Read Doyayo YOHANA 5 Bible Online

YOHANA 5 - Doyayo bible

YOHANA 5

¹Yɔ kuudu anbɔ Yahuduya wɔ naabya̧ za giro, Yeesu dɔɔ a Urusalima be.

²A Urusalima, mɛmzɛɛl hotillɛl gi a tamluk gbarya̧ nuŋgɔ a Ibraniŋko ya̧a̧boon du a Baytizaada, hi wɔm zekslɛl nɔɔnɛ hi gɔ̧ɔ̧nige.

³Gumtil kittɔnɔ an yɔ̧ɔ̧rɛ wɔ, dɔɔ gumtilya wɔ hi dood zaŋdɛ wɔ hi ɗɔɔt a zekslɛl wɔ gedu [hi ook mɛm bɔ naŋkɔ, an hi sil gedu.

⁴Bɛtwalsɛr za gɔ siz nams mɛm bɔ a mɛmzɛɛl bɔ gedu. Yɔ bɛɛ mɛm bɔ namsig anbɔ, za̧a̧nyɔ gɔ sil gi dorɔ za̧a̧za̧, an gin nɔ gumsɔ hɛw. ]

⁵Wal za gumtil gi nɛ waak kusig hɔdi, gumsɔ loo wɛl dumbili taarɛ daatɔ gɛ̧ɛ̧sɛ.

⁶Yɔ Yeesu zaa gi gbɛnig a kusillɛl di mɛɛmɛ a gin gumsɔ amntyɔ; ɛrige a ha̧a̧mɔ an mɔ za̧a̧ ya?

⁷Gumtil bɔ ta̧a̧ge a Ɗɛntyɔ, be taan doo za an gi sisib a mɛmzɛɛl bɔ gedu yɔ mɛm bɔ gɔ gi naŋko. Wɛɛ yɔ gɔ be mɔk muul be an be silɔ, doo za dor siil ma a be muutdu.

⁸Yeesu raage a ɗukumɔ, loom sil mɔ mɔ ɛmbɔ.

⁹Ɓɔrbɔ wal bɔ za̧a̧za̧, loo silɔ ɛmb rekɔ. A ɔ̧tɔ ge gi holum-ɔ̧t be.

¹⁰Yɔ Yahuduya wɔ hi gbɛn za̧a̧n bɔ hi za̧a̧sig gi ɛmbik anbɔ hi raage a nɛɛk holum-ɔ̧tyɔ! Maak wɛ gaam gbɔnɔ an mɔ pɛɛ sil mɔ a holum-ɔ̧t du ya?

¹¹Goohi a za̧a̧nyɔ za̧a̧sibe raabe a loom sil mɔ mɔ ɛmbɔ, bee be loo sil be be ɛmb gɔ be.

¹²Hi warige a bɔ walɔ raam a loom sil mɔ mɔ ɛmb nɔ?

¹³Hɔnɛ wal bɔ hi za̧a̧sig be mɛ̄ɛ̄ za̧a̧nɔ gɛ. Yeesu be da tuu nɛ ɔɔ saal lɛl bɔ rek be.

¹⁴Kuudu Yeesu rek a Bɛtluk du zɛŋge raage a yɛrɛ mɔ za̧a̧ gɔ, ɔɔm hinha̧a̧l mɔ wɔ, an bɔ hinza yɔ daarlɛl gi zɛ̧mɔ.

¹⁵Wal bɔ rek raas Yahuduya wɔ a Yeesu gii za̧a̧sibe.

¹⁶Yahuduya wɔ hi yɛɛl Yeesu ya̧a̧ɗantig tɛmnik an hi gbɔŋge a woosɔ bɔ gi wook a holum-ɔ̧t du gi dɔŋgo.

¹⁷Hɔnɛ gii wɛɛ goohi a yɛrɛ Baa be gi waak hinrɔb wooki, bee be hinrɔb wook be.

¹⁸Yɔ anbɔ Yahuduya wɔ hi wɛɛ hi gig tɛk hi tɛŋko an hi gbɔŋge. Hi tɛ̄ge a yɔ ha̧tir holum-ɔ̧t bɔ gii kpɔd gɛ, hi tɛge a yɔ raa a Bɛt gi Baa be giya, gi goksingo zulɔ hi Bɛt giya.

¹⁹Yeesu wɛɛ raahi a be raasin rɔbo: waawal bɔ ɗɛɛ an gi woo hinza hi zulɔ gɛ, gɛ gi wook hinyɔ gbɛn Baa bɔ gi wooko. Hinyɔ Baa bɔ gi wook sɛw, Waawal bɔ gi wook hin gbun bɔ giya.

²⁰Yɔ anbɔ Baa bɔ ha̧a̧g a waawal muulɛ, wɛɛ gisig zuunik hinyɔ gii gi wook sɛw hi zulɔ. Gii gi wɛɛ gi zunsig woos gbɔlɛ wɔ hi tɔɔ hi daarlɛl an hin gi wɛɛsin gɛrsɛ.

²¹Anyɔ Baa bɔ gi ɗunsig wɔrkɛ wɔ gi wɛɛ gi gihi gaak za̧a̧tigi, waawal bɔ gi gaak za̧a̧tig a za̧a̧nyɔ ha̧a̧g ge anbɔ be.

²²Baa bɔ taas doo za dɔgl gbaako, wɛɛ gàà waawal dɔgl yɔ gɔ hi gbaa sɛw naan du,

²³an dood sɛw hi ɗɔbs waawal bɔ anyɔ hi ɗɔbsig Baa bɔ be. Za̧a̧nyɔ ɗɔbs waawal bɔ gɛ, ɗɔbs Baa bɔ yaazig hɛw gɛ.

²⁴Be raasin rɔbo: za̧a̧nyɔ gi kɛŋk dɔgl be gi wɛɛ gi ɗɔbsig Za̧a̧nyɔ yaazib sɛw, gin za̧a̧tig faa, wɛɛ hi taasig dɔgl gbaako. Taz wɔrko, tuur a za̧a̧tig faa du.

²⁵Be raasin rɔbo: lɛlɔ gi riiko, tuur ma hɛw a lɛlyɔ wɔrkɛ wɔ gɔ hi lag Bɛt waaɔ kɔlkɔ ge. Za̧a̧nyɔ gɔ gi lagɔ gi za̧a̧.

²⁶Anyɔ za̧a̧tig gi fu̧u̧zig a Baa bɔ ge hi zulɔ, yɔ anbɔ gaa waaɔ bɔ tɛŋko an za̧a̧tig gi fu̧u̧ a ge hi zulɔ be.

²⁷Wɛɛ gaag tɛŋko an gi gbaa dɔglɛ anyɔ gi Za̧a̧n Waa bɔ.

²⁸Bɔ hin bɔ lab gi wɛɛsin gɛrsɛ, lɛlɔ gi riiko an wɔrkɛ wɔ hi gi loor du sɛw hi lag waawal bɔ kɔlkɔ

²⁹hi tuuzɔ. Dood hinrɔbwookya wɔ hi ɗund hi dag za̧a̧tigi, hinha̧a̧lwookya wɔ be hi ɗund hi dag dɔgl-gbaaki.

³⁰Bee be ɗɛɛ hinza wook hi zul be gɛ. Be gbaak dɔgl an hinyɔ Bɛt raabe, wɛɛ dɔgl be gbaak bɔ gi hi gbɔnɔ. Be taa ɓɛɛk hinyɔ ha̧a̧ beya, be ɓɛɛk hinyɔ ha̧a̧ Za̧a̧nyɔ yaazib giya, ya̧a̧nɛ.

³¹À be book dɔgl been a be zulha, dɔgl be yɔ taa dɔgl rɔbo.

³²Doo za gi raak dɔglɔ a be zulha, be mɛɛ a dɔglyɔ gi dɔk be zulha gi rɔbo.

³³Nɛ yaas Yohana doo, warig hinɛ, Yohana be raa hinrɔb a be zulha.

³⁴Benɛ hā̧a̧b doo za dɔglɔ yɔ gi book a be zulha an be zuun a bee bɔ zaanɔ gɛ. Yɛrɛ gɛ be gisin dɔk hin wɔrɔ an nɛ za̧a̧.

³⁵Yohana gi nɛ an pitila yɔ gi kak laa gi wɛɛ gi gaak giya; wɛɛ nɛ ta̧a̧ an nɛ dag hat am kaasi a gaakilɔ bɔ gedu.

³⁶Bee be gin dɔgl gbɔɔl daar Yohana ɔnɛ bɔ daarɔ; gɛ woos yɔ Baa be gaazibe an be da̧a̧sɔ. Woos wɔrɔ be wooko hi gi an ɗɛnt sɔɔlɛ hi raak a be zulha a Baa be gii yaazibe.

³⁷Wɛɛ Baa be yɔ yaazibe raa dɔgl be hi zulɔ hɛw; nɛ lāgdir kɔlkɔ gɛ, wɛɛ nɛ gbɛndir muutɔ gɛ hɛw.

³⁸Anyɔ nɛ ɗɔbs za̧a̧nyɔ Baa bɔ yaazig gɛ, Baa be dɔglɔ taa waak a nɛɛge.

³⁹Nɛ zaŋgig Bɛt ɗɛɛrwolɔ hi tɛŋko anyɔ nɛ mɔkig a be zɛm za̧a̧tig gbɔnɔ a gedu, wɛɛ Bɛt ɗɛɛrwol bɔ gi raak dɔgl be.

⁴⁰Wɛɛ hā̧a̧n zaak a beege an nɛ dag za̧a̧tig gɛ be.

⁴¹Benɛ hā̧ā̧be bantyɔ gɔ be dag a dood ge gɛ.

⁴²Be mɛɛ a nɛ taan Bɛt ha̧a̧tigɔ a nɛ kpoos du.

⁴³Be zaa a Baa be nuŋg du nɛ dagib gɛ. An doo za dɔɔmi zaa hi zulɔ ɔnɛ nɛ dagige.

⁴⁴Nɛɛ yɔ nɛ tɛk bant a doodɛ yɔ nɛ ɗɛɛ ɗɔbsugɔ ri? Nɛ́ ɓɛ̄ɛ bant rɔb yɔ gi fu̧u̧zig a Bɛt gbunsum bɔ ge gɛ be.

⁴⁵Bɔnɛ mɔk a bee be gɛ̧ɛ̧nin hinza a Baa bɔ gi muut du; za̧a̧nyɔ gin gɛ̧ɛ̧nik hinɛ gɛ Muusa, za̧a̧nyɔ nɛ gbaak mɔkil nɛ a ge a gi ɗaasinɛ.

⁴⁶À nɛ ɗɔbs nɛ Muusa, yɔ nɛ ɗɔbs bee hɛw. Muusa bi̧i̧ dɔgl been be.

⁴⁷Yɛrɛ anyɔ nɛ ɗɔbs hinyɔ bi̧i̧ gɛ, gi an nɛ ɗɛɛ dɔgl be ɗɔbsigɔ ri?