Read Doyayo TƆMSYAADƐ WOOSƐ 9 Bible Online

TƆMSYAADƐ WOOSƐ 9 - Doyayo bible

TƆMSYAADƐ WOOSƐ 9

¹Yɔ anbɔ Sawulu ɔ̄ɔ̄ Waar Yeesu fɔkɔya wɔ zɛksig hi naati an gi wa̧a̧hi gi gbɔ̧hi gɛ.

²Rek ɛr ɗɛɛrwol doowa̧a̧-nikya a Bɛtmaakwookya gbɔɔl mɔɔt bɔ ge an gi ren a dood mɔksillukya wɔ a Dimaska hi, hi gaag gbɔnɔ gi zɛm dood hi fɔk Yeesu gbɔnɔɔ an walɛ hi nɛɛdɛ gi wa̧a̧hi, gi wɔblihi gi kamzihi a Urusalima.

³Yɔ gi rek gbɔnɔ du gí sɛ̧ɛ̧bik a Dimaska, ɓɔrbɔ lɛlgaal za fu̧u̧z bɛtha gāa gi dɔŋdi kpay,

⁴Sawulu mat hɛbtdi wɛɛ lag ya̧a̧ booyz bɛtha a Sawulu, Sawulu, mɔ gib ya̧a̧ kɛtingo nɔ?

⁵Gii wɛɛ war a mɔɔ bɔ, Waar i? Waar Yeesu googe a bee Yeesu , Za̧a̧nyɔ mɔ gig ya̧a̧kɛtingo,

⁶yɛrɛ ɗukum ha, mɔ rek a waal gbɔɔl du, hi raasum hinyɔ gɔ mɔ woo.

⁷Walɛ wɔ hi gi Sawulu kaŋk hi kɔm hititi. Hi kɛŋk ya̧a̧ bɔ gi booyzig wɛɛha bɛttɔnɔ, wɛɛ hi gbɛn doo gɛ be.

⁸Sawulu ɗukɔ, yɔ gaas lɔlɔ anyɔ gbɛn lɔl gɛ; hi wa̧a̧g a naan muul ro hi tɛlig hi kaŋg a Dimaska.

⁹Kɔm ɔ̧t taarɛ gbɛn lɔl gɛ, lehin gɛ, yɔ̧ mɛm gɛ be.

¹⁰Hɔnɛ wal za Yeesu fɔkya gi a Dimaska nuŋgɔ a Ana-niyas. Gbɛn Waar Yeesu raag a gɛrs du a Ananiyas! Gii ta̧a̧ a nɔ be giyɔ, Waar i.

¹¹Wɛɛ Waar Yeesu raage a ɗukum mɔ rek a gbɔnɔ yɔ gɔ hi el a gbɔnɔ Eti gedu, mɔ ɛr za̧a̧n za Tarseya nuŋgɔ a Sawulu a Yahuda raa du. Yɛrɛ gi Bɛt zɔ̧ko,

¹²yɔ gi Bɛt zɔ̧ko gbɛn za̧a̧nza a gɛrs du gi guzugo nuŋgɔ a Ananiyas. Yɔ guzɔ gbaasig naan zulha an gi wɛɛ gi gbɛn lɔlɛ.

¹³Ananiyas googe a Waar i, dood kittɔnɔ hi raasib wal bɔrɔ dɔglɔ, hi wɛɛ hi dɔgsib hinbɔbtinɔ yɔ gɔs dood mɔ gaatɛ wɔ gi daarinlɛl a Urusalima.

¹⁴Yɛrɛ yɔ zaa a hɛdi, Bɛtmaak-wookya gbɔlɛ wɔ hii gaazig tɛŋk gbɔɔltɔnɔ an gi zaa gi wa̧a̧ dood wɔ hi gim ɗɔbsugo.

¹⁵Wɛɛ Waar Yeesu raage a rekumɔ, be herig an gi woosibwoosɛ an gi kam nuŋg be a dood waal du hi teesdu, a waar ɛ gbɔlɛ wɔ hi teesdu hi a Israhilaya wɔ hi tees du.

¹⁶Yɔ anbɔ bé wɛɛ bé zunsig hinyɔ gɔ gi ha̧a̧nya̧a̧r sɛw a be nuŋg dɔŋgo.

¹⁷Ananiyas tuu re da gul raa bɔ gedu gbaas Sawulu naan zulha raage a Sawulu, yɛ̧ɛ̧be, Waar Yeesu yɔ mitsum a gbɔnɔ yɔ mɔ zaak gedu, gii yaazibe an be gbaasum naan zulha mɔ wɛɛ mɔ gbɛnlɔlɛ, Bɛt Mɔkilɔ gi tɔɔ mɔ kpoos du.

¹⁸Ɓɔrbɔ hinza tuuz gi lɔl du an dut fɛbti, wɛɛ gbɛnlɔl gɔ. Ɗukɔ dag Bɛtmɛmɛ.

¹⁹Kuudu le lees dag tɛŋko. Sawulu waa yɛmsɔ tɔŋ kaasi hi Yeesu fɔkya wɔ a Dimaska.

²⁰Ɓɔrbɔ Sawulu wɛɛ rek Yeesu dɔglɔ dɔk a mɔksilluk wɔ hi du a Yeesu gi Bɛt waayɔ.

²¹Dood wɔ hi gisig dɔglɔ lak sɛw kɔmsihi gɛrsɛ; hi wɛɛ hi raako a nɛ za̧a̧nyɔ gi gbɔmntig nɛ dood wɔ hi ɗɔbsig Yeesu a Urusalima gii ma mi? Zaa dihɛ an gi wɔbl dood wɔ hi Yeesu ɗɔbsig gi ka̧hi a Bɛtmaakwookya gbɔlɛ wɔ hi muutdu wɛ gɛ?

²²Yɔ anbɔ Sawulu Bɛt dɔglɔ bɔ gi dɔko gi rek hi tɛŋk doosɛ, doosɛ. Yahuduya wɔ a Dimaska hí mɛ̄ɛ̄ hinyɔ gɔ hi woo gɛ, anyɔ hi lag Sawulu gi zunsihi a Yeesu gii gi Masihu.

²³Kuudu ɔ̧tyɔ daa kittɔnɔ, Yahuduya wɔ hi wɔya̧a̧ an hi wa̧a̧ Sawulu hi gbɔŋge.

²⁴Yɛms du hi lurk du sɛw hi ooge a waal gbɔɔl bɔ ya̧a̧gbarɔ ge an hi wa̧a̧ hi gbɔŋge. Ya̧a̧wɔkya̧ bɔ hi gɔ, Sawulu lag ya̧a̧wɔkya̧ bɔ dɔglɔ be.

²⁵Yɔ a yɛms za du anbɔ walɛsɛrɛ ɔ̧ɔ̧ wɔ hi loog hi sisig ba̧a̧n muul a wɔmnt hɔɔt kuu a dɛl gbɔɔl du.

²⁶Yɔ Sawulu rek a Urusalima ha̧a̧g an gi ɔks hi Yeesu -fɔkya wɔ, hii be hoob ha̧a̧higeha̧ hi sɛw hi mɔk a zaab wa̧a̧kyɔ, hí ɗɔ̄bs a gii wɛɛ Yeesu fɔkya ma hɛw gɛ.

²⁷Yɔ anbɔ Barnabas loog kaŋg a tɔmsya wɔ hi, raasihi Sawulu Waar Yeesu gbɛnkɔ bɔ gbɛnig bɛttɔnɔ yɔ gi rek a gbɔnɔ du hi Waar Yeesu bookɔ bɔ booge. Wɛɛ raasihi Sawulu Bɛt dɔglɔ bɔ dɔg hi kpoos ɓaasigi a Dimaska hi Yeesu nuŋgɔ.

²⁸Yɔ anbɔ Sawulu gi waak reki, gi waak wɛɛzig a hii a Urusalima gi gbosig Bɛt dɔglɔ dɔk hi Waar Yeesu nuŋgɔ, hoobha̧a̧g hinza gɛ be.

²⁹Gi bookya̧a̧ wɛɛ gi hin faltingo hi Yahuduya wɔ hi book Yonaniŋkoya ya̧a̧boonɛ. Wɔrɔ be hi tɛk an hi wa̧a̧ hi gbɔŋge.

³⁰Yɔ yɛ̧ɛ̧dɛ Yeesu fɔkya wɔ hi lag dɔglɔ anbɔ hi rek hi looge hi kaŋg a waal gbɔɔl Kaysariya gedu hi da hi rek hi yaag rek a Tarse.

³¹Yɔ anbɔ Yeesu fɔkya wɔ a Yahuduya, a Galile hi a Samariya sɛw hi dag saŋtum gɔ ɓɔrɔ, zɛksil taaro, hi wɛɛ hi dag tɛŋko; Bɛt Mɔkilɔ gisihi ɗaako, hoob gihi ha̧a̧k Waar Bɛto, hi wɛɛ hi kitugo kitugo.

³²Anyɔ Piyɛr gi zɛ̧btirgo waal sɛwi, ɔ̧tza ɗund tii a Bɛt doodɔ zaadɛ wɔ hi waak a Lida hɛbt du hi.

³³Zɛm wal za zaŋgd hɔ nuŋgɔ a Aynɛyas kus gums sil ha wɛlɔ gɛ̧ɛ̧sɛ.

³⁴Piyɛr raag a Aynɛyas, Yeesu Kristu za̧a̧sumza̧a̧sɔ, ɗukum ha, wɛɛm mɔ ka̧a̧ sil mɔ. Ɓɔrbɔ wal bɔ ɗukɔ ka̧a̧ silɔ.

³⁵Dood wɔ hi waak a Lida hi wɔ hi waak a Sarɔŋ sɛw hi gbɛn wal bɔ gbɛnɔ. Yɔ anbɔ hi ɔɔ hinha̧a̧lya̧ hi ɗɔbs Waar Yeesu gɔ.

³⁶Nis za Yeesu fɔkya gi a Zope nuŋgɔ a Tabita. Tabita elkɔ zaa a Dɔrkas hinɔ raakɔ a nam kpaarɛ a Yonaniŋko ya̧a̧boon du. Gɔ gi gaak gaas bɛttɔnɔ, gi hinrɔb wook gbɔɔltɔnɔ be.

³⁷A ɔ̧tɔge mat gums wɔrɔ. Yɔ hi hotige hi gbaag a luk hɔɔt za buu du a wɛɛha.

³⁸Anyɔ Lida sɛ̧ɛ̧b hi Zope be, Yeesu fɔkya wɔ hi lag a Piyɛr gi a Lida, hi yaa dood eerɛ hi wɔrk bɔ ramsɔ hi rek hi zɔ̧ge a gi zaa nɔɔktɔnɔ bɔgi amzɔ.

³⁹Piyɛr ɗuk retin hi hiya. Yɔ bɛɛ tuuruko hi kaŋg a luk búú bɔ wɛɛha gedu. Kuurɛ nɛɛd wɔ sɛw hi rek hi er gi dɔŋdi hi kaako. Hi zuns Piyɛr gban hek wɔ Dɔrkas gi nɛ baako hi gban zaadɛ wɔ gɔ nɛ yɔ gi nɛ hi hii za̧a̧tili.

⁴⁰Piyɛr tuus dood sɛw zagl gi dɔŋdi zɔ̧ Bɛto. Wɛɛ zɛmr a wɔrk bɔ ge dɔgɔ a Tabita, ɗundum ha! Wɔrk bɔ gaas lɔlɔ, yɔ gbɛn Piyɛr ɗukha ɗɔɔtɔ.

⁴¹Piyɛr wa̧a̧ naanɔ ɗuksig ha. Wɛɛ el Bɛt doodɔ gaatɛ wɔ hi kuurɛ nɛɛd wɔ gaahige naan du za̧a̧tili.

⁴²Dood a Zope du sɛw hi mɛɛ hin bɔ labɔ, wɛɛ dood kittɔnɔ hi ɗɔbs Waar Yeesu be.

⁴³Piyɛr waa am a Zope a walza zoolnukya lɛl du nuŋgɔ a Simɔŋ.