Read Doyayo TƆMSYAADƐ WOOSƐ 5 Bible Online

TƆMSYAADƐ WOOSƐ 5 - Doyayo bible

TƆMSYAADƐ WOOSƐ 5

¹Wal za giro, nuŋgɔ a Ananiyas. Nisɔ be nuŋgɔ a Saafira, hi zebr bakya̧ za. Wal bɔ gɛ̧ɛ̧ tus bɔ tee du, ɓeg zaa gbaa be, kamz zaa a tɔmsya wɔ hi be. Nisɔ mɛɛ dɔglɔ be.

³Hɔnɛ Piyɛr warige a Ananiyas, nɔ Saydanu gi guz mɔ kpoos du an mɔ gɔ̧ɔ̧s Bɛt Mɔkilɔ ya̧a̧ mɔ ɓez bak tus bɔ zaaɔ mɔ gbaaz nɔ?

⁴An bak bɔ zey nɛ gɛ rɛ, yɔ kɔ̄m mɔnɛ gɛ ya? Yɔ zey be, nɛ tusɔ gi mɔɔn ma mi? Kɔmri kpoos mɔ gi ta̧a̧ hingɔk anbɔ? Yɛrɛ mɔ́ gɔ̧̄ɔ̧̄s dood ya̧a̧ gɛ, mɔ gɔ̧ɔ̧s Bɛt gii ya̧a̧.

⁵Yɔ Ananiyas lag dɔgl wɔrɔ anbɔ, mat hɛbtdi wɔrɔ. Walɛ-sɛrɛ hi zaa hi loog hi wɔbtige, hi pɛɛg hi re hi i̧i̧ge. Hoobha̧a̧ dood wɔ hi lak nɛ dɔgl bɔrɔ sɛw ha̧a̧ltɔnɔ.

⁷Gɔ am kaasi nisɔ zaa guzɔ, mɛ̄ɛ̄ hinyɔ tal nɛ gɛ be.

⁸Piyɛr warige a dɔgsibe, nɛ zebr bak bɔ tusɔ anyɔ lɛ ya? Nis bɔ ta̧a̧ a hɔɔ, wi zebr bak bɔ tusɔ anbɔ labɔ.

⁹Hɔnɛ wɛɛ warige a nɛ mɔk ri lɛlgbunu hi wal mɔ an nɛ gɔ̧ɔ̧s Waar Bɛt Mɔkilɔ ya̧a̧ nɔ? Yɛrɛ dood wɔ hi i̧i̧ wal mɔ wɔrkɔ hi erk gɛrɛ a lukgbarɔ. Hí pɛɛm hí kam a lakɛ hí re hí i̧i̧m be.

¹⁰A ya̧a̧ gbun bɔ duge nis bɔ mat wɔrko, hi pɛɛg hi wɔbtige hi kam hi i̧i̧g a waltɔ dɔŋdi.

¹¹Yɔ anbɔ hoobha̧a̧s Yeesu fɔkya wɔ ɔksilya̧ bɔ sɛw ha̧a̧ltɔnɔ, hi dood zaadɛ wɔ hi lag dɔglɔ sɛw.

¹²Tɔmsya wɔ hi wook gɛrs hinmɛksingoya wɔ hi gɛrs zaadɛ kittɔnɔ a dood tees du. Hi er lɛlgbun hi kpoosya̧ ɔksi a Sulemaanu zekslɛl yɔ wɔm a Bɛtlukya̧ gedu.

¹³Hoobha̧a̧ dood wɔ ha̧a̧hi Yeesu ɗɔ̄bsig gɛ ɔksugɔ hi hiya. Wɛɛ dood hi gihi baanik gbɔɔltɔnɔ be.

¹⁴Wɔ hi ɗɔbsig Waar Yeesu hi hɔŋko hɔŋko, walɛ hi nɛɛd hi kit be hi ɔksig hi ɗɔbsigya zaadɛ wɔ.

¹⁵Wɛɛ dood hi kamzig gumtil wɔ a leeso ha hi a tɛ̧ɛ̧waak ha hi gihi gbaak a gbɔnɔ du an Piyɛr gɔ gi daak lɛlɔge zeksɔ gi zɛm zaadɛya̧ mɔɔti hi za̧a̧.

¹⁶Dood saal kittɔnɔ hi fu̧u̧z a waal gbɔlɛ zaadɛ wɔ hi sɛ̧ɛ̧b a Urusalima dɔŋdi gedu, hi kamzig gumtil wɔ hi dood zaadɛ wɔ loorɛha̧a̧l gihi muul du, hi sɛw hi za̧a̧ko.

¹⁷Yɔ anbɔ Bɛtmaakwookya gbɔɔl mɔɔt bɔ hi dood wɔ gɔ hi ɔksig elo, hi zaadɛ wɔ gɔ hi ɔksig hi Sadukiya wɔ hi ɗuns ka̧a̧si a tɔmsya wɔ hi zulha. Hi mɔk a yɛrɛ ɔnɛ gi an wɛ woosihi hinbɔbtini ma.

¹⁸Hi wa̧a̧ tɔmsya wɔ hi yaahi a luknɔ gbɔɔl du.

¹⁹Wɛɛ Waar Bɛtwalsɛr za zaa a yɛms du gboor luknɔ gbɔnɔ wɔ tudzihi, wɛɛ raahi

²⁰a rekin nɛ da nɛ tal a Bɛtluk du nɛ erɔ, nɛ́ dɔks dood za̧a̧tig dɔgl wɛrɛ sɛw.

²¹Tɔmsya wɔ hí lāg anbɔ hi re hi gul a Bɛtluk du bi̧i̧ltɔnɔ hi yɛɛl hingoki. Yɔ Bɛtmaakwookya gbɔɔl mɔɔt bɔ hi wɔ gɔ hi mɔksig el hi tuurɔ, hi mɔks Yahuduya ɗɛntɛ dɔglyɛ̧ɛ̧kya wɔ hi Israhilaya ɗɛntɛ wɔ sɛw, hi yaa doodɛ hi rek hi ɓɛɛz tɔmsya wɔ a luknɔ bɔ gedu an hi kamzihi.

²²Yɔ lɛl-ookya wɔ hi rekɔ hí zɛ̧hi ma duhɔ gɛ. Hi wɛɛz hi dɔgɔ

²³a wi zɛm hi gboo luknɔ gbɔnɔ wɔ rɔbtɔnɔ hi ookya wɔ a gbarya̧ bɔ ge. Hɔnɛyɔ wi gboor wí zɛ̄m doo gedu gɛ.

²⁴Yɔ Bɛtluk-ookya gbɔɔl bɔ hi Bɛtmaakwookya gbɔlɛ wɔ hi lag dɔgl bɔrɔ anbɔ a tɔmsya wɔ hi waglɛlɛ, yɔɔhi sɔsɔg, hi wɛɛ hi ɛr zulya̧ hin a nɔ gi tuurik ma anbɔ ɔnɛ?

²⁵Kaasi doo za zaa dɔgsihi a kɛnɛ! Yɛrɛ walɛ wɔ nɛ yaahi luknɔ du hi gi a Bɛtluk du hi wɛɛ hi gogsig dood hinɛ.

²⁶Yɔ anbɔ, laaya gbɔɔl bɔ retin hi lɛl-ookya wɔ hi loozihi, hí kāmzihi hi tɛŋk gɛ ɔnɛ. Hoobha̧a̧hi dood saal wɔ ha̧a̧ltɔnɔ an bɔhi duunihi bet hi wɔrɔ!

²⁷Yɔ hi kamzihi hi gbaahi a dɔglyɛ̧ɛ̧kya wɔ hi muutdu. Bɛtmaakwookya gbɔɔl mɔɔt bɔ warihi

²⁸a yɔ wi ansin hi gabsɛ a bɔnɛ goghin hi nuŋg bɔrɔ zaŋ nɛ́ kɛ̄ŋ gɛ ya? Yɛrɛ nɛ hi̧i̧sin Urusalima gɔ hi hingok nɛ wɔrɔ; nɛ́ ha̧a̧n ma an nɛ wɛns wii wal bɔrɔ ga̧a̧mɔ wi zulha ma mi!

²⁹Piyɛr hi tɔmsya zaadɛ wɔ hi goo: a gi an wi kɛms Bɛt gii ya̧a̧ hi anyɔ gɔ wi kɛms doodɛ.

³⁰Nɛ doo Yeesu a dɔ̧ɔ̧r ha nɛ gbɔŋge; yɛrɛ baa wɛ Bɛtya̧ wɛɛ rɛmsige,

³¹dɔɔnig a gi naanrɔb an Waar i hi Za̧a̧sigya an gi ɗaas dood Israhilaya wɔ hi zɛmr kpoosya̧, Bɛt gi wɛɛ gi bitsihi hinha̧a̧lya̧.

³²Wi gi Bɛt segya ɔ̧ɔ̧nɛ an wi raasin hin wɛrɛ dɔglya̧; gbunɔ, Bɛt yɔ gaaz dood wɔ Mɔkilɔ hi gisig tɔnkɛŋk zuun dɔglɔ be.

³³Yɔ dɔglyɛ̧ɛ̧kya wɔ hi lag anbɔ hin nɔɔsihi ha̧a̧ltɔnɔ, ha̧a̧hi an hi wa̧a̧hi hi gbɔ̧higbɔmɔ.

³⁴Hɔnɛ doo za Farisaya gi hi teesdu nuŋgɔ a Gamaliyɛl, gi Bɛtmaakdɔkyayɔ. Dood sɛw hi wɛɛnig an doo gbɔɔl a hi muutdu. Ɗund a dɔglyɛ̧ɛ̧kya wɔ hi teesdu, raahi a hi tuus tɔmsya wɔ a lakdi kaasi.

³⁵Kuudu wɛɛ raahi a walɛ Israhilaya wɛ, mɔkin hinyɔ gɔ nɛ woo a dood wɛrɛ hi gbaŋgi.

³⁶Ām gɛ, doo za da giro nuŋgɔ a Tɛwdas, ɗuk raa zulɔ a be doo gbɔɔlɛ, dood tɛmɛrɛ nasɔ hi ɔks hi giya hi gig nɛ fɔko. Yɔ hi gbɔŋge, wɔ hi gig nɛ fɔk sɛw hi wag gbɔnɔ, dɔglɔ bɔ wɛɛ hintɔsyayɔ.

³⁷A gi kuudu be, Galileya bɔ nuŋgɔ a Yahuda mid a dood nuŋgbi̧i̧s ɔ̧ti, maat dood kittɔnɔ an hi fɔge, hi gbɔŋg hɛw. Fɔkɔya wɔ hi hɛksɔ.

³⁸Yɛrɛ be raasinɛ, ɔɔn dood wɛrɛ dɔglya̧ nɛ zaŋ, ɔɔnɛhi hi rekɔ. Mɔkil bɔrɔ hi woos wɔrɔ lab doo tɔsi gi gihi nɛ wooko, gi ha̧tiro.

³⁹Yɛrɛ woosɔ gi gi nɛ fu̧u̧zig a Bɛt ge be, taa an nɛ ɗɛɛg ha̧tirgo. Oon zul nɛ an bɔnɛ gbaatin hi Bɛt dey!

⁴⁰Dɔglyɛ̧ɛ̧kya wɔ hi ze Gamaliyɛl dɔglɔ. Hi wɛɛ hi el tɔmsya wɔ hi lɛhi. Hi wɛɛ hi raahi a bɔhi boo nɛ hinza hi Yeesu nuŋgɔ nɛ zaŋ, hi wɛɛ hi bisihi gɔ.

⁴¹Yɔ tɔmsya wɔ hi hɛɛtin hi dɔglyɛ̧ɛ̧kya wɔ, hi dag hat gbɔɔltɔnɔ anyɔ hi mɛɛ a Bɛt mɔk a hi rii an hi yɔ̧ ya̧a̧rhant hi Yeesu nuŋgɔ.

⁴²Wɛɛ ɔ̧t nuŋg sɛw, hi waak hingok a Bɛtluk du hi raat wɔ duge. Hi dɔg Dɔgl Rɔb bɔ a Yeesu gi Masihu yɔ Bɛt wɛɛnig Waar giya.