Read Doyayo TƆMSYAADƐ WOOSƐ 6 Bible Online

TƆMSYAADƐ WOOSƐ 6 - Doyayo bible

TƆMSYAADƐ WOOSƐ 6

¹A ɔ̧tɔge yɔ Yeesu fɔkya wɔ mɔglikya̧ hi hɔŋko, Yahu- duya wɔ hi book Yonaniŋko ya̧a̧boonɛ hi kaa hin a Yahuduya zaadɛ wɔ hi zulha. Hi booko a lees yɔ gɔ hi gɛ̧ɛ̧k ɔ̧t nuŋg sɛw hí gāā kuurɛ nɛɛdya̧ wɔ gɛ.

²Tɔmsya wɔ koobl daa eer hi mɔks Yeesu fɔkya wɔ sɛw hi raa a rı̄ı̄ an wi ɔɔ Bɛt dɔglɔ dɔki an wi wɛɛ kokgɛ̧ɛ̧kyaadɛ gɛ.

³Yɔ anbɔ yɛ̧ɛ̧dɛ be wɛ, herin walɛ nɔɔn-erɛ a nɛ tees ɗu, walɛ hinmɛɛkya wɔ Bɛt Mɔkilɔ hi̧i̧s hi kpoos du, wɔ dood hi gihi seek an dood rɔ́bɛ, an wɛ gbaahi hi woowoos yɛrɛ.

⁴Wii be wi gbor Bɛt zɔ̧k hi dɔglɔ dɔki. Anbɔ.

⁵Yɔ dɔgl bɔrɔ bɛs dood saal wɔ sɛw hi her Estafanus yɔ Bɛt Mɔkilɔ hi̧i̧s gi kpoos du, hi Filib, Porokɔr, Nikanɔr, Tiimɔŋ, Parmɛnas hi Nikola yɔ fu̧u̧ a Aŋtakiya gi gul Yahuɗuya maako.

⁶Hi esihi a tɔmsya wɔ hi muutdu. Yɔ hi zɔ̧ Bɛto hi gbaasihi naan zulha.

⁷Bɛt dɔgl bɔ gi yɛdugo, Yeesu fɔkya wɔ hi hɔŋk a Urusalima, hi kitig gi daariklɛlɛ. Bɛtmaakwookya wɔ saalya̧ kittɔnɔ hi ta̧a̧k Yeesu dɔglɔ.

⁸Estafanus yɔ kpoosɔ hi̧i̧s hi gɛmsili hi tɛŋko woo gɛrs gbɔlɛ hi gɛrs hinmɛksingoyaadɛ a dood tees du.

⁹Dood zaadɛ wɔ hi fu̧u̧z a mɔksilluk za yɔ gɔ hi el a Gbaarɛ Bisilyaadɛ Mɔksilluko, wɔ hi lag Kirɛnɛ ya̧a̧boon hi Iskandariya wɔ ya̧a̧boonya̧, hi Yahuduya wɔ a Silisi hi wɔ hi gi a Aaziya ya̧a̧boonya̧ hi yɛɛl hinfaltingo hi Estafanus.

¹⁰Anyɔ Bɛt Mɔkilɔ gaa Estafanus hinmɛɛki, hi ɗɛ̄ɛ̄ an hi daaringe hinmɛɛk zaa gɛ.

¹¹Hɔnɛ wɔrɔ hi wɛɛ hi sɔmb walɛ zaadɛ a luurlɛlɛ hi gɔ̧ɔ̧sihi ya̧a̧ a wi lagig gi book ya̧a̧ha̧a̧l a Muusa zulha hi Bɛt zulha.

¹²Hi sɔmb dood wɔ hi ɗɛntɛya̧ wɔ hi Bɛtmaakdɔkya wɔ hi zaa hi wa̧a̧ge hi kaŋg a dɔglyɛ̧ɛ̧kya wɔ hi muutdu.

¹³Hi wɛɛ hi tɔmz dood hi zaa hi gɔ̧ɔ̧sigya̧a̧ hi raa a wal yɛrɛ gɔ gi waak ya̧a̧ha̧a̧l book a Bɛtluk gaat yɛrɛ gi zulha hi Muusa maakdɔglɔ zulha.

¹⁴Wi lagig gi book a Yeesu Naza-rɛdya bɔrɔ gii gi ɛ̧btir Bɛtluk bɔ gi wɛɛ gi zɛmtir maak wɔ Muusa da goksɛ nɛko.

¹⁵Dɔglyɛ̧ɛ̧kya wɔ hí ɗɔ̄ɔ̄t a luk bɔ gedu sɛw yɔ̧lya̧ gi a Estafanus muulɛ, hi gbɛnk muutɔ an Bɛtwalsɛr muuto.