Read Doyayo YOHANA 6 Bible Online

YOHANA 6 - Doyayo bible

YOHANA 6

¹Yɔ anbɔ Yeesu tal a Galile Mɛmbal yɔ nuŋgɔ zaa a Tiberiya Mɛmbal kasiŋ zaabɔ ge.

²Saalzanɔ gbɔɔl fɔge anyɔ hi gbɛn gɛrs wɔ gi wook a gumtil wɔ hi muulɛ.

³Yeesu ɗund da dɔɔ a ga̧a̧t ha hi walɛsɛrɛ ɔ̧ɔ̧ wɔ.

⁴Hɔnɛ Yahuduya Paska naab gi sɛ̧ɛ̧bik be.

⁵Yɔ Yeesu pɛɛ yɔ̧lɔ anyɔ gi gbɛn saalzanɔ gbɔɔl gi zaak a ge, ɛr Filib a wɛ zɛm kokɔ ay an wɛ gaa dood wɛrɛ hi le nɔ?

⁶Gii ɛr Filib hin anbɔ an gi kɛm hinyɔ gɔ gi goosige. Gii mɛɛ hinyɔ gɔ gi woo nɛ hɛw.

⁷Filib raage a kok yɔ gɔ wɛ zeb tus gaat tɛmɛrɛ eerɛ yɔ rii an dood sɛw hi dag kaasi hɛw gɛ.

⁸Simɔŋ yɔ nuŋgɔ zaa a Piyɛr , yɛ̧ɛ̧tɔ Andrɛ, yɔ gi walɛsɛrɛ ɔ̧ɔ̧ wɔ zaaya̧ gbunu, raage:

⁹a walà za gi hɛdi gin kok kiml nɔɔnɛ hi dut dɛɛt eerɛ. Gi rii nɔ ma a dood kit wɔ hi muutdu nɔ?

¹⁰Yeesu raa walɛsɛrɛ ɔ̧ɔ̧ wɔ a raan dood wɔ hi ɗɔɔtɔ. Hɛtyɛ̧s gi lɛlɔge bubudug be. Walɛ wɔ hi ɗɔɔtɔ, kitigya̧ sɛ̧ɛ̧b an duk nɔɔnɛ.

¹¹Yeesu loo kok kiml wɔ baan Bɛto, wɛɛ raa hi gɛ̧ɛ̧s dood wɔ hi ɗɔɔt a hɛtyɛ̧s wɔ ha. Wɛɛ gɛ̧ɛ̧sihi dut wɔ anyɔ ha̧a̧hi.

¹²Yɔ dood wɔ hi le kok bɔ hi bɛɛ hi̧i̧ko, Yeesu raa walɛsɛrɛ ɔ̧ɔ̧ wɔ a mɔglin kok ɓɛɛkil wɔ hi zɛ̧ɛ̧rɔ, an bɔ hinza gi wagɔ.

¹³Hi mɔgl kok ɓɛɛkil wɔ hi hi̧i̧s dɛl koobl daatɔ eerɛ a kok kiml nɔɔn wɔ hi le gi zɛ̧ɛ̧r gedu.

¹⁴Yɔ dood wɔrɔ hi gbɛn gɛrs yɔ Yeesu woo anbɔ hi dɔgɔ: a wal yɛrɛ gi Bɛtya̧a̧kɛŋkya yɔ gɔ gi zaa nɛ waal du gii sa̧a̧nɛ!

¹⁵Yɔ Yeesu mɛɛ a hi zaak a ge an hi loog hi tɛŋko hi wɛɛnig Waar gbɔɔlɛ, zol wɛɛ dɔɔ a ga̧a̧t ha gi gbunu.

¹⁶Yɔ lɛɛsig tuurɔ Yeesu walɛsɛrɛ ɔ̧ɔ̧ wɔ hi tii a mɛmbal ya̧di,

¹⁷hi da hi kar a lɛmb du hi kar mɛmbal bɔ an hi rek a mɛmbal kasiŋ zaabɔ ge a Kapɛrnayum, yɛms bul da̧a̧ be. Yeesu zaadir nɛ a hii ket gɛ.

¹⁸Zɛk gi fɛk hi tɛŋko, mɛmɗukil wɔ hi kark be.

¹⁹Yɔ hi nuu lɛmb bɔ hi rek an kilomɛɛtre nɔɔnɛ, zaa nɔɔn-gbunu, hi gbɛn Yeesu ɛmzig a mɛmbal bɔ hage gi zaak a lɛmb lɛl bɔ ge. Yɔ hi gbɛnige hoobha̧a̧hiha̧.

²⁰Yeesu raahi a beya, bɔ hoob gi ha̧a̧nɛ.

²¹Yɔ anbɔ, ha̧a̧hi an hi loog nɛ a lɛmb bɔ gedu, wɛɛ ɓɔrbɔ hi tuur a lɛlyɔ gɔ hi sil nɛ ge.

²²Yoosugɔ yɔ saal wɔ hi kɔm hi erk a mɛmbal kasiŋ bɔ hɔ ge, hi mɔk a gɛ lɛmb gbun bɔ gi nɛ a lɛl bɔ ge kpɔd, hi mɛɛ be a Yeesu kār hi walɛsɛrɛ ɔ̧ɔ̧ wɔ a lɛmb bɔ gedu gɛ, walɛsɛrɛ ɔ̧ɔ̧ wɔ hi rek mukya̧.

²³Anyɔ lɛmb zaadɛ hi fu̧u̧z a Tiberiya hi zaa hi sɛ̧ɛ̧b a lɛlyɔ Yeesu baan Bɛto hi le kok ge,

²⁴yɔ dood saal wɔ hi gbɛn Yeesu taa lɛlɔge hi walɛsɛrɛ ɔ̧ɔ̧ wɔ hɛw gɛ, hi wɛɛ hi tal a lɛmb wɔ gedu, hi rek hi tɛb Yeesu a Kapɛrnayum.

²⁵Yɔ hi zɛŋg a mɛmbal kasiŋ zaa bɔ ge hi warige a Hingokya , mɔ zaa bil hɛdi be?

²⁶Yeesu goohi a be raasinɛ hi rɔbo: nɛ́ tɛ̄be a gɛrs hintuusingoya wɔ nɛ gbɛn be woo dɔŋgɔ gɛ, nɛ tɛb a kok yɔ nɛ le nɛ hi̧i̧ gi dɔŋgo.

²⁷Bɔnɛ woos lees yɔ gɔ gi da̧a̧ woosɛ, yɛrɛ woosin lees yɔ gɔ gi waa faa gii woosɛ. Za̧a̧n Waa bɔ gii gi gaan leesɔ. Gii gi Za̧a̧nyɔ Baa Bɛt gaag gbɔlums an hi mɛksinge.

²⁸Hi wɛɛ hi warige a gi an wi gɔ nɔ an wi woo Bɛt woosɔ wɔ ha̧a̧ge?

²⁹Yeesu goohi a Bɛt woosɔ gɛ: an nɛ ɗɔbs Za̧a̧nyɔ yaazige.

³⁰Wɔrɔ hi wɛɛ hi warige a mɔ wook nɔ gɛrsɔ an gɔ wi gbɛn wi ɗɔbsum nɔ? Mɔ wook nɔ woosɔ?

³¹Baa wi hi le kok gɛrsya bɔ nuŋgɔ a maanyɔ a hɛtdɔŋ du anyɔ Bɛt ɗɛɛrwolɔ raa a gaazihi kok a bɛtha an hi le.

³²Yeesu wɛɛ raahi a be raasin rɔbo, Muusa gāan kok yɔ fu̧u̧z a bɛtha gɛ, Baa be gii gin gaak kok rɔb bɔ fu̧u̧z a bɛtha.

³³Yɛrɛ Bɛt kokɔ gɛ Za̧a̧nyɔ siz a bɛtha gi wɛɛ gi gaak dood waal du za̧a̧tigi.

³⁴Hi raage a Ɗɛntyɔ, gaawi kok bɔrɔ faa.

³⁵Yeesu raahi a bee gi kok za̧a̧tigya, za̧a̧nyɔ zaa a be, a̧a̧kil taag zaa ha̧a̧k nɛ zaŋ, wɛɛ za̧a̧nyɔ ɗɔbsibe mɛm taag ha̧a̧k nɛ zaŋ.

³⁶Yɛrɛ be raasinɛ a nɛ gbɛnibe, wɛɛ nɛ ɗɔbsib gɛ.

³⁷Dood wɔ Baa be gib gaak sɛw hí zaa a be; za̧a̧nyɔ gɔ gi zaa a be, be taag nɛ bisig zaŋ.

³⁸Yɛrɛ be siz a bɛtha an be woo hinyɔ ha̧a̧ Za̧a̧nyɔ yaazib giya, taa hinyɔ ha̧a̧ beya.

³⁹Hinyɔ ha̧a̧ Za̧a̧nyɔ yaazib gɛrɛ: ha̧a̧g an dood wɔ gaab sɛw, bɔbe waks zaaya̧ gbunu, gɔ gi ɔ̧t kuud bɔ gedu, be wɛɛ be ɗunsihi a wɔrk du.

⁴⁰Hinyɔ Baa be ha̧a̧g gɛrɛ: an za̧a̧nyɔ gbɛn waawal bɔ gi ɗɔbsige gi dag za̧a̧tig faa, be wɛɛ be ɗunsige a wɔrk du a ɔ̧t yɔ̧ɔ̧sum bɔ gedu.

⁴¹Yahuduya wɔ hi dɔn hinyɔ Yeesu raa a be gi kok yɔ siz bɛtha giya.

⁴²Hi raa a nɛ Yeesu bɔ za̧a̧nɔ Yusufu waawal gii ma mi? Wɛ mɛɛ baatɔ hi nɔɔtɔ be, yɔ wɛɛ yɔ raa ri ma a be siz bɛtha nɔ?

⁴³Yeesu goohi a bɔnɛ dɔntinu.

⁴⁴Doo za ɗɛ̄ɛ̄ an gi zaa beege gid Baa be yɔ yaazib dizig hi Mɔkilɔ gɛ. Bé wɛɛ bé ɗunsig a ɔ̧t kuud bɔ gedu.

⁴⁵Bɛtya̧a̧kɛŋkya wɔ hi bi̧i̧ dɔglɔ a dood sɛw Bɛt gi goksihi hinɛ. Gɔ gi anbɔ za̧a̧nyɔ lag Baa bɔ ya̧a̧ɔ gi wɛɛ gi ta̧a̧ hinyɔ gɔ gi goksige ɓɔr gi zaa a be.

⁴⁶Yɛrɛ doo za gbɛn Baa bɔ gɛ, gɛ za̧a̧nyɔ fu̧u̧z a ge gbɛnig kpɔd.

⁴⁷Be raasin rɔbo, za̧a̧nyɔ ɗɔbsibe gin za̧a̧tig faa.

⁴⁸Bee gi kok za̧a̧tigya.

⁴⁹Baa nɛ wɔ hi le kok gɛrsya bɔ nuŋgɔ a maan a hɛtdɔŋ du hi wɔɔrɔ.

⁵⁰Kok yɔ siz bɛtha gi hɛdi, za̧a̧nyɔ gɔ gi lege taa wɔrko.

⁵¹Bee gi kok za̧a̧til yɔ siz a bɛtha, za̧a̧nɔ gi le kok yɛrɛ gi waa faa; kok yɛrɛ be gaako gi muul benɛ yɔ be gaak an waal gi za̧a̧ giya.

⁵²Kuudu Yahuduya wɔ hi faltinhin hi teesdu hi raa a wal yɛrɛ yɔ gaawɛ yɔ̧ktɔ ri an wɛ tɔb nɔ?

⁵³Yeesu raa a be raasin rɔbo, nɛd lē Za̧a̧n Waa bɔ muulɔ gɛ, nɛ wɛɛ nɛ yɔ̧ ga̧a̧mɔ gɛ, nɛ taan za̧a̧tigi.

⁵⁴Za̧a̧nyɔ le muul be gi wɛɛ gi yɔ̧ ga̧a̧m be, gin za̧a̧tig faa, bé wɛɛ bé ɗunsige a ɔ̧t yɔ̧ɔ̧sumi.

⁵⁵Muul be gi lees hi rɔbo, ga̧a̧m be gi hinyɔ̧k hi rɔbo, ya̧a̧nɛ.

⁵⁶Za̧a̧nyɔ gɔ gi lek muul be gi wɛɛ gi yɔ̧k ga̧a̧m be, gi waak hi beya, bee be waak hi gii be.

⁵⁷Baa Bɛt za̧a̧tig gaakya bɔ yaazibe, bee be, be za̧a̧k a gi dɔŋgo. Yɔ anbɔ, za̧a̧nyɔ gɔ gi lebe gi za̧a̧ be dɔŋgo.

⁵⁸Kok bɔ siz a bɛtha gi hɛdi; kokɔ taa an kok gɛrsya yɔ baa nɛ hi le a hɛtdɔŋdu hi wɛɛ hi wɔrɔ. Za̧a̧nyɔ gi lek kok yɛrɛ gi za̧a̧ faa.

⁵⁹Yeesu dɔg hin bɔrɔ yɔ gis dood hingok a mɔksilluk du a Kapɛrnayum.

⁶⁰Yɔ Yeesu walɛsɛrɛ ɔ̧ɔ̧ wɔ hi kɛm hin bɔrɔ, zaadɛya̧ kittɔnɔ hi raa a dɔgl ɓaatil bɔrɔ bɔ ɗɛɛ an gi ta̧a̧ nɔ?

⁶¹Yɔ Yeesu mɛɛ a walɛsɛrɛ wɔ hi dɔntingo dɔgl bɔrɔ, raahi a hin bɔrɔ zɛks mɔkil nɛ zɛks ya?

⁶²Yɛrɛ à nɛ gbɛn nɛ Za̧a̧n Waa bɔ dɔɔk a lɛlyɔ da giz nɛ ge doosɛ, yɔ nɛ mɔk ri?

⁶³Bɛt Mɔkili gi gaak za̧a̧tigi, taa an doo muul gi woo hinza ɔnɛ. Dɔgl wɔ be raasinɛ gi Mɔkili hi za̧a̧tigi.

⁶⁴Yɛrɛ dood zaadɛ hi gi nɛ teesdu hi taa ɗɔbsugo. (Yɔ anbɔ Yeesu mɛɛ nɛ dood wɔ hi taa nɛ ɗɔbsig zaŋ gɛ gaati, wɛɛ mɛɛ za̧a̧nyɔ gɔ gi rɛ̧ɛ̧sigya̧a̧ be. )

⁶⁵Yeesu wɛɛ dɔgɔ a hinɔ gii be raasinɛ a doo za ɗɛɛ an gi zaa beege gɛ gid Baa bɔ gaag gbɔnɔ gɛ.

⁶⁶Bɛɛ lɛlɔdi anbɔ, walɛsɛrɛ wɔ kittɔnɔ hi wɛɛ kuudu, hí sɔktin zaa hi Yeesu ma gɛ.

⁶⁷Yeesu war walɛsɛrɛ ɔ̧ɔ̧ wɔ koobl daa eerɛ a nɛɛ be, ha̧a̧n reki hɛw ya?

⁶⁸Simɔŋ Piyɛr wɛɛ googe a Ɗɛntyɔ, wi re ma bɔge? Mɔɔ gin dɔgl za̧a̧tigya faa be.

⁶⁹Wi ɗɔbsɔ, wi wɛɛ wi mɛɛ a mɔɔ gi Kristu doo gaat yɔ fu̧u̧z a Bɛt ge.

⁷⁰Yeesu wɛɛ warihi a nɛ bee herin nɛ koobl daa eer ma mi? Nɛ yɛrɛ zaa gbun a nɛ teesdu gi loorɛha̧a̧lɛ!

⁷¹Gi dɔk Simɔŋ waawal Yahuda Iskaryudi dɔgl ɔ̧ɔ̧nɛ. Gi walɛsɛrɛ ɔ̧ɔ̧ wɔ koobl daa eer zaaya̧ gbun yɔ gɔ gi rɛ̧ɛ̧sig ya̧a̧ giya.