Read Doyayo ROMA 1 Bible Online

ROMA 1 - Doyayo bible

ROMA 1

¹Mii Pol , Yeesu Kristu woosɔya, mi bi̧i̧sig Yeesu fɔkya wɔ a Roma hii ɗɛɛrwol yɛrɛ. Bɛt elim an mi wɛɛ tɔmsɔya, herim an mi dɔgs dood Dɔglɔ Rɔb bɔ.

²Bɛt raa da amntɔnɔ a ya̧a̧ɔkɛŋkya wɔ hi ya̧a̧ du, a bé gaa Dɔgl Rɔb bɔ, hii wɛɛ hi bi̧i̧ a ɗɛɛrwolɔ gaatɛ wɔ gedu.

³Dɔgl Rɔb bɔ gi book Bɛt waa dɔglɛ. Hinyɔ gi seek Bɛt waa bɔ midzigɔ an doo, fu̧u̧ a Dawda dɔ̧ɔ̧t du.

⁴Hinyɔ gi seek Bɛt Mɔkilɔ be, rɛmtigɔ a wɔrkɛ teesdu wɛɛ gɛrs gbɔɔl yɔ zunsɛ a gi Bɛt Waayɔ, gii Waar wɛ Yeesu Kristu.

⁵Bɛt gɛmsim a gi dɔŋgo wɛɛnim tɔmsɔya an mi elz dood dɔ̧ɔ̧t sɛw, an hi ɗɔbsige hi wa̧a̧ dɔglɔ, nuŋgɔ gi dag gbɔlumsɛ.

⁶Nɛɛ hɛw, Bɛt elin an nɛ wɛɛ Yeesu Kristu doodɔ.

⁷Mi gi book nɛɛ dood Romaya wɔ sɛw. Bɛt ha̧a̧g a nɛ muul nɛ sɛw, wɛɛ elin an nɛ wɛɛ doodɔ gaatɛ. An Baa wɛ Bɛto hi Waar wɛ Yeesu Kristu hi gaanɛ gɛmsili hi gaan boolumi!

⁸Biitirɔ, anyɔ mi lag a hi book ɗɔbsig nɛ dɔgl a waal du sɛw, mi baanik Bɛt mi a Yeesu Kristu nuŋg du a nɛ zul nɛ sɛw.

⁹Bɛt yɔ mi gisig waaɔ Dɔgl Rɔb wook hi kpoos mi sɛw, mɛɛ a mi gi dɔk rɔbo: yɛms du hi lurk du sɛw mi gin waak mɔkig a zɔ̧kyɔ gɔ mi zɔ̧k duge.

¹⁰Mi gig zɔ̧k a gi ha̧a̧ge, kinsa gi gaam gbɔnɔ an mi rek mi tuur a nɛɛge ma ɓɔrɔ.

¹¹Yɔ anbɔ, ha̧a̧m gbɔɔltɔnɔ an mi gbɛninɛ, mi gɛ̧ɛ̧sin hinyɔ Bɛt Mɔkilɔ gaam zaaɔ, an nɛ dag tɛŋko,

¹²raakɔ: zaabe an wɛ dag tɛŋk lɛlgbunu, mii be mi dag a nɛ ɗɔbsig dɔŋgo, nɛɛ be a minɛ bɔ gi dɔŋgo.

¹³Yɛ̧ɛ̧dɛ mi wɛ, ha̧a̧m an nɛ mɛɛ rɔbtɔnɔ a gim nɛ ha̧a̧k dɔɔ kittɔnɔ an mi rek a nɛɛge mi dag woos mi huml zaadɛ a nɛ teesdu anyɔ gɔ mi dak a dood wɔ hi taa Yahuduya gɛ zaadɛya̧ wɔ hi tees du.

¹⁴Rek mi a dood dɔ̧ɔ̧t wɔ sɛw hi dɔŋdi gi woos miinɛ -a dood wɔ hi kɛ̧ɛ̧, hi wɔ hi kɛ̧ɛ̧ gɛ, a dood wɔ hi gin hinmɛɛk dubti hi wɔ hi taan hinmɛɛk dubt gɛ.

¹⁵Ya̧a̧ gii gi gim ha̧a̧sig gbɔɔltɔnɔ an mi rek mi dɔgsin Dɔgl Rɔb bɔ hɛw, nɛɛ dood wɔ nɛ gi a Roma.

¹⁶Yɔ anbɔ seemhā̧a̧m Dɔgl Rɔb bɔ gɛ, gi Bɛt tɛŋkɔyɔ gɔ za̧a̧sin za̧a̧nyɔ gig ɗɔbsig sɛw, yɛɛl a Yahuduya wɔ hi, tuur a dood wɔ hi taa Yahuduyaadɛ gɛ hi sɛw.

¹⁷Bɛt zuns dood hi Dɔgl Rɔb bɔ a gi wɛɛnik za̧a̧nyɔ ɗɔbsig sɛw doo rɔb a gi muut du a ɗɔbsigɔ bɔ gi dɔŋg kpɔd. Hinza dɔɔm taaro, anyɔ Bɛt ɗɛɛrwolɔ raa a doo riiti gi za̧a̧ a ɗɔbsig bɔ gi dɔŋgo.

¹⁸Bɛt yɔ gi bɛtha nɔɔtigɔ miid ma ɓɔryɔ a hinha̧a̧l yɔ gi sɛw, hi hinyɔ dood hi gɔ gi bɛr gɛ sɛw a woosya̧ ha̧a̧l wɔ gi a̧a̧nik rɔb bɔ wookɔ hi zulha.

¹⁹Yɔ Bɛt yɛɛl waal kiŋko, dood hi gbɛnik hinyɔ hí ɗɛ̄ɛ̄ an hi gbɛn a Bɛt ge gɛ, hi gbɛnik a woosɔ wɔ kim gedu. Raakɔ a hi gbɛnik a Bɛt tɛŋkɔ waa faa, Bɛt gi Bɛt hi rɔbo. Yɔ anbɔ hinyɔ dood hi ɗɛɛ an hi mɛɛ a Bɛt zulha hinɔ hi mɛɛmɛ ma, Bɛt zunsihi hinɔ zunsɔ. Ya̧a̧nɛ, hi taa an hi bitsihi dɔglya̧,

²¹an hii yɔ hi mɛɛ Bɛt si̧, hi ɗɔ̄bsige hi sēeg an Bɛt gɛ, hi wɛɛ hi bāānig gɛ. Wɛɛ hi wag gbɔnɔ a hi mɔkil ha̧a̧l du hi kpoosya̧ yɔ gi yoo be, mɛɛhin gɛ be, wag a lɛlwil du.

²²Yɔ hi pɛɛk zulya̧ a hi mɛɛhinɛ, hi wɛɛ yooyɔ,

²³hi ɔɔ Bɛt gbɔlumsɔ yɔ taa wɔrkya gɛ fɔko, hi fɔk dood wɔrkɛ fɔtɔ wɔ, nɔɔs fɔtɔ wɔ, hinza̧a̧til wɔ hi ɛmbingo dɔɔ nas fɔtɔya̧ hi hinza̧a̧til wɔ hi ɛmbingo buu.

²⁴Hinɔ lab ro Bɛt gi ɔɔhi an hi fɔb hinyɔ kpoosya̧ gi ɗɔkingo hi ɓi̧i̧l muulya̧ a seem du.

²⁵Sa̧a̧nɛ, Bɛt gii Kiŋkya yɔ gin rɔbs taa. Hii be, hi wɛɛn rɔbyɔ gi Bɛt ɔnɛ wɛɛ ya̧a̧gɔ̧ɔ̧nɛ. Hi ɗɔbsig hinyɔ Bɛt kim giya, hi wɛɛ hi woosig hinyɔ kim gii woosɛ, hi ɔɔ Kiŋkya bɔ fɔko.

²⁶Ya̧a̧nɛ Bɛt gi bisihi a ɗɔkum seemya ha̧a̧l du anyɔ nɛɛdya̧ hi zɛmr kusil hi nɛɛdɛ. Bɛt woosɔ rı̄ı̄tin anbɔ gɛ.

²⁷Gbunɔ, walɛ be hi ɔɔ kusig hi nɛɛdɛ, hi re kusig hi nayzaya̧ walɛyɔ, hi wootingo hin seem ha̧a̧lyaadɛ. Yɔ anbɔ hi dak gbɔnɔya̧ wak bɔrɔ dɔɔrɔɔsɔ hi zulya̧ a hi muul du.

²⁸Anyɔ hā̧ā̧hi Bɛt mɛɛk gɛ, Bɛt bisihi a mɔkilya̧ tɔs bɔ gedu an hi woo hinyɔ rii an hi woo gɛ.

²⁹Kpoosya̧ hi̧i̧s hi ha̧a̧lyɔ gi sɛw: an ha̧a̧lwooki, ka̧a̧si, ha̧a̧lɛ, kpoosya̧ hi̧i̧s hi lɔlha̧a̧lɛ, zulgbɔŋki, gabsɛ, maatili hi dooleki. Hi gi mɛl-yaadɛ,

³⁰hi gi dood niiko, hi hɛ̧ɛ̧nik Bɛt lɔlɛ, hi gi ya̧a̧ha̧a̧l bookyaadɛ, zulpɛɛkyaadɛ, zultɔɔsigyaadɛ hi midilgo ha̧a̧l-gbɔnɔ zaadɛ an hi gɔ ha̧a̧lɛ, hi wɛɛ hi zuks baaya̧ hi naaya̧ hi tɔnɛ.

³¹Hi taan hinmɛɛki, hi gin ya̧a̧luurɛ, hi taan hato, hi taan ya̧a̧rmɛɛki.

³²Anyɔ hi mɛɛ Bɛt dɔglɔgbaak bɔ gi raak a dood wɔ hi gi wook hin wɔrɔ lab sɛw hi rii wɔrk nɛ si̧, taa an hi wook hinya̧ gii kpɔd, hi wɛɛ hi ɔksig ya̧a̧ hi dood wɔ hi wook hin wɔrɔ anbɔ.