Read Doyayo LUKA 6 Bible Online

LUKA 6 - Doyayo bible

LUKA 6

¹Holum-ɔ̧t zayɔ tuurɔ, Yeesu gi talik a totbak du. Walɛsɛrɛ ɔ̧ɔ̧ wɔ hi halk tot wɔ bak du hi kɔɔl naan du hi tɔbɔ.

²Yɔ Farisaya zaadɛ hi gbɛn anbɔ hi warihi: a nɛ wook nɔ hinyɔ rii an hi woo a holum-ɔ̧t gɛ nɔ?

³Yeesu ta̧a̧hi: a nɛ zaŋg hinyɔ Dawda woo ɔ̧t zayɔ a̧a̧kil ha̧a̧ge hi doodɔ wɔ hi gitin el gɛ ya?

⁴Dawda gul a Bɛtluk du, loo kok yɔ hi gbaas Bɛto, le, wɛɛ gaa doodɔ wɔ hi gi el ya̧nɛ hi le be. Nɛ mɛɛ a gbɔnɔ giro a Bɛtmaakwookya wɔ hii hi le Bɛt kok bɔ kpɔd.

⁵Wɛɛ dɔgɔ: a Za̧a̧n Waa bɔ gii gi holum-ɔ̧t waar i hɛw.

⁶A holum-ɔ̧tza dɔɔmi, Yeesu gul a mɔksilluk du gi hingoko. Doo za yɔ naanrɔbɔ gi wɔlɛ gi duhɔ.

⁷Bɛtmaakdɔkya wɔ hi Farisaya wɔ hi gi Yeesu sɔ̧ɔ̧ko a kinsa gi za̧a̧s doo za a holum-ɔ̧t be. Ha̧a̧hi an hi dag hinyɔ gɔ hi gɛ̧ɛ̧nig dɔgl gedu.

⁸Hɔnɛ gii be yɔ mɛɛ mɔkilya̧, raa wal naanwɔlya bɔ a ɗukumɔ, erumha a dood teesdu sɛw. Wal bɔ ɗukɔ, erɔ.

⁹Yeesu raahi: a ɔbe ɛrin hinɛ: maakdɔgl wɛ raa a nɔ? A gi an hi woo hinrɔb a holum-ɔ̧t ya, gi an hi woo hinha̧a̧lya, gi an hi za̧a̧s doo ya, zaabe gi an hi gbɔm doo ya ri?

¹⁰Hɔnɛyɔ zɛ̧brihi hi lɔl sɛwi, wɛɛ raa wal bɔ: a yɔdum naan mɔ, wal bɔ yɔdɔ. Naanɔ bɔ wɛɛ dag tɛŋko, wɛɛ bɛrɔ.

¹¹Yɔ wɔrɔ hi gbɛn anbɔ kpoosya̧ nɔɔhi ha̧a̧ltɔnɔ, hi watin hinyɔ gɔ hi woos Yeesu.

¹²A ɔ̧tɔge Yeesu rek a ga̧a̧t ha an gi zɔ̧b Bɛto. Yɛmsbed gāag Bɛt zɔ̧ki.

¹³Yɔ lɛl gaa, el walɛsɛrɛ ɔ̧ɔ̧ wɔ her dood koobl daa eerɛ a hi tees du, gaahi nuŋgya̧ a hi tɔmsyaadɛyɔ.

¹⁴Tɔmsɔya wɔ herihi nuŋgya̧ gɛrɛ: Simɔŋ (yɔ Yeesu dɔ̧ɔ̧sig nuŋgɔ a Piyɛr ), Piyɛr yɛ̧ɛ̧tɔ Andrɛ, Yakuba, Yohana, Filib, Bartelemi,

¹⁵Mata, Tumas, Alfe waawal Yakuba, Simɔŋ (yɔ gɔ hi elig a Hɛbtwaa Gàbs bɔ),

¹⁶Yakuba waawal Yahuda, hi Yahuda Iskaryudi yɔ rɛ̧ɛ̧ge.

¹⁷Yeesu wɛɛ siz hi tɔmsɔya wɔ a ga̧a̧t bɔ hage, zaa er a lɛl-aakil du. Walɛsɛrɛ ɔ̧ɔ̧ wɔ kittɔnɔ hi gi lɛlɔge, dood saal zaadɛ kittɔnɔ hi gi di be hi fu̧u̧z a Yahuduya hɛbt du sɛw, hi Urusalima, hi Tirus zɛɛ ya̧ hi a Sidɔŋg hi zaa an hi lag dɔgl wɔ gi dɔko, an gi za̧a̧sihi a gumsya̧ wɔ gedu.

¹⁸Dood wɔ loorɛha̧a̧l bindihi hi za̧a̧k be.

¹⁹Wɛɛ dood saal wɔ sɛw hi ɓɛɛk an hi ki̧i̧ge anyɔ tɛŋk za gi tuuzig gi muul du gi za̧a̧sig dood sɛw.

²⁰Hɔnɛyɔ Yeesu pɛɛ lɔlɔ a walɛsɛrɛ ɔ̧ɔ̧ wɔ hi zulha, raa: a Hat gi a nɛ, ya̧a̧rya wɛ, anyɔ Bɛt wáátɔ gi nɛnɛ.

²¹Hat gi a nɛ, a̧a̧kilya wɛ ɓɔryɔ, nɛ́ hi̧i̧. Hat gi a nɛ, kaalya wɛ ɓɔryɔ, nɛ́ kpɛ̧ɛ̧.

²²Gid dood hi hɛ̧ɛ̧nin lɔlɛ, hi nininɛ, hi wɛɛ hi wɛɛnin an dood bɔbtini a Za̧a̧n Waa bɔ gi dɔŋgo,

²³dagin hat a ɔ̧tɔge, kpoos nɛ kpɛ̧ɛ̧ge, yɔ anbɔ nɛ gin dɔɔrɔɔs nɛ gbɔɔltɔnɔ a bɛtha; ya̧a̧nɛ, baaya̧ hi da hi gɔs nɛ Bɛtya̧a̧kɛŋkya wɔ anbɔ be.

²⁴Yɛrɛ rɔɔsya wɛ, nɛ gin ya̧a̧rhanto. Ya̧a̧nɛ, nɛ dag dɔɔrɔɔs nɛ dagɔ.

²⁵Ya̧a̧rhant gisinɛ, nɛɛ dood wɔ nɛ hi̧i̧ ɓɔryɔ, kuudu a̧a̧kil gi ha̧a̧nɛ. Ya̧a̧rhant gisinɛ, nɛɛ dood wɔ nɛ kpɛ̧ɛ̧k ɓɔryɔ, kuudu nɛ mimɔ nɛ wɛɛ nɛ kaa!

²⁶Ya̧a̧rhant gisinɛ, nɛɛ dood wɔ hi gisin hinrɔb raak nɛ zulha sɛw. Baaya̧ hi woo nɛ anbɔ ro a Bɛtya̧a̧kɛŋkya ya̧a̧gɔ̧ɔ̧nya wɔ hi zulha.

²⁷Yeesu wɛɛ raa: a yɛrɛ be dɔksinɛ, wɔ nɛ gisib dɔgl be lako: yɛgi ha̧a̧n dood wɔ hi gin lɔlhɛ̧ɛ̧nuko. Gɔsin dood wɔ ha̧a̧hi dɔgl nɛ gɛ rɔbo.

²⁸Rɔbsin dood wɔ hi gisin gɔk booto. Zɔ̧bsin dood wɔ hi gin ya̧a̧rha̧a̧nik Bɛto.

²⁹Doo gi dɛmɔ a wɛktya̧, wɛɛm mɔ zɛmrsig zaa bɔ hɛw; doo za gi loo gbandil mɔ gbɔɔl yɔ mɔ gin muulɛ, bɔmɔ yansig gbandil wans bɔmɔ gin buudu lookɔ.

³⁰Gaam za̧a̧nyɔ ɛrum hinɛ; wɛɛ za̧a̧nyɔ wɔɔ rɔɔs mɔ, bɔ mɔ fɔbɔ.

³¹Hinyɔ ha̧a̧nɛ an dood hi woosinɛ, woosinɛhi anbɔ be.

³²À ha̧a̧nɛ a dood wɔ ha̧a̧hi a nɛɛge be, bantɔ nɔni gi ma a nɛɛge nɔ? Dood hinha̧a̧lya wɔ hɛw, ha̧a̧hi dood wɔ ha̧a̧hi hiige be.

³³Gid nɛ gɔk rɔb a dood wɔ hi gisin rɔb gɔk hi be, bantɔ nɔni gi ma a nɛɛge nɔ? Wɛɛ hinha̧a̧lya̧ wɔ hi wook gɔ anbɔ be.

³⁴Gid nɛ gaak belk a za̧a̧nyɔ nɛ mɔkig a ɔ̧tza bé dag belk a ge hɛw, bantɔ nɔni gi ma a nɛɛge ɔnɛ? Dood hinha̧a̧lya wɔ hɛw hi gaak hin belk a dooɗ zaadɛ hinha̧a̧lya hi, an hi wɛɛ hi dag belkya̧ bɔ ɔ̧tza ɓɛ.

³⁵Yɛrɛ yɛgi ha̧a̧nɛ a dood wɔ hi gin lɔlhɛ̧ɛ̧nik hi muulɛ. Woon hinrɔbo, gaan hinɛ, bɔnɛ mɔk a hi wɛɛ hi wɛnsib hinza. Yɔ anbɔ dɔɔrɔɔs nɛ gi tɔɔ, nɛ wɛɛ nɛ wɛɛ Bɛt Yɔ Gi Gbɔɔl Gi Daarlɛl waatɔ. Ya̧a̧nɛ Bɛt gɔ wòòs dood wɔ gɔ hi baanig gɛ hi dood bɔbtin wɔ hii rɔbo.

³⁶Wɛɛn ya̧a̧rmɛɛk-yaadɛ an Baa nɛ Bɛt yɔ gi ya̧a̧rmɛɛkya be.

³⁷Nɛ́ gbāās dood dɔgl gɛ Bɛt taasin dɔgl gbaak be. Bɔnɛ wa̧a̧n dood dɔglɛ, an bɔ Bɛt gi wa̧a̧nin dɔgl be. Bitsin dood hinha̧a̧lya̧, Bɛt gi bitsin hinha̧a̧l nɛ be.

³⁸Gaan dood hinɛ Bɛt gi wɛɛ gi gaan be. Hi kpesin hin a gbandil nɛ ziba gbɔɔl bɔ gedu an gi hi̧i̧sɔ, hi nams bɛttɔnɔ hi ziŋgɔ, hi wɛɛ hi kpel zaa ha an gi gubɔ. Ya̧a̧nɛ Bɛt gi goo hinrɔb nɛ a kɔlwaa yɔ gɔ nɛ gonsig dood zaadɛ hin gedu.

³⁹Yeesu wɛɛ dɔksihi ya̧a̧daanik yɛrɛ: a yɔ̧ɔ̧r ɗɛɛ an gi tɛl naaza yɔ̧ɔ̧r ya? Nɛ yɔ hi mat lɛlgbun a zɛŋk du ma mi?

⁴⁰Hingokigya ɗɛɛ an gi daar hingokɔya gɛ. Yɛrɛ za̧a̧nyɔ gokhin bɛttɔnɔ gi ɗɛɛ gi da̧a̧, gi wɛɛ an hingokɔya bɔ be.

⁴¹Nɔ mɔ seek betwaa yɔ gi a namɔza lɔl du, mɔd gbɛn gā̧ā̧t yɔ gi mɔ lɔl du gɛ?

⁴²Zaa gi an mɔ raa namɔza ri a sa̧a̧ɔ, ɔbe ha̧tsum betwaa gi a mɔ lɔl du, mɔ wɛɛ mɔ gbɛn gā̧ā̧t mɔnɛ yɔ gi a mɔ lɔl du gɛ? Mɔɔ mɛlya ha̧a̧lɛ, ha̧sum gā̧ā̧t bɔ gi mɔ lɔl du kete, ɓɔr mɔ ɔɔ gbɛnik lɔl bɛttɔnɔ an mɔ ha̧s betwaa bɔ gi a namɔza lɔl du.

⁴³Tɛ̧ɛ̧ rɔb gɔ hum humlɔ ha̧a̧l gɛ; tɛ̧ɛ̧ ha̧a̧l be gɔ hum humlɔ rɔb gɛ be.

⁴⁴Tɛ̧ɛ̧ yɔ gi sɛw gɔ hi mɛɛnig humlɔ bɔ giya. Gɔ hi ha̧b yɔmnt huml a kobs muul gɛ, wɛɛ gɔ hi ha̧b inaboohi a tɛ̧ɛ̧ kobs muul gɛ.

⁴⁵Doo rɔbo gɛ gɔ tuus hin rɔbɛ a rɔɔs rɔb yɔ gi fu̧u̧zig a gi kpoos duge; wɛɛ doo ha̧a̧lɛ gɛ gɔ tuus hin bɔbtini a hinha̧a̧l yɔ gin a gi kpoos du gedu be. Ya̧a̧nɛ ya̧a̧ gɔ gi tuusig hinyɔ hi̧i̧s a kpoos du giya.

⁴⁶Nɛ gib elik a Waar i, Waar i, a nɔ dɔŋg nɔ? Wɛɛ nɛ wōō hinyɔ be dɔk gɛ be!

⁴⁷Za̧a̧nyɔ zaa a beege gi kɛŋk dɔgl be gi wa̧a̧k kpoos du, be zunsin za̧a̧nyɔ riitin elo.

⁴⁸Riitin hi za̧a̧nyɔ gi wɔŋk luko, gi zɛɛ sɛŋkɔ bɔ zɛŋkɔ dubtɔnɔ, wɛɛ sɛŋg sɛŋkɔ bɔ hi bet a hɛɛl ha. Mɛm gɔ hi̧i̧s a zɛɛ du, tuu rek luk bɔ muulɔge, mɛm bɔ tɛŋkɔ ɗɛɛ luk bɔ namsig gɛ, anyɔ luk bɔ wɔ̧y bɛttɔnɔ.

⁴⁹Yɛrɛ za̧a̧nyɔ kɛm dɔgl be gi wā̧ā̧ kpoos du gɛ, riitin hi za̧a̧nyɔ wɔm lukɔ a hɛbtdi tɔs gi gboot sɛŋk gɛ; mɛm yɔ hi̧i̧s a zɛɛ du gi bɛɛ rek a luk bɔ muulɔge, luk bɔ ɛ̧btir hɛbtdi ɓɔrbɔ di sɛw.