Read Doyayo TƆMSYAADƐ WOOSƐ 26 Bible Online

TƆMSYAADƐ WOOSƐ 26 - Doyayo bible

TƆMSYAADƐ WOOSƐ 26

¹Waar Agaripa raa Pol a gbɔnɔ gi an mɔ booya̧a̧ mɔ dɔks zul mɔ hinɛ. Yɔ Pol lag anbɔ pɛɛ naanɔ dɔks zulɔ hin anyɔ lɛ:

²a baa waar Agaripa, be dag hat gbɔɔltɔnɔ an be zee zul be a mɔ muutdu nɛɛko a hinyɔ Yahuduya wɔ hi gib gɛ̧ɛ̧nik geha sɛw.

³Mɔɔ mɔ mɛɛ Yahuduya wɔ maakya̧ hi dɔglya̧ zaadɛ sɛw bɛttɔnɔ. Yɔ anbɔ be zɔ̧mɔ an mɔ mɔm mɔ kɛmsib dɔgl be.

⁴Yahuduya wɔ sɛw hi mɛɛ waak yɔ be waa yɛɛl amntɔnɔ yɔ be gi walsɛrɔ. Hi mɛɛ ɗɔɔtil be yɔ be ɗɔɔt a be hɛbt du hi a Urusalima sɛw yɛɛl a biitirnaan du.

⁵Hi mɛɛb da amntɔnɔ hɛw gi ha̧a̧hi hi ɗɛɛ an hi ta̧a̧ a ɗɔɔtil be yɔ be ɗɔɔt an Farisaya, hi ɓɛrib nɛ a dood Farisaya wɔ hi kaŋk maak wi hi tɛŋk yɔ daar zaadɛ wɔ sɛw hi tees du.

⁶Yɛrɛ be gi a dɔgl-gbaak ha a mɔkil be yɔ be gin a ya̧a̧ yɔ Bɛt wɔb hage hi baa wɛ hiya a ɔ̧t-yɔ̧ɔ̧sum bɔ gedu be rɛms dood wɔrk du gi dɔŋgo.

⁷Yahuduya dɔ̧ɔ̧t koobl daa eer wɔ be, hi gbaa mɔkilya̧ a wɔrkɛ rɛmtig dɔgl ha hɛw, yɔ hi tɛk hinɔ gii ma hi woosig Bɛt hin hi tɛŋko yɛms du hi lurk du sɛw. Waar i, a mɔkil bɔrɔ gi dɔŋg ro, Yahuduya wɔ hi gɛ̧ɛ̧nib hinɛ!

⁸Ɔnɛ nɔ nɛɛ Yahuduya wɔ nɛ ɗɛɛ ɗɔbsig a Bɛt gɔ ɗuns wɔrkɛ a wɔrk du gɛ?

⁹Bee hi zul be, be mɔk nɛ a be woo hinyɔ be ɗɛɛ sɛw an be ha̧tir Yeesu Nazarɛdya bɔ nuŋgɔ.

¹⁰Be woo hinɔ gii a Urusalima. Be dag tɛŋk a Bɛtmaakwookya gbɔlɛ wɔ hii an be yaa dood gaatɛ wɔ hi fɔk Yeesu a luknɔ du. Yɔ hi gbaasihi dɔgl an hi gbɔ̧hi, be ɔks ya̧a̧ hi hiya.

¹¹Dɔɔ kittɔnɔ, be gi hi wa̧a̧lik a mɔksilluk wɔ hi du sɔmsɔm. Be tɛk an be fɛ̧ɛ̧hi hi faa Yeesu nuŋgɔ, hi boo ya̧a̧ha̧a̧l a gi zulha. Yɔ nɔɔtig be dɔ̧ɔ̧ hi zulha ha̧a̧ltɔnɔ, be tɛhi a hi lɛlɛ hi lɛlɛ tuur a hɛbt zaadɛ sɔmsɔm an be wa̧a̧lihi.

¹²Hinɔ anbɔ ro be wa̧a̧ gbɔnɔ an be rek a Dimaska hi ɗɛɛrwol doowa̧a̧nikya yɔ Bɛtmaakwookya gbɔlɛ wɔ hi yaanibe, gid hi gaab tɛŋk a ɗɔbsigya wɔ hi zulha.

¹³Be ɗund be wa̧a̧ gbɔnɔ. A lurk teesdu, waar i, yɔ be gi gbɔnɔ du, be gbɛn lɛlgaal yɔ daar ɔ̧t ɔ̧nɛ ha̧a̧ltɔnɔ gaaz bɛtha tuur be dɔŋdi hi dood wɔ be gi elo hi dɔŋdi be.

¹⁴Wi sɛw wi mat gɔ hɛbtdi. Be wɛɛ be lag ya̧a̧ za booy a bɛtha raabe hi Ibraniŋko ya̧a̧boonɛ: a Sawulu, Sawulu! Mɔ gib ya̧a̧kɛtingo a be gɔ nɔ? Nɔ mɔ gi zul mɔ nɔk gaak an pɛɛzum gi dɔk baatɔ sɔɔl yɔ hi gɔn kobs a muulɔ ge ma nɔ?

¹⁵Be wɛɛ be warɔ a mɔɔ bɔ, Waar i? Waar bɔ ta̧a̧ a bee Yeesu yɔ mɔ gig ya̧a̧ kɛtingo.

¹⁶Yɛrɛ ɗundum mɔ er ha. Be herumɔ an mɔ wɛɛ woosya beenɛ mɔ wɛɛsib segya, ya̧a̧nɛ be zunsum zul be an mɔ dɔks dood gbɛnik yɔ mɔ gbɛnib nɛɛko, mɔ wɛɛ mɔ raasihi hinyɔ gɔ be goksumɔ.

¹⁷Bé oomɔ a Israhilaya wɔ hi teesdu hi dood dɔɔmɛ wɔ be gim yaak hi teesdu,

¹⁸an mɔ kpɛ̧rsihi yɔ̧lya̧ an kpoosya̧ gi zɛmrɔ mɔ tudzihi a lɛlwil du hi tal a lɛlgaal du, hi a Saydanu tɛŋk du hi tuur a Bɛt ge. Gɔ anbɔ, be bitsihi hin ha̧a̧lya̧ hi wɛɛ hi dag ɗɔɔtil rɔb a dood gaatɛ wɔ hi gaa mɔkilya̧ a beege hi tees du.

¹⁹Hinɔ giya, baa waar Agaripa, be ı̄n hinyɔ zaasib gɛrs du a bɛtha gɛ.

²⁰Be dɔgsihi Bɛt dɔglɛ, be yɛɛl a Dimaska, be renɔ be tuurin a Urusalima hi a Yahuduya hɛbt du sɛw, be wɛɛ be tuurin a dood dɔɔmɛ wɔ hi tees du. Be dɔgsihi an hi zɛmr kpoosya̧ hi wɛɛ hi zaa a ge hi zuun woos yɔ gɔ hi mɛɛn naandɛmsya̧ be.

²¹Hinɔ gii Yahuduya wɔ hi wa̧a̧be, a Bɛtluk du hi wɛɛ hi kɛɛ an hi gbɔ̧be.

²²Tuur ɔ̧ti gi zulɛ Bɛt gii gisib ɗaako, be erk hɛdi be boosig dood gbɔlɛ hi dood zaadɛ sɛw Waar Yeesu dɔglɔ. Hinyɔ be dɔkyɔ riitin hi hinyɔ Bɛtya̧a̧kɛŋkya wɔ hi Muusa hɛw, hi dɔg nɛ a hinɔ gi wooyyɔ .

²³Hi dɔgɔ: a Masihu gi yɔ̧ ya̧a̧rɛ, gii gi yɛɛl rɛmlik gi ɗund a wɔrk du doosi, an gi dɔg lɛlgaal za̧a̧tig dɔgl a Yahuduya wɔ hi dood dɔɔmɛ wɔ hi tees du.

²⁴Yɔ Pol gi zeek zulɔ anbɔ Fɛstus ɓooya̧a̧ a Pol , mɔ yooyɔ, hinyɔ mɔ zaŋ mɔ daarin zul mɔ wɛɛnum yoo nɛ zaŋ!

²⁵Pol wɛɛ goo a ɗɛnti, Fɛstus, be taa yoo. Dɔgl be yɛrɛ dɔgl rɔbo hi dɔgl mɔkilya.

²⁶Yɔ Waar bɔ Agaripa mɛɛ dɔgl yɛrɛ, hoobha̧a̧b ya̧a̧book hi gii gɛ. Be mɛɛ rɔbtɔnɔ a mɔ mɛɛ hinyɔ tal sɛw. Hinɔ daa luurlɛl gɛ be!

²⁷Baa, waar Agaripa, mɔ gi ɗɔbsig Bɛtya̧a̧kɛŋkya wɔ hinyɔ hi raak ya? Be mɛɛ a mɔ ɗɔbs hinyɔ hi dɔko.

²⁸Agaripa war Pol a gɔ gi kaasi mɔ mɔkig an mɔ wɛɛnib Yeesu Kristu ɗɔbsigya hɛw ya?

²⁹Pol goo: a gi samɔ, zaabe gi sam gɛ, be zɔ̧k Bɛt a mɔ zulha, mɔɔ gbun kpɔd gɛ, ha̧a̧be an dood zaadɛ wɔ hi zɛ̧ɛ̧r sɛw hi gisib dɔgl be kɛŋk nɛɛko, nɛ wɛɛ Yeesu doodɔ an beya, nɛ wɛɛ an bee her, ɔnɛ an bɔhi wɔmnin ba̧a̧ntus an yɛrɛ be naan du lɛ.

³⁰Yɔ anbɔ waar bɔ hi hɛbtzulya bɔ Fɛstus hi nis bɔ Bɛrnike hi dood zaadɛ wɔ hi gi ɗɔɔtig di hi ɗund hi tuuza lakdi.

³¹Yɔ hi tuuza hi watinu: a wal yɛrɛ gɔ hinyɔ rı̄ı̄ an gi gul luknɔ zaabe an gi wɔr gɛ.

³²Agaripa wɛɛ raa hɛbt zulya bɔ Fɛstus a à wal yɛrɛ raa nɛ a Kaysara gi gbɛrsib dɔgl be gɛ, yɔ wɛ ɗɛɛ nɛ an wɛ bisig gi rekɔ.