Read Doyayo TƆMSYAADƐ WOOSƐ 1 Bible Online

TƆMSYAADƐ WOOSƐ 1 - Doyayo bible

TƆMSYAADƐ WOOSƐ 1

¹Teyofili, A ɗɛɛrwol mi biitir bɔ gedu, mi fɔ̀k hinyɔ Yeesu yɛɛl gi woo sɛw gi wɛɛ gi goks doodɛ,

²tuur a ɔ̧tyɔ Bɛt ha̧sig gi dɔɔnig a bɛtha gedu. Yeesu goks dood wɔ sɛ̧ɛ̧hi an tɔms-yaadɛ ɔ̧ɔ̧ hinɛ hi Bɛt Mɔkilɔ tɛŋkɔ, ɓɔr gi ɔɔ dɔɔk a bɛtha.

³Yɔ yɔ̧ nɛ ya̧a̧r gi wɔrɔ, wɛɛz nɛ za̧a̧til zunsihi muutɔ hi hinmɛksingoya kittɔnɔ. Midil dɔɔ kittɔnɔ hi teesdu, waa ɔ̧tɔ dumbili nasɔ an gi zunsihi bɛttɔnɔ a gi za̧a̧tilyɔ, wɛɛ gisihi book Bɛt wáát dɔglɔ nɔɔha.

⁴Yɔ Yeesu gi lekhin hi hiya, raahi a bɔnɛ hɛml hi Urusalima, oon hinyɔ Baa be raa a gi gaazinɛ anyɔ be raasin nɛko.

⁵Wɛɛ raa a Yohana da hotin dood Bɛtmɛm hi mɛmɛ, yɛrɛ nɛya, gɔ gi am kaasi, nɛ́ dag Bɛtmɛm hi Bɛt Mɔkilɔ. Anbɔ.

⁶Hɔnɛyɔ tɔmsya wɔ hi mɔksɔ hi ɛr Yeesu a Waar i, ɔ̧tɔ tuur ma an mɔ wɛnz Israhila hɛbtɔ waar ums a dood Israhilaya wɔ hi naan du ya?

⁷Yeesu wɛɛ ta̧a̧hi a taa an nɛɛ nɛ mɛɛ hin wɔrɔ sɛw ɔ̧tya̧, zaabe, lɛlya̧ riikɔ. Baa be gii dɛ̧ɛ̧ ɔ̧tya̧ hi zulɔ.

⁸Yɛrɛ nɛya, nɛ dag tɛŋko, a ɔ̧tyɔ Bɛt Mɔkilɔ gɔ gi zaa nɛ zulha duge, nɛ wɛɛ segyaadɛ benɛ dihɛ a Urusalima, a Yahuduya hi Samariya hɛbt du sɛw, gi da gi tuur a waal doorum lɛlɛ.

⁹Yɔ Yeesu dɔg nɛ hin bɔrɔ anbɔ ɗund dɔɔ bɛtha, hi gig seeko, kuus za wɛɛ yaatig hi lɔlgbar hí gbɛ̄nig zaa ma gɛ.

¹⁰Yɔ hi gbork lɔlseek a bɛtha, yɔ Yeesu gi reko, walɛ gban buudɛya eerɛ hi midz hi er hi dɔŋdi

¹¹hi warihi a walɛ Galileya wɛ, nɛ er nɛ seek nɔ a bɛtha hɛ? Yeesu gii ha̧s a nɛ teesdu gi dɔɔk a bɛtha, gɔgi wɛɛzugo, gi siz a bɛtha anyɔ nɛ gbɛnig rekɔ her.

¹²Tɔmsya wɔ hi fu̧u̧z a Kɔ̧ɔ̧b Ga̧a̧t ha, hi wɛɛz a Urusalima. Ga̧a̧t bɔ sɛ̧btin hi Urusalima, kaasi.

¹³Yɔ hi wɛɛzɔ hi dɔɔ a luk hɔɔt bɔ gɔ hi waak du a buuɔ bɔ wɛɛha gedu. Doodya̧ gɛrɛ: Piyɛr , Yohana, Yakuba, Andrɛ, Filib, Tumas, Bartelemi, Mata, Halfa waawal Yakuba, Simɔŋ Hɛbtwaa Gabs bɔ, hi Yakuba waawal Yahuda.

¹⁴Wɔrɔ sɛw hi waak Bɛt zɔ̧k lɛlgbun hi kpoosya̧ gbunu, hi nɛɛd wɔ, hi Yeesu nɔɔtɔ Mariyama, hi Yeesu yɛ̧ɛ̧dɛ ɔ̧ɔ̧.

¹⁵A ɔ̧tɔge yɔ dood Yeesu ɗɔbsigya wɔ hi mɔksɔ, kitigya̧ sɛ̧ɛ̧b yɔ̧ɔ̧lɔ nɔɔn-gbunu, Piyɛr ɗuk hi teesdu raahi:

¹⁶a yɛ̧ɛ̧dɛ be wɛ, rii an hinyɔ Bɛtdɔglɔ dɔgɔ gi tuur anyɔ Bɛt Mɔkilɔ da dɔg nɛ amntɔnɔ a Dawda ya̧a̧ du a Yahuda za̧a̧nyɔ dos nɛ dood wɔ gɔ hi wa̧a̧ Yeesu gbɔnɔ gi zulha.

¹⁷Yahuda gi nɛ gbun wiinɛ a ɛmbil wi bɔ gedu. Wɛɛ dag nɛ Bɛtwoos bɔ ɔnɛ an wi wootin elo.

¹⁸Wɛɛ zeb bak za hi hinbɔbtin yɔ woo nɛ tusɔ. Mat gedu wɔrɔ, muulɔ foo teesdu ha̧dɔ wɔ sɛw hi gubr lakɛ.

¹⁹Dood Urusalimaya wɔ sɛw hi kɛm dɔglɔ hɛw. Ya̧a̧nɛ hi el bak bɔ a hi ya̧a̧boon du a Hakeldama, raakɔ a ga̧a̧mbako.

²⁰Ya̧a̧nɛ hi bi̧i̧ nɛ a Zaabura du a an raaɔ gi wɛɛ beemɛ, bɔ doo gi waa du. Hi wɛɛ hi bi̧i̧ ɓɛ a an za̧a̧n za gi yɛr woosɔ bɔ.

²¹Piyɛr wɛɛ raa a yɔ anbɔ, wɛ woo anyɔ Bɛt ɗɛɛrwolɔ raa. Gi an wi dag dood wɔ hi sɔkiw ɔ̧t nuŋg sɛw a Yeesu waabilɔ bɔ gedu zaaɔ. Yɔ gi za̧a̧nyɔ baariw sɔkig a ɔ̧t yɔ Yeesu dag Bɛtmɛm a Yohana naan duge, gi tuur a ɔ̧tyɔ Bɛt ha̧sig a wɛ teesdu gedu. Gi an za̧a̧nɔ gi ɔks hi wiya a Yahuda kalɛ an gi wɛɛ Yeesu rɛmtigɔ segya.

²³Yɔ anbɔ hi zuun dood eerɛ: Yusufu yɔ nuŋgɔ zaa a Barsabas, zaa a Yustus, hi Matiyas du hɛw.

²⁴Hi wɛɛ hi zɔ̧b Bɛt hi zulha: a Waar i, mɔɔ yɔ mɔ mɛɛ dood kpoos sɛw, zuunum zaa gbun yɔ mɔ herig a dood eerɛ wɛrɛ hi teesdu,

²⁵an gi yɛr tɔmsya wooslɛl bɔ Yahuda ɔɔ gi rek a lɛl ɔnɛ yɔ riisig ge.

²⁶Hi her doo gbunu. Herkɔ bɔ hi woo hinɔ an subudyɔ. Subud bɔ le Matiyas giya. Matiyas ɔks gɔ ma hi tɔmsya zaadɛ koobl daa gbun wɔ.