Read Doyayo TƆMSYAADƐ WOOSƐ 22 Bible Online

TƆMSYAADƐ WOOSƐ 22 - Doyayo bible

TƆMSYAADƐ WOOSƐ 22

¹a baa be wɛ hi nabeza wɛ, laginɛ, hinyɔ be dɔk yɔ be taan a̧a̧bi!

²Yɔ dood hi lagig gi book hi Ibraniŋko ya̧a̧boonɛ, hi wɛɛ hi see bɛttɔnɔ, an hi kɛmɔ.

³A bee be Yahuduyayɔ, hi mɔɔb a Tarse a Silikiya hɛbtdu. Hi kaŋkib a Urusalima dihɛ. Gamaliyɛl gii goksib hin be mɛɛ baa wɛ maakdɔgl bɔ rɔbtɔnɔ. Be fɔk nɛ Bɛt hi tɛŋko anyɔ nɛɛ nɛ gig fɔk nɛɛk be.

⁴Be ha̧a̧n nɛ dood wɔ hi fɔk Yeesu Gbɔnɔ yɛrɛ ya̧a̧rɛ be gbɔ̧hi. Be wa̧a̧l walɛ hi nɛɛd sɛw be wɔhi be yaahi luknɔ du.

⁵Bɛtmaak-wookya gbɔɔl mɔɔt bɔ hi ɗɛntɛ Yahuduya dɔglyɛ̧ɛ̧kya wɔ sɛw hi ɗɛɛ an hi ta̧a̧ a hɔɔ! be dɔk rɔbo. Hi gaab ɗɛɛrwol yɔ hi bi̧i̧s nawɛza Yahuduya wɔ a Dimaska an be kamsihi hi gaab gbɔnɔ be wa̧a̧l Yeesu fɔkya wɔ hi gi a hɔ hɛw, be wɔblihi be kamzihi a Urusalima an hi ha̧a̧nihi ya̧a̧rɛ.

⁶Anyɔ be rek a gbɔnɔ du be sɛ̧ɛ̧bik Dimaska dɔŋdi a lurk tees du, yaala lɛlgaal za fu̧u̧z a bɛtha kpay gaa yɔ̧ɔ̧s dɔŋg be.

⁷Be mat hɛbtdi be wɛɛ be lag ya̧a̧ za gib elzugo: a Sawulu! Sawulu! Mɔ gib ya̧a̧ kɛtingo nɔ?

⁸Be warige: a mɔɔ bɔ, Waar i? Za̧a̧nɔ wɛɛ goo: a bee Yeesu Nazarɛdya bɔ mɔ gig ya̧a̧ kɛtingo!

⁹Dood wɔ hi gi nɛ hi bee hi gbɛn lɛlgaal bɔ bɛttɔnɔ, ɔnɛ hí lāg za̧a̧n bɔ gib boozig ya̧a̧boonɔ gɛ. Hɔnɛ be wɛɛ be warige a nɛ be woo nɔ, Waar i?

¹⁰Wɛɛ Waar Yeesu raabe a ɗukum ha mɔ rek mɔ gul a Dimaska, a hɔ, hí raasum hinyɔ gi an mɔ woo sɛw.

¹¹Anyɔ lɛlgaal bɔ yɔ̧ɔ̧s lɔl be be gbɛnlɔl gɛ, dood wɔ hi gi hi bee hi wa̧a̧be naan muul hi tɛlib be tuur gɔ a Dimaska.

¹²Hɔnɛ wal za gi hɔ nuŋgɔ a Ananiyas, gi Bɛtmaakdɔgl fɔk hi gbɔnɔ. Yahuduya wɔ hi ɗɔɔtig a Dimaska sɛw hi ta̧a̧g an doo rɔbo.

¹³Gii zaa gi er be dɔŋdi gi raabe: a yɛ̧ɛ̧ be Sawulu, gaasum lɔl mɔ, ɓɔrbɔ lɔl be gaa be wɛɛ be gbɛnig-gbɛnɔ.

¹⁴Wɛɛ raa a baa wɛ Bɛtya̧ bɔ gii herumɔ an mɔ mɛɛ hinyɔ ha̧a̧ge, an mɔ gbɛn Doo Riit bɔ, an mɔ lag dɔgl yɔ gi a gi ya̧a̧ du.

¹⁵Gbaam an segya ɔ̧ɔ̧ an mɔ dɔks dood sɛw hinyɔ mɔ gbɛnɔ hi hinyɔ mɔ lagɔ.

¹⁶Yɛrɛ mɔ ook nɔ? Ɗundum mɔ loo Bɛtmɛm a Waar Yeesu nuŋg du, mɔ el a Waar Yeesu za̧a̧sibe an Bɛt gi doktsum hinha̧a̧l mɔ.

¹⁷Yɔ be wɛɛ a Urusalima be gul a Bɛtluk du an be zɔ̧ Bɛto, Bɛt Mɔkilɔ zunsib hinza gɛrs du.

¹⁸Be gbɛn Waar Yeesu gib raako: a sam du, tuum a Urusalima hɛbt du nɔɔko, dood wɛrɛ hi tā̧ā̧ hinyɔ gɔ mɔ dɔgsihi be zulha gɛ.

¹⁹Be wɛɛ be ta̧a̧ a Waar i, hi mɛɛ bɛttɔnɔ hi zulya̧ a gɔ be rek nɛ a mɔksilluk wɔ du sɛw, be wa̧a̧lik dood wɔ hi gim ɗɔbsugo be gihi yaak a luknɔ du, be gihi lɛko.

²⁰Yɔ hi wa̧a̧ Estafanus, za̧a̧nyɔ dɔks dood dɔgl mɔ hi gig gbɔŋko, be gidi hɛw be ta̧a̧ an hi gbɔŋge, be oo gbɔŋkɔya wɔ gbandilya̧ wɔ hi mɔks be dɔŋdi.

²¹Hɔnɛ wɛɛ Waar Yeesu raabe a ɗukumɔ, bé yaam a dɔ̧ɔ̧t dɔɔmɛ wɔ hi mɛ̄ɛ̄ Bɛt gɛ hi teesdu a hɛbt zaadɛ hɛml wɔ hi an mɔ ɛmbin dɔgl be.

²²Dood saal wɔ hi mɔm Pol hi kɛmsig tuur a dɔgl yɛrɛ raa gedu, wɛɛ hi ɓooya̧a̧ a wa̧a̧n wal yɛrɛ nɛ gbɔŋg nɛ zaŋ, rı̄ı̄ an hi ɔɔg za̧a̧til gɛ!

²³Hi wɛɛ hi ɓoolya̧a̧ hi hodil gbandilya̧ hi namsɔ, hi yaa luus a bɛtha.

²⁴Yɔ laaya gbɔɔl mɔɔt bɔ gbɛn anbɔ raa doodɔ hi loo Pol hi gunig a lukya̧ du hi lɛge an gi dɔg hinyɔ Yahuduya wɔ hi gig ya̧a̧ wɔ̧ɔ̧nuko gi mɛɛ.

²⁵Yɔ hi wɔg an hi lɛge, Pol ɛr laaya gbɔɔl bɔ gi dɔŋgdi: a nɛ gin gbɔnɔ an nɛ ɓaa doo Romaya yɔ dɔgl matig ket gɛ ya?

²⁶Yɔ laaya gbɔɔl bɔ lag dɔgl bɔrɔ, rek a laaya gbɔɔl mɔɔt bɔ ge warige a mɔ gɔk nɔ? Wal bɔrɔ gi Romayayɔ!

²⁷Yɔ laaya gbɔɔl mɔɔt bɔ lag anbɔ zaa war Pol a raasibe, mɔ gi Romaya ya? Gii ta̧a̧ a hɔɔ, be gi Romayayɔ.

²⁸Laaya gbɔɔl mɔɔt bɔ raa a bee be too tus gbɔɔltɔnɔ an be wɛɛ Romaya hɛw. Pol wɛɛ raa: a benɛ be rɛm be zɛm be gi Romaya waayɔ.

²⁹Yɔ laaya wɔ hi sɔɔ nɛ gi dɔŋdi an hi lɛg gi dɔg hinɛ hi kɛm anbɔ, hi sɔɔ tɔlɛ. Yɔ laaya gbɔɔl mɔɔt bɔ see Pol an gi Romaya waayɔ, hoob wɛɛ ha̧a̧gha̧ yɔ wɔge.

³⁰Hɔnɛ yoosugɔ yɔ laaya gbɔɔl mɔɔt bɔ ha̧a̧g an gi mɛɛ Pol dɔglɔ hi rɔb a hinyɔ Yahuduya wɔ hi gɛ̧ɛ̧nig dɔŋgɔ ge, pidige, wɛɛ raa Bɛtmaakwookya gbɔlɛ wɔ hi dɔglyɛ̧ɛ̧kya wɔ sɛw hi mɔks lɛlɔdi, wɛɛ kamz Pol esig hi muutdu.