Read Doyayo YOHANA 11 Bible Online

YOHANA 11 - Doyayo bible

YOHANA 11

¹Wal za giro nuŋgɔ a Laazar, guumɔ, lɛlɔ a Betani, a Mariyama hi yɛ̧ɛ̧tɔ Marta lɛlɛ.

²Mariyama ɔ̧ɔ̧ gii sɔɔs nɛ Waar Yeesu ɗaasɛrɛ kurum ki̧i̧lhɛmntya gi wɛɛ gi pugdsinge dɔɔɔ wɔ hi susugi. Waŋtɔ Laazar gii gumɔ.

³Siŋdɛ wɔ hi yaa doo za gɔ a Yeesu ge a hi raasig a Waar i, sa̧a̧m mɔ guumɔ.

⁴Hɔnɛyɔ Yeesu lag anbɔ raa a gumsɔ taa wɔrkya, gumsɔ gi an gi zuun Bɛt tɛŋk an hi ɗɔbsinu, gi wɛɛ gi zuun waaɔ bɔ gbɔlumsɔ an hi ɗɔbsig be.

⁵Yeesu ha̧a̧g a Marta muulɛ hi yɛ̧ɛ̧tɔ hɛw, hi waŋtɔ Laazar hɛw.

⁶Yɔ mɛɛ ma a Laazar guumɔ, kɔm ɔ̧tɔ eerɛ a lɛl bɔ gi ge.

⁷Yɔ kuudu anbɔ, wɛɛ raa walɛsɛrɛ ɔ̧ɔ̧ wɔ a wɛ wɛɛ a Yahuduya.

⁸Walɛsɛrɛ ɔ̧ɔ̧ wɔ hi raage a Hingokya , Yahu-duya wɔ hi gim nɛ ɓɛɛk nɔgansɛ an hi duutinmɔ beto mɔ wɔrɔ, kɔmri gi ha̧a̧mɔ wɛɛk a Yahuduya ɓɛ?

⁹Yeesu ta̧a̧ a nɛ lɛlgaal gɔ yɛɛl bi̧i̧l du tuur lɛɛsig du mi? À za̧a̧n za gi ɛmbik a lurk du, yɔ simdɔɔ gɛ anyɔ gi gbɛnik lɛlgaal a waal du.

¹⁰Yɛrɛ à za̧a̧n za gi ɛmbik a yɛms du gi taan lɛlgaalɛ, yɔ simdɔɔsimɔ.

¹¹Yɔ dɔg anbɔ wɛɛ raahi a saam wɛ Laazar gi yokyo. Yɛrɛ be gig rek kpookyɔ.

¹²Walɛsɛrɛ ɔ̧ɔ̧ wɔ hi raage a Waar i, à gi yokyo yɔ za̧a̧za̧ ro!

¹³Yeesu ha̧a̧g nɛ raak a Laazar wɔɔrɔ. Yɔ anbɔ, walɛ-sɛrɛ ɔ̧ɔ̧ wɔ be hi rum a gi book yoom rɔb dɔglɛ;

¹⁴wɛɛ wadsihi dɔglɔ gɔ a Laazar wɔɔrɔ.

¹⁵Ànyɔ be taa lɛlɔdi gɛ, be dag hat a nɛ dɔŋgo an nɛ ɗɔbsɔ. Yɛrɛ yɛnwɛ rek a ge.

¹⁶Tumas yɔ nuŋgɔ a Kumbili, raa naaza walɛsɛrɛ wɔ a wɛ́ɛ́ be, yɛnɛ an wɛ ɗa wɛ wɔr elo hi Waar Yeesu.

¹⁷Yɔ Yeesu tuurɔ zɛm Laazar gi loor du ma am ɔ̧tɔ nasɔ.

¹⁸Betani sɛ̧ɛ̧b hi Urusalima di kaasi, an kilomɛɛtre nɔɔnɛ.

¹⁹Yɔ Marta hi Mariyama waŋya̧ Laazar wɔrɔ, Yahuduyaadɛ kittɔnɔ hi zaa hi gihi rɔɔko an hi ɓatsihi muulɛ.

²⁰Yɔ Marta lag a Yeesu gi zaako rek dagzige, Mariyama ɗɔɔt raa du be.

²¹Marta raa Yeesu a Waar i, an mɔ gi nɛ dihɛ waŋ be yɔ wɔr nɛ gɛ ro!

²²Yɛrɛ be mɛɛ a hinyɔ gɔ mɔ war Bɛt ge sɛw gi gaamɔ.

²³Yeesu googe a waŋ mɔ gi rɛmla.

²⁴Marta raage a bé mɛ̍ɛ̍ a gi rɛml a ɔ̧t yɔ̧ɔ̧sum bɔ ge du, a wɔrkɛ rɛmtig ɔ̧ti.

²⁵Yeesu goo a bee gi rɛmtigi hi za̧a̧tigi. Za̧a̧nyɔ ɗɔbsibe gi za̧a̧, an wɔr nɛ hɛw.

²⁶Za̧a̧nyɔ gi za̧a̧tili gi ɗɔbsibe taa nɛ wɔrk zaŋ. Mɔ ɗɔbsig hin wɔrɔ ya?

²⁷Marta ta̧a̧ a hɔɔ, Waar i, be ɗɔbs a mɔɔ gi Masihu bɔ Bɛt waaɔ yɔ gɔ gi zaa a waal du.

²⁸Yɔ dɔg anbɔ rek da elz hindaɔ a yaaklɛlɛ raage a hingokya bɔ gi hɛdi gi mɔ ɛrko.

²⁹Yɔ Mariyama bɛɛ lako ɗun nɔɔktɔnɔ rek a ge.

³⁰Yeesu da gudir nɛ a waal bɔ gedu ket gɛ, gi a lɛlyɔ Marta dagig nɛ ge.

³¹Yɔ Yahuduya wɔ hi zaa Mariyama rɔɔk a gi raa du hi wɛɛ hi gbɛnig gi ɗuk nɔɔktɔnɔ gi tuu, hi fɔge. Hi rum a gi rek a waŋya̧ loorlɛl bɔ ge an gi kaa wɔrk bɔ giya.

³²Yɔ Mariyama tuur a lɛl bɔ Yeesu gi nɛ ge gi gbɛnige, zagl gi dɔŋdi raage a Waar i, an mɔ gi nɛ dihɛ waŋ be yɔ wɔr nɛ gɛ ro!

³³Yɔ Yeesu gbɛn nis bɔ gi kaako, Yahuduya wɔ hi zaatinu hi kaak be, hin bɔ lab pɛɛ kpoosɔ, wɛɛ mɔkilɔ ɗukɔ,

³⁴wɛɛ warihi a nɛ i̧i̧g loorɔ ay? Hi googe a Ɗɛntyɔ, zaamɔ mɔ see lɛlɔ hi i̧i̧ge.

³⁵Yeesu zɔbs mɛɛko.

³⁶Yahuduya wɔ hi gbɛn anbɔ hi dɔgɔ a eh! seenɛ, ha̧a̧gha̧ gi muul ro!

³⁷Wɛɛ dood wɔ zaadɛya̧ hi dɔgɔ a gii yɔ kpɛ̧rs yɔ̧ɔ̧r bɔ yɔ̧lɛ, ɗɛ̄ɛ̄ nɛ an gi woo hinza an bɔ za̧a̧n yɛrɛ gi wɔr gɛ gɛ ya?

³⁸Yɔ Yeesu kpoosɔ wɛɛ gi ɗɔbɔ, rek gɔ a loorlɛl bɔ ge. Loor bɔ gi zɛŋk gbeeti a hɛɛl du hi kpɛ̧ɛ̧n bet fɛɛti.

³⁹Yeesu raa a mibrin bet fɛɛt yɛrɛ. Wɔrk bɔ siŋtɔ Marta raage A Waar i, wɔrk bɔ ɔ̧tɔ nas ma hɛdu, gi huur ma ɔnɛ.

⁴⁰Yeesu raage a bé rāāmɔ a mɔ́ ɗɔbsɔ mɔ́ gbɛn Bɛt gbɔlumsɔ gɛ ya?

⁴¹Hi ha̧s bet fɛɛt bɔ a loorya̧. Yeesu wɛɛ pɛɛ yɔ̧lɔ wɛɛha raa a Baa, be baanumɔ anyɔ mɔ kɛmsibe.

⁴²Be mɛɛ a mɔ gisib kɛŋk faa. Yɛrɛ be gi dɔk a dood saal wɔ hi rɔ̄be hi dɔŋgo, an hi ɗɔbs a mɔɔ yaazibe.

⁴³Yɔ dɔg anbɔ ɓooya̧a̧ ha̧a̧ltɔnɔ raa a Laazar, tuuzumɔ!

⁴⁴Wɔrk bɔ Laazar tuuzɔ, dɔɔɔ wɔ hi naanɔ wɔ hi wɔy hi kɔmas zukkru, muutɔ bɔ yɛ̧ɛ̧y hi gbandili. Yeesu raahi a pidinɛge nɛ ɔɔge gi rekɔ.

⁴⁵Yahuduya wɔ hi zaatin nɛ hi Mariyama hi gbɛn hinyɔ Yeesu woo, zaadɛya̧ kittɔnɔ hi ɗɔbsig gɔ.

⁴⁶Dood zaadɛ hi teesdu be, hi rek hi zɛm Farisaya wɔ hi fɔksihi hinyɔ Yeesu woo.

⁴⁷Hɔnɛyɔ Bɛtmaakwookya gbɔlɛ wɔ hi Farisaya wɔ hi lag anbɔ hi mɔks Yahuduya ɗɛntɛ dɔgl-yɛ̧ɛ̧kya wɔ hi wɔ̀ dɔglɛ hi raa a wɛ woo nɔ, walɔ gi wook gɛrs gbɔɔltɔnɔ be?

⁴⁸An wɛ ɔɔg gi wook hin anbɔ, dood sɛw hi ɗɔbs giya. Romaya wɔ be, yɔ hi zaa hi ha̧tir Bɛtluk wɛ gaat bɔ ha̧tir hi hɛbt wɛ.

⁴⁹Zaaya̧ gbun bɔ nuŋgɔ a Kayafas yɔ gi nɛ Bɛtmaak-wookya gbɔɔl mɔɔt a wɛlɔ gedu raahi a nɛya nɛ mɛ̄ɛ̄ nɛ hinza nɛ gɛ zaŋ.

⁵⁰Nɛ mɔk gɛ ya? An doo gbunu wɔr a dood sɛw dɔŋgo, yɔ daarɔ, hi anyɔ dood hɛbtdi sɛw gɔ hi wagɔ.

⁵¹Bɛtmaakwookya gbɔɔl mɔɔt bɔ dɔ̄g hin bɔ lab hi zulɔ gɛ. Anyɔ gi Bɛtmaakwookya gbɔɔl mɔɔti a wɛlɔ gedu be, gi dɔgnik Bɛtdɔglɛ a Yeesu gii gi wɔr a dood Yahuduya wɔ sɛw hi dɔŋgo.

⁵²Za̧a̧nɔ taa an gi wɔr wɔrkɔ a Yahuduya wɔ hi dɔŋg kpɔd, gi an gi kamz Bɛt waatɔ wɔ hi hɛks nɛ lɛl sɛw gi ɔksihi lɛlgbunu.

⁵³Yɔ anbɔ, yɛɛl a ɔ̧tɔ ge hi ɔks dɔglɔ gbunu an hi gbɔŋge.

⁵⁴Yɔ anbɔ Yeesu zuun muutɔ rɔbtɔnɔ a Yahuduya wɔ hi tees du ma gɛ. Ɗund rek a hɛbt za dɔɔmi a hɛt du a waal za gbɔɔl du nuŋgɔ a Efrayim, waa hɔ hi walɛ-sɛrɛ ɔ̧ɔ̧ wɔ.

⁵⁵Yɔ Yahuduya Paska naab bɔ sɛ̧ɛ̧b an dood kittɔnɔ hi fu̧u̧ a waal zaadɛ du sɔmsɔm a hɛt du hí dɔ̀ɔ̀ a Urusalima hí gaas muulya̧,

⁵⁶hi ɓɛɛ Yeesu hi wɛɛ hi erk Bɛtluk du hi watingo gbunu gbunu a nɛ mɔk ri, Yeesu taa zaak naab bɔ ya?

⁵⁷Bɛtmaakwookya gbɔlɛ wɔ hi Farisaya wɔ hi raa nɛ be, a doo za gi mɛɛ lɛlyɔ Yeesu gi du hi raasihi an hi wa̧a̧ge.