Read Doyayo ROMA 11 Bible Online

ROMA 11 - Doyayo bible

ROMA 11

¹Yɛrɛ mi warko: a Bɛt bis doodɔ Israhilaya wɔ bis ya? Taa nɛ anbɔ zaŋ! Ya̧a̧nɛ mii hi zul mi mi gi Israhilayayɔ, dɔ̧ɔ̧t mi fu̧u̧ a Abraham ge, fɔbtin hi Bɛnzamɛ dɔ̧ɔ̧tɔ.

²Bɛt bı̄s doodɔ wɔ yɛɛl gi sɛ̧ɛ̧hi nɛ doos gɛ. Nɛ mɛ̄ɛ̄ hinyɔ Bɛt ɗɛɛrwolɔ da raa nɛ a Eliya zulha gɛ ya? Kam Israhila dɔglɔ a Bɛt ge raa:

³a Waar Bɛto hi gbɔm ya̧a̧mɔkɛŋkya wɔ, hi ɛ̧btir maaksɛŋk mɔ wɔ, gɛ zɛ̧ɛ̧r ma bee be gbunu, hi tɛk an hi gbɔ̧b hɛw.

⁴Nɛ Bɛt goosig a nɔ? Ta̧a̧ raa: a be zɛ̧ɛ̧r dood benɛ duk nɔɔn-eerɛ hí zagl a bɛtya̧ ya̧a̧gɔ̧ɔ̧nya bɔ Bahal dɔŋdi an hi zɔ̧g gɛ.

⁵Gi anbɔ a waabil wɛ yɔ ɓɔryɔ gedu, Bɛt sɛ̧ɛ̧ doo hi zɛ̧ɛ̧r hi giro anyɔ gɛmsilɔ herɔ.

⁶Nɛ Bɛt gii her dood wɔ a rɔbgɔkɔ bɔ gi dɔŋgo, herihi a wooswookya̧ bɔ gi dɔŋg gɛ. À herihi nɛ a wooswookya̧ bɔ gi dɔŋgo, yɔ hi dag dɔɔrɔɔsya̧, wɛɛ Bɛt rɔbgɔkɔ bɔ dɔglɔ taadu.

⁷Yɛrɛ gi ri ma nɔ? Hinyɔ Israhila gi tɛko dag gɛ, wɛɛ dood wɔ Bɛt sɛ̧ɛ̧hi ya̧nɛ hi daagɔ, wɛɛ zaadɛ be kpoosya̧ wɛɛ ɓaaɓa, Bɛt yɔ gi hi elko hi kɛŋ gɛ,

⁸anyɔ Bɛt ɗɛɛrwolɔ raa a Bɛt gaahi mɔkil an bɔhi kɛm hinɛ, gaahi lɔlɛ an bɔhi gbɛnɔ. Gaahi tɔnɛ an bɔhi lagn hinɛ, hinɔ gis a ɔ̧tigi zul tɛ̧.

⁹Dawda wɛɛ boohi: a an leesya̧ gbɔɔl bɔ gi wɛɛsihi ɓoosɛ an hi simdɔɔ hi matɔ, hí dag zɛksili an dɔɔrɔɔsɛ!

¹⁰An lɔlya̧ gi wilihi, bɔhi gbɛnɔ, an hi wɛɛ gbaarɛ, yɛlya̧ gi waa totigi!

¹¹Yɛrɛ mi warko: a an Israhilaya wɔ hi simdɔɔ hi matɔ hi ɗɛ̄ɛ̄ ɗundig zaa ma gɛ ya? Taa nɛ anbɔ zaŋ! A hin-a̧a̧bya̧ bɔ gi dɔŋg ro za̧a̧tig gi zaas dɔ̧ɔ̧t wɔ hi taa nɛ Bɛt fɔk gɛ. Bɛt gɔ anbɔ an gi ɗuks Israhilaya wɔ gi ha̧a̧hilɔl a hi muulɛ.

¹²Nɛ yɔ anbɔ an a̧a̧bya̧ gaa dood waal du Bɛt rɔbsɔ, wɛɛ gid wɛɛkya̧ bɔ kuudu kams dɔ̧ɔ̧t dɔɔmɛ wɔ Bɛt rɔbsɔ, yɔ anbɔ dood Israhila wɔ sɛw gɔ hi dɛmnaan be, Bɛt gi rɔbs dood dɔ̧ɔ̧t sɛw gi daarlɛlɛ.

¹³Dood dɔ̧ɔ̧t dɔɔmɛ wɛ, mi gis nɛɛ dɔko, anyɔ mi gi tɔmsya a dood wɔ hi taa Yahuduya gɛ hi teesdu, mi seek woos yɔ Bɛt gaami an hin gbɔɔlɛ.

¹⁴Mi mɔkig an mi sɔmb dɔ̧ɔ̧t mi hi ɗuks kpoosya̧ gi ha̧a̧hilɔl a hat nɛ bɔ gedu an woos mi gi za̧a̧s zaadɛya̧.

¹⁵Ya̧a̧nɛ, an bisigya̧ bɔ ginɛ a waal du an naandɛmsɛ, zekya̧ bɔ Bɛt gɔ gi zehi nɛ gi ri? Gɛ gi ma rɛmtig yɔ gɔ hi rɛml a wɔrkɛ tees du!

¹⁶Doo gi gaa Bɛt kok kiml doos bɔ, kok kiml zaadɛ wɔ sɛw hi gi Bɛt ɔ̧ɔ̧nɛ. Gid tɛ̧ɛ̧yɛ̧ɛ̧s gi Bɛt ɔ̧nɛ, tɛ̧ɛ̧ya̧a̧n wɔ sɛw gi ɔ̧ɔ̧nɛ.

¹⁷Dood Israhilaya wɔ hi gi an kɔ̧ɔ̧b yɔ hi dɛ̧ɛ̧l ya̧a̧nɔ wɔ; mɔɔyɔ mɔ gi dɔ̧ɔ̧t za dɔɔmi, mɔ gi an tɛ̧ɛ̧ hɛtum za ha̧a̧l waahams yɔ hi yɛn a lɛlyɔ hi dɛ̧ɛ̧l wɔrɔ ge, mɔ ɔks hi hii a kɔ̧ɔ̧byɛ̧ɛ̧s bɔ tɛŋkɔ gedu mɔ dak tɛŋk gɔ.

¹⁸Yɔ anbɔ taa an mɔ wɛɛ mɔ see waahams wɔ hi gbohi an hintɔs. Mɔ taan gbɔnɔ an mɔ pɛɛ zulɛ. Bɔmɔ mɔk a mɔɔ gi pɛɛk tɛ̧ɛ̧yɛ̧ɛ̧sɛ, tɛ̧ɛ̧yɛ̧ɛ̧s gii gi mɔɔ pɛɛko!

¹⁹Kinsa mɔ raa a Bɛt dɛ̧ɛ̧l waahams wɔ an be yɛr du.

²⁰Hinɔ gi rɔbo; yɛrɛ hi ha̧sihi anyɔ hi in ɗɔbsigi. Mɔɔ be, Bɛt gbaam a lɛlɔge a ɗɔbsig mɔ bɔ gi dɔŋg kpɔd. Bɔmɔ pɛɛ zulɛ, gi an hoob gi ha̧a̧m Bɛto.

²¹Ya̧a̧nɛ, Bɛt yɔ ɔ̄ɔ̄ waahams rɔbɛ wɔ hi gi tɛ̧ɛ̧ gbun bɔ gɛ a zulɓaasigya̧ bɔ gi dɔŋgo, taa mɔɔ ɔɔk be gid mɔ ɓaasig zulɛ.

²²Seem Bɛt rɔbgɔkɔ hi gabsɔ yɔ gi a dood wɔ hi inig hi zulha; rɔbgɔkɔ gi a mɔɔge gid mɔ waak hi kpoos mɔ sɛw a rɔbgɔkɔ bɔ gedu. Gi lab gɛ, mɔɔ hɛw, hi dɛ̧ɛ̧lumdɛ̧ɛ̧lɔ.

²³Gbunɔ, gid Israhilaya wɔ hi wɛɛz hi zɛmr mɔkilya̧ hi ɗɔbs Yeesu , Bɛt gin tɛŋk gbɔɔltɔnɔ an gi wɛɛ gi gusihi a lɛlyɔ hi da hi ginɛ ge.

²⁴Mɔɔ yɔ mɔ taa Israhilaya gɛ, Bɛt dɛ̧ɛ̧mnɛdɛ̧ɛ̧ a tɛ̧ɛ̧hɛtum za ha̧a̧l muul gi wɛɛ gi sa̧a̧m a tɛ̧ɛ̧ rɔb muulɛ. Yɔ anbɔ, Bɛt ɗɛɛ an gi wɛɛ gi sa̧a̧ waahams rɔbɛ wɔ dɛ̧ɛ̧lihi nɛ a tɛ̧ɛ̧ nɔɔ rɔb bɔ gedu rɔbtɔnɔ.

²⁵Ya̧a̧nɛ yɛ̧ɛ̧dɛ mi wɛ, hā̧ā̧mi an dɔgl dubtyɔ yaatɔ gi wagin gɛ, an bɔnɛ see zul nɛ an nɛ mɛɛhinɛ. Dood Israhi-laya zaadɛ hi in Yeesu ɗɔbsigi, hinɔ tuur an dood dɔɔmɛ wɔ Bɛt sɛ̧ɛ̧hi sɛw hi taz a za̧a̧tig du kete.

²⁶Yɔ anbɔ dood Israhila wɔ sɛw hí za̧a̧ anyɔ Bɛt ɗɛɛrwolɔ raa a Za̧a̧sigya gi fu̧u̧ a Siyona, gi ha̧s Yakuba doodɔ wɔ zulɓaasigya̧ wɔ.

²⁷Hin bɔ lab bé wɔya̧a̧ hage hi hii a ɔ̧tyɔ gɔ be ha̧s hinha̧a̧lya̧ gedu.

²⁸Yahuduya wɔ hi wɛɛ Bɛt lɔlhɛ̧ɛ̧nikɔyaadɛ a nɛ dɔŋgo, an nɛɛ nɛ dag Bɛtdɔgl kɛŋki, nɛɛ dood dɔɔmɛ wɔ. Yɛrɛ an hinyɔ gi seek herkya̧ yɔ Bɛt herihi an doodɔ, ha̧a̧g hi muul a baaya̧ amntɛ wɔ hi dɔŋgo.

²⁹An Bɛt gɔ gi zɛmr mɔkilɔ, zɛmr gɛ. Gaasɔ wɔ gaa hi herkyɔ gɔ her doo, taa zɛmrikya nɛ zaŋ.

³⁰Da amntɔnɔ nɛ́ da nɛ́ kɛ̄ms nɛ Bɛt tɔn gɛ ro, Bɛt gii mɛɛsinya̧a̧r a hi zulɓaatil dɔŋgo.

³¹Yɛrɛ hii be, ɓɔryɔ hi kɛ̄ms Bɛt tɔn gɛ be, Bɛt gi mɛɛsihiya̧a̧r a ya̧a̧rmɛɛk bɔ mɛɛsin nɛ gi dɔŋgo.

³²Ya̧a̧nɛ, Bɛt wɛɛn dood sɛw an luknɔyaadɛ a tɔnzuks du an gi mɛɛs dood ya̧a̧r sɛw.

³³À Bɛt rɔɔsɔ tɔɔ nɛ ri! Hinɔkɛŋki hi hinmɛɛkɔ hi dub nɛ ri! Dɔgl-gbaakɔ wɔ hi gbɔnɔ ɔ̧ɔ̧ wɔ hi ɓaaɓa wadilgo ɔ̧ɔ̧!

³⁴Anyɔ hi bi̧i̧ a Bɛt ɗɛɛrwol du: a bɔ mɛɛ Waar Bɛt Mɔkilɔ? Zaabe bɔ ginɛ dɔgl-gɛmsigya ɔ̧ɔ̧?

³⁵Bɔ yɛɛl gi gaag hinza an kuudu gi dag ɔ̧nɛ?

³⁶Hin sɛw fu̧u̧ a ge, gii gi kaŋkugo, wɛɛ gi wɛɛk a ge. Gbɔlums gi a ge faa. Aanbɔ!