Read Doyayo YOHANA 15 Bible Online

YOHANA 15 - Doyayo bible

YOHANA 15

¹Yeesu raa a bee gi tɛ̧ɛ̧humlya rɔbo, Baa be gii balkya.

²Waahams wɔ hi gi a be muulɛ, wɔ hi taa huŋk gɛ sɛw, Baa be gi hɛbtirihi. Waahams wɔ hi huŋk be, gi raatihi an hi wɛɛ hi hum hi kitɔ hi daarin lɛlɛ.

³Baa be raatin da̧a̧da̧ hi dɔgl yɔ be dɔgsinɛ, nɛ wɛɛ nɛ gaa ma gɔ.

⁴Waan ɔksi hi beya, bee be waak ɔksi hi nɛɛ be. Gid nɛ́ wāā ɔksi hi bee gɛ, gi wɛɛ gi ha̧a̧n hinza wooko, yɔ nɛ ɗɛɛ gɛ, anyɔ waahams bɔ ɗɛɛ an gi hum hi zulɔ gi gbun gɛ. Gi kɔ̄m ɔks hi tɛ̧ɛ̧humlya bɔ gɛ, ɗɛɛ an gi dag tɛŋk gi hum gɛ.

⁵Bee gi tɛ̧ɛ̧humlya bɔ, nɛɛ be nɛ gi waahamsyɔ. Za̧a̧nyɔ gi waak ɔksi hi beya, wɛɛ bee be waak ɔksi hi giya, za̧a̧nɔ gii gi huŋk huml kittɔnɔ. Yɔ anbɔ, nɛ́ waa ɔksi hi bee gɛ, nɛ́ ɗɛɛ hinza wook gɛ.

⁶Za̧a̧nɔ gi wāā ɔks hi bee gɛ hi bisig a lako an tɛ̧ɛ̧has hi kootɔ, kuudu hi wɛɛ hi tuuhi hi yaahi hi dɔ̧ɔ̧ laa du.

⁷Gid nɛ waak ɔksi hi beya, wɛɛ dɔgl be gi gi waak ɔksi hi nɛɛ be, ɛrin Baa be hinyɔ ha̧a̧n sɛw, nɛ dagɔ.

⁸Nɛ́ gi gaak huml kittɔnɔ, hi ɗɔbsin Baa be hi hinɔ giya, nɛ wɛɛ nɛ zuunik a nɛ gi walɛsɛrɛ beenɛ.

⁹Ha̧a̧be a nɛ muulɛ anyɔ Baa be ha̧a̧g a be muul be; waan a be hat du.

¹⁰Nɛ́ wa̧a̧k dɔgl be wɔ, nɛ waa a be hat du; an bee yɔ be wa̧a̧ Baa be dɔglɔ wɔ a be kpoos du, be waak a gi hat du.

¹¹Be dɔgsin hin wɔrɔ an nɛ dag hat be a nɛ kpoos du an kpoos nɛ gi kpɛ̧ɛ̧ gi daarin lɛlɛ.

¹²Dɔgl benɛ gɛrɛ a yɛgi hatinnɛ a nɛ teesdu anyɔ ha̧a̧be a nɛ muul be.

¹³Ha̧a̧tig za yɔ gɔ gi daar za̧a̧nyɔ gi gaak kolɔ an gi wɔr a saamɔ hi dɔŋg hatɔ giir ya? Taaro.

¹⁴Nɛya, nɛ́ gi wook hinyɔ be raanɛ, nɛ gi saam be hiya.

¹⁵Be taan zaa elik ma a woosya be wɛ, anyɔ woosya gɔ mɛ̄ɛ̄ hinyɔ ɗɛntɔ gi wook gɛ. Yɛrɛ nɛya, be gin elik a saam be wɛ, anyɔ be goksin hinyɔ be lag a Baa be ge sɛw.

¹⁶Nɛɛ her bee gɛ, bee her nɛya. Be gbaan an nɛ rek nɛ humɔ, huml nɛ bɔ gi waa. An hinyɔ gɔ nɛ zɔ̧ Baa be a be nuŋg du sɛw, gi gaan hinɔ.

¹⁷Be raan hin gbunu: yɛgi hatinnɛ.

¹⁸Waal gi gin lɔlhɛ̧ɛ̧nuko, mɛɛn a yɛɛl bee lɔlhɛ̧ɛ̧nuko.

¹⁹À nɛ gi nɛ dood waalyaadɛ, waal yɔ ha̧a̧g a nɛɛge anyɔ nɛ gi doodɔ; yɛrɛ nɛ taa dood waalyaadɛ, be hedin waal teesdu, a dɔŋgɔ ro waal gi gin lɔlhɛ̧ɛ̧nuko.

²⁰Mɛksin dɔgl yɔ be da be dɔgsinɛ a gbaari tɔ̄ɔ̄ daar ɗɛntɔ gɛ. Gid hi ɗantibe, hi ɗant nɛɛ hɛw. Gid hi fɔ dɔgl benɛ, hi fɔ dɔgl nɛnɛ hɛw.

²¹Yɛrɛ anyɔ hi mɛɛ Za̧a̧nyɔ yaazib gɛ, hi woosin hin wɔrɔ sɛw a be nuŋg dɔŋgo.

²²À be zaa nɛ be dɔ̄ksihi hinza gɛ, yɔ hi taan hinha̧a̧lɛ. Yɛrɛ be dɔgsihi za̧a̧tig dɔglɛ, wɛɛ hi iinɔ. Yɛrɛ hi taan hinza yɔ gɔ hi dɔks zulya̧ gi wɛɛsihi ya̧a̧gɔ̧ɔ̧n lɛl an hi bits hinha̧a̧lya̧.

²³Za̧a̧nyɔ hɛ̧ɛ̧niblɔlɛ, hɛ̧ɛ̧n Baa be lɔl hɛw.

²⁴À be woo nɛ woosyɔ doo za woodir nɛ hi teesdu gɛ gɛ, yɔ hi taan hinha̧a̧lɛ. Yɛrɛ ɓɔryɔ hi gbɛn woos wɔ gbɛnɔ, hi wɛɛ hi hɛ̧ɛ̧nib lɔlɛ, hi wɛɛ hi hɛ̧ɛ̧n Baa be lɔl hɛw.

²⁵Yɛrɛ hin bɔ lab tuur an dɔgl yɔ hi bi̧i̧ a maakya̧ dɔgl du a hi hɛ̧ɛ̧nib lɔl ditɔs, gi wooyyɔ .

²⁶Yɛrɛ ɗaakya bɔ gɔ gi zaa, Mɔkil hinrɔbya yɔ fu̧u̧z a Baa be ge, be yaazige a nɛɛge, gii gi boo dɔgl benɛ.

²⁷Nɛɛ be, yɔ nɛ waatin hi bee gi yɛɛl a biitirnaan du, nɛ gi segyaadɛ beenɛ.