: a Bɛt gin tɛŋk an gi loo bet wɛrɛ hi gɔns Àbraham waato.

⁹Yɛrɛ hi gbaa gaal a tɛ̧ɛ̧yɛ̧ɛ̧s wɔ hi muul da̧a̧da̧ ma an gi dɛ̧ɛ̧tiro; tɛ̧ɛ̧ wɔ hi hum rɔbtɔnɔ gɛ sɛw hi gboblihi hi yaahi laa du.

¹⁰Dood saal wɔ hi warige: a nɛ yɛrɛ gi an wi woo nɔ ma ɔnɛ?

¹¹Gii ta̧a̧hi: a an za̧a̧nyɔ gin gbandil eerɛ, gi hod zaa gbunu gi gaa naa zayɔ taan gɛ. Wɛɛ za̧a̧nyɔ gin lees be, gi woo an gbun bɔ.

¹²Wɛɛ tooszekya wɔ hi zaa a Yohana ge an hi dag Bɛtmɛmɛ, hi ɛrige: a Hingokya , gi an wi woo nɔ?

¹³Gii ta̧a̧hi: a bɔnɛ ɛr dood toos gi daar toos yɔ hi dɛ̧ɛ̧z an dood hi gaanɛ.

¹⁴Laaya zaadɛ hɛw hi zaa hi ɛrige: a wii be, wi woo nɔ? Gii wɛɛ ta̧a̧hi ɓɛ: a bɔnɛ wɔɔl dood tus hi tɛŋko, zaabe hi ya̧a̧gɔ̧ɔ̧nɛ, kɔmbin nɛ oo dɔɔrɔɔs nɛ bɔ gii kpɔd.

¹⁵Dood hi ook hi waaliki, wɛɛ hi sɛw hi mɔkig hin hi kpoos du a Yohana zulha, a kinsa gii Masihu bɔ be.

¹⁶Yohana wɛɛ raahi a bee be gin hotig Bɛtmɛmɛ hi mɛm tɔs, yɛrɛ za̧a̧nyɔ gin gbɔlums gi daar beya, gi zaako, be tūūr doo rɔb a gi muutdu an be hu̧u̧r be pid taal ba̧a̧nɔ gɛ. Gii gi hotinnɛ Bɛtmɛmɛ hi Bɛt Mɔkilɔ hi laa.

¹⁷Gin dɛlɔ naan du, gi nuun tot a daŋk du gi gɛ̧ɛ̧ gaato hi kasɛ; gi gaas daŋkɔ, gi tuu tot bɔ gi tɔ̧ɔ̧ gaat bɔ gi bil du, gi wɛɛ gi kpɔɔ kas wɔ a laayɔ gɔ niŋ gɛ gedu.

¹⁸Yɔ Yohana dɔks dood hin anbɔ, wɛɛ gisihi Dɔgl Rɔb dɔko hi dɔgl zaadɛ du kittɔnɔ kittɔnɔ.

¹⁹Hɔnɛ Yohana za̧br nɛ Waar bɔ Hirudus a nisɔ bɔ loog nuŋgɔ a Hiruduya yɔ gi yɛ̧ɛ̧tɔ nisɔ gi dɔŋgo, hi hin zaadɛ ha̧a̧l wɔ woo nɛko;

²⁰Waar Hirudus goks hinza ha̧a̧l a wɔrɔ hage sɛw, wa̧a̧ Yohana gbooge a luknɔ du.

²¹Yɔ dood sɛw hi loo Bɛtmɛmɛ, Yeesu loo Bɛtmɛm gɔ be. Yɔgi Bɛt zɔ̧ko, bɛtha kpɛ̧ɛ̧rɔ.

²²Bɛt Mɔkilɔ siz gi zulha, muulɔ riitin an gutu buu. Wɛɛ ya̧a̧ booyz bɛtha raa: a mɔɔ gi waa be yɔ ha̧a̧be hi kpoos be sɛw. Be gaa hat be sɛw a mɔɔ.

²³Yɔ Yeesu gi yɛɛlik woosɔ gɔ wɛl an dumbili taarɛ. Dood hi mɔkugo: a Yeesu gi Yusufu waayɔ. Yusufu be,

²⁴gi Heli waayɔ; Heli be gi Matad waayɔ; Matad be gi Lewi waayɔ; Lewi be gi Mɛlki waayɔ; Mɛlki be gi Yaanay waayɔ; Yaanay be gi Yusufu waayɔ;

²⁵Yusufu be gi Matatiya waayɔ; Matatiya be gi Amɔs waayɔ; Amɔs be gi Nahum waayɔ; Nahum be gi Elsi waayɔ; Elsi be gi Nagay waayɔ;

²⁶Nagay be gi Mahad waayɔ; Mahad be gi Matatiya waayɔ; Matatiya be gi Semɛyin waayɔ; Semɛyin be gi Yozek waayɔ; Yozek be gi Yoda waayɔ;

²⁷Yoda be gi Yowana waayɔ; Yowana be gi Rɛsa waayɔ; Rɛsa be gi Zorobabɛl waayɔ; Zorobabɛl be gi Salatiyɛl waayɔ; Salatiyɛl be gi Nɛɛri waayɔ; Nɛɛri be gi

²⁸Mɛlki waayɔ; Mɛlki be gi Àddi waayɔ; Addi be gi Kɔsan waayɔ; Kɔsan be gi Ɛlmadan waayɔ; Ɛlmadan be gi Ɛɛr waayɔ;

²⁹Ɛɛr be gi Yosuwa waayɔ; Yosuwa be gi Eliyezɛr waayɔ; Eliyezɛr be gi Yoorim waayɔ; Yoorim be gi Matad waayɔ; Matad be gi Lewi waayɔ; Lewi be gi

³⁰Simɛyɔŋ waayɔ; Simɛyɔŋ be gi Yahuda waayɔ; Yahuda be gi Yusufu waayɔ; Yusufu be gi Yonam waayɔ; Yonam be gi Elyakim waayɔ; Elyakim be gi Mɛleya waayɔ;

³¹Mɛleya be gi Mɛna waayɔ; Mɛna be gi Matata waayɔ; Matata be gi Natan waayɔ; Natan be gi Dawda waayɔ;

³²Dawda be gi Yɛsa waayɔ; Yɛsa be gi Obɛd waayɔ; Obɛd be gi Bowas waayɔ; Bowas be gi Salmuna waayɔ; Salmuna be gi Naasu waayɔ;

³³Naasu be gi Aminadab waayɔ; Aminadab be gi Admin waayɔ; Admin be gi Arni waayɔ; Arni be gi Hɛsrun waayɔ; Hɛsrun be gi Farɛs waayɔ; Farɛs be gi Yahuda waayɔ;

³⁴Yahuda be gi Yakuba waayɔ; Yakuba be gi Isaaku waayɔ; Isaaku be gi Abraham waayɔ; Abraham be gi Tara waayɔ; Tara be gi Nakɔɔr waayɔ;

³⁵Nakɔɔr be gi Seeruk waayɔ; Seeruk be gi Raagaw waayɔ; Raagaw be gi Faaleg waayɔ; Faaleg be gi Eebɛr waayɔ; Eebɛr be gi Saala waayɔ; Saala be gi

³⁶Kaynam waayɔ; Kaynam be gi Arfaksad waayɔ; Arfaksad be gi Sɛm waayɔ; Sɛm be gi Nɔwe waayɔ; Nɔwe be gi Laamɛk waayɔ;

³⁷Laamɛk be gi Matusala waayɔ; Matusala be gi Ɛ̧nɔg waayɔ; Ɛ̧nɔg be gi Zaarɛd waayɔ; Zaarɛd be gi Maleliyɛl waayɔ; Maleliyɛl be gi Kaynam waayɔ; Kaynam be gi Enɔs waayɔ;

³⁸Enɔs be gi Sɛd waayɔ; Sɛd be gi Adamu waayɔ; Adamu be gi Bɛt waayɔ; hinɔ anbɔ.