Read Doyayo YOHANA 21 Bible Online

YOHANA 21 - Doyayo bible

YOHANA 21

¹Yɔ kuudu anbɔ Yeesu wɛɛ zuns walɛsɛrɛ ɔ̧ɔ̧ wɔ muutɔ ɓɛ a mɛmbalya̧ a Tiberiya. Muutɔ bɔ zuunukɔ zuun nɛ rɛ gɛrɛ.

²Simɔŋ Piyɛr hi Tumas yɔ nuŋgɔ zaa a Kumbili, Nataniyɛl yɔ fu̧u̧ a Kana a Galile, Zebede waatwalɛ ɔ̧ɔ̧ wɔ hi Yeesu walɛsɛrɛ ɔ̧ɔ̧ zaadɛ eerɛ hi gi lɛlgbunu.

³Simɔŋ Piyɛr raahi a be rek dut wa̧a̧ko. Hi raage a wi retin hi mɔya. Hi tuu hi kar lɛmb du hi rekɔ. Yɔ hi rekɔ, yɛmsɔ gedu hi wa̧a̧ hinza gɛ.

⁴Yɔ lɛl gi gaako Yeesu zaa er a mɛmbal ya̧di. Wɔrɔ be hí mɛ̄ɛ̄ a Yeesu gii gɛ.

⁵Yeesu warihi a wāāt be wɛ, nɛ taan dut ya? Hi goo a hinza taaro.

⁶Yeesu raahi a gbalin zagr bɔ a lɛmb naanrɔbo nɛ wa̧a̧ dutu. Hi gbal gɔ. Yɔ hi gbalɔ dut wɔ hi leg hi hi̧i̧s a zagr bɔ gedu deder. Yɔ dut wɔ hi hi̧i̧s du hɔ anbɔ, hí ɗɛ̄ɛ̄ zagr bɔ wɛnzig a lɛmb du gɛ.

⁷Hɔnɛ walsɛr bɔ Yeesu ha̧a̧g gi muulɛ raa Piyɛr a Waar bɔ giya! Piyɛr be, da hod nɛ gbandilɔ an gi woowoos be. Yɔ lag a Waar bɔ giya, mal gbandilɔ bɔ see du, gi̧i̧ mɛmbal bɔ gedu.

⁸Walɛsɛrɛ zaadɛ wɔ hi zaan lɛmb bɔ hi diz zagr bɔ dut hi̧i̧s gedu a lɛmb kuudu. Lɛl bɔ sɛ̧ɛ̧b hi kasiŋ bɔ be. Hɛmlikɔ an hi taa dɔɔ yɔ̧ɔ̧lɔ nɔɔnɛ.

⁹Yɔ hi sil hɛbtdi hi gbɛn laa-ɛ̧ɛ̧ko hi dut hage hi koko.

¹⁰Yeesu raahi a kamzin dut wɔ nɛ wa̧a̧z zaadɛya̧.

¹¹Simɔŋ Piyɛr kar a lɛmb bɔ gedu diz zagr bɔ dut gbɔlɛ hi hi̧i̧s gedu yɔ̧ɔ̧lɔ nɔɔnɛ daatɔ dumbili nɔɔnɛ daa taarɛ. Hi mɔkɔ a dut bɔ tɔɔ gi daarlɛl gi taar zagr bɔ taarɔ, wɛɛ taar gɛ be.

¹²Yeesu elihi a zaan nɛ lehinɛ. Walsɛrɔ zaa gbun mɔk an gi warig a mɔɔ bɔ gɛ, anyɔ hi mɛɛmɛ a Waar bɔ giya.

¹³Yeesu sɛ̧ɛ̧bɔ loo kok bɔ gaahi, wɛɛ gaahi dut bɔ anbɔ be.

¹⁴Tuur dɔɔ taasimɛ Yeesu gi gis walɛsɛrɛ ɔ̧ɔ̧ wɔ muutɔ zuunik anyɔ bɛɛ ɗundig a wɔrkɛ teesdu a loor du.

¹⁵Yɔ Yeesu lehin gi da̧a̧, war Simɔŋ Piyɛr a Simɔŋ, Zonas waawalɔ, ha̧a̧m a be muul daar ha̧a̧tig ya̧nɛ bɔ ya? Simɔŋ goo a hɔɔ, Waar i, mɔ mɛɛ a harib hi mɔya. Yeesu raa a ɛ̧ɛ̧num tam be waat wɔ.

¹⁶Wɛɛ warig dɔɔ eesimɛ a Simɔŋ Zonas waawalɔ, ha̧a̧m a be muul ya? Piyɛr googe a hɔɔ, Waar i, mɔ mɛɛ a haribe hi mɔya. Yeesu wɛɛ raage a oom tam be wɔ.

¹⁷Yeesu warig dɔɔ taasumɛ, a Simɔŋ Zonas waawalɔ, harim be muul ya? Yɔ Yeesu warig hin dɔɔ taasim bɔ anbɔ, a harim be muul ya? Piyɛr miimɔ. Wɛɛ googe a Waar i, mɔ mɛɛ hin sɛw, mɔ mɛɛ a harib a mɔ muulɛ. Yeesu wɛɛ raage a ɛ̧ɛ̧num tam be wɔ.

¹⁸Be raasum rɔbo yɔ mɔ gi sɛrɔ mɔ heg hi̧i̧l mɔ see du mɔ naanɛ, mɔ rekɔ a lɛlyɔ ha̧a̧mɔ ge. Yɛrɛ gɔ mɔ wɔmɔ, mɔ́ yɔd naan mɔ, za̧a̧nza gi yɛ̧ɛ̧ naan mɔ wɔ, gi wɛɛ gi ka̧m a lɛl yɔ ha̧a̧m ge gɛ.

¹⁹Yeesu raahi n bɔ lab an gi zuun wɔrk yɔ Piyɛr gɔ gi wɔrɔ kuudu gi wɛɛ gi ɗɔbsin Bɛto. Yɔ anbɔ wɛɛ raage a fɔbzibe.

²⁰Yɔ Piyɛr zɛmr lɛ, gbɛn walsɛrɔ Yeesu ha̧a̧g gi muul gi zaak hi kuudu, walsɛr bɔ da yees nɛ a Yeesu kpoos du yɔ hi gi hinleko gi warige a Waar i, za̧a̧n bɔ gɔ gi rɛ̧ɛ̧m gɛ bɔ?

²¹Yɔ Piyɛr gbɛnige war Yeesu a Waar i, yɛrɛ gii be nɔ gi tursige?

²²Yeesu raage a an ha̧a̧be an gi waa gi tuur an be wɛɛz be zɛŋge, dɔgl mɔ gi du ya? Mɔnɛ fɔbzibe sa!

²³Hinɔ anbɔ ro dɔgl bɔrɔ gi hɛks a naaza hi teesdu a walsɛr bɔrɔ taa wɔrko. Bɔ lab Yeesu rāā Piyɛr gii a ɔnɛ taa wɔrk gɛ, raa a an ha̧a̧be gi waa gi tuur an be wɛɛza be zɛŋge, dɔglɔ taa du.

²⁴Yeesu walsɛr bɔrɔ gii gi book hin wɔrɔ dɔglɔ labɔ gii wɛɛ gi bi̧i̧ hinya̧, wɛ wɛɛ wɛ mɛɛ a dɔglɔ gi rɔbo.

²⁵Yeesu wɛɛ woo hinza kittɔnɔ ɓɛ. À hi bi̧i̧ nɛ hin wɔrɔ gbunu gbunu sɛw, dɔglɔ yɔ hi̧i̧s nɛ ɗɛɛrwol kittɔnɔ; mi mɔk a ɗɛɛrwolya̧ yɔ hi hi̧i̧s waal yɛ̧ltɔnɔ, waal yɔ riihi gɛ hɛw. Aanbɔ.