Read Doyayo YOHANA 13 Bible Online

YOHANA 13 - Doyayo bible

YOHANA 13

¹Anyɔ Paska naab gɔ gi tuurɔ, Yeesu mɛɛmɛ a ɔ̧t be rii an be ɔɔ waalɛ be rek a Baa be ge. Anyɔ ha̧a̧g doodɔ waal du, zunsihi hatɔ tuur a da̧a̧ki.

²Yɔ hi gi lees lɛɛsumgbar bɔ leko loorɛha̧a̧l raa nɛ Simɔŋ waawal Yahuda Iskaryudi da̧a̧da̧ a gi rɛ̧ɛ̧ Yeesu.

³Yeesu be mɛɛ a Baa be Bɛt gaab hin naan du sɛw. Be fu̧u̧ nɛ a Bɛt ge, wɛɛ be wɛɛk a Bɛt ge.

⁴Ɗund ɔɔ leeslɛl bɔ, hod gbandilɔ, loo gbandil fɛɛt yɔ gɔ hi pugdin muulɛ malɔ.

⁵Wɛɛ loo mɛmɛ kpel a dak fɛɛt du yɛls walɛsɛrɛ ɔ̧ɔ̧ dɔɔya̧ nɛɛki, wɛɛ gisihi pugdig hi gbandilɔ fɛɛt yɔ gi tabuko.

⁶Wɛɛ dɔŋg a Simɔŋ Piyɛr ge. Piyɛr yɔ gbɛn anbɔ raage a Waar i, mɔɔ gisib ma dɔɔ nɛɛk ya?

⁷Yeesu raage a hinyɔ be wooko, mɔ́ mɛɛ hinɔ ɓɔri gɛ, gɔ gi kuudu kaasi mɔ kɛm hinɔ.

⁸Piyɛr raage a ɛ̧-ɛ̧, mɔ taasib nɛ dɔɔ be nɛɛk zaŋ! Yeesu raage a be taasum nɛɛk gɛ, mɔ taa waak ɔks hi beya.

⁹Simɔŋ Piyɛr wɛɛ raage a Waar i, bɔmɔ nɛɛsib dɔɔ wɔ kpɔd, nɛɛsib naan wɔ hi zul bɔ hɛw.

¹⁰Yeesu raage a za̧a̧nyɔ hotɔ gi an gi nɛɛ dɔɔɔ wɔ hii kpɔd, muulɔ sɛw gi gaa bɛttɔnɔ. Nɛnɛ nɛ dood gaatɛyɔ, nɛ́ gaa nɛ sɛw gɛ.

¹¹Yɔ mɛɛ za̧a̧nyɔ gɔ gi rɛ̧ɛ̧sig ya̧a̧ gii gi dɔg a nɛ taa dood gaatɛ nɛ sɛw.

¹²Yɔ nɛɛsihi dɔɔya̧ wɔ gi da̧a̧ loo gbandilɔ hegɔ wɛɛ ɗɔɔt raahi a nɛ mɛɛ hinyɔ be woosin ya?

¹³Nɛ gib elko a Hingokya , zaabe a Waar i; nɛ gi raak lɛlɔ ge, be gi za̧a̧nɔ giya.

¹⁴Bee Waar i, bee Hingokya bé nɛɛsin dɔɔ nɛ, gi an nɛɛ hɛw nɛ nɛɛtin dɔɔ be.

¹⁵Be goksin gbɔnɔɔ giya an nɛ woo an bee yɔ be woo be.

¹⁶Be raasin rɔbo, gbaari tɔ̄ɔ̄ daar raatzulya gɛ. Tɔmsya tɔ̄ɔ̄ daar za̧a̧nyɔ yaag gɛ.

¹⁷À nɛ mɛɛ hin wɔrɔ nɛ wɛɛ nɛ wooko, hat gi nɛɛge.

¹⁸Bé bōō nɛ zulha sɛw gɛ, be mɛɛ dood wɔ be herihi, be gɔ an hinyɔ Bɛt ɗɛɛrwol bɔ raa gi wooyyɔ a za̧a̧nyɔ letin kok hi beya wɛɛsib lɔlhɛ̧ɛ̧nikyayɔ.

¹⁹Be raasin dor an hin bɔ lab gi ɔɔ tuuruko. Hinɔ gɔ gi tuurɔ nɛ ɗɔbs gɔ a bee Za̧a̧nɔ.

²⁰Be raasin rɔbo: za̧a̧nyɔ dag za̧a̧nyɔ be yaazig sɛw, dag beya. Za̧a̧nyɔ dag beya, dag Za̧a̧nyɔ yaazib giya.

²¹Yɔ Yeesu dɔg hin bɔrɔ anbɔ kpoosɔ gi luutɔ, wɛɛ raa deg a be raasin rɔbo: doo za gbun a nɛ teesdu gi rɛ̧ɛ̧sib ya̧a̧.

²²Walɛsɛrɛ wɔ hi seetinu. Hinɔ yɔɔhiyɔ hi mɛɛ za̧a̧nyɔ gi book dɔglɔ gi zulha gɛ.

²³Walɛsɛrɛ wɔ zaaya̧ gbun yɔ Yeesu ha̧a̧g gi muulɛ kus Yeesu dɔŋdi a gi kpoos du.

²⁴Simɔŋ Piyɛr kpa̧l walsɛr zaa bɔrɔ hi lɔlwiiko warige a raasiwi za̧a̧nyɔ Yeesu gi book dɔglɔ gi zulha.

²⁵Walsɛr bɔ yees a Yeesu kpoos du warige a Waar i, bɔ za̧a̧nɔ ɔnɛ?

²⁶Yeesu googe: a za̧a̧nyɔ gɔ be gaag kok-ɔ̧ɔ̧kil yɛrɛ gɔ be ɓa̧a̧n bisɛ. Yɔ ɔ̧ɔ̧ kok bɔ gi ɓa̧a̧n bis bɔ, gaa Simɔŋ waawal Yahuda Iskaryudi.

²⁷Yɔ Yeesu gaa Yahuda kok-ɔ̧ɔ̧kil bɔ anbɔ, Saydanu gul a Yahuda kpoos du. Yeesu raage a hinyɔ gɔ mɔ woo, woom hinɔ nɔɔktɔnɔ.

²⁸Hɔnɛ wɔ hi ɗɔɔt hi gii hi hinleko hi mɛ̄ɛ̄ hinyɔ raag anbɔ dɔŋgɔ gɛ.

²⁹Dood zaadɛ hi rum a Yahuda yɔ gi kaŋkig tus saa gi naan du gii Yeesu gi gig raako a rekum mɔ zebz hinyɔ gɔ wɛ gɔn naabo, zaabe a gi gaa ya̧a̧rya wɔ tusɛ.

³⁰Yɔ Yahuda loo kok-ɔ̧ɔ̧kil bɔ anbɔ wɛɛ tuu nɔɔktɔnɔ a yɛms bɔ gedu rekɔ.

³¹Yɔ Yahuda tuu gi rekɔ, Yeesu raa a yɛrɛ hi ɗɔbs Za̧a̧n Waa bɔ ɗɔbs ma. Hí ɗɔbs Bɛt a gi zulɛ.

³²Gid hi ɗɔbs Bɛt a Waaɔ zulɛ, Bɛt gi ɗɔbs Waa bɔ ɗɔbs a gi zul be, gi ɗɔ̀bsig ɓɔr sɛ̧ɛ̧li hɛw.

³³Ya̧a̧mwaat be wɛ, be gi hi nɛɛ ɔ̧t kaasiwaanɔ. Nɛɛ be, nɛ́ tɛbe. Be raa Yahuduya wɔ a lɛlyɔ be rék ge, hi ɗɛ̄ɛ̄ an hi rek ge gɛ. Yɛrɛ ɓɔryɔ, be gisin raak hin gbun bɔ gii hɛw: a lɛlyɔ be rék ge, ɗɛ̄ɛ̄ an nɛ rek ge gɛ.

³⁴Be gin gaak dɔgl sego a yɛ gi hatinnɛ, anyɔ ha̧a̧b a nɛ muul be, nɛɛ yɛgi hatinnɛ anbɔ be.

³⁵Dood sɛw gɔ hi gbɛn a nɛ gin hatingo, hi mɛɛn a nɛya nɛ gi fɔkyaadɛ beenɛ.

³⁶Simɔŋ Piyɛr warige a Waar i, mɔ gi rek ay nɔ? Yeesu goo a lɛlyɔ be rek ge, ɗɛɛ an mɔ fɔb lɛlɔge ɓɔri gɛ, wɛɛ gɔ gi kuudu kaasi mɔ fɔbe.

³⁷Piyɛr raage a Waar i, nɔ be ɗɛɛ an be fɔm lɛlɔge ɓɔri gɛ? Bé gaa kol be a mɔ dɔŋgo.

³⁸Yeesu warige a mɔ raa ri, a mɔ gaa kol mɔ a be dɔŋgo? Be raasumɔ rɔbo, an kɔba gi kekɔ, mɔɔ mɔ faabe gi dor dɔɔ taarɛ.