Read Doyayo YOHANA 12 Bible Online

YOHANA 12 - Doyayo bible

YOHANA 12

¹Yɔ Paska naab bɔ wag yɛms nɔɔngbun an gi tuurɔ, Yeesu tuur a Betani a lɛlyɔ Laazar, za̧a̧nyɔ da rɛmsig a wɔrk du gi waak ge;

²hi gaag lees a lɛlɔge; Marta gii gi lees bɔ dɔɔzugo. Laazar gi hi dood zaadɛ wɔ hi elzihi nɛ hi hinlek hi Yeesu be.

³Mariyama wɛɛ loo naar kurum ki̧i̧lhɛmntya tik gbunu, zekɔ gumntɔnɔ, hi ɔ̄ksin hinza gɛ, gubs Yeesu dɔɔ muulɛ wɛɛ pugdin hi susugɔ. Luk bɔ hi̧i̧s gɔ hi kurum bɔ ki̧i̧lɔ hɛmnt bɔ seserkum.

⁴Yeesu walɛsɛrɛ ɔ̧ɔ̧ wɔ zaaya̧ gbun nuŋgɔ a Yahuda Iskaryudi yɔ gɔ gi rɛ̧ɛ̧s Yeesu ya̧a̧ raa gɔ:

⁵a nɔ hi zebr kurum ki̧i̧lhɛmntya yɛrɛ tus gaat tɛmɛrɛ taarɛ an hi gaa ya̧a̧rya wɔ gɛ nɔ?

⁶Rāā hin bɔrɔ anyɔ ya̧a̧rya wɔ hi gisig ya̧a̧rha̧a̧k gii gɛ, yɔ gi doo luur giigi raanɔ; gii gi tus saa kaŋkigya. Gɔ gi ɓek zaa luur gi gbaak ɔnɛ be.

⁷Yeesu wɛɛ raage a ɔɔmɔge, gbaa kurum bɔ an gi gɛbsin loor beenɛ a ɔ̧tyɔ gɔ hi i̧i̧b gedu.

⁸Ya̧a̧rya wɔ hi gi hi nɛɛ faa, bee be, be taa gik hi nɛɛ faa.

⁹Yɔ Yahuduyaadɛ kittɔnɔ hi lag a Yeesu gi a Betani hi zaa; hí zāā a gi dɔŋg kpɔd gɛ, hi zaa an hi see Laazar yɔ rɛmsig nɛ a wɔrk du be.

¹⁰Ya̧a̧nɛ Bɛtmaakwookya gbɔlɛ wɔ hi wɔ̀ya̧a̧ an hi gbɔm Laazar hɛw.

¹¹Yahuduya zaadɛ kittɔnɔ hi hed a zaadɛ teesdu hi ɗɔbsig Yeesu a Laazar rɛmtigɔ bɔ gi dɔŋgo, ya̧a̧nɛ gi ha̧a̧hi an hi gbɔŋge.

¹²A yoosugɔ ge saalzanɔ gbɔɔl hi zaa naab bɔ yɔ hi lag a Yeesu gi zaak a Urusalima.

¹³Hi gbobz tɛ̧ɛ̧kpas wɔ hi gbaa daak-kpas wɔ hi rek hi dagtin hi Yeesu hi zaan a gi muutdu hi ya̧a̧ɓolti a Hozana, raakɔ a seko gbɔɔltɔnɔ, rɔbs gi a Za̧a̧nyɔ gi zaak a Waar Bɛt nuŋg du ge, rɔbs gi a Waar Israhila ge!

¹⁴Yeesu zɛm pɛɛzumwaa za kar ɗɔɔt hage anyɔ Bɛt ɗɛɛr-wolɔ raa

¹⁵a bɔ hoob gi ha̧a̧mɔ, Siyona waasiŋ, yɛrɛ Waar mɔ gbɔɔl bɔ gi zaako, ɗɔɔt a pɛɛzumwaa yɛlha.

¹⁶Walɛsɛrɛ ɔ̧ɔ̧ wɔ be hí kɛm hin wɔrɔ hi zul du ket gɛ. Hɔnɛ kuudu, yɔ Yeesu tal a gi gbɔlums du, hi mɛks ma gɔ a Bɛt ɗɛɛrwol bɔ raa nɛ hinyɔ hi woosig yɔ dɔglɔ giya.

¹⁷Dood kit wɔ hi gi nɛ hi Yeesu hı̄ gbɛ̄nig nɛ gi el Laazar a loor du a wɔrk du gi ɗunsige, hi dɔg dɔglɔ hɛw.

¹⁸Dood saal wɔ hi kɛm dɔglya̧ hi lag a Yeesu gɔ nɛ gɛrs bɔrɔ, ya̧a̧nɛ hi mɔks gi muutdu.

¹⁹Yɔ anbɔ, Farisaya wɔ hi watinu a sɔ̧ɔ̧nɛ, dood waal du sɛw hi gig fɔk gɛrɛ, wɛɛ taa an nɛ ɗɛɛ hinza wook be.

²⁰Yonaniŋkoya zaadɛ wɔ hi gi a dood wɔ hi dɔɔ naab bɔ teesɔ gedu an hi ɗɔbs Bɛto,

²¹hi zaa a Filib yɔ fu̧u̧z a Baytizaada a Galile ge, hi raage a ɗɛnti, ha̧a̧w an wi gbɛn Yeesu giya.

²²Filib rek raas Andrɛ; Andrɛ hi Filib hi rek hi dɔks Yeesu.

²³Yeesu goohi a ɔ̧tyɔ Za̧a̧n Waa bɔ gɔ gi dag gbɔlumsɔ gedu riiri ma.

²⁴Be raasin rɔbo à totlɛŋks zāā hɛbtdi gi wɔr gɛ, gi kɔŋk bundikyɔ; gi wɔr be, gi tuusig gaatɔ kittɔnɔ.

²⁵Za̧a̧nyɔ ha̧a̧g kolɔ, gi waksige, za̧a̧nyɔ hā̧a̧g kolɔ a waal yɛrɛ gedu gɛ be, gi za̧a̧sig faa.

²⁶Za̧a̧n za gi ha̧a̧ge an gi woosib hinɛ fɔbzigbe! À lɛl yɔ be gi ge, woosya be gi gi lɛlɔge be. Za̧a̧nyɔ gisib hin wooko, Baa be gi ɗɔbsige.

²⁷Yɛrɛ kpoos be luutɔ, bé wɛɛ be dɔg hinɔ a nɔ? Baa Bɛto, za̧a̧sibe a hinyɔ gɔ gi tuur gedu a ɔ̧t yɛrɛ gedu? Ɛ̧-ɛ̧, lab gɛ, be zaa be tuur a ɔ̧t yɛrɛ gedu a hinyɔ gɔ gi tursib gi dɔŋgo, an be yɔ̧ ya̧a̧rhanto.

²⁸Baaba, ɗɔbsum nuŋg mɔ! Yɔ anbɔ, ya̧a̧booyz a bɛtha raa a be ɗɔbsigɗɔbsɔ, be wɛɛ be ɗɔbsig du ɓɛ.

²⁹Yɔ saal wɔ hi gi lɛlɔdi hi kɛm anbɔ hi dɔgɔ a bɛldɔntilyɔ; zaadɛ be a Bɛtwalsɛr boozige.

³⁰Yeesu dɔgɔ a ya̧a̧ bɔrɔ booyz be dɔŋg gɛ, booyz a nɛ dɔŋgo.

³¹Yɛrɛ ɔ̧tyɔ Bɛt gɔ gi gbaas waal dɔglɛ riiri ɓɔri ma; waal bɔ waar ɔ be hi bisig-bisɔ.

³²Wɛɛ, benɛ, gɔ hi doobe a dɔ̧ɔ̧r ha hi pɛɛb a hɛbt wɛɛha, be dir dood sɛw hi zaa a beege.

³³Yɔ gi book anbɔ gi zuunik wɔrkɔ yɔ gɔ gi wɔr giya.

³⁴Dood saal wɔ hi goo a wi kɛm hinɔ a maakdɔgl du a Masihu gi waak faa. Mɔ wɛɛ mɔ raak ri a gi an Za̧a̧n Waa bɔ gi pɛɛy wɛɛha nɔ? Bɔ Za̧a̧n Waa bɔrɔ ma ɓɛ?

³⁵Yeesu wɛɛ raa a yɛrɛ lɛlgaal gi hi nɛɛ ɔ̧t kaasi ɓɛ a nɛ tees du. Fɔn gbɔnɔ anyɔ lɛlgaal gi hi nɛya, an bɔ lɛlwil gi kpɛ̧ɛ̧nɛ. Za̧a̧nyɔ gi ɛmbik a lɛlwil du mɛ̄ɛ̄ lɛlyɔ gi rek du gɛ.

³⁶Yɔ nɛ gin lɛlgaalɛ ɗɔbsin lɛlgaal bɔ an nɛ wɛɛ lɛlgaal waat be. Yɔ Yeesu dɔg hin wɔrɔ anbɔ ɗun rekɔ da yaat zulɔ hɛmltɔnɔ sɛ̧ɛ̧b dɔŋya̧ gɛ.

³⁷Anyɔ woo gɛrs kittɔnɔ a hi muutdu si̧, hi ɗɔbsig gɛ,

³⁸an hinyɔ Bɛtya̧a̧kɛŋkya bɔ Esaya dɔg nɛ gi wooyyɔ a Waar Bɛto, bɔ ta̧a̧ dɔgl wi? Bɔ gbɛn Waar Bɛt naanɔ tɛŋk be?

³⁹Yɔ anbɔ, hí ɗɛ̄ɛ̄ ɗɔbsig gɛ. Esaya wɛɛ dɔg be

⁴⁰a Bɛt yɔ̧ɔ̧s dood wɔ yɔ̧lya̧ wɛɛ ɓaas kpoosya̧, an bɔ yɔ̧lya̧ gi gbɛn hinɛ, an bɔ kpoosya̧ gi mɛɛ hinɛ, bɔhi zɛmr kpoosya̧ a be ge, be za̧a̧sihi.

⁴¹Esaya dɔg anbɔ yɔ gbɛn nɛ Masihu bɔ gbɔlumsɔ gi dor giya gi wɛɛ gi boo dɔglɔ.

⁴²A dood gbɔlɛ Yahuduya wɔ hi teesdu hɛw, zaadɛ kittɔnɔ hi ɓɛ̧ɛ̧y hi ɗɔbs Yeesu be; hɔnɛ anyɔ gɔ hi ta̧a̧ dɔglɔ be, hoobha̧a̧hi Farisaya wɔ be, an bɔhi ninihi hi tuu a mɔksillɛl du,

⁴³Yɔ anbɔ ha̧a̧hi dood bant giigi daar Bɛt bantɔ.

⁴⁴Yeesu wɛɛ ɓooya̧a̧ dɔgɔ a za̧a̧nyɔ ɗɔbsibe ɗɔbs bee gɛ, ɗɔbs Za̧a̧nyɔ yaazib giya.

⁴⁵Wɛɛ za̧a̧nyɔ gbɛnibe, gbɛn za̧a̧nyɔ yaazib giya.

⁴⁶Be zaa an lɛlgaal a waal du, an za̧a̧nyɔ gɔ gi ɗɔbsibe bɔgi kɔm a lɛlwil du.

⁴⁷Za̧a̧nyɔ kɛm dɔgl be gi wɛɛ gi wā̧ā̧ a kpoos du gɛ, bee be taasig dɔgl gbaako; ya̧a̧nɛ, bé zaa an be gbaas waal dɔgl gɛ, yɛrɛ be zaa an be za̧a̧s waalɛ.

⁴⁸Za̧a̧nyɔ inibe gi wɛɛ gi tā̧ā̧ dɔgl be wɔ gɛ, za̧a̧nyɔ gɔ gi gbaasig dɔgl giro; dɔglyɔ be dɔg yɔ gii gi gbaas za̧a̧nɔ dɔgl a ɔ̧t yɔ̧ɔ̧simi.

⁴⁹Yɔ anbɔ, bé dɔg hin bɔrɔ hi zul benɛ gɛ, Baa be yɔ yaazib gii raabe hi zulɔ dɔgl yɔ gɔ be dɔgɔ .

⁵⁰Be mɛɛ dɔgl wɔ gi gaako gi dɔgl za̧a̧tigya faa. Yɛrɛ hinyɔ be dɔko, be gi dɔk dɔgl yɔ Baa bɔ raasib giya.