Read Doyayo LUKA 7 Bible Online

LUKA 7 - Doyayo bible

LUKA 7

¹Yɔ Yeesu bɛɛ dɔglɔ wɔrɔ da̧a̧sig sɛw a dood wɔ hi gisig lak hi muutdu anbɔ, ɗund rek a Kapɛrnayum.

²Laaya za gbɔɔl Romaya gin gbaarwal za yɔ ha̧a̧g gi muul gbɔɔltɔnɔ; gbaarwal bɔ gum ha̧a̧ltɔnɔ hi gig ook kpoos du.

³Yɔ laaya gbɔɔl bɔ lag hi book Yeesu dɔglɔ anbɔ, yaas Yeesu Yahuduya ɗɛntɛ hi rek hi zɔ̧ge an gi zaa gi za̧a̧s gbaarwalɔ bɔ.

⁴Wɔrɔ hi tuur gɔ a Yeesu dɔŋdi hi zɔ̧ge hi ya̧a̧hɛmnti hi raa: a za̧a̧n bɔrɔ gi doo rɔbo, rii an mɔ re mɔ woosig hinyɔ zɔ̧bɔ;

⁵ha̧a̧ge dood Israhilaya wɔ, wɛɛ wɔmsiw mɔksilluk wi be.

⁶Yeesu retin hi hiya, yɔ sɛ̧ɛ̧b tuurik a raa bɔ ge, laaya gbɔɔl bɔ yaa sa̧a̧mɔ zaadɛ hi raage: a hi yaaziwi an wi dɔksumɔ: a bé tuur doo rɔb an mɔ zaa mɔ gul a be raa du gɛ, Waar i, bɔmɔ mɔɔ gbɔɔltɔnɔ.

⁷Ya̧a̧nɛ, bé sēē a be ɗɛɛ an be rek a mɔɔge hi zul be gɛ. Yɛrɛ dɔgum hin gbun kpɔd an gbaarwal be bɔ gi za̧a̧.

⁸Beya hi gbààbe a waar ums wɛɛdisɛ, gbɔlɛ wɔ hi dosibe hi giro, be gin laaya zaadɛ benɛ. Gɔ be raa zaa gbunu a rekumɔ, rekɔ. Gɔ be raa zaa bɔ: a zaamɔ, zaa. Gɔ be raa gbaarwal be bɔ: a woom hin yɛrɛ, woo.

⁹Yɔ Yeesu lag anbɔ, see wal bɔ ya̧a̧boonɔ kɔmsig gɛrsɛ. Wɛɛ zɛmr a dood saal wɔ hi fɔbzig hi, dɔgɔ: a be raasinɛ: a Israhilaya hɛbt du hɛw, be zɛmdir ɗɔbsil gbɔɔl anyɔ lɛ gɛ.

¹⁰Dood wɔ laaya gbɔɔl bɔ yaazihi tɔmsɛ hi wɛɛ raa du hi zɛm gbaar wal bɔ ginɛ gumsɛ za̧a̧za̧.

¹¹A ɔ̧tza di, Yeesu rek a waal gbɔɔl za du nuŋgɔ a Nayin. Walɛsɛrɛ ɔ̧ɔ̧ wɔ hi saalzanɔ gbɔlɛ hi retin elo.

¹²Yɔ Yeesu sɛ̧ɛ̧b a waal gbɔɔl bɔ gbɔnɔya̧ bɔ ge, zɛm dood hi pɛɛk wɔrko. Waawal gbunsimi wɔrɔ, naaɔ bɔ kuuryɔ. Dood kittɔnɔ a waal gbɔɔl bɔ gedu hi gi hi niskuur bɔ.

¹³Yɔ Waar Yeesu bɛɛ nis bɔ gbɛnko, mɛɛsig ya̧a̧rɛ, raage: a bɔmɔ kaa!

¹⁴Wɛɛ sɔɔ ki̧i̧ wɔrk bɔ sílɔ, dood wɔ hi gig nɛ pɛɛko hi erɔ. Raa: a walsɛrɔ, be raamɔ, ɗukumɔ!

¹⁵Wɔrk bɔ ɗuk ɗɔɔtɔ, yɛɛl ya̧a̧bookyɔ. Yeesu wɛɛ looge gaag nɔɔtɔ naan du.

¹⁶Dood wɔ hi gbɛn anbɔ hoobha̧a̧hi hi sɛw. Hi wɛɛ hi baan Bɛto hi raa: a Bɛtya̧a̧kɛŋkya za gbɔɔl midz gɛrɛ wɛ teesdu, Bɛt yaazig an gi ɗaas dood ɔ̧ɔ̧nɛ.

¹⁷Dood hi fɔ̀k hinyɔ Yeesu woo a Yahuduya waalɔ du sɛw, hi waal zaadɛ wɔ hi sɛ̧ɛ̧b di gedu sɛw.

¹⁸Yohana walɛsɛrɛ ɔ̧ɔ̧ wɔ hi dɔgsig dɔgl wɔrɔ sɛw.

¹⁹Yohana el dood eerɛ yaahi a Waar Yeesu ge, an hi warige: a mɔɔ gi za̧a̧nyɔ gɔ gi zaa ya, gi an wi oo zaa dɔɔmi ya ri?

²⁰Yɔ wɔrɔ hi tuur a Yeesu ge hi raage: a Yohana Bɛtmɛm Hotingoya bɔ gii yaaziwi a mɔɔge an wi ɛrumɔ: a mɔ gi za̧a̧nyɔ gɔ gi zaa gii ya, zaabe gi an wi oo zaa dɔ̧ɔ̧mi ya?

²¹A ya̧a̧ gbun bɔ gedu Yeesu za̧a̧s gumtil kittɔnɔ, za̧a̧s wɔ hi gin loorɛha̧a̧l muul du hi yɔ̧ɔ̧rɛ kittɔnɔ, gatsihi lɔlya̧.

²²Yeesu wɛɛ raahi: a rekinɛ nɛ goks Yohana hinyɔ nɛ gbɛnɔ hi hinyɔ nɛ kɛmɔ: yɛrɛ yɔ̧ɔ̧rɛ wɔ hi gbɛnik lɔlɛ, dɔɔɓɛrkilya wɔ be hi ɛmbiko. Ɗobtilya wɔ ɗobtilya̧ da̧a̧sihi. Lagɛ wɔ be hi laktɔnɛ, wɔrkɛ wɔ be hi rɛmluko, ya̧a̧rya wɔ be, hi gisihi Dɔgl Rɔb bɔ dɔko.

²³Hat gi a za̧a̧nyɔ simdɔɔ a be dɔŋg gɛ ge.

²⁴Yɔ Yohana tɔmsɔya wɔ hi bɛɛ wɛɛko, Yeesu yɛɛl dood saal wɔ Yohana dɔglɔ ɛrkyɔ: a nɛ da nɛ re nɔ seezig a hɛtdɔŋ du nɔ? Nɛ rek an nɛ seez bɔ̧ɔ̧k zayɔ zɛk gig namsig gii ya?

²⁵Nɛ re nɔ seezig nɔ? Wal za yɔ heg gbandil hɔnt muul gii ya? Dood wɔ hi hek gbandil bɛtɛ hi wɛɛ hi waak a hɛmntig du hi gi a waar ɛ raa du.

²⁶Nɛ́ nɛ da nɛ rek nɔ seezig ɔnɛ? Bɛtya̧a̧kɛŋkya ya? Hɔɔ, ɔbe raasinɛ, gii daar Bɛtya̧a̧kɛŋkya hɛw.

²⁷Gii gi za̧a̧nyɔ hi bi̧i̧ dɔglɔ a be yaak tɔmsyabe gɛrɛ a mɔ muutdu an gi dorɔ gi gɛmtsim gbɔnɔ mɔ.

²⁸Be gisin raako: dood wɔ nɛɛd hi mɔɔhi, zaaɔ tɔ̄ɔ̄ dāār Yohana gɛ. Wɛɛ be, za̧a̧n wans yɔ daarlɛl a Bɛt wáát du, tɔɔ daar gii daarɔ.

²⁹(Yɔ hi lag dɔgl wɔrɔ anbɔ, dood saal wɔ hi tooszekya wɔ sɛw hi ta̧a̧ a Bɛt gi doo hinrɔbwookyayɔ, hi wɛɛ hi loo Bɛtmɛm a Yohana ge.

³⁰Yɛrɛ Farisaya wɔ hi Bɛtmaakdɔkya wɔ hi dāg Bɛtmɛm a Yohana naan du gɛ, hi see hinyɔ ha̧a̧ Bɛto an hi woo hin tɔsyɔ. )

³¹Yeesu wɛɛ raa: a be gòksin dood wɔ ɓɔryɔ hi nɔ hinɔ? Hi riitin nɛ hi nɔ?

³²Hi riitin hi ya̧a̧mwaat wɔ gɔ hi ɗɔɔt a luum ha hi goktingo hinɛ: a wi usin fɛ̧ɛ̧brɛ̧ɛ̧ nɛ nahin gɛ; wi ɛɛsin ya̧a̧rnaabo, nɛ kaa gɛ.

³³Ya̧a̧nɛ Yohana Bɛtmɛm Hotingoya bɔ zāa̍, le kok gɛ, yɔ̧̄ bum hob gɛ. Nɛ wɛɛ nɛ raako: a gin loorɛha̧a̧l gi muul du.

³⁴Wɛɛ Za̧a̧n Waa bɔ zaa gi hinleko, gi yɔ̧ko. Nɛ wɛɛ nɛ raak ɓɛ: a wal yɛrɛ ɔnɛ gi hinlekya ha̧a̧lɛ hi bumyɔ̧kya ha̧a̧lɛ. Gi tooszekya wɔ hi hinha̧a̧lya wɔ sa̧a̧m ya̧a̧nɛ. Nɛ ha̧a̧n ri?

³⁵Nɛ yɛrɛ Bɛt hinmɛɛk dubt bɔ gɔ zuun woosɔ bɛttɔnɔ a dood wɔ hi gig fɔk hi.

³⁶Farisaya za zaa zɔ̧b Yeesu an gi re gi lɛlɛ gi lehin hi giya. Yeesu re a Farisaya bɔ gi raa du ɗɔɔtɔ gi hinleko.

³⁷Nis za waabil ha̧a̧lya yɔ gi a waal gbɔɔl bɔ gedu, lag a Yeesu rek a Farisaya bɔ gi raa du gi hinleko, kamz ɗaasɛrɛ kurum ki̧i̧lhɛmntya tik hi̧i̧sili. Tik bɔ hi wɔmn bet rɔb yɔ gɔ hi el a albaatre giya.

³⁸Er kuudu a Yeesu dɔɔ dɔŋdi gi kaako. Gɔ kaasi bɔ̀ɔ̀r Yeesu dɔɔɔ wɔ hi mɛɛkɔ, wɛɛ pugdɔ hi susugɔ, wɛɛ zɔm dɔɔɔ wɔ hi ya̧a̧, gubsig kurum ki̧i̧lhɛmntya bɔ dɔɔ muulɛ.

³⁹Farisaya bɔ elzig nɛ gi gbɛn hin bɔrɔ anbɔ, mɔkɔ: a à wal yɛrɛ gi nɛ Bɛtya̧a̧-kɛŋkya rɔbo, yɔ mɛɛ nɛ a nis yɛrɛ ɓi̧i̧be gi nis waabil ha̧a̧lyayɔ.

⁴⁰Yeesu raage: a Simɔŋ, be gin mɔkil za an be dɔksumɔ. Gii ta̧a̧: a Hingokya , dɔgumɔ.

⁴¹A doo za giro gi fɔk dood eerɛ belko. Gi zaabɔ fɔk tus gaat tɛmɛrɛ nɔɔnɛ, zaabɔ be, tus dɛɛt dumbili nɔɔnɛ.

⁴²Yɔ wɔrɔ hi eer sɛw hi taan hinza an hi toon gɛ, wal bɔ ɔsihi belk bɔ hi eer sɛw. Dood wɔrɔ hi eerɛ, nɔni gɔ gi ha̧a̧ge a wal bɔ ge gi daarlɛl nɔ?

⁴³Simɔŋ ta̧a̧: a be mɔk a zaabɔ loo belk gbɔɔltɔnɔ giya. Yeesu ta̧a̧ge: a mɔ zol lɛlɔ ge.

⁴⁴Yɔ zɛmr a nis bɔ gi muutdu, ɛr Simɔŋ: a mɔ gbɛn nis yɛrɛ ya? Be zaa a mɔ raa du, mɔ́ gāābe mɛm be nɛɛn dɔɔ be gɛ. Yɛrɛ giya, bɔ̀ɔ̀rin dɔɔ be hi mɛɛkɔ, wɛɛ pugdin susugɔ.

⁴⁵Mɔɔ be, mɔ́ dagibe mɔ́ kɔ̄tib gɛ. Yɛrɛ giya, yɔ be bɛɛ zaak mɔ raa du, dagibe, wɛɛ gi waak dɔɔ be zɔŋki.

⁴⁶Mɔɔ mɔ ɓeg kurum ki̧i̧lhɛmntya a be zulha gɛ; gii be, ɔnɛ ɓeg kurum ki̧i̧lhɛmntya a be dɔɔ muulɛ.

⁴⁷Ya̧a̧nɛ, be gisim raako: a hinha̧a̧lɔ kit wɔ hi bitsig bitsɔ a hatɔ gbɔɔl bɔ dɔŋgo. Yɛrɛ za̧a̧nyɔ hi bitsig hinha̧a̧lɔ kaasi, hatɔ gi kaasi be.

⁴⁸Wɛɛ raa nis bɔ a hinha̧a̧l mɔ wɔ hi bitsimbitsɔ.

⁴⁹Dood wɔ hi gi nɛ hinlek hi yɛɛl mɔkigi hi kpoos du: a bɔ za̧a̧n yɛrɛ ɔnɛ gi ɗɛɛ hinha̧a̧l bisigi wɛ yɔ?

⁵⁰Hɔnɛ Yeesu wɛɛ raa nis bɔ: a ɗɔbsig mɔ za̧a̧sumza̧a̧sɔ, rekum rɔbtɔnɔ.