Read Doyayo YOHANA 9 Bible Online

YOHANA 9 - Doyayo bible

YOHANA 9

¹Yɔ Yeesu gi daako gbɛn wal za yɔ mɔɔy yɔ̧ɔ̧ri.

²Walɛsɛrɛ ɔ̧ɔ̧ wɔ hi ɛrig anyɔ lɛ a Hingokya , bɔ gɔ hinha̧a̧l nɔ, wal yɛrɛ gii ya, zaabe baatɔ hi nɔɔtɔ hii gɔ hinha̧a̧l an gi mɔɔy yɔ̧ɔ̧r ya ri?

³Yeesu wɛɛ goohi a wal yɛrɛ gii hɛw gɛ, baatɔ hi nɔɔtɔ hii hɛw gɛ. Hinɔ wooy an Bɛt tɛŋkɔ gi mid muulɔ ge.

⁴A lurk yɔ duge, gi an wɛ woo Za̧a̧nyɔ yaazib woosɔ wɔ. Wag kaasi an yɛms gi bulɔ, a yɛmsɔ gedu doo za ɗɛɛ an gi woo woos ma gɛ.

⁵Anyɔ be gi waal du, be gi lɛlgaal a waal du.

⁶Yɔ raa anbɔ tus set hɛbtdi ya̧a̧n hɛbto, huus yɔ̧ɔ̧r bɔ yɔ̧l du.

⁷Wɛɛ raage a rekum mɔ da mɔ ur muut mɔ a Silowe mɛmzɛɛl bɔ gedu. (Silowe bɔ hinɔ raakɔ a yaayzɔ. ) Wal bɔ rek ur muutɔ a mɛm bɔ gedu, wɛɛza gbɛn yɔ̧lɔ bɔ gaattɔnɔ.

⁸Naaza zaadɛ wɔ hi sɛbtin di hi wɔ gɔ hi gig nɛ gbɛnik ɗɔɔtugo, hí mɛ̄ɛ̄ a ɛltyayɔ, hi warɔ a nɛ za̧a̧n yɛrɛ wal ɛltya bɔ da gi ɗɔɔtig gbɔnɔya̧ gi gi ɛɛlik gii ma yɔ mi?

⁹Dood zaadɛ hi raa a giya, zaadɛ be, hi raa a ɛ̧-ɛ̧ muut rɛɛsɛ. Wal bɔ raa hi zulɔ hɛw a beya.

¹⁰Hii be hi wɛɛ hi warige a yɔ̧l mɔ bɔ kpɛ̧ɛ̧r hinɔ ri?

¹¹Yɔ̧ɔ̧r bɔ fɔkɔ a wal za bɔ nuŋgɔ a Yeesu gii ya̧a̧ wɔmt gi sɔɔsib yɔ̧l du, wɛɛ raabe a rekum mɔ uz a Silowe mɛmzɛɛl du. Yɔ be rek be uzɔ be gbɛn yɔ̧l be gaa sɛs.

¹²Hi wɛɛ hi warige a walɔ gi ay? Gii ta̧a̧ a be mɛɛ gɛ.

¹³Hi kam wal bɔ gi nɛ yɔ̧ɔ̧r a Farisaya wɔ hi.

¹⁴Yeesu woo hin bɔrɔ a holum-ɔ̧t ro gi ya̧a̧ wɔmnt bɔ gi kpɛ̧ɛ̧r wal bɔ yɔ̧lɔ wɔ be.

¹⁵Kuudu Farisaya wɔ hi wɛɛ hi warige a yɔ̧l mɔ wɔ hi gaa hinɔ ri? Gii wal bɔ wɛɛ fɔkɔ a wal bɔ ya̧a̧ wɔmnt gi sɔɔsib yɔ̧l du, be rek be uz mɛm du be gbɛnik ma gɛrɛ.

¹⁶Farisaya zaadɛ wɔ hi raa a walɔ taa fɔk holum-ɔ̧t maak bɔ, fu̧u̧z Bɛt ge gɛ. Zaadɛ hi ta̧a̧ a doo hinha̧a̧lya yɔ ɗɛɛ hingɛrsyaadɛ an wɛrɛ wookɔ ri nɔ? Hi gɛ̧ytin gɔ teesɛ.

¹⁷Hi wɛɛ hi war wal bɔ a mɔɔ mɔ raa a nɔ a gi zulha nɔ? Anyɔ kpɛrsum yɔ̧l mɔ rɛ mɔ raa a ri? Wal bɔ goo a benɛ be raa a nɔ, raak be gɛ ma a gi Bɛtya̧a̧kɛŋkyayɔ.

¹⁸Yahuduya wɔ hí ɗɔ̄bs a gi nɛ yɔ̧ɔ̧ri hi wɛɛ hi kpɛrsig yɔ̧lɔ gɛ, hi elz za̧a̧nyɔ lɔlɔ gaa baatɔ hi nɔɔtɔ hi zaa kete.

¹⁹Yɔ hi zaa, hi warihi a waa nɛ bɔ nɛ da nɛ raak a mɔɔy yɔ̧ɔ̧ri giiyɔ ya? Yɛrɛ wɛɛ gi gbɛnik ri ma ɓɔri nɔ?

²⁰Baatɔ hi nɔɔtɔ hi ta̧a̧ a wi mɛɛ a waa wi bɔ mɔɔy yɔ̧ɔ̧r giya.

²¹Yɛrɛ wí mɛ̄ɛ̄ hinyɔ tal gi muul an gi gbɛn yɔ̧l ɓɔri ma gɛ, kinsa bɔ kpɛrsig yɔ̧lɔ? Gii tɔɔtɔ, warinɛge gi fɔksin hinyɔ daa hi zulɔ.

²²Yɔ baatɔ hi nɔɔtɔ hoobha̧a̧hi Yahuduya wɔ gii hi raa anbɔ. Yahuduya wɔ be hi ɔks nɛ ya̧a̧ya̧ hi teesdu da̧a̧da̧ a kinsa za̧a̧n za gɔ gi raa a Yeesu gii gi Masihu hi tuusig a mɔksilluk du, hi seege an ɓi̧i̧limyayɔ.

²³Hinɔ gii baatɔ hi nɔɔtɔ hi raa a gii tɔɔtɔ, warinɛge.

²⁴Farisaya wɔ hi wɛɛ hi el wal bɔ gi nɛ yɔ̧ɔ̧ri dɔɔ eesimɛ hi raage a ɗɔbsum Bɛto, wi mɛɛ a wal bɔrɔ gi doo hinha̧a̧l-yayɔ.

²⁵Gii goo a gi gi hinha̧a̧lyayɔ benɛ be mɛɛ gɛ. Be mɛɛ hin gbunu a be da be gi nɛ yɔ̧ɔ̧ri, be wɛɛ be gbɛnik yɔ̧l ɓɔryɔ a gi dɔŋg ma.

²⁶Hi wɛɛ hi warige a woosum nɔ, kpɛrsum yɔ̧l mɔ wɔ hinɔ ri?

²⁷Gii wɛɛ goohi a be da be raasin hinɔ raasɔ, hā̧a̧n lak gɛ be, yɛrɛ ha̧a̧n nɔ lak ɓɛ? Ha̧a̧n an nɛ wɛɛ fɔkyaadɛ ɔ̧ɔ̧n hɛw ya?

²⁸Hi niige a mɔɔ mɔ gi fɔkya ɔ̧ɔ̧nɛ, wii be wi gi Muusa fɔkyaadɛ ɔ̧ɔ̧n be.

²⁹Wi mɛɛ ɔnɛ a Bɛt booya̧a̧ hi Muusa, yɛrɛ wal yɛrɛ ɔnɛ wí mɛ̄ɛ̄ lɛlɔ fu̧u̧z du gɛ.

³⁰Wal bɔ raa a eh! Hinɔ kɔmsib ma gɛrsɛ, nɛ́ mɛ̄ɛ lɛl yɔ wali fu̧u̧z du gɛ! Nɛ yɛrɛ kpɛrsib yɔ̧l be ɔnɛ.

³¹Wɛ mɛɛ a Bɛt taas hinha̧a̧lya wɔ kɛŋko; za̧a̧nɔ gi gig ɗɔbsugo, gi gisig hinyɔ ha̧a̧g wooko, gi kɛmsig ɔnɛ.

³²Yɔ waal bɛɛ yɛɛluko, hi kɛm hinza a doo za kpɛrs za̧a̧n za yɔ mɔɔy yɔ̧ɔ̧r yɔ̧l hinɔ gɛ.

³³À wal bɔrɔ fu̧u̧z nɛ a Bɛt ge gɛ, yɔ ɗɛ̄ɛ̄ an gi woo hinza gɛ.

³⁴Wɔrɔ hi wɛɛ hi gòòge a mɔɔ yɔ hi mɔɔm a hinha̧a̧l du zaŋ, mɔɔ mɔ wɛɛ mɔ goks wii hin ya? Hi ninig tuu gɔ fɛd a mɔksilluk bɔ gedu.

³⁵Yɔ Yeesu kɛm a hi nin wal yɔ̧ɔ̧r bɔ yɔ̧lɔ kpɛr nɛko, rek zɛŋge warige a mɔ ɗɔbsig Za̧a̧n Waa bɔ ya?

³⁶Wal bɔ yɔ̧lɔ kpɛr ta̧a̧ a ɗɛnti, gii gi bɔ Za̧a̧nɔ? Raasibe an be ɗɔbsige.

³⁷Yeesu raa a mɔ gbɛnig-gbɛnɔ, za̧a̧nɔ gii gimɔ booko.

³⁸Wɛɛ raage a Waar i, be gi ɗɔbsigɗɔbsɔ; wɛɛ zagl gi muut du, ɗɔbsige.

³⁹Yeesu wɛɛ raa a be zaa a waal yɛrɛ gedu an dɔglyɛ̧ɛ̧k gi giro, dood hi gɛ̧ɛ̧y teesɛ, an dood wɔ hi gi yɔ̧ɔ̧ri hi gbɛn yɔ̧lɛ, wɛɛ an wɔ hi gbɛnko hi yɔ̧ɔ̧.

⁴⁰Farisaya zaadɛ wɔ hi gi nɛ hi gii hi lag dɔglɔ anbɔ hi raage a wii hɛw wi gi yɔ̧ɔ̧rɛ ya?

⁴¹Yeesu ta̧a̧hi a à nɛ gi nɛ yɔ̧ɔ̧rɛyɔ, yɔ nɛ taan hinha̧a̧lɛ. Yɛrɛ ɓɔri nɛ raak a be gbɛnik-gbɛnɔ, gid hinha̧a̧l nɛ bɔ gi waako.