Read Doyayo TƆMSYAADƐ WOOSƐ 17 Bible Online

TƆMSYAADƐ WOOSƐ 17 - Doyayo bible

TƆMSYAADƐ WOOSƐ 17

¹Pol hi Silas hi daa a Amfipolis hi a Apolɔni hi tuur a Tesaloniki a lɛlyɔ Yahuduya mɔksilluk gi ge.

²Pol gi gulk a mɔksilluk bɔ gedu a holum-ɔ̧t nuŋg sɛw anyɔ rɔ̧ɔ̧sɔ, a holum-ɔ̧t taar du gi hinwatingo hi dood wɔ hɔ a Bɛt ɗɛɛrwol du.

³Gisihi dɔgl wɔ hi bi̧i̧ ɗɛɛrwol bɔ gedu walkugo a gi nɛ an Masihu gi yɔ̧ ya̧a̧r gi wɛɛ gi rɛml a wɔrk du. Pol gi zuunik hinɔ gaattɔnɔ a Bɛt ɗɛɛrwol bɔ gedu. Raa a Yeesu yɔ be gisin dɔglɔ dɔko gii gi Masihu bɔ.

⁴Dood zaadɛ wɔ hi ta̧a̧ dɔglya̧ hi teesdu hi ɔks gɔ hi Pol hi Silas. Gbunɔ, dood dɔ̧ɔ̧t dɔɔmɛ Bɛtɗɔbsigyaadɛ saalya̧nɔɔ gbɔɔl hi zaa hi nɛɛd gbɔlɛ kittɔnɔ hi ɔks hi hiya.

⁵Hɔnɛyɔ Yahuduya wɔ hi gbɛn anbɔ hi gɔ ka̧a̧s gbɔɔl-tɔnɔ, hi mɔks dood lɛɛlikya wɔ gɔ hi waak gbɔnɔ du hi gɔ saalɛ, hi ɗuks ya̧a̧bolt gɔ a waal gbɔɔl bɔ geɗu hi re hi yɛɛl Yasɔn lukɔ bɔ ha̧tirgo an hi zɛm Pol hi Silas hi wa̧a̧zihi hi kamzihi a dood muutdu.

⁶Yɔ hi zɛ̧hi gɛ hi wa̧a̧ Yasɔn hi yɛ̧ɛ̧dɛ Yeesu fɔkya zaadɛ hi dirkihi a dood gbɔlɛ waalya wɔ hi muutdu hi ɓoolinihi ya̧a̧ a zɛnɛ wɛrɛ hi gɔ ya̧a̧ a waal du sɛw hi zaa dihɛ.

⁷Yɔ hi zaa lab Yasɔn gii zehi gi lɛl du. Hi sɛw, hi ɗa̧a̧k Waar gbɔɔl bɔ Kaysara maak ɔ̧ɔ̧n hi gi raak a waar za dɔɔm giro, nuŋgɔ a Yeesu.

⁸Yɔ dɔgl bɔrɔ nams dood gbɔlɛ hɛbtya wɔ hi dood saal wɔ zulya̧,

⁹hi fɛ̧ɛ̧ Yasɔn hi dood zaadɛ wɔ an hi gbaa tusya̧ hi wɛɛ hi bisihi.

¹⁰Yɔ ɔ̧t bɛɛ lek yɛms gi bulɔ, yɛ̧ɛ̧dɛ Yeesu fɔkya wɔ hi yaa Pol hi Silas hi rek a Bereya. Yɔ hi tuurɔ hi rek hi gul a Yahuduya wɔ hi mɔksilluk du.

¹¹Yahuduya wɔrɔ ya̧nɛ hi gin kpoos rɔb daar Tesalonikiya wɔ mɔkilya̧ daarɔ. Ya̧nɛ hi ta̧a̧ Bɛt dɔglɔ hi kpoosya̧ sɛw. Hi wɛɛ hi sɔ̧ɔ̧k hinyɔ hi bi̧i̧ a Bɛt ɗɛɛrwol du ɔ̧t nuŋg sɛw an hi see hinyɔ Pol gisihi dɔk kinsa riitin be.

¹²Yɔ anbɔ doodya̧ kittɔnɔ hi ɗɔbsɔ, Yonaniŋko-yaadɛ kittɔnɔ, an nɛɛd zaadɛ wɔ dɔ̧ɔ̧tya̧ hi ɗɔbɔ hi walɛ sɛw, hi ɗɔbs hɛw.

¹³Hɔnɛyɔ Yahuduya Tesalonikiya wɔ hi lag a Pol gi dɔk Bɛt dɔglɔ a Bereya hɛwi, hi rek hi yɛɛl dood saal wɔ zɛksig hi sɔmbili.

¹⁴Yɛ̧ɛ̧dɛ Yeesu fɔkya wɔ hi bɛɛ gbɛnik anbɔ hi loo Pol hi yaag rek a mɛmbal gbɔɔlya̧. Silas hi Timɔte hi kɔm ya̧nɛ a Bereya.

¹⁵Dood wɔ hi kam Pol hi tuuringe a Atena hi yaazig gɔ. Yɔ wɔrɔ hi wɛɛ hi wɛɛk a Bereya, Pol wɛɛ yaahi tɔms a hi raas Silas hi Timɔte hi zaa nɔɔktɔnɔ hi zɛ̧be. Hi rek gɔ.

¹⁶Yɔ Pol gi ook Silas hi Timɔte a Atena kpoosɔ ɗɔb ha̧a̧ltɔnɔ anyɔ gbɛn maakwɔd sɔmsɔm wɔ hi kit yɛ̧ltɔnɔ a waal gbɔɔl bɔrɔ gedu.

¹⁷Yɔ anbɔ hi ɗɔɔt hi watin dɔgl hi Yahuduya wɔ hi dood dɔɔmɛ wɔ hi gi Bɛt ɗɔbsig a Yahuduyaadɛ mɔksilluk du be hi a luumha ɔ̧t nuŋg sɛw hi dood wɔ gɔ hi dagtinu.

¹⁸Dood hinmɛɛktɛkya wɔ gɔ hi elihi a Epikuriyaadɛ hi Sitoykoyaadɛ zaadɛya̧ hi watin hin hi gii hɛw. Dood zaadɛ be, hi raa a ya̧a̧zɔ̧ɔ̧tya bɔdi ha̧a̧g nɔ dɔk nɔ? Dood zaadɛ wɔ hi lagig Yeesu nuŋgɔ book hi rɛmtigɔ dɔgl a wɔrkɛ teesdu, hi raa a riitin an gi dɔk waal za loorɛ dɔglɛ. Dood hi dɔg hin bɔ lab yɔ Pol gi Yeesu dɔglɔ dɔk hi rɛmtigɔ giya.

¹⁹Hɔnɛ wɔrɔ hi loo Pol hi renig a dɔglmɛɛkyaadɛ muutdu, a gol za bɔ nuŋgɔ a Areyopagus ge, hi warige: a ha̧a̧wi an wi mɛɛ hingok mɔ seg bɔ dɔglɔ.

²⁰Wi kɛmdir hinza yɔ riitin hi hingok mɔ seg bɔrɔ ket gɛ, ha̧a̧w an wi mɛɛ hin bɔrɔ welɔ lɛlɛ.

²¹Atenaya wɔ sɛw hi rɔ̀bɛ wɔ hi waak a Atena sɛw gɔ hi lɛl daasig an hi dɔkt hinɛ, zaabe an hi kɛmt hin sego.

²²Pol ɗuk gɔ a Areyopasya wɔ hi muutdu dɔgɔ: a dood Atenaya wɛ, be gbɛn nɛ ɗɔbs maak wɔd nɛ wɔ hi tɛŋko a waabil nɛ bɔ gedu sɛw.

²³Yɔ be daak lɛ be seek maakwɔd wɔ nɛ gihi ɗɔbsugo; be mid sɛŋk za yɔ hi wɔmɔ hi bi̧i̧ muulɔ ge a gis bɛtyɔ hi mɛɛg gɛ. Bɛrɔ! Hinyɔ nɛ gig ɗɔbsig nɛ mɛɛ hinɔ gɛ, be gisin hinɔ gii dɔko.

²⁴Bɛt yɔ kim waalɛ hi hinyɔ gi gedu sɛw gi gi Waar a bɛtha hi hɛbtdi sɛw, taa waak a luk yɔ dood hi wɔmn naan gedu.

²⁵Taa an doo za gi woosig hin an nɔ, an gii yɔ gi gaak dood sɛw za̧a̧tigi hi holumi hi hin sɛw, wɛɛ hinza taag ha̧a̧k be.

²⁶Bɛt yɛɛl a doo gbun muul ro gi kim dood dɔ̧ɔ̧t sɛw, gbaahi hi waa a waal du sɛw. Dɛ̧ɛ̧ ɔ̧tya̧ gaati, hi ɗɔɔtillɛlya̧ welɔ.

²⁷Ha̧a̧ Waar Bɛt an dood hi tɛge, hi mɔkilge, kin hi zɛŋge. Hi rɔbo, Bɛt hɛ̄ml hi zaa gbun a wɛ teesdu gɛ.

²⁸Za̧a̧tig wɛ hi naŋk wɛ hi gik yɔ wɛ giro gi a Bɛt naan du. Hin-ɛɛnbi̧i̧kya zaadɛ nɛ teesdu hi raa hinɔ anyɔ lɛ hɛw: a wɛɛ hɛw wɛ gi dɔ̧ɔ̧t ɔ̧ɔ̧nɛ.

²⁹Yɔ anbɔ gid wɛ gi Bɛt dɔ̧ɔ̧t ɔ̧ɔ̧nɛ, bɔwɛ mɔk a Bɛt riitin an hɛɛlmɔto, zaabe an tusɛ hi bet yɔ doo gɔ loog gi wɛɛ gi gɛmsinge hinbɛt anyɔ mɔkilɔ ha̧a̧ge.

³⁰Bɛt taa ɓɛrk hinha̧a̧l wɔ doo hi woo nɛ a ɔ̧t wɔrɔ gedu zaa ma. Yɛrɛ ɓɔryɔ gi elik doo a lɛl sɛw, gihi raak a hi zɛmr kpoosya̧.

³¹Wɛɛ dɛ̧ɛ̧ ɔ̧tyɔ gɔ gi gbaas waal sɛw dɔgl du hi gbɔnɔ. Gi gbaa dɔglɔ hi wal bɔ herig gi gbaag an dɔglyɛ̧ɛ̧kya. Rɛmsig a wɔrk du an gi zuns dooɗ sɛw gaattɔnɔ a be her giya.

³²Yɔ dood hi lag Pol gi dɔg rɛmtig dɔglɛ, zaadɛ hi kpɛ̧ɛ̧lig be. Zaadɛ hi dɔg be a wi ɔsum hinɔ kɛŋk ɔ̧tza ma.

³³Yɔ anbɔ Pol hed hi teesdu rek ɔɔhi.

³⁴Hɔnɛ dood zaadɛ hi hed hi ɔks hi Pol be hi ɗɔbs Bɛt dɔglɔ. A hi teesdu, Areyopasya bɔ Denis hi nis za nuŋgɔ a Damaris hi dood zaadɛ du ya̧nɛ hi ɗɔbsɔ.