Read Doyayo YOHANA 3 Bible Online

YOHANA 3 - Doyayo bible

YOHANA 3

¹Wal za Farisaya giro, nuŋgɔ a Nikodɛm, gi Yahuduya waar yɔ.

²Zaa yɛms du a Yeesu ge raage a Hingokya , wi mɛɛ a mɔ gi hinmɛɛkya yɔ fu̧u̧z a Bɛt ge; yɛrɛ gɛrs wɔ mɔ wooko, doo za taa an gi ɗɛɛ wookɔ à Bɛt taa hi za̧a̧nɔ gɛ.

³Yeesu ta̧a̧ raage a be raasum rɔbo, doo gi mɔɔy dɔɔ eesim gɛ ɗɛ̄ɛ̄ an gi gbɛn Bɛt wáátɔ gɛ.

⁴Nikodɛm ɛrige a à za̧a̧nɔ gi nɛ ɗɛnti be yɔ wɛɛ yɔ mɔɔy hinɔ ri? Yɔ ɗɛɛ an gi wɛɛ nɔɔtɔ buu du an gi wɛɛ gi mɔɔy dɔɔ eesim ya?

⁵Yeesu ta̧a̧ a be raasum rɔbo: doo gi mɔɔy hi mɛmɛ hi Bɛt Mɔkilɔ gɛ, ɗɛ̄ɛ̄ an gi gul a Bɛt wáát du gɛ.

⁶Za̧a̧nyɔ mɔɔy hi muulɛ gi muulɛ, yɔ mɔɔy hi Bɛt Mɔkili gi Mɔkilyɔ.

⁷Yɔ be raam a gi an nɛ mɔɔy eesimɛ, bɔ hin bɔ lab gi kɔmsum gɛrsɛ.

⁸Zɛk fɛ gi rek a lɛlyɔ ha̧a̧g ge, mɔ lak nams yɔ gi gɔk be, wɛɛ mɔ mɛɛ lɛlyɔ gi fu̧u̧zig du gɛ, wɛɛ mɔ mɛɛ lɛlyɔ gi rek du gɛ. Za̧a̧nyɔ mɔɔy hi Bɛt Mɔkili gi anbɔ.

⁹Nikodɛm wɛɛ warige a hin bɔ lab rɛ yɔ wooy hinɔ ri nɔ?

¹⁰Yeesu googe a mɔɔ mɔ gi hingokya gbɔɔl a Israhila, mɔ wɛ̄ɛ̄ mɔ mɛɛ hin wɔrɔ lab gɛ ya?

¹¹Be raasum rɔbo: wi raak hinyɔ wi mɛɛ giya, wi book hinyɔ wi gbɛn dɔglɔ giya, wɛɛ nɛ ta̧a̧ dɔgl winɛ bɔ gɛ.

¹²Gɔ be dɔksin hinwɔ hi talik hɛbtdi, nɛ ɗɔ̄bsib gɛ! À be dɔksin hinyɔ gi talik bɛtha rɛ, yɔ nɛ ɗɔbs hinɔ ri?

¹³Doo za kadir a bɛtha gɛ, gɛ Za̧a̧n Waa bɔ siz a bɛtha kpɔd.

¹⁴Anyɔ Muusa pɛɛ beks yɔ hi gɔn tushob a tɛ̧ɛ̧ muul a hɛtdɔŋ du, Za̧a̧n Waa bɔ gi pɛɛy anbɔ be,

¹⁵an za̧a̧nyɔ gig ɗɔbsig sɛw gi za̧a̧ faa.

¹⁶Hinɔ anbɔ ro Bɛt gi ha̧a̧g dood waal du gbɔɔltɔnɔ gi gaaz waaɔ gbunsimi an za̧a̧nyɔ ɗɔbsig sɛw kolɔ taa wako gin za̧a̧tig faa.

¹⁷Bɛt yāāz waaɔ a waal du an gi gbaas waal dɔgl gɛ, yaazig an gi za̧a̧s dood waal du.

¹⁸Za̧a̧nyɔ ɗɔbs waa bɔ, hi taasig dɔgl gbaako. Za̧a̧nyɔ ɗɔbsig gɛ dɔgl matig da̧a̧da̧, anyɔ ɗɔbs Bɛt waa gbunsum bɔ gɛ.

¹⁹Lɛlyɔ dɔgl-gbaak gi ge gɛrɛ: lɛlgaal zaa a waal du, wɛɛ dood ha̧a̧hi lɛlwil bɔ giigi daar lɛlgaal bɔ anyɔ woosya̧ ha̧a̧lɔ.

²⁰Yɔ anbɔ za̧a̧nyɔ gi wook hinha̧a̧lɛ, hā̧a̧g lɛlgaal gɛ. An gɔ gi zaa a lɛlgaal du, hoobha̧a̧gha̧ an bɔ woosɔ ha̧a̧l wɔ hi midɔ.

²¹Za̧a̧nyɔ ɔɔ mɛldɔgl gi gi fɔk rɔb be, zaa a lɛlgaal du an hi gbɛn woosɔ rɔbɛ wɔ woo hi Bɛt tɛŋkɔ.

²²Yɔ hin wɔrɔ hi tal sɛwi, Yeesu rek hi walɛsɛrɛ ɔ̧ɔ̧ wɔ a Yahuduya hɛbt du, waa hɔ hi hiya, gi hotingo dood Bɛtmɛmɛ.

²³Yohana hɛw gi hotingo dood Bɛtmɛm a Ayinɔn, a Salim dɔŋdi. Mɛm gi hɔ gbɔɔltɔnɔ be. Dood hi zaako gihi hotingo Bɛtmɛmɛ.

²⁴Yɔ anbɔ Yohana da gudir nɛ a luknɔ du gɛ.

²⁵Yohana walɛsɛr ɔ̧ɔ̧ hi yɛɛl hinfaltingo gɔ hi Yahuduya za a maakya̧ muulgaasig dɔŋgo.

²⁶Hi zaa hi zɛm Yohana hi dɔgsige a Hingokya , Za̧a̧n bɔ gi nɛ hi mɔɔ a Urdum zɛ̧ɛ̧rnɔ kasiŋ za, Za̧a̧nyɔ mɔ boosuw nɛ dɔglɔ gi hotingo dood Bɛtmɛmɛ, wɛɛ dood sɛw hi rek a ge.

²⁷Yohana goo a doo za ɗɛ̄ɛ̄ an gi dag hinza gɛ, gɛ hinyɔ Bɛt gaage.

²⁸Nɛɛ hi zul nɛ nɛ kɛmbe a be dɔgɔ a be taa Masihu bɔ, hi yaazib ɔnɛ a Za̧a̧n bɔrɔ gi muutdu.

²⁹Nislookya bɔ gii gi niszulya, wɛɛ saamɔ bɔ gi erk gi dɔŋdi gi gisig kɛŋko, gɔ lag nislookya bɔ kɔlkɔ dag hat gbɔɔltɔnɔ. Yɔ anbɔ hat benɛ bɔ gi hat gaatyɔ.

³⁰Gi an gii gi tɔɔ, wɛɛ bee be, be ɓɛ̧ɛ̧rɔ.

³¹Za̧a̧nyɔ fu̧u̧z a wɛɛha gi a hin zulha sɛw. Za̧a̧nyɔ fu̧u̧ a hɛbtdi gi hɛbtumyɔ, gi boo hɛbt dɔgl be. Za̧a̧nyɔ fu̧u̧ a bɛtha gi a hin zulha sɛw.

³²Hinyɔ gbɛnɔ hi hinyɔ lagɔ gi dɔk giya, wɛɛ doo za ta̧a̧ dɔglɔ bɔ gɛ.

³³Za̧a̧nyɔ ta̧a̧ dɔglɔ sɛw raa gaatɔ gii a Bɛt gi rɔbo.

³⁴Za̧a̧nyɔ Bɛt yaazige gi dɔk hinyɔ Bɛt gi dɔk sɛw. Yɔ anbɔ Bɛt gāāzig Mɔkilɔ hi wel gɛ.

³⁵Baa Bɛt ha̧a̧g a waaɔ bɔ gi muulɛ, wɛɛ gbaa hin sɛw a gi naan du.

³⁶Za̧a̧nyɔ ɗɔbs Waa bɔ gin za̧a̧tig faa; za̧a̧nyɔ kɛ̄ms waa bɔ tɔn gɛ, taa gbɛnik za̧a̧tig bɔ, wɛɛ Bɛt nɔɔtigɔ gi waak gi zulha.