Read Doyayo YOHANA 2 Bible Online

YOHANA 2 - Doyayo bible

YOHANA 2

¹Yɛms yɔ tal eerɛ lottins gi a Kana a Galile. Yeesu nɔɔtɔ re gi lɛlɔge be.

²Hi el Yeesu hi walɛsɛrɛ ɔ̧ɔ̧ wɔ hi rek a lottins lɛl bɔ ge be.

³Dood wɔ hi lekhinɛ hi yɔ̧k bumhob be. Yɔ bumhob bɔ da̧a̧, Yeesu nɔɔtɔ raage a hi taan bumɛ, bum hob bɔ da̧a̧da̧.

⁴Yeesu ta̧a̧ge a naadyɔ, dɔgl mɔ nɔ du hi beya? Ɔ̧t be riidir gɛ.

⁵Nɔɔtɔ re raa woosya wɔ a hinyɔ Yeesu gɔ gi raan sɛw woon hinɔ.

⁶Hɔnɛ Yahuduya maakdɔn gbɔlɛ wɔ hi wɔmn bet hi gi di nɔɔn-gbun be, maakdɔn wɔ Yahuduya wɔ gɔ hi hotingo mɛm du an ɓi̧i̧limya̧ gi da̧a̧. Dɔn wɔ sɛw buuya̧ yɔ loo an liitre yɔ̧ɔ̧lɔ nɔɔnɛ.

⁷Yɔ anbɔ Yeesu ɗun raa woosya wɔ a hı̧̀ı̧̀sin dɔn wɛrɛ hi mɛmɛ. Wɔrɔ hi hı̧̀ı̧̀sil dɔn gbɔlɛ wɔ hi mɛm rasras.

⁸Wɛɛ raahi a kɔn mɛm bɔ nɛ kams lottinsnaab zulya bɔ gi yɔ̧.

⁹Hi kɔ̀bɔ̀ hi kamsige. Yɔ naabzulya bɔ dag mɛm bɔ hi zɛmr gi wɛɛ bumhobo, mɛ̄ɛ̄ lɛlɔ fu̧u̧z du gɛ. Woosya wɔ hi kɔbz nɛ mɛm bɔ ya̧nɛ hi mɛɛmɛ. Lottins naabzulya bɔ el wal nislookya bɔ

¹⁰raage a dood sɛw, gɔ hi kamz nɛ bumhob rɔb yɔ hɛ̧ɛ̧m gii hi gaa dood doosi; gɔ hi yɔ̧ riihi, kuudu wɛɛ kamz ma yɔ hɛ̧ɛ̧m kaasi. Yɛrɛ mɔɔ mɔ gbaa bum yɔ hɛ̧ɛ̧m gis te ya?

¹¹Gɛrs biitir yɔ Yeesu yɛɛl gi gɔ a Kana a Galile giibɔ an gi zuun gbɔlumsɔ. Yɔ walɛsɛrɛ ɔ̧ɔ̧ wɔ hi gbɛn anbɔ hi ɗɔbsig gɔ.

¹²Yɔ hin wɔrɔ hi daa sɛwi Yeesu wɛɛ ɗund rek a Kapɛrnayum hi nɔɔtɔ, hi yɛ̧ɛ̧dɛ ɔ̧ɔ̧ hi walɛsɛrɛ ɔ̧ɔ̧ be. Hi waa hɔ ɔ̧t kaasi.

¹³Yɔ Yahuduya Paska naab bɔ gi sɛ̧ɛ̧biko, Yeesu dɔɔ a Urusalima, da gul Bɛtluk du.

¹⁴Yɔ gulɔ zɛm dood hi zebtig naa wɔ, hi tam wɔ hi gutu wɔ hi tus-i̧i̧kya wɔ a Bɛtluk bɔ gedu hi ɗɔɔtugo.

¹⁵Loo ba̧a̧ni haŋ kpooti nininihi a Bɛtluk bɔ gedu hi sɛw hi tamya̧ wɔ hi naaya̧ wɔ, wɛɛ yɛlk tus-i̧i̧kya wɔ tusya̧, yaatir tɛ̧ɛ̧hɛɛk wɔ gɔ hi ɓɛrk tus hage.

¹⁶Wɛɛ raa wɔ hi zebtig gutu: a ha̧sin hin wɛrɛ hɛdi ma mi! Bɔnɛ wɛɛn Baa be lukɔ an hinriŋsluko!

¹⁷Walɛsɛrɛ ɔ̧ɔ̧ wɔ hi mɔk dɔgl yɔ Bɛt ɗɛɛrwolɔ raa nɛko a Bɛto, luk mɔ bɔ hatɔ gi kak be kpoos du an laa!

¹⁸Yahuduya wɔ hi warige a mɔ gisiw nɔ gɛrsɔ zuunik an wi mɛɛn a mɔ gin tɛŋk an mɔ woo hin wɛrɛ lɛ nɔ?

¹⁹Yeesu goohi a ɛ̧brin Bɛtluk yɛrɛ, bee be wɛɛ be wɔŋge ɔ̧t taarɛ.

²⁰Wɔrɔ hi raage a hi wɔm Bɛtluk yɛrɛ wɛl dumbili nasɔ daa nɔɔn-gbunu, mɔɔ mɔ wɛɛ mɔ raa ri: a be wɔm ɔ̧t taar nɔ?

²¹Gii be dɔg Bɛtluk bɔ dɔglɔ goksin muul ɔ̧ɔ̧nɛ.

²²Kuudu, yɔ rɛmla a wɔrk du, walɛsɛrɛ ɔ̧ɔ̧ wɔ hi mɛks a raan hinɔ giya, hi wɛɛ hi ɗɔbs Bɛt ɗɛɛrwol wɔ hi dɔgl yɔ Yeesu dɔg nɛko.

²³Yɔ Yeesu gi nɛ a Paska naab bɔ gedu a Urusalima, dood kittɔnɔ hi ɗɔbsige anyɔ hi gbɛnig gi wook gɛrs wɔ.

²⁴Yeesu mɛɛhi sɛw mɔ̄kihi gɛ.

²⁵Yɔ mɛɛ hinyɔ gi doo kpoos du sɛw hi zulɔ, ha̧a̧g an doo za gi dɔgsig doo za dɔgl ma gɛ.