Read Doyayo TƆMSYAADƐ WOOSƐ 8 Bible Online

TƆMSYAADƐ WOOSƐ 8 - Doyayo bible

TƆMSYAADƐ WOOSƐ 8

¹Sawulu be ta̧a̧ nɛ dɔglɔ an hi gbɔŋg hɛw. A ɔ̧tɔge dood hi yɛɛl Yeesu fɔkya wɔ zɛksig ha̧a̧ltɔnɔ a Urusalima. Hi nɔɔ hi hɛks hi rek a Yahuduya hɛbt du, zaadɛ be a Samariya hɛbt du. Tɔmsya wɔ hii kɔm kpɔd.

²Yeesu -ɗɔbsigya rɔ́bɛ wɔ zaadɛya̧ hi loo Estafanus wɔrkɔ hi rek hi i̧i̧ge. Hi wɛɛ hi kaag ha̧a̧ltɔnɔ.

³Sawulu be zɛks Yeesu fɔkya wɔ, gut raato hi raato, gi wa̧a̧lik walɛ hi nɛɛdɛ gihi yaak luknɔ du.

⁴Yeesu fɔkya zaadɛ wɔ hi hɛks hi rek hi dɔg Dɔgl Rɔb bɔ a lɛlyɔ hi re ge sɛw.

⁵Filib be rek a Samariya waal gbɔɔl du dɔg Masihu bɔ dɔglɔ be.

⁶Anyɔ dood saal wɔ hi kɛm hinyɔ Filib gi dɔk hi wɛɛ hi gbɛn gɛrs hintuusingoya yɔ gi wook be, hi zaa hi sɛw hi ta̧a̧ dɔglɔ rɔbtɔnɔ.

⁷Loorɛha̧a̧l hi tuu a dood kittɔnɔ hi muul du hi kaal ha̧a̧ltɔnɔ. Dood zaŋdɛ wɔ, hi dɔɔwɔlya wɔ hi za̧a̧k be.

⁸Yɔ anbɔ ma Samariyaya wɔ hi dag hat gbɔɔltɔnɔ.

⁹Doo za da gi a waal gbɔɔl bɔ gedu nuŋgɔ a Simɔŋ, raa zulɔ a be doo gbɔɔlɛ, gɔ gis nɛ Samariyaya wɔ gɛrs gɔko; hii be, hinɔ yɔɔhiyɔɔ.

¹⁰Dooɗ gbɔlɛ hi waat sɛw gɔ hi gisig kɛŋk dɔglɔ bɛttɔnɔ. Dood wɔ hi wɛɛ hi dɔk be a gii gi Bɛt Tɛŋk yɔ gɔ hi el a Tɛŋk Gbɔɔlɛ.

¹¹Yɔ Simɔŋ gisihi waak nɛ gɛrsɔ bɔ gɔk be, hii be duhidumɔ hi wɛɛ hi ta̧a̧k dɔglɔ gɔ be.

¹²Hɔnɛyɔ Filib dɔgsihi Dɔgl Rɔb bɔ yɔ gi Bɛt wáátɔ dɔgl hi Yeesu Kristu nuŋgɔ hi ɗɔbs dɔglɔ; walɛ hi nɛɛd sɛw hi look Bɛtmɛmɛ.

¹³Simɔŋ hi zulɔ ɗɔbs Bɛt dɔgl bɔ hɛw, wɛɛ dag Bɛtmɛmɛ. Yɔ anbɔ wɛɛ ɔ̄ɔ̄ Filib dɔŋgɔ zaa ma gɛ. Yɔ gbɛn hinmɛksingoyaadɛ hi gɛrs gbɔlɛ zaadɛ wɔ Bɛt zuun a Filib naan du, yɔɔgyɔ.

¹⁴Yɔ tɔmsya wɔ hi gi a Urusalima hi lag a dood wɔ hi waak a Samariya hi ta̧a̧ Bɛt dɔglɔ, hi yaa Piyɛr hi Yohana a hiige a Samariya.

¹⁵Yɔ Piyɛr hi Yohana hi tuur a Samariya hi zɔ̧bs ɗɔbsigya wɔ hi gi hɔ Bɛt an hi dag Mɔkilɔ.

¹⁶Bɛt Mɔkilɔ da sidir nɛ a Samariyaya wɔ zaaya̧ gbun zulha ket gɛ be, hi dag Bɛtmɛm gii kpɔd a Yeesu nuŋg du.

¹⁷Hɔnɛyɔ Piyɛr hi Yohana hi tuur hi gbaas wɔrɔ naan zulha hi dag Bɛt Mɔkilɔ gɔ hi kpoos du.

¹⁸Anyɔ Simɔŋ gbɛn tɔmsya wɔ hi gbaas ɗɔbsigya wɔ naan zulha Bɛt gi wɛɛ gi gaahi Mɔkilɔ anbɔ, ha̧a̧g an gi gaa tɔmsya wɔ tusɛ,

¹⁹raahi a gaanbe tɛŋk bɔrɔ an za̧a̧nyɔ gɔ be gbaasig naan zulha gi dag Bɛt Mɔkilɔ be.

²⁰Hɔnɛ Piyɛr wɛɛ raage a an Bɛt gi ha̧tirmɔ hi tus mɔ bɔ sɛw anyɔ mɔ mɔk a be zeb Bɛt gaasɔ hi tusɛ!

²¹Anyɔ kpoos mɔ gāā a Bɛt muutdu gɛ, ɗɛ̄ɛ̄ an mɔ ɔks hi wii a woos yɛrɛ gedu zaŋ gɛ.

²²Ɔɔm mɔkil mɔ ha̧a̧l bɔrɔ mɔ wɛɛ mɔ dɛms Waar Bɛt naan an mɔ zɔ̧g kinsa gi bitsum mɔkil mɔ bɔ mɔ kpoos du.

²³Be gbɛn an kpoos mɔ zoobɔ, yɔ anbɔ hinha̧a̧l daarumdaarɔ.

²⁴Simɔŋ wɛɛ raa Piyɛr hi Yohana a saanɛ, zɔ̧bsinbe Waar Bɛto hi zul nɛ an bɔ hinwɔ nɛ raa zaaya̧ gbun gi zɛ̧be.

²⁵Kuudu yɔ Piyɛr hi Yohana hi raas dood hinyɔ Yeesu woo hi wɛɛ hi dɔksihi Bɛt dɔgl gi da̧a̧ hi wɛɛ a Urusalima. Yɔ hi gi wɛɛko hi dɔg Dɔgl Rɔb bɔ nɔɔha a raat kitɛ du a Samariya hɛbt du sɛw.

²⁶Bɛtwalsɛrɔ za zaa a Filib ge raage: a ɗukumha, mɔ rek a ɔ̧tkazig naanyɛ̧li, a gbɔnɔ yɔ fu̧u̧ a Urusalima gi tii a Gaaza ge, gbɔnɔ yɔ fɔb a hɛtdɔŋ du.

²⁷Filib ɗuk rek a gbɔnɔ bɔ gedu, dagtin hi wal za Etiyobya gi zaako, giz nɛ a Urusalima an gi ɗɔbs Bɛto. (Hi sɔɔg nɛ an gi oo nɛɛwaar Etiyobya bɔ rɔɔsɔ sɛw. )

²⁸Gi wɛɛk ma gi lɛlɛ, ɗɔɔt a mɔɔta yɔ dɔy gi dirk hage, gi zaŋgig Bɛtya̧a̧kɛŋkya bɔ Esaya ɗɛɛrwolɔ.

²⁹Wɛɛ Bɛt Mɔkilɔ raa Filib a rekum mɔ sɛ̧ɛ̧b a mɔɔta bɔrɔ gi dɔŋdi.

³⁰Yɔ Filib nɔɔ gi reko lag wal Etiyobya bɔ gi zaŋgig hin a Esaya ɗɛɛrwol du. Ɛrige a mɔ kɛŋk hinyɔ mɔ zaŋgig ya?

³¹Gii goo a doo za gogsib hinɔ gɛ be, be ɗɛɛ hinɔ kɛŋk ri? Wɛɛ el Filib a kazum hɛdi mɔ ɗɔɔt hi bee ɔksi an mɔ wadsibe hinɔ.

³²Lɛl bɔ gi nɛ zaŋgig a ɗɛɛrwol bɔ gedu gi an yɛrɛ lɛ a hi kaŋg an tamɔ a gbɛɛrik lɛlɛ. Wɛɛ kɔ̀m an tamwaa yɔ gɔ ɓōō a za̧a̧nyɔ gɔ gi dɛ̧ɛ̧lik sɛɛsɔ gi muutdu gɛ. Āā ya̧a̧ an gi inɔ gi raa doodɛ a ha̧a̧be an hi huur sɛɛs be gɛ zaŋ.

³³Yɔ hi wa̧a̧ge, hi mātinge dɔgl rɔb gɛ. Bɔ ɗɛɛ an gi dɔg zaŋgɔ dɔglɛ? Ya̧a̧nɛ, hi da̧a̧s kolɔ a hɛbtdi.

³⁴Etiyobya bɔ ɛr Filib a raasibe, Bɛtya̧a̧kɛŋkya bɔ gi book dɔgl yɛrɛ a bɔ zulha nɔ? Gi book gi zulha ya, zaa gi book doo za zulha ya ri?

³⁵Filib yɛɛl ya̧a̧book dɔgsig Yeesu dɔglɔ bɔ baar a lɛl yɔ hi zaŋg nɛ a tamwaa bɔ gbɛɛrikɔ dɔglɔ ge.

³⁶Anyɔ hi gi rek gbɔnɔ du hi tuur a mɛmlɛlɛ, wɛɛ Etiyobya bɔ raa a mɛm gɛrɛ, à be dag Bɛtmɛm hɛdi yɔ gɔ nɔ? [

³⁷Filib raa a gɔ hinza gɛ, gid mɔ ɗɔbsig Yeesu hi kpoos mɔ sɛw, mɔ ɗɛɛ an mɔ dag Bɛtmɛmɛ. Woosya bɔ goo a yɛrɛ be ɗɔbs a Yeesu Kristu gi Bɛt waayɔ. ]

³⁸Wɛɛ es mɔɔta ɔ̧ɔ̧ bɔ. Wɛɛ Filib hi Etiyobya bɔ hi sil mɛm bɔ gedu hi eer sɛw. Filib hotinge Bɛtmɛm gɔ.

³⁹Yɔ hi tuuz a mɛm bɔ gedu, Bɛt Mɔkilɔ ha̧s Filib. Etiyobya bɔ gbɛnig zaa ma gɛ, yɔ anbɔ gii wɛɛ fɔ gbɔnɔɔ hi hato.

⁴⁰Hi wɛɛ hi da hi gbɛn Filib a Azota, dɔŋgɔ rek a Kaysariya hɛbt du, gi Bɛt dɔglɔ dɔk nɔɔha a waal gbɔlɛ wɔ du a lɛlyɔ gi daak ge sɛw.