Read Doyayo TƆMSYAADƐ WOOSƐ 16 Bible Online

TƆMSYAADƐ WOOSƐ 16 - Doyayo bible

TƆMSYAADƐ WOOSƐ 16

¹Pol wɛɛ rek a Dɛrbe hi a Listira. Doo za Yeesu fɔkya gi hɔ nuŋgɔ a Timɔte, nɔɔtɔ gi Yahuduya Yeesu ɗɔbsigya, baatɔ be gi Yonaniŋkoyayɔ.

²Yeesu fɔkya zaadɛ wɔ a Listira hi a Ikoniya ha̧a̧hi Timɔte dɔglɔ be.

³Yɔ Pol ha̧a̧g an gi retin hi gii be, loog nage a Yahuduya wɔ hi gi hɔ hi dɔŋgo anyɔ dood hi mɛɛ sɛw a baatɔ gi Yonaniŋkoyayɔ.

⁴Yɔ hi daak a waal gbɔlɛ zaadɛ ɗu sɔmsɔm hi dɔksig Yeesu fɔkya wɔ dɔgl wɔ tɔmsya wɔ hi ɗɛntɛ Bɛtwoos kaŋ-kigya wɔ a Urusalima hi bi̧i̧ nɛko. Hi wɛɛ hi raahi a hi fɔ dɔgl wɔ fɔbɔ, bɔhi ɔɔ.

⁵Yɔ anbɔ Yeesu fɔkya wɔ ɔksilya̧ wɔ ɗɔbsigya̧ gi rek hi tɛŋk doosɛ doosɛ, wɛɛ kitigya̧ gi hɔŋk ɔ̧t nuŋg be.

⁶Yɔ Bɛt Mɔkilɔ ya̧a̧nihi rek a Aaziya an bɔhi dɔg Bɛt dɔglɔ hɔ, Pol hi Timɔte hi daa a Firiziya hi a Galatiya hɛbt du.

⁷Yɔ hi tuur a Misiya hɛbt wel du hi tɛb an hi rek a Bitiniya, wɛɛ Yeesu Mɔkilɔ gāāhi gbɔnɔ gɛ.

⁸Yɔ anbɔ hi wɛɛ hi daar Misiya hi tal hi tii a Torowas.

⁹À yɛms du Pol gbɛn Bɛt zunsig hinza a gɛrs du: walzayɔ fu̧u̧z a Makeduniya zɔ̧g a zaam hɛdi a Makeduniya mɔ ɗaasiwi.

¹⁰Yɔ Pol bɛɛ hin bɔ lab gbɛnuko wi mɛɛn gɔ a Bɛt gii giw elik an wi dɔks dood Makeduniyaya wɔ Dɔgl Rɔb bɔ, wi ɓɛɛ ma gbɔnɔ gɔ an wi rek a hɔ.

¹¹Wi kar lɛmb du a Torowas wi rek der a Samɔtaras, yoosugɔ wi tuur a Nɛyapolis.

¹²Yɔ wi ɗuk a Nɛyapolis wi rek a Filipi. (Filipi gii gi waal gbɔɔl biitir a Makeduniya hɛbtɔ du. Dood Romaya wɔ hii wɔmɔ. ) Wi waa ɔ̧t kaasi a waal gbɔɔl bɔrɔ gedu.

¹³A Yahuduyaadɛ holum-ɔ̧ti wi tuu a waal gbɔɔl bɔ gbɔnɔ bɔ gedu wi rek a zɛɛya̧, wi mɔ̀k nɛ a wi zɛm Yahuduya wɔ a Bɛtzɔ̧kya̧ lɛl bɔ ge hɔ. Wi re wi zɛm nɛɛd zaadɛ hi mɔks lɛlɔdi, wi ɗɔɔt wi booya̧a̧ hi hiya.

¹⁴Nɛɛd wɔ zaaya̧ gbun nuŋgɔ a Lidiya gi gbandil hob rɔbɛ riŋnikya, fu̧u̧ a Tiyatira, táā Yahuduya, wɛɛ gi Bɛtɗɔb-sigyayɔ, gis Pol dɔglɔ kɛŋko. Waar Bɛt kpɛrsig kpoosɔ an gi kɔm sob gi kɛm hinyɔ Pol gi dɔko.

¹⁵Dag Bɛtmɛm hi doodɔ raa du sɛw. Wɛɛ wariw hin anyɔ lɛ: a gid nɛ sɔ̧ɔ̧b an be gi ɗɔbsig Bɛt hi rɔbo, zaan nɛ gul be raa du nɛ ɗɔɔtɔ. Wɛɛ dɛmsiw naan gbɔɔltɔnɔ, wi ɗɛ̄ɛ̄ inik gɛ.

¹⁶Ɔ̧tza yɔ wi gi rek a Bɛtzɔ̧k lɛlɛ, wi dagtin hi nisgbaar za yɔ gin loorɛha̧a̧l gi muul du, gɔ gi raasig dood hinyɔ gɔ gi tuur hi gɛrsɛ. Gi daksig ɗɛntɛ ɔ̧ɔ̧ wɔ tus gbɔɔltɔnɔ hi hinyɔ gɔ gis dood walkugo.

¹⁷Gi Pol hi wii fɔbzig kuudu hi ya̧a̧ɓolt gi raako a dood wɛrɛ hi gi Bɛt Yɔ Gi Gbɔɔl Gi Daarlɛlɛ woosyaadɛ ɔ̧ɔ̧nɛ. Hi zaak an hi dɔgsin za̧a̧tig gbɔnɔyɔ.

¹⁸Nis bɔ gɔ anbɔ ɔ̧t kittɔnɔ. Yɔ dɔglɔ rii Pol anbɔ nɔɔgnɔ, zɛmr raage a be raam a Yeesu Kristu nuŋg du, loorɛha̧a̧lɛ, tuum a za̧a̧n yɛrɛ gi muul du. Ɓɔrbɔ loorɛha̧a̧l bɔ tuutu.

¹⁹Yɔ nisgbaar bɔ ɗɛntɛ ɔ̧ɔ̧ hi gbɛn a taa an hi dag tus zaa be, hi wa̧a̧ Pol hi Silas hi dirihi a luum ha a dood gbɔlɛ dɔglyɛ̧ɛ̧kya wɔ hi muutdu.

²⁰Yɔ hi ka̧hi a dɔglyɛ̧ɛ̧kya gbɔlɛ wɔ hi muutdu anbɔ hi dɔg a dood wɛrɛ hi gi Yahuduyaadɛyɔ hi wɛɛ hi lɛl wɛ zɛksugo.

²¹Hi gók maak zaadɛ dɔɔmɛ wɔ maakdɔgl wɛ yansɛ fɔkɔ, zaabe ta̧a̧kɔ, zaabe wookɔ. Wɛ́ɛ́ yɔ wɛ gi dood Romayaadɛ be, wɛ ɗɛɛ an wɛ fɔb maak ya̧nɛ bɔ gɛ.

²²Dood saal sɛw hi ɗuk hi zulha hi niihi; waar ɛ wɔ hi taatir gbandilya̧, hi wɛɛ hi raa dood hi lɛhi hi sɔɔlɛ.

²³Yɔ hi lɛhi ha̧a̧ltɔnɔ hi sɔɔlɛ, hi yaahi luknɔ du, dood gbɔlɛ wɔ hi wɛɛ hi raa luknɔ-ookya bɔ a gi oohi bɛttɔnɔ.

²⁴Yɔ luknɔ-ookya bɔ lag anbɔ loohi gbalihi a luknɔ du, a da lɛlyoogil du, wɛɛ dōo̍ ɗɔɔya̧ wɔ a tɛ̧ɛ̧-i̧i̧kil du.

²⁵A yɛms teesdu Pol hi Silas hi ɗɔbsig Bɛto hi hin-ɛɛko, hi gig baanuko. Luknɔya zaadɛ hi gisihi kɛŋko.

²⁶Yaala hɛbt nam ha̧a̧ltɔnɔ, luknɔ bɔ sɛŋkɔ wɔ hi bee, ɓɔrbɔ gbɔnɔ wɔ sɛw hi kpɛ̧ɛ̧tiro. Ba̧a̧ntus wɔ hi wɔmn nɛ luknɔya wɔ sɛw dɔɔya̧ hi dudil wɔmnt muulɛ hi kpɔm hɛbtdi.

²⁷Yɔ luknɔ-ookya bɔ rɛm gi gbɛn luknɔ bɔ gbɔnɔ wɔ hi kpɛ̧ɛ̧tiro mɔk a luknɔya wɔ hi tuu hi nɔɔ da̧a̧da̧. Hɔ̧b daŋbɛsimɔ an gi gbɔmn zulɔ.

²⁸Hɔnɛ Pol ɓooya̧a̧ ha̧a̧ltɔnɔ raage: a bɔmɔ gaa zul mɔ nɔko, wi sɛw wi gi dihɛ.

²⁹Luknɔ-ookya bɔ ɛr laa, gul nɔɔktɔnɔ hi beeto a luknɔ bɔ gedu re zagl a Pol hi Silas dɔŋdi,

³⁰tudzihi raahi: a baa, be woo nɔ an be za̧a̧ nɔ?

³¹Pol hi Silas hi goo: a ɗɔbsum Waar Yeesu , mɔ za̧a̧ hi zul mɔ hi dood mɔ sɛw.

³²Yɔ anbɔ hi wɛɛ hi dɔgsig Waar Yeesu dɔglɔ, hi dood wɔ hi gi gi raa du sɛw.

³³Wɛɛ tudzihi nɛɛsihi nɔkya̧ wɔ a yɛms bɔ gedu. Wɛɛ ɓɔrbɔ wɔrɔ hi wɛɛ hi hotinge Bɛtmɛmɛ hi doodɔ wɔ gi raa du sɛw.

³⁴Wɛɛ kam Pol hi Silas gi raa du gaahi lees hi le, wɛɛ dag hat gbɔɔltɔnɔ anyɔ ɗɔbs Bɛt hi doodɔ wɔ raa du hi sɛw.

³⁵Yɔ lɛl gaa, dɔglyɛ̧ɛ̧kya gbɔlɛ wɔ hi yaa laya wɔ hi raas luknɔ-ookya bɔ a gi bis Pol hi Silas hi rekɔ.

³⁶Luknɔ-ookya bɔ raas Pol hinyɔ hi dɔgɔ a dɔglyɛ̧ɛ̧kya gbɔlɛ wɔ hi yaaz dood a hi bisinɛ. Nɛ yɛrɛ, tuuzinɛ, nɛ́ rek bɛttɔnɔ.

³⁷Hɔnɛ Pol wɛɛ raa laaya wɔ a wii yɔ wi gi Romayaadɛ, hi lɛwi saal du, hí wɛɛ hí yɛ̧ɛ̧ dɔgl wi gɛ be, hi gbaliw a luknɔ du be, yɛrɛ hi bisiw ri luurlɛl nɔ? Lab gɛ, hii hi zaa hi zulya̧ hi tuusiw wi rekɔ.

³⁸Laaya wɔ hi rek hi fɔks dɔglyɛ̧ɛ̧kya gbɔlɛ wɔ hinyɔ Pol hi Silas hi dɔgɔ . Yɔ hi lag a Pol hi Silas hi gi Romayaadɛyɔ, kol tuuhitu.

³⁹Yɔ anbɔ, hi zaa hi dɛmsihi naanɛ, hi tudzihi luknɔ bɔ gedu, hi wɛɛ hi zɔ̧hi an hi rek hi ɔsihi waalya̧ bɔ.

⁴⁰Yɔ Pol hi Silas hi tuuz a luknɔ bɔ gedu hi tal a nis bɔ Lidiya lɛl du hi zɛm yɛ̧ɛ̧dɛ Yeesu fɔkya wɔ duhɔ, hi ɓaasihi muulɛ, hi tuu hi rekɔ.