Read Doyayo YOHANA 20 Bible Online

YOHANA 20 - Doyayo bible

YOHANA 20

¹A dimaas ɔ̧t bi̧i̧ltɔnɔ Mariyama a Magdala rek a Yeesu loorlɛl bɔ ge, lɛl da gaadir nɛ rɔbtɔnɔ ket gɛ. Yɔ tuurɔ gbɛn hi ha̧s loorbet bɔ ha̧sɔ.

²Nis bɔ yɔ gbɛn anbɔ nɔɔ rek a Simɔŋ Piyɛr ge hi a Yeesu walɛsɛrɛ ɔ̧ɔ̧ za gbun yɔ Yeesu ha̧a̧g gi muul ge, raasihi a Waar bɔ wɔrkɔ bɔ hi a̧a̧d a loor du, be mɛ̄ɛ̄ lɛlyɔ hi gbaag du gɛ.

³Piyɛr hi walsɛr bɔ hi tuuz hi rek a loorlɛl bɔ ge.

⁴Hi nɔɔ, hi rek, hi eer sɛw. Hɔnɛ walsɛr zaa bɔ nɔɔ daar Piyɛr dihɔ dor a loorlɛl bɔ ge;

⁵yɔ tuurɔ hu̧u̧r lɛ, yoo lɔl a loor du, wɛɛ gbɛn gbandil wɔ hi wɔbtinge a hɛbtdi a lɛlyɔ hi hog nɛ Yeesu wɔrkɔ ge. Anyɔ gɔ gi gul loor gbeet bɔ gedu be, gul gɛ.

⁶Wɛɛ Simɔŋ Piyɛr fɔbzig kuudu zaa tuurɔ gbor gulk a loor bɔ gedu gbɛn gbandil wɔ hi gidi,

⁷hi gbandil fɛɛt bɔ hi yɛ̧ɛ̧n nɛ Yeesu zulɔ bɔ ɔks hi gbandil zaadɛ wɔ gɛ, kɔm wɔbiy gi gbunu a aakil du.

⁸Hɔnɛ walsɛr zaa bɔ doz nɛ a loorlɛl bɔ ge gul hɛw, yɔ gbɛn hin wɔrɔ ɗɔbs gɔ.

⁹Hí kɛ̄m nɛ hinyɔ Bɛt ɗɛɛrwol raa nɛ a gi an Yeesu gi rɛml a wɔrkɛ teesdu rɔbtɔnɔ kɛn gɛ be.

¹⁰Yɔ anbɔ walɛ-sɛrɛ wɔ hi wɛɛ hi lɛl be.

¹¹Mariyama er a loor ya̧a̧gbar bɔ ge gi kaako. Yɔ gi kaako hu̧u̧rɔ yoo lɔl a loor bɔ gedu.

¹²Gbɛn Bɛt walɛsɛrɛ eerɛ hi heg gbandil buudɛ muulɛ hi ɗɔɔtig a lɛl bɔ hi hog nɛ Yeesu wɔrkɔ ge: gbunu ɗɔɔt a zullɛl bɔ hi gbaag nɛ ge, zaa gbunu a dɔɔ-lɛl bɔ hi gbaag nɛ ge.

¹³Bɛtwa-lɛsɛrɛ wɔ hi warige a naadyɔ, mɔ kaak nɔ? Gii ta̧a̧ a yɔ hi ha̧s waar be wɔrkɔ bɔ gii be kaako, wɛɛ bé mɛ̄ɛ̄ lɛl yɔ hi gbaag du hɛw gɛ.

¹⁴Yɔ dɔg anbɔ zɛmrɔ gbɛn Yeesu gi erko, mɛɛ a Yeesu gii gɛ.

¹⁵Yeesu warige a naadyɔ, mɔ kaak nɔ, mɔ ɓɛɛk nɔ ɔnɛ? Nis bɔ mɔk a za̧a̧nbakya bɔ gii gib warko. Wɛɛ raage a ɗɛntyɔ, gid mɔɔ loo Yeesu wɔrkɔ bɔ raasibe lɛlɔ mɔ gbaa du, be re be loozɔ.

¹⁶Yeesu elige a Mari-yama! Mariyama wɛɛ zɛmrɔ ta̧a̧ a Rabuni, a Ibraniŋko ya̧a̧boon du raakɔ a Hingokya.

¹⁷Yeesu raage a bɔmɔ ki̧i̧be, be kadir a Baa be ge ket gɛ. Yɛrɛ rekumɔ mɔ zɛm yɛ̧ɛ̧dɛ be hiya, mɔ raasihi a be dɔɔk a Baa be yɔ gi Baa nɛ ge, hi a Bɛt be, yɔ gi Bɛt nɛ ge.

¹⁸Mariyama a Magdala rekɔ raas Yeesu walɛsɛrɛ ɔ̧ɔ̧ wɔ a be gbɛn Waar bɔ, gii raasib hin wɛrɛ sɛw.

¹⁹A ɔ̧t gbun bɔ lɛɛsigɔ gedu a dimaas ɔ̧t biitir bɔ ge du, walɛsɛrɛ ɔ̧ɔ̧ wɔ hi mɔks a luk za du hi kpɛ̧ɛ̧tɔ, yɔ hoob gihi ha̧a̧k Yahuduya wɔ. Yaala Yeesu zaa mid hi teesdu raahi a ɗɔɔtil saŋtum gi hi nɛya!

²⁰Yɔ dɔg hin bɔrɔ anbɔ zunsihi naanɔ wɔ hi yɛ̧brɔ bɔ. Yɔ walɛsɛrɛ ɔ̧ɔ̧ wɔ hi bɛɛg gbɛnko hi dag hato.

²¹Yeesu wɛɛ raahi a ɗɔɔtil saŋtum gi hi nɛya, bee be yaan waal du anyɔ Baa be yaazib waal du be.

²²Yɔ dɔg anbɔ ul zɛk hi zulha, raahi a zen Bɛt Mɔkilɔ.

²³Dood wɔ gɔ nɛ bitsihi hinha̧a̧lya̧, hinha̧a̧lya̧ gi bisɔ. Dood wɔ gɔ nɛ wa̧a̧ hinha̧a̧lya̧, hinha̧a̧lya̧ gi wa̧a̧y be.

²⁴Yɔ Yeesu mits walɛsɛrɛ wɔ, koobl daa eer wɔ zaaya̧ gbun bɔ nuŋgɔ a Tumas Kumbili, taatin ma hi naaza wɔ ɔksi.

²⁵Walɛsɛrɛ zaadɛ wɔ hi fɔksige a wi gbɛn Waar bɔ gbɛnɔ. Gii wɛɛ raa be a bé gbɛ̄n pɔnti wɔ hi doo gi naan du taalya̧ gɛ, be yāā naanwal be a pɔnti lɛl wɔ hi doo gedu gɛ, be yāā naan be a yɛ̧brɔ bɔ gedu gɛ, be taa nɛ ɗɔbsig zaŋ.

²⁶Ɔ̧t yɔ tal di gɛ̧ɛ̧sɛ, Yeesu walɛsɛrɛ ɔ̧ɔ̧ wɔ hi wɛɛ hi ɗɔɔtig a luk du ɓɛ, Tumas gi du be hi hiya. Gbɔnɔ wɔ hi kpɛ̧ɛ̧t be. Yeesu zaa mid hi teesdu ɓɛ raahi a ɗɔɔtil saŋtum gi hi nɛya!

²⁷Kuudu wɛɛ raa Tumas a yaazum naanwal mɔ bɔ hɛdi mɔ wɛɛ mɔ sɔ̧ɔ̧ naan be wɔ; yɔdzum naan mɔ mɔ wɛɛ mɔ kiin yɛ̧br be. Bɔmɔ faa zaa, ɗɔbsum kpɔd.

²⁸Tumas raa a Waar be! Bɛt be!

²⁹Yeesu raage a yɔ mɔ gbɛnib ro mɔ ɗɔbsɔ. Hat gis dood wɔ hi gbɛnib gɛ hi ɗɔbsɔ.

³⁰Yeesu wɛɛ woo gɛrs hinmɛksingoya zaadɛ kittɔnɔ a walɛsɛrɛ ɔ̧ɔ̧ wɔ hi muutdu, hi bi̧i̧ gɛrsya̧ a ɗɛɛrwol yɛrɛ gedu gɛ.

³¹Yɛrɛ hi bi̧i̧ hin wɛrɛ an nɛ ta̧a̧ a Yeesu gi Masihu bɔ giya, gi Bɛt Waawal giya, an nɛ wɛɛ nɛ ɗɔbsɔ nɛ dag za̧a̧tig a gi nuŋg du.