Read Doyayo YOHANA 17 Bible Online

YOHANA 17 - Doyayo bible

YOHANA 17

¹Yɔ Yeesu booya̧a̧ anbɔ pɛɛ lɔlɔ bɛtha zɔ̧b Bɛto a Baa, ɔ̧tɔ riiri, ɗɔbsum waa mɔ beya an bee be ɗɔbsum be.

²Mɔ gaab tɛŋk a dood zulha sɛw be an be gaa dood wɔ mɔ gaahi be naan du sɛw za̧a̧tig faa.

³Za̧a̧tig faa bɔ hinɔ gɛrɛ: hí mɛɛ a mɔɔ gi Bɛt rɔb mɔ gbunu, hí wɛɛ hí mɛɛ Yeesu Kristu yɔ mɔ yaazige.

⁴Be ɗɔbsum hɛbtdi, be wɛɛ be da̧a̧s woos yɔ mɔ gaazib nɛ an be woo.

⁵Yɛrɛ Baa, gaabe gbɔlumsɛ a mɔ muutdu an gbɔlums yɔ be gin nɛ a mɔ dɔŋdi yɔ waal ki̧y nɛ ket gɛ.

⁶Be mits dood wɔ mɔ loohi a waal du mɔ gaab nuŋg mɔ an hi mɛɛmɔ; hi gi nɛ dood mɔɔnɛ, mɔ loohi mɔ gaabe, hii be hi wa̧a̧ dɔgl mɔ hi kpoos du.

⁷Yɛrɛ hi mɛɛ a hinyɔ mɔ gaazib sɛw fu̧u̧z a mɔɔge.

⁸Be gaahi dɔgl yɔ mɔ gaabe, be dɔksihi dɔglɔ hi ta̧a̧. Hi mɛɛ rɔbtɔnɔ a be fu̧u̧z mɔɔge, hi ɗɔbs a mɔɔ yaazibe.

⁹Be zɔ̧bsig hii mɔya, bé zɔ̧̄bs waal gɛ. Be zɔ̧bsig dood wɔ mɔ gaab hii mɔya. Hi gi dood mɔnɛ be.

¹⁰Wɛɛ hinyɔ be gin sɛw gi mɔɔnɛ, hinyɔ mɔ gin be, gi beenɛ. Gbɔlums be mid hi zulɛ.

¹¹Yɛrɛyɔ be rék a mɔɔge, be taa ɗɔɔtig ma a waal du, hii be, hi gi waal du kete. Baa Gaati, oomɔhi a nuŋg mɔ yɔ mɔ gaabe tɛŋk du, hi ɔksa gbunu an wɛɛ yɔ wɛ gi gbun be.

¹²Yɔ be gi hi hii a waal du be gihi ook a mɔ nuŋg du. Be oo dood wɔ mɔ gaabe, zaa gbun wāg hi teesdu gɛ; gɛ za̧a̧nyɔ gɔ gi wagɔ an hinyɔ hi bi̧i̧ mɔ ɗɛɛrwol du gi wooyyɔ .

¹³Yɛrɛ be gi rek mɔɔge ɓɔryɔ. Be dɔk hin yɛrɛ waal du an hi dag hat be an kpoosya̧ gi kpɛ̧ɛ̧ gi daarlɛlɛ.

¹⁴Be gaahi dɔgl mɔ, wɛɛ waal hɛ̧ɛ̧nihi lɔlɛ. Hi taa dood waalduyaadɛ an bee yɔ be taa doo waalduya be, ya̧a̧nɛ.

¹⁵Bé zɔ̧̄mɔ an mɔ ha̧sihi waal du gɛ, be zɔ̧mɔ an mɔ oohi a hinha̧a̧l du.

¹⁶Hi taa dood waalduyaadɛ an bee yɔ be taa doo waalduya be.

¹⁷Gogsumɔhi hinrɔbo an hi wɛɛ dood mɔ gaatɛ. Dɔgl mɔ gii gi hinrɔbo.

¹⁸Be yaahi waal du an mɔɔ yɔ mɔ yaazib waal du be.

¹⁹Bee hi zul be, be gaam muul be sɛw a hi dɔŋgo an be wɛɛ doo mɔ gaati an hii be, hi wɛɛ dood mɔ gaatɛ hi rɔbo.

²⁰Be taas hii zɔ̧k kpɔd. Be gi zɔ̧bsig dood zaadɛ wɔ gɔ hi ɗɔbsib hɛw, wɔ gɔ hi ɗɔbsib a hinyɔ dood wɛrɛ gɔ hi dɔksihi be zulha gi dɔŋgo.

²¹Be gim zɔ̧k an hi sɛw hi ɔks gbunu. Baa, an hi ɔks gbun hi wɛya, anyɔ mɔɔ mɔ ɔks hi beya, bee be, be gi gbun hi mɔya. Ɔksihi gbunu an waal gi ɗɔbsɔ a mɔɔ yaazibe.

²²Be gaahi gbɔlums yɔ mɔ gaazibe an hi gi gbunu an wɛɛ yɔ wɛ gi gbun be.

²³Bee be gi gbun hi hiya, wɛɛ mɔɔ be mɔ gi gbun hi bee be. Gɔmɔ an hi ɔks gbun bɛttɔnɔ an waal gi mɛɛ a mɔɔ yaazibe, gi wɛɛ gi mɛɛ a ha̧a̧mɔ a hii be anyɔ ha̧a̧ mɔɔ a bee be.

²⁴Baa, ha̧a̧be an lɛlyɔ be gige, dood wɔ mɔ gaab naan du hi gi hi bee a lɛlɔge hɛw an hi gbɛn gbɔlums be, gbɔlums yɔ mɔ gaazibe anyɔ ha̧a̧mɔ a bee doosi yɔ da waal ki̧ydir nɛ gɛ.

²⁵Baa riiti, waal mɛɛmɔ gɛ, benɛ be mɛɛmɔ. Hii be hi mɛɛ a mɔɔ yaazibe.

²⁶Be goksihi nuŋg mɔ an hi mɛɛmɔ, bé wɛɛ bé goksihi nuŋg mɔ ɓɛ an ha̧a̧k yɔ ha̧a̧ mɔɔ a be muulɛ gi hi̧i̧s kpoosya̧, bee be woo a hi kpoos du be.