Read Doyayo TƆMSYAADƐ WOOSƐ 21 Bible Online

TƆMSYAADƐ WOOSƐ 21 - Doyayo bible

TƆMSYAADƐ WOOSƐ 21

¹Yɔwi kpáár wi ɔɔhi wi wɛɛ wi kar lɛmb du wi rek der wi tuur a Kos. Yoosugɔ wi tal a Roodi. Wi wɛɛ wi ɗund hɔdi wi rek a Patara.

²Wi re wi zɛm lɛmb yɔ gɔ gí rek nɛ a Finikiya, wi kar gedu wi rekɔ,

³wi tuur a Kiprus dɔŋdi, wi gbɛn Kiprus a naanyɛ̧li. Wi wɛɛ wi daa wi rek a Siriya. Wi er a Tirus an hi sisil wɔdɛ.

⁴Wi re wi zɛm Yeesu fɔkya wɔ hɔ wi waa hi hii ɔ̧t nɔɔn-erɛ. Hi raa Pol hi Bɛt Mɔkilɔ tɛŋkɔ a bɔgi dɔɔ a Urusalima.

⁵Hɔnɛyɔ wi waa dimaas gbun gi da̧a̧ wi ɗuk wi wa̧a̧ gbɔnɔ wi rekɔ; yɔ wi ɗuk wi reko, dood wɔ hɔ sɛw hi nɛɛdya̧ hi waatya̧ hi ka̧wi hi tuuniw a waal gbɔɔl bɔ gedu hi yaazuw da hɔ hɛmltɔnɔ a mɛmbal gbɔɔl ya̧. Wi zagl a mɛmbal gbɔɔl ya̧ bɔ ge wi zɔ̧ Bɛto.

⁶Wi wartin wi kar a lɛmb du, hii be hi wɛɛ hi lɛl be.

⁷Yɔ wi kar lɛmb du a Tirus, wi rek rɔbs wi, wi da wi tuur a Potolemayis wi zɛm yɛ̧ɛ̧dɛ Yeesu fɔkya wɔ wi boohi, wi naa hi hii ɔ̧t gbunu.

⁸Yoosugɔ ɓɛ wi ɗukɔ wi rek a Kaysariya wi sil a Filib Bɛtdɔgl ɛmbingoya bɔ gi raa du. Gi dood nɔɔn-er wɔ hi sɛ̧ɛ̧hi nɛ a Urusalima zaaya̧ gbunyɔ.

⁹Gin waatsiŋdɛ nasɔ hí lōō wal gɛ, hi gi Bɛtya̧a̧kɛŋkyaadɛ.

¹⁰Yɔ wi waa gi am hɔdi ɔ̧t kaasi, Bɛtya̧a̧kɛŋkya zaayɔ nuŋgɔ a Agabus fu̧u̧z a Yahuduya,

¹¹zaa wiige zɛ̧wi, pid Pol hi̧i̧lɔ see du yɛ̧ɛ̧n dɔɔɔ hi naanɔ, dɔgɔ: a hinyɔ Bɛt Mɔkilɔ raa gɛrɛ: a Yahuduya wɔ hi wɔb za̧a̧n hi̧i̧lya yɛrɛ anyɔ lɛ a Urusalima hi wɛɛ hi gaag dood wɔ hi mɛɛ Bɛt gɛ hi naan du.

¹²Yɔ wi lag anbɔ wii hi dood wɔ hi gi hɔ sɛw wi zɔ̧b Pol an bɔgi dɔɔ a Urusalima.

¹³Hɔnɛ Pol warihi a nɛ kaak nɔ, ha̧a̧n an nɛ kaar kpoos be ya? Yɛrɛ be gi gɛrɛ. Wɔk dɔglɔ gii kpɔd gɛ, bé ta̧a̧ wɔrk a Urusalima hɛw a Waar Yeesu nuŋg dɔŋgo.

¹⁴Yɔ wi ɗɛɛ an wi ya̧a̧nig gɛ, wi ɔɔg wi raa an Waar Bɛt gi woo hinyɔ ha̧a̧ge.

¹⁵Yɔ wi waa hɔ gi am kaasi wi gɛms wɔd wi, wi dɔɔ gɔ a Urusalima.

¹⁶Yeesu ɗɔbsigya zaadɛ wɔ hi gi a Kaysariya hi retin hi wiya hi da hi ka̧w a Manasɔn Yeesu ɗɔbsigya amnt yɔ fu̧u̧z a Kiprus, za̧a̧nyɔ dagiw a gi raa du.

¹⁷Yɔ wi tuur a Urusalima, yɛ̧ɛ̧dɛ wɔ hɔ hi dagiw hi hato.

¹⁸Yoosugɔ Pol retin hi wii a Yakuba ge. Ɗɛntɛ Bɛtwoos kaŋkigya wɔ hi zaa hi mɔks lɛlɔge sɛw.

¹⁹Pol boohi, fɔk hinyɔ Bɛt woo hi gii gbunu gbunu sɛw a dood dɔɔmɛ wɔ hi tees du.

²⁰Yɔ dood wɔ hi kɛm hinyɔ Pol fɔk sɛwi hi baan Bɛt gɔ. Hi wɛɛ hi raag a yɛ̧ɛ̧ wi, mɔ gbɛnɔ, a Yahuduya wɔ hi tees du, Yahuduyaadɛ duko duko, kittɔnɔ hi ɗɔbs Waar Yeesu , hi sɛw hi fɔ́k Bɛtmaakdɔgl hi tɛŋko.

²¹Hi lag dɔgl mɔ a mɔ gogsig Yahuduya zaadɛ wɔ hi ɗɔɔt a dood dɔɔmɛ teesdu sɛw a hi bis Muusa maakɔyɔ gogɔ; mɔ wɛɛ mɔ raak be a bɔhi nab waatya̧, wɛɛ bɔhi fɔb Yahuduya maak wɔ hɛw.

²²Yɛrɛ wɛ́ gɔk ri? Ya̧nɛ hí ɔɔ dɔgl mɔ kɛŋkɔ a mɔ zaaza gɛ.

²³Yɛrɛya, wi gin walɛ nasɔ hi dɛŋgls Bɛt hinɛ.

²⁴Loomɔhi nɛ retinu a maak muulgaasig lɛl bɔ ge nɛ gaas muul nɛ. Toom tusyɔ gɔ hi hu̧u̧rin zulya̧. Gid mɔ woo hin anbɔ, dood sɛw hí mɛɛ gɔ a hinyɔ hi lag nɛ mɔ zulha sɛw gi mɛlɛ, hinɔ rɔb gɛ, wɛɛ mɔɔ hi zul mɔ mɔ fɔ́k Muusa maakɔ bɔ bi̧i̧ giya.

²⁵Yɛrɛ dood dɔɔmɛ wɔ hi ɗɔbs Waar Yeesu , ya̧nɛ, wi yaasihi ɗɛɛrwol wi dɔksihi hinyɔ wi wɔya̧a̧ hage a bɔhi tɔb nambyɔ hi gbɛrs maakwɔd wɔ hi gɔn maako, bɔhi tɔb namga̧a̧mɛ, bɔhi tɔb nambyɔ hi ɓɔ̧rɔ, wɛɛ bɔhi naa mansi.

²⁶Yɔ anbɔ Pol retin gɔ hi dood nas wɔ. Yoosugɔ hi rek hi gɔ muulgaasig maak bɔ gɔ. Wɛɛ da gul a Bɛtluk du an gi raas Bɛtmaakwookya wɔ muulgaasig maak bɔ ɔ̧tɔ gɔ gi da̧a̧ du, hi ɔ̧tyɔ gɔ gi tòò dooɗ nas wɔ muul-gaasigya̧ maak bɔ tusɔ du sɛw.

²⁷Yɔ muulgaasig ɔ̧t nɔɔn-er bɔ sɛ̧ɛ̧b da̧a̧ko, Yahuduya wɔ hi fu̧u̧z a Aaziya hɛbt du hi gbɛn nɛ Pol a Bɛtluk du be, hi rek hi sɔmb dood saal wɔ sɛw hi zaa hi gɔ̧ɔ̧ge hi wa̧a̧ge,

²⁸hi ɓoolya̧a̧ hi dɔko a walɛ Israhilaya wɛ, ɗaasinwi! Wal yɛrɛ gii gi goksig dood lɛl sɛw hin an hi ɓaas zulya̧ a dood Israhilaya wɔ hi maak wɛ wɔ, hi Bɛtluk yɛrɛ hi gbaŋgi. Wɛɛ kamz dood dɔ̧ɔ̧t dɔɔmɛ a Bɛtluk bɔ gedu hɛw, ɓi̧i̧l lɛl gaat bɔ da̧a̧da̧!

²⁹Yɔ hi gbɛn nɛ Efesuya bɔ Torofemus gihi Pol a waal gbɔɔl bɔ gedu gii hi rum a Pol tasigtas a Bɛtluk bɔ gedu.

³⁰Yɔ ɗɔglɔ hɛks gi nɔɔ ɗood wɔ a waal bɔ gedu sɛwi, dood hi nɔɔz hi zaa hi wa̧a̧ Pol hi dirig hi tuunig a Bɛtluk lako, hi wɛɛ hi kpɛ̧ɛ̧ gbɔnɔ bɔ ha nɔɔktɔnɔ.

³¹Yɔ dood wɔ ha̧a̧hi an hi gbɔŋge, yaala rams tuur gɔ a laya gbɔɔl zulya Romaya bɔ ge hi raasige a dood Urusalimaya wɔ sɛw hi mɛ̄ɛ̄ zulya̧ lɛl gɛ.

³²Yɔ laaya gbɔɔl bɔ lag anbɔ rek el laaya dɛɛt wɔ hi laaya gbɔlɛ wɔ nɔɔktɔnɔ nɔɔ retin hi hii a dood saal lɛl bɔ ge. Yɔ dood wɔ hi gbɛn laaya gbɔɔl mɔɔt bɔ hi laaya zaadɛ wɔ hi zaa, hi ɔɔ Pol lɛkɔ gɔ.

³³Laaya gbɔɔl bɔ tuur wa̧a̧ Pol , raa hí wɔg hi ba̧a̧ntus eerɛ. Wɛɛ warɔ a yɛrɛ bɔ? Woo nɔ?

³⁴Dood zaadɛ a saal bɔ gedu hi ya̧a̧ɓoolik lɛ, zaadɛ be hi ya̧a̧ɓoolik hɔ sɔmsɔm. Laaya gbɔɔl mɔɔt bɔ ɗɛ̄ɛ̄ an gi kɛm dɔgl rɔb gbun gɛ anyɔ ya̧a̧ɓolt giro, raa hi kam Pol a laya wɔ hi woosluk du.

³⁵Yɔ Pol sɛ̧ɛ̧b a woosluk bɔ ya̧di dood saal hi gɔk gabs yɛ̧ltɔnɔ, laya wɔ hi pɛɛg wɛɛha.

³⁶Dood saal wɔ hi gig fɔk hi ya̧a̧ɓolt be: a gbɔ̧nɛge! Gbɔ̧nɛge!

³⁷Anyɔ laaya wɔ gɔ hi gus Pol a wooslukya̧ du, Pol war laaya gbɔɔl mɔɔt bɔ: a gbɔnɔ gi an be dɔgsum hinza ya? Laaya gbɔɔl bɔ warige: a kɔmri, mɔɔ mɔ mɛɛ Yona-niŋkoya ya̧a̧boon ya?

³⁸Mɔɔ taa Misraya bɔ ɗuks gabs gi ām gɛ gi wɛɛ gi kam zulgbɔŋkyaadɛ duk nas wɔ a hɛt dɔŋg du gɛ ya?

³⁹Pol goo: a ewwee, bee be gi Yahudu-yayɔ, hi mɔɔb a Tarse a Silikiya hɛbt du. Be gi waal gbɔɔlya waayɔ. Be zɔ̧mɔ, gaabe gbɔnɔ an be dɔks dood saal hinɛ.

⁴⁰Yɔ laaya gbɔɔl bɔ gaa Pol gbɔnɔ, Pol er a kɔntil lɛl bɔ gɔ hi kar geha hi tal luk ɗu, gbaas dood naanɛ, hi kɔm tɛrɛrɛ. Dɔg gɔ hi Ibraniŋko ya̧a̧boonɛ: