Read Doyayo TƆMSYAADƐ WOOSƐ 18 Bible Online

TƆMSYAADƐ WOOSƐ 18 - Doyayo bible

TƆMSYAADƐ WOOSƐ 18

¹Kuudu yɔ Pol ɗuk a Atena gi rek a Kɔrɛŋgtu,

²zɛm Yahuduya za hɔ nuŋgɔ a Akilas, doo Pɔntusya, zaatin Kɔrɛŋgtu hi nistɔ Piriskila am gɛ. Yɔ Waar Romaya bɔ Kalawdiya raa nɛ a Yahuduya wɔ sɛw hi tuu hi ɔɔ Roma hɛbtɔ gii Akilas hi nisɔ hi ɔɔ Itali hi zaa a Kɔrɛŋgtu. Pol be re hii booko.

³Anyɔ woosɔ gi gbun bɔ gii hi wɔrɔ ya̧nɛ bɔ, ɗɔɔt hi hii hi wootinwoos lɛlgbunu. Woosya̧ gɛ luk gbandil baaki.

⁴A holum-ɔ̧t nuŋg sɛw gi watingo hin hi Yahuduya wɔ hi dood dɔɔmɛ wɔ a mɔksilluk du. Doodya̧ zaadɛ hi ta̧a̧ dɔglɔ hi ɗɔbs be.

⁵Yɔ Silas hi Timɔte hi fu̧u̧z a Makeduniya hi bɛɛ tuurik a Kɔrɛŋgtu, Pol gaa zulɔ an gi woo Bɛtdɔgldɔk woosɔ gii tigid; gi raasig Yahuduya wɔ a Yeesu gii gi Masihu.

⁶Anyɔ Yahuduya wɔ hi insig dɔglɔ wɔ lak hi wɛɛ hi gig niiko, Pol be hod gbannɔ pubsihi luusɔ muulɛ raahi a an ga̧a̧m nɛ gi wɛɛ gi zesin nɛ zulha! Dɔgl be taa du. Yɛrɛ ɓɔryɔ be rek a dood dɔ̧ɔ̧t dɔɔmɛ wɔ hi an be dɔgsihi Bɛt dɔglɛ.

⁷Tuuz gɔ a hɔ rek gul a wal za Bɛtɗɔbsigya yɔ taa Yahuduya gɛ gi lɛl du, wal bɔ nuŋgɔ a Titiyus Yustus, yɔ raaɔ gi a mɔksilluk dɔŋdi.

⁸Kirispus, mɔksillukya gbɔɔl bɔ lag Pol Bɛt dɔgl bɔ dɔgɔ, ɗɔbs Waar Yeesu hi doodɔ raa du sɛw. Wɛɛ yɔ dood Kɔrɛŋgtuya wɔ kittɔnɔ hi lag Pol dɔglɔ anbɔ be hi ta̧a̧ Bɛt dɔglɔ hi wɛɛ hi dag Bɛtmɛmɛ.

⁹A yɛms za du Pol gbɛn Waar Yeesu a gɛrs du raag a bɔ hoob gi ha̧a̧mɔ, fɔm dɔgl be dɔkɔ, bɔmɔ ɔɔ;

¹⁰yɛrɛ be gi hi mɔya. Doo za ɗɛɛ an gi yaasum naan muul an gi gaamɔ kosgumn gɛ. Dood be hi kit a waal gbɔɔl yɛrɛ gedu be.

¹¹Yɔ anbɔ Pol waa a waal bɔ gedu wɛl gbunu hi sɛɛ nɔɔngbunu gi Bɛt dɔgl gok a Kɔrɛŋgtuya wɔ hi tees du.

¹²Hɔnɛyɔ waar Romaya bɔ gus Galiyɔŋ an hɛbt zulya a Akaya, Yahuduya wɔ hi ɔks ya̧a̧ya̧ hi wa̧a̧ Pol hi kaŋge a dɔglyɛ̧ɛ̧k luk du.

¹³Hi raa a wal yɛrɛ gi sɔmbik dood an hi ɗɔbs Bɛt hi gbɔnɔ zaa yɔ fɔ maak wi dɔgl gɛ.

¹⁴Pol bɛ̄ɛ̄ ya̧a̧ɔ aako an gi dɔg hinɛ, Galiyɔŋ raa Yahuduya wɔ a nɛɛ Yahuduya wɛ, à hinɔ gi nɛ an wal yɛrɛ woo hin-a̧a̧bi, zaabe gi woo hinbɔbtini ha̧a̧ltɔnɔ be, yɔ rii an be mɔnɛ.

¹⁵Yɛrɛyɔ nɛ watingo dɔgl tɔs hi nuŋg tɔs hi maak nɛ dɔglɛ, nɛɛ hi zul nɛ nɛ́ see hinɔ, hā̧ā̧be an be wɛɛ dɔglyɛ̧ɛ̧kya a hin wɔrɔ hi dɔŋg gɛ.

¹⁶Wɛɛ ninzihi a dɔglyɛ̧ɛ̧k luk bɔ gedu hi tuu lakɛ.

¹⁷Hɔnɛyɔ dood wɔrɔ sɛw hi tuuz lakdi kpoosya̧ gi nɔɔhi be hi wa̧a̧ mɔksillukya bɔ Sostenɛs hi lɛge a dɔglyɛ̧ɛ̧klɛl bɔ dige. Hɔnɛ Galiyɔŋ be dɔglɔ taadu hi hinya̧ bɔ hi book nɛ lakdi fɛŋ mɔɔti, mɔ̄k hinza a hi doo lɛk hɔ gɛ.

¹⁸Kuudu yɔ Pol wɛɛ gi waa a Kɔrɛŋgtu ɔ̧t kittɔnɔ, wa̍a̍r yɛ̧ɛ̧dɛ Yeesu fɔkya wɔ. Anyɔ dɛŋgls nɛ Bɛt hin a Kɛŋkeriya, hu̧u̧r zulɔ kete, ɓɔr gi ɔɔ kark a lɛmb za yɔ gi rek a Siriya hɛbt du gedu.

¹⁹Yɔ hi tuur a Efesu, Pol ɔɔ Piriskila hi Akilas dihɔ re gul a mɔksilluk du hi watin dɔgl hi Yahuduya wɔ.

²⁰Yahu-duya wɔ hi zɔ̧ge an gi waatin hi hii dihɔ gi am kaasi, gii Pol be ta̧a̧ gɛ.

²¹Yɔ wɛɛ gi ɗund gi gihi waar uko raahi a an Bɛt ha̧a̧ge, be wɛɛza a nɛɛge. Wɛɛ kar lɛmb du ɔɔ waal gbɔɔl bɔ Efesu rek a Kaysara.

²²Yɔ siz lɛmb du a Kaysariya dɔɔ a Urusalima an gi boo dood Yeesu fɔkya wɔ. Yɔ boozihi, wɛɛ tii a Aŋtakiya.

²³Kuudu yɔ am hɔ kaasi, wɛɛ ɗuk da daa a Galatiya hi Firiziya hɛbt du, gi Yeesu fɔkya wɔ sɛw tɛŋk gaak nɔɔha a lɛlyɔ gi daak ge sɛw.

²⁴Doo za Yahuduya giro nuŋgɔ a Apolos, hi mɔɔg a Iskandariya, zaa a Efesu. Za̧a̧nɔ ɗɛɛ ya̧a̧book bɛttɔnɔ wɛɛ mɛɛ Bɛt ɗɛɛrwol bɛttɔnɔ hɛw.

²⁵An mɛɛ Yohana Bɛtmɛm dɔgl gii kpɔd si̧, gi dɔk Yeesu dɔglɔ hi gbɔnɔ bɛttɔnɔ hi kpoosɔ sɛw, wɛɛ gis dood dɔglɔ gok hi gbɔnɔ be.

²⁶Yɛɛl Bɛtdɔglɔ book gɔ a mɔksilluk du, hoobha̧a̧g hinza gɛ be. Hɔnɛyɔ Piriskila hi Akilas hi kɛmsige, hi elig hi retin raa du hi da hi goksig Bɛt gbɔnɔ gaattɔnɔ.

²⁷Anyɔ Apolos ha̧a̧g rek a Akaya be, Yeesu ɗɔbsigya wɔ a Efesu hi ɗaasige, hi bi̧i̧s nahiza Yeesu fɔkya wɔ a Àkaya ɗɛɛrwol an hi dagig rɔbtɔnɔ. Yɔ Apolos re gi tuur hɔ ɗaas dood wɔ Bɛt gɛmsilɔ gaahi nɛ tɛŋk an hi ɗɔbs gbɔɔltɔnɔ.

²⁸Apolos ɗɛɛ Yahuduya wɔ a dood muutdu hi tɛŋk ɔ̧ɔ̧n a hinfaltingo du. Wɛɛ zunsihi a Bɛt ɗɛɛrwol du a Yeesu gii gi Masihu.