Read Doyayo ROMA 10 Bible Online

ROMA 10 - Doyayo bible

ROMA 10

¹Yɛ̧ɛ̧dɛ mi wɛ, hinyɔ ha̧a̧mi a mi kpoos du hi zɔ̧k mi a Bɛt ge, ha̧a̧mi an dɔ̧ɔ̧t mi Yahuduya wɔ hi za̧a̧.

²Mi ɗɛɛ an mi dɔgɔ a hi gin ha̧a̧tigi an hi fɔb Bɛto, wɛɛ hi mɛ̄ɛ̄ gbɔnɔ rɔb gɛ.

³Hi mɛ̄ɛ̄ gbɔnɔ yɔ gɔ hi fɔbɔ an Bɛt gi wɛɛnihi dood rɔbɛ gɛ, ha̧a̧hi an hi su̧u̧ gbɔnɔya̧ hi zulya̧. Yɔ anbɔ hí tā̧ā̧ Bɛt gbɔnɔ gɛ.

⁴Hinyɔ Bɛt gaa Muusa maakɔ, gaag an gi kamn dood a Kristu ge, an dood wɔ hi ɗɔ̄bsig sɛw hi wɛɛ dood riitɛ a Bɛt muutdu.

⁵Yɔ anbɔ hinyɔ Muusa bi̧i̧ gi wadilgo hinriit bɔ gi fu̧u̧k a maakɔ bɔ dɔglɔ fɔkigɔ gedu, raa: a za̧a̧nyɔ gi fɔk hinyɔ maakdɔgl raa, gí za̧a̧.

⁶Yɛrɛ gbɔnɔ yɔ mɔ fɔb an Bɛt gi wɛɛnum doo rɔb anyɔ mɔ ɗɔbs Yeesu gi sɔm. Anyɔ hi bi̧i̧ a Bɛt ɗɛɛrwol du: a bɔmɔ raa a mɔ kpoos du: a bɔ gi kar bɛtha an gi sidz Kristu gi zaa gi ɗaasɛ nɔ?

⁷Zaabe a bɔ gi sil a zɛŋk dubt ha̧a̧l bɔ gedu an gi kadz Kristu a wɔrkɛ teesdu nɔ?

⁸Lab gɛ! Bɛt ɗɛɛrwol raa a ri? Raa a yɛrɛ Bɛtdɔgl bɔ gi mɔ dɔŋdi ro, hi a mɔ ya̧a̧ du, hi a mɔ kpoos du. Dɔgl yɛrɛ wi dɔgsig doodɛ, wi gisihi dɔgl yɔ gɔ hi ɗɔbs gii dɔko: a ɗɔbsin Yeesu ga.

⁹Yɔ anbɔ gid mɔ ta̧a̧ gaattɔnɔ hi ya̧a̧ mɔ a dood muut du: a Yeesu giigi Waar Gbɔɔlɛ, mɔ wɛɛ mɔ ɗɔbs a mɔ kpoos du a Bɛt ɗunsig za̧a̧til a wɔrk du, yɔ anbɔ mɔ́ za̧a̧.

¹⁰Ya̧a̧nɛ, hi ɗɔbsig yɔ kpoos du giya, mɔ tuur doo rɔb a Bɛt muutdu, wɛɛ hi hinrɔb tuusigi ya̧a̧du ro, mɔ tuur an mɔ dag za̧a̧tigi. Hi bi̧i̧ a Bɛt ɗɛɛrwol du:

¹¹a za̧a̧nyɔ gɔ gi ɗɔbsige, seem taag wa̧a̧ko.

¹²Yɔ anbɔ, Yahuduyaadɛ hi dɔ̧ɔ̧t zaadɛ, anyɔ hi gin Waar Bɛt gbunu, taa an hi gɛ̧ɛ̧hi a Bɛt muutdu, Waar Bɛt gbun bɔ gi dood sɛw Waar i, wɛɛ gis dood wɔ hi gi nuŋgɔ elik an hi zɔ̧g sɛw rɔbgɔko hi tɛŋko.

¹³Yɔ anbɔ, za̧a̧nyɔ el Waar Yeesu nuŋgɔ gi zɔ̧g a za̧a̧sibe sɛw gi za̧a̧.

¹⁴Gi an hi el za̧a̧nyɔ hi ɗɔbsig gɛ nuŋgɔ ri? Gi an hi ɗɔbs za̧a̧nyɔ hi kɛmdir nuŋgɔ book gɛ ri? Bɛtdɔgl dɔkya gi taa gɛ, gi an hi kɛm dɔkɔ ri be?

¹⁵Gi an doo gi ɗɔg Bɛt dɔglɔ ri à hi yaazig nɛ an gi dɔg gɛ? Ya̧a̧nɛ, Bɛt ɗɛɛrwolɔ raa a dood wɔ hi dɔk Bɛtdɔglɔ yɔ gi Dɔgl Rɔb sɛw zaakya̧ nag bɛrɔ!

¹⁶Wɛɛ dood sɛw hi tā̧ā̧ Dɔgl Rɔb bɔ gɛ, kaasi ro hi ta̧a̧. Bɛtya̧a̧kɛŋkya bɔ Esaya dɔg be: a Waar i, bɔ ɗɔbs dɔgl yɔ wi dɔgɔ?

¹⁷Yɔ anbɔ, mɛɛn a ɗɔbsig gi fu̧u̧zig a hinyɔ dood hi kɛŋk duge, wɛɛ hinyɔ hi kɛŋko gi fu̧u̧zig a Kristu dɔglɔ yɔ hi dɔk gedu.

¹⁸Yɛrɛ mi warko: a dood Israhilaya wɔ hi kɛm ket gɛ ya? Dɔɔmɔ! Anyɔ Bɛt dɔglɔ raa: a kɔlkya̧ ɛmb a waal du sɛw, wɛɛ dɔglya̧ ɛmb tuur a waal doorumlɛl sɛw.

¹⁹Yɛrɛ mi warko: Israhilaya wɔ hi mɛɛ gɛ ya? Hi mɛɛmɛ, wɛɛ hí tā̧ā̧ gɛ be. Yɛɛlɔ, Muusa yɛɛl da dɔgɔ: a Bɛt raa a be ɗuks kubl nɛ a dood wɔ hi taa dɔ̧ɔ̧t rɔb gɛ hi zulha. Be tɛb nɔɔtig nɛ a dɔ̧ɔ̧t wɔ hi mɛɛhin gɛ hi zulha.

²⁰Kuudu Esaya be, yɔ hoobhā̧a̧g hinza gɛ, dɔgɔ: a Bɛt raa a dood wɔ ha̧a̧hi bee ɓɛɛk gɛ, hi zolibe, be mits dood wɔ hi taab ɛrk gɛ.

²¹Yɛrɛ Bɛt dɔg a Israhila zulha be: a be yɔts dood zulɓaatilya hinfaakya wɔ naan be an be ɗaasihi ɔ̧t nuŋg sɛw.