Read Doyayo TƆMSYAADƐ WOOSƐ 19 Bible Online

TƆMSYAADƐ WOOSƐ 19 - Doyayo bible

TƆMSYAADƐ WOOSƐ 19

¹Yɔ Apolos gi a Kɔrɛŋgtu, Pol fɔ gbɔnɔ a ga̧a̧tya̧ rek tuur a Efesu. Yɔ ɗagtin hi Bɛtfɔkya zaadɛ wɔ

²warihi a yɔ nɛ ɗɔbs Bɛt dɔglɔ nɛ dag Bɛt Mɔkilɔ dag ya? Hi goo a wi dag gɛ wí kɛ̄mdir nɛ hinyɔ mɔ raa a Bɛt Mɔkili kɛn gɛ hɛw.

³Gii wɛɛ ɛrihi a nɛ dag Bɛtmɛm nɔni? Hii hi goo a wi dag Bɛtmɛm anyɔ Yohana gɔ da hotinu.

⁴Hɔnɛ Pol raahi a Yohana hotin dood wɔ hi zɛmr kpoosya̧ Bɛtmɛmɛ, wɛɛ raa dood Israhilaya wɔ hí ɗɔbs za̧a̧nyɔ gɔ gi zaa gi kuudu, nuŋgɔ a Yeesu.

⁵Yɔ hi bɛɛ dɔgl wɔrɔ lako, hi loo Bɛtmɛm gɔ a Waar Yeesu nuŋg du.

⁶Pol gbaasihi naan zulha, Bɛt Mɔkilɔ zaa gɔ hi muulɛ, hi wɛɛ hi booya̧a̧ segdɛ sɔmsɔm hi wɛɛ hi kɛŋk Bɛt ya̧a̧ɔ hi dɔko.

⁷Kitigya̧ gi an walɛ koobl daa eerɛ.

⁸Sɛɛ taarɛ Pol gi waak rek a Yahuduyaadɛ mɔksilluk du gi boosig dood dɔglɛ hoobha̧a̧g hinza gɛ, gi dɔk hinyɔ gi seek Bɛt wáátɔ giya. Gi hin faltingo hi hiya wɛɛ gi kɛɛk an gi wadsihi Bɛt wáátɔ dɔglɛ an hi ta̧a̧.

⁹Anyɔ dood zaadɛ hi gin kpoos ɓaatil be hi tā̧ā̧ Bɛt ɗɔbsig gɛ, hi book ya̧a̧ha̧a̧l gii a Waar Yeesu Gbɔnɔ bɔ Pol gi book dɔglɔ hage a dood muutdu sɛw, Pol wɛɛ ɔɔhi dihɔ, kam fɔkɔya wɔ. Wɛɛ ɔ̧t nuŋg sɛw gi hinwatingo hi doodɛ a Tiranus hingok luk du.

¹⁰Pol woo anbɔ wɛl eerɛ. Yɔ anbɔ, dood Aaziyaya wɔ sɛw, Yahuduya wɔ hi Yonaniŋkoya wɔ sɛw, hi kɛm Waar Yeesu dɔglɔ.

¹¹Bɛt woo gɛrs gbɔlɛ wɔ hi wɛɛs dood gɛrsɛ a Pol naan du.

¹²Hi loo Pol gbandilɔ wɔ heg nɛko, zaabe muswaar ɔ wɔ hi re hi fiikin gumtil wɔ hi loorɛha̧a̧lya wɔ muulya̧. Gumsya̧ wɔ hi loorɛha̧a̧l wɔ sɛw hi tuu gɔ.

¹³Dood Yahuduya zaadɛ, loorɛha̧a̧l ninikya wɔ gɔ hi ɛmbik lɛl sɛw hi goo Waar Yeesu nuŋgɔ elik an dood wɔ hi gin loorɛha̧a̧l hi muul du hi za̧a̧. Hi raa loorɛha̧a̧l wɔ a wi raanɛ hi tɛŋko a tuunɛ a Yeesu Za̧a̧nyɔ Pol gɔ gi dɔglɔ dɔk gi nuŋg du.

¹⁴Bɛtmaakwookya gbɔɔl Yahuduya bɔ nuŋgɔ a Sekewas waatɔ walɛ wɔ nɔɔn-erɛ hii woo anbɔ.

¹⁵Hɔnɛ loorɛha̧a̧l bɔ lag anbɔ watihi a be mɛɛ Yeesu , be mɛɛ Pol bɔ za̧a̧nɔ hɛw, yɛrɛ nɛya, nɛɛ bɔ?

¹⁶Za̧a̧n bɔ gin loorɛha̧a̧l muul du ɗun gabs hi hiya, hi dɛɛtinu, ɗɛɛnihi tɛŋk sɛw, taatir gbanya̧, wɛɛ gaahi nɔko, wɔrɔ hi nɔ̀ɔ̀ hi tuuz ɔ̧l a lukɔ gedu hi rekɔ.

¹⁷Yɔ anbɔ, dood Yahuduya hi Yonaniŋkoya wɔ hi waak a Efesu hɛbt du sɛw hi kɛm dɔglɔ, hi sɛw hoobha̧a̧hi ha̧a̧ltɔnɔ, hi wɛɛ hi ɗɔbs Waar Yeesu nuŋgɔ gɔ.

¹⁸Dood wɔ hi ɗɔbs nɛ Yeesu zaadɛya̧ kittɔnɔ hi walk hinha̧a̧lya̧ wɔ hi woo nɛko a dood muutdu an Bɛt gi bitsihi.

¹⁹Dood wɔ hi gɔk nɛ gɛrsɛ zaadɛya̧ hi tuus ɗɛɛrwol wɔ gɔ hi woonik gɛrsɛ hi kamz hi kpɔɔ laa du a dood muutdu sɛw. Ɗɛɛrwol wɔ riŋsya̧ hi dɛ̧ɛ̧ tusɔ sɛw tuur tus gaat duk dumbili nɔɔnɛ (50.000).

²⁰Hinɔ anbɔ ro Waar Yeesu dɔglɔ gi tɔɔ gi rek doos hi tɛŋko.

²¹Yɔ hin wɔrɔ hi daa lab sɛw, Pol wɔb gi kpoos du an gi daa a Makeduniya hi a Akaya an gi tuur a Uru-salima. Raa a gɔ be tuur hɔ, gi an be rek be see waal gbɔɔl bɔ Roma hɛw.

²²Yaa woosɔyaadɛ eerɛ, Timɔte hi Erastus hi rek a Makeduniya. Gii kɔm waa am kaasi gi gbunu a Aaziya hɛbt du.

²³A wɛlɔ gedu, dɔgl gbɔɔl ɗuk a Efesu a Waar Yeesu Gbɔnɔ bɔ gi dɔŋgo.

²⁴Nám za giro nuŋgɔ a Demɛtɛryus gɔ gi tulik hin zaadɛ hi tus buu, hi riitin an bɛtya̧nɔɔ Àrtimɛs bɔ lukɔ. Hinɔ gii gi gaak námɔ dɛɛt wɔ rɔɔsɛ.

²⁵Wɛɛ mɔks námɔ dɛɛt wɔ hi nám zaadɛ wɔ hi wook nɛ woos gbun bɔ raahi: a walɛ wɛ, nɛ mɛɛ a woos wɛ yɛrɛ gii gisɛ rɔɔs kamzugo.

²⁶Yɛrɛ nɛ gbɛn hinyɔ wal bɔ nuŋgɔ a Pol gi wooko, gi dɔksig dood a bɛt wɔ dood hi gɔnik naanɛ hi taa nɛ bɛt zaŋ. Wɛɛ maat dood kittɔnɔ an hi ɔɔwɛ, a Efesu hɛdi kpɔd gɛ, a Aaziya hɛbt du sɛw daarlɛlɛ.

²⁷Wɛ ōō zul wɛ gɛ, gɔ gi kaasi dood hi boo ya̧a̧ha̧a̧l a woos wɛ bɔ gi zulha. Anbɔ kpɔd gɛ, yɛrɛ dood hi sɔ̧ɔ̧ bɛt wɛ nɔɔ gbɔɔl Artimɛs bɔ lukɔ bɔ an hin tɔsyɔ. Nɛ wɛɛ nɛ mɛɛ a dood wɔ a Aaziya hi dood waal du sɛw hi gi gii ɗɔbsugo. Yɛrɛ gbɔlumsɔ gi da̧a̧da̧.

²⁸Yɔ dɔgl bɔrɔ pɛɛ kpoosya̧ hi yɛɛl ya̧a̧ɓooliki: a hin gbɔɔl gɛ Efesuya wɔ Artimɛsya̧ bɔ!

²⁹Dɔglɔ hɛks a waal gbɔɔl bɔ gedu sɛw. Yɔ dood hi lag anbɔ hi nɔɔz hi zaa hi wa̧a̧ dood eerɛ wɔ hi fu̧u̧z a Makeduniya, hi ɛmbik hi Pol : Gayus hi Aristarkus hi kamnihi gabs a naab lɛl du.

³⁰Pol ha̧a̧g an gi tal a dood saal teesdu, wɛɛ Yeesu fɔkya zaadɛ wɔ hi a̧a̧nig-a̧a̧nɔ.

³¹Woosya gbɔlɛ wɔ a Aaziya hɛbt du hi gi Pol saamɔ hi yaasigya̧a̧ hi zɔ̧ge an bɔgi gul a naab lɛl bɔ gedu.

³²Dood zaadɛ hi ya̧a̧ɓoolik lɛ, zaadɛ be hi da hi ya̧a̧ɓoolik hɔ sɔmsɔm. Hi sɛw hi mɛ̄ɛ̄ zulya̧ lɛl gɛ be. Wɔ hi mɛɛ hinyɔ dood hi mɔks gi dɔŋg be hi kit gɛ.

³³Hɔnɛ dood zaadɛ a saal bɔ gedu hi raas Iskandarus yɔ Yahuduya wɔ hi gig yaatirgo doosɛ doosɛ dɔglɔ an gi er hi muutdu gi dɔgs Yahuduya wɔ zulya̧, gi raa a dɔglya̧ taadu. Iskandarus wɛɛ gba̍a̍ naanɛ an dood hi kɔm sob gi dɔg hin an gi zees Yahuduya wɔ zulya̧.

³⁴Hɔnɛyɔ hi mɛ̄ɛ̄ a Iskandarus gi Yahuduyayɔ hi sɛw hi ɓoolya̧a̧ hi sam hi da̧a̧s gɛ: a hin gbɔɔl gɛ Efesuya bɛtya̧ Artimɛs bɔ.

³⁵Yɔ anbɔ doo gbɔɔl hinbi̧i̧kya bɔ zaa raa dood hi kɔm sob. Gii wɛɛ dɔgɔ a walɛ Efesuya wɛ, dood hi mɛɛ sɛw a Efesuya wɔ waal gbɔɔlya̧ bɔ gii gi bɛt gbɔɔl bɔ Artimɛs lukɔ-ookya, wɛɛ gi bet yɔ kɔm an muutɔrɛsɛ yɔ mɛɛz a bɛtha wɛ gig ɗɔbsig an ookɔya hɛw.

³⁶Doo za ɗɛɛ an gi faa hin wɔrɔ lab dɔglya̧ gɛ. Yɔ anbɔ yɛwɛ kɔm sob, bɔwɛ gɔ hinza hi dikto.

³⁷Dood wɛrɛ nɛ kamzihi dihɛ hí lōōluur a bɛt wɛ luk bɔ gedu gɛ be, wɛɛ hí bōō ya̧a̧ha̧a̧l a bɛt wɛ nɔɔ bɔ gi zulha gɛ be.

³⁸Gid Demɛtɛryus hi woosɔya wɔ hi gin kaal a doo za zulha, ɔ̧t yɔ gɔ hi yɛ̧ɛ̧ dɔgl du giro, wɛɛ dood gbɔlɛ dɔglyɛ̧ɛ̧kya hi giro, hi ɗɛɛ an hi kamz dɔglɔ a ɔ̧tɔ ge hi gbɛrsihi.

³⁹Yɛrɛ gi ha̧a̧n hinza dɔɔm be, nɛ kam dɔglɔ a mɔksillɛl bɔ dood gbɔlɛ gɔ hi es dɔgl ge hi gbɛrsinɛ.

⁴⁰Hi dɔgl nɛ yɛrɛ nɛɛko, gid wɛ wa̧a̧ zul wɛ gɛ, dood hi ɗɛɛ an hi raa a wɛ bindɔ, anyɔ dɔgl nɛ bɔ yaa yɛ̧ɛ̧s gɛ. An dood hi warɛ nams yɛrɛ dɔglɔ be, wɛɛ yɔ wɛ mɛɛ hinyɔ gɔ wɛ dɔg gɛ.

⁴¹Yɔ doo gbɔɔl hinbi̧i̧kya bɔ dɔg anbɔ wɛɛ hɛks dood hi wɛɛ hi lɛlɛ.