Read Doyayo TƆMSYAADƐ WOOSƐ 2 Bible Online

TƆMSYAADƐ WOOSƐ 2 - Doyayo bible

TƆMSYAADƐ WOOSƐ 2

¹Yɔ Paŋtekosta naab bɔ ɔ̧tɔ tuurɔ, Yeesu ɗɔbsigya wɔ sɛw hi mɔks lɛlgbunu.

²Yaala nams za fu̧u̧z bɛtha an zɛk tɛŋkya gi fɛko hi̧i̧s luk bɔ hi ɗɔɔtig gedu sɛw.

³Hinza an laamɛlɛ mid a hi teesdu gɛ̧ɛ̧y ɗɔɔt hi zulha gbunu gbunu hi sɛw.

⁴Yɔ anbɔ Bɛt Mɔkilɔ hi̧i̧s hi kpoos du sɛw hi wɛɛ hi yɛɛl ya̧a̧book sɔmsɔm anyɔ Bɛt Mɔkilɔ gihi boonuko.

⁵Yahuduya zaadɛ wɔ hi fɔk Bɛt hi rɔbo hi gi di be. Hi fu̧u̧z a hɛbt wɔ hi gi a waal du sɔmsɔm gedu sɛw, hi zaa hi waak a Urusalima.

⁶Yɔ hi kɛm nams bɔrɔ anbɔ dood saal hi mɔks lɛlgbun mad. Bɔbe yɔ kɛ̄m hi book ya̧a̧boon ɔnɛ, hinɔ yɔɔhiyɔɔ.

⁷Yɔ hinɔ duhi gi kɔmsihi gɛrsɛ, hi watinu a nɛ dood wɛrɛ hi booya̧a̧ hi gi Galileyaadɛ ma sɛw mi?

⁸Ri wɛ kɛŋk a hi bootig ya̧a̧boon zaadɛ wɛ sɔmsɔm wɔ hi mɔɔwɛ gedu hii nɔ?

⁹Dood zaadɛ wɔ hi gi wɛ teesdu hi fu̧u̧z a Partiya, Mɛdiya, Elamiya; zaadɛ hi waak a Mɛzopotami, Yahuda, Kapadokiya, Pɔntus, Aaziya, Pirza, Pamfila, hi a Misra, a Libiya hɛbt du a Sirɛŋ dɔŋdi; zaadɛ hi fu̧u̧z a Roma hi waak hɛdi be, wɛɛ zaadɛ hi gi Yahuduyaadɛ, zaadɛ be hi gul Yahuduya maakya̧ be, Keretayaadɛ hi Araab wɔ, wɛ sɛw, wɛ lag Galileya wɔrɔ hi fɔkig woos gbɔɔl yɔ Bɛt woo hi ya̧a̧boon wɛnɛ sɔmsɔm.

¹⁰

¹¹

¹²Anyɔ hin kɔmsihi gɛrs hi sɛw gi wɛɛ gi yɔɔhi be, hi wɛɛ hi watin gɔ hi teesdu a hinɔ raakɔ a nɔ?

¹³Hɔnɛ zaadɛ hi kpɛ̧ɛ̧l be hi raa a dood wɛrɛ hi yɔ̧z bumɛ.

¹⁴Hɔnɛ Piyɛr wɛɛ ɗuk hi tɔmsya zaadɛ koobl daa gbun wɔ, dɔghin gaattɔnɔ hi ya̧a̧ɓoot anyɔ lɛ a kɛnɛ, Yahuduya walɛ wɛ hi Urusalimaya wɛ sɛw, mɛɛn hin yɛrɛ; ɓaan tɔn nɛ an nɛ kɛm ya̧a̧ yɔ be booko!

¹⁵Bɔnɛ mɔk a dood wɛrɛ hi wɔn bumɛ, anyɔ nɛ mɔkugo. Ɔ̧t da gi kusaal ɓaat be!

¹⁶Nɛ yɛrɛ ɓɔryɔ gi hinyɔ Bɛtya̧a̧kɛŋkya bɔ Zowɛl dɔg giya:

¹⁷a Bɛt raa a bé gɛ̧ɛ̧ Mɔkil be a ɔ̧t yɔ̧ɔ̧sum bɔ gedu a dood zulha sɛw. Waat nɛ walɛ wɔ hi waat nɛ siŋdɛ wɔ hí kɛm ya̧a̧ be, hi wɛɛ hi dɔks doodɛ. Walɛ nɛ sɛrɛ wɔ hi gbɛn hinza a gɛrs du, ɗɛntɛ nɛ wɔ hi yorhin hɛw.

¹⁸Hɔɔ, bé gɛ̧ɛ̧ Mɔkil be a ɔ̧tɔge a gbaarɛ walɛ be wɔ hi gbaarɛ nɛɛd be wɔ hi zulha hɛw. Hi kɛm ya̧a̧ be hi wɛɛ hi dɔgs doodɛ.

¹⁹Bé woowoos gɛrsyaadɛ a wɛɛha a bɛtha hi gɛrs zaadɛ a wɛɛdisɛ a hɛbtdi: ga̧a̧mɛ, laa, hi uusɛ hi midɔ.

²⁰Ɔ̧t gi nimɔ, sɛɛ gi hob an ga̧a̧m kete, ɓɔr bee Waar Bɛto ɔ̧t be gbɔɔl yɔ daar ɔ̧t zaadɛ wɔ sɛw gi ɔɔ tuuruko.

²¹Hɔnɛ gɔ gi anbɔ za̧a̧nyɔ gɔ gi el nuŋg be gi zɔ̧be an be za̧a̧sige, gí za̧a̧ gɔ.

²²Nɛɛ Israhilaya walɛ wɛ, lagin hinyɔ gɔ be dɔgsinɛ! Nɛ mɛɛ hi zul nɛ a Yeesu Nazarɛdya bɔ gi nɛ za̧a̧nyɔ Bɛt zunsin nɛ gaattɔnɔ a bee yaazige, Bɛt zunsin nɛ hin bɔ lab hi woos tɛŋkyaadɛ hi gɛrsɛ hi gɛrs zaadɛ hinmɛksingoyaadɛ yɔ woo nɛ a gi naan du a nɛ tees du.

²³Wal bɔrɔ gaay a nɛ naan du anyɔ Bɛt mɔkɔ gi mɛɛ nɛ doosɛ. Nɛ wɛɛ nɛ gɔ hin-a̧a̧bi nɛ looge nɛ gaag dood wɔ hí fɔb Bɛt maak gɛ hi naan du, hi doog a dɔ̧ɔ̧r muulɛ, wɔrɔ.

²⁴Yɛrɛ Bɛt rɛmsigrɛms be, ha̧sig a wɔrk ya̧a̧rhantya bɔ gedu, yɔ hinɔ ka̧d nɛ an wɔrk gi wa̧a̧g gi waa nɛ a gi tɛŋk du hɛw gɛ.

²⁵Dawda raa dɔglɔ be a be gbɛn Waar bɔ a be muutdu faa, anyɔ gi a be dɔŋdi a naanrɔbo, ya̧a̧nɛ muul be gi bēē gɛ.

²⁶Yɔ anbɔ kpoos be kpɛ̧ɛ̧ gɔ, mɛl be tuus dɔgl hi hat gbɔɔlɛ. Beya, be doo wɔlɛ, be waa mɔkil be gbaak a hinyɔ Bɛt gɔ gi woosib gedu.

²⁷Mɔ taa kol be ɔɔk a wɔrkɛ ɗɔɔtillɛlɛ, ya̧a̧nɛ. Wɛɛ mɔ́ tā̧ā̧ an Za̧a̧n Gaat mɔnɛ bɔ muulɔ gi dog gɛ.

²⁸Mɔ gogsib gbɔnɔ wɔ hi tuur a za̧a̧tig lɛl bɔ ge. Gɔ mɔ gi hi beya mɔ hi̧i̧s kpoos be hi hato.

²⁹Yɛ̧ɛ̧dɛ be wɛ, gbɔnɔ gi an be boosin baa wɛ Dawda dɔglɔ gaattɔnɔ. Yɔ Dawda wɔrɔ, hi i̧i̧ge, wɛɛ loorɔ gis a wɛ tees du nɛɛko àgiyɔ te.

³⁰Dawda yɔ gi nɛ Bɛtya̧a̧kɛŋkya be, gii mɛ̄ɛ̄ a Bɛt raage hi hindɛŋgliki a bé gbaa waa mɔ zaa gbun a mɔ waar ums ɗɔɔtillɛlɛ.

³¹Dawda gbɛn nɛ doosɛ a Masihu gí rɛmlɔ, wɛɛ boo rɛmtig dɔglɔ a hi taag ɔɔk a wɔrkɛ ɗɔɔtillɛlɛ, muulɔ be, taa doko.

³²Yeesu gii gi za̧a̧nyɔ Bɛt rɛmsig a wɔrk du. Wii sɛw wi gbɛnige, ya̧a̧nɛ wi ɗɛɛk dɔglɔ raak hi rɔbo.

³³Yɛrɛyɔ, Bɛt dɔɔnig a gi naanrɔbo, wɛɛ dag Bɛt Mɔkilɔ anyɔ Baatɔ raa nɛ a gi gaage. Wɛɛ gɛ̧ɛ̧ ma hinyɔ nɛ gbɛnik yɔ gɛrɛ hi hinyɔ nɛ kɛŋk yɔ sɛw gɛrɛ.

³⁴Yɔ anbɔ Dawda kār a bɛtha ɔnɛ gɛ Dawda wɛɛ raa hi zulɔ a Waar Bɛt raa Waar be a ɗɔɔtum be naanrɔbo,

³⁵gi tuur an be gbàà yɔ̧lhɛ̧ɛ̧nikya mɔ wɔ, hi wɛɛ dɔɔ mɔ ɗa̧a̧klɛlɛ.

³⁶Dood Israhilaya wɔ sɛw, mɛɛhi rɔbtɔnɔ a Yeesu bɔrɔ Za̧a̧nɔ nɛ doog a dɔ̧ɔ̧r muulɛ, Bɛt wɛɛnig Waar i hi Masihu be. Anbɔ labɔ.

³⁷Yɔ dood hi kɛm dɔgl bɔrɔ anbɔ kol tuuhitu. Hi war Piyɛr hi tɔmsya zaadɛ wɔ a saanɛ, wi woo nɔ?

³⁸Piyɛr wɛɛ goohi: a zɛmrin kpoos nɛ, bɔbe gi loo Bɛtmɛmɛ a Yeesu Kristu nuŋg du an Bɛt gi bitsin hinha̧a̧l nɛ. Gɔ gi anbɔ ma Bɛt gi gaan Mɔkilɔ bɔ an gaas ɔnɛ.

³⁹Ya̧a̧nɛ hinyɔ Bɛt raa a bé gaazɔ gi nɛɛnɛ hi waat nɛ ya̧nɛ, hi wɔ hi hɛml ya̧nɛ, hi wɔ Waar Bɛt gɔ gi elihi sɛw an hi zaa a ge ya̧nɛ.

⁴⁰Wɛɛ boosihi dɔgl zaadɛ kittɔnɔ, wɛɛ ɓaasinihi muulɛ, zɔ̧hi, raahi: a za̧a̧sin kol nɛ hi dood wɔ hi waak ɔ̧tigi zulɛ bɔbsya̧.

⁴¹Wɔ hi ta̧a̧ Piyɛr dɔglɔ be hi dag Bɛtmɛmɛ. Wɛɛ a ɔ̧tɔ ge dood wɔ hi dak Bɛtmɛm kpoosya̧ ɔks gɔ hi ɗɔbsigya zaadɛ wɔ. Kitigya̧ tuur an duk taarɛ.

⁴²Hi fi̧i̧y hi kpoosya̧ gbunu a hinyɔ tɔmsya wɔ hi gok gedu, hi yɛ̧ɛ̧dums waabil-ɔ̄ks du, hi Bɛtkokɔ leki, hi Bɛt zɔ̧ki.

⁴³Yɔ hi gbɛn gɛrs wɔ Bɛt woo kittɔnɔ sɔmsɔm a tɔmsya wɔ hi naan du, hoobha̧a̧ dood sɛw gbunu gbunu.

⁴⁴Dood Yeesu fɔkya wɔ hi waak ɔksig lɛlgbunu, hi wɛɛ hi gbaak hinwálk lɛlgbun sɛw.

⁴⁵Hi zebtig hɛbtya̧ wɔ hi rɔɔs wɔ, hi gɛ̧ɛ̧k tusɔ a hi teesdu sɛw, bɔbe anyɔ ha̧a̧ge.

⁴⁶Ɔ̧t nuŋg sɛw hi waak mɔksig a Bɛtluk du hi kpoosya̧ gbunu, hi wɛɛ hi lek Bɛt kokɔ bɔ lɛlgbunu a raa wɔ hi du, hi lekhin lɛlgbun hi hato, hi kpoos saŋtimi.

⁴⁷Hi baanik Bɛto, dood sɛw hi wɛɛn Yeesu fɔkya wɔ dood rɔ́bɛ. Wɛɛ Waar Bɛt gi tɔŋsig dood wɔ za̧a̧sihi ɔ̧t nuŋg sɛw a ɔksilya̧ bɔ gedu.