Read Doyayo ROMA 12 Bible Online

ROMA 12 - Doyayo bible

ROMA 12

¹Yɛ̧ɛ̧dɛ mi wɛ, ya̧a̧nɛ mi gin zɔ̧ko hi Bɛt ya̧a̧rmɛɛkɔ an nɛ gaa muul nɛ an namb za̧a̧til yɔ hi gbɛɛr hi nɔms Bɛt a sɛŋk ha, yɔ gi hin gaati, hinyɔ Bɛt gɔ ta̧a̧ hinɔ, giigi woos nɛ yɔ gi an nɛ woos Bɛt nɛ ɗɔbsinge hi rɔbo.

²Bɔnɛ riitin hi dood wɔ ɔ̧tigi zulɛ, ɔɔn Bɛt gi zɛmr kpoos nɛ gi wɛɛn mɔkil nɛ sego, nɛ wɛɛ nɛ mɛɛ hinyɔ ha̧a̧ge: an hinyɔ bɛrɔ, hinyɔ bɛs Bɛto, hinyɔ hinza wag du gɛ.

³Hi gɛmsil yɔ Bɛt gaami mi gin raak nɛ gbunu gbunu, bɔ zaa gi tɔɔs zulɔ gi daarlɛlɛ. Yɔ anbɔ, bɔbe gi see zulɔ an ɗɔbsil yɔ Bɛt gɛ̧ɛ̧sige gi tuur lɛlɔge.

⁴Ya̧a̧nɛ an wɛ gin muul gbun si̧, muul wɛ gbun bɔ gin muul dɛɛt kittɔnɔ, hi sɛw hi taan woos gbun bɔ.

⁵Wɛ́ɛ́ Yeesu ɗɔbsigya wɔ hɛw, wɛ gi labɔ. Yɔ wɛ gi kittɔnɔ be, wɛ ɔks muul gbunu a Kristu ge, wɛ ɔks gbunu an hinwɔ hi ɔks a muul gbun bɔ muulɔge gbunu gbunu.

⁶Anyɔ Bɛt gaawɛ gaas sɔmsɔm anyɔ gɛmsilɔ gaawɛ, yɛwɛ woon hinɛ. Za̧a̧nyɔ Bɛt gaag ya̧a̧ɔkɛŋkya gaasɛ an gi kɛm ya̧a̧ɔ gi dɔgɔ, wooge an ɗɔbsilyɔ dagɔ.

⁷Za̧a̧nyɔ Bɛt gaag woosɔ an gi woos yɛ̧ɛ̧dɛ Yeesu fɔkyaadɛ woosɛ, woogwo; yɔ Bɛt gaage an gi gognhinɛ, gogig-gogɔ;

⁸yɔ Bɛt gaage an gi ɓats dood zaadɛ muulɛ, ɓaasigɓaasɔ; yɔ gɔ gi gɔ rɔbtigi, rɔgrɔbɔ hi kpoosɔ sɛw; yɔ gi dɔgl-gɛmsigya, gɛmsiggɛmsɔ hi tɛŋko; yɔ gɔ gi ɗaas ya̧a̧rha̧a̧kyaadɛ, ɗaagɗa hi hato.

⁹Ha̧a̧tig nɛ kpoos du gáage, inin hinha̧a̧lɛ, fɔn rɔbgɔki.

¹⁰Yɛgi hatinnɛ yɛ̧ɛ̧dums hat rɔbo, bɔbe gi ɗɔbs naaza hi tɛŋko.

¹¹Bɔnɛ nabrɔ, i̧i̧yinɛ, ɔɔn Bɛt Mɔkilɔ gi ɗuks kpoos nɛ hi hato an laa, woosin Waar Yeesu woosɛ.

¹²Dagin hat a hinyɔ nɛ ook gedu, mɔn zɛksil yɔ hi gisin gɔko, waan Bɛt zɔ̧ki.

¹³Gɛ̧ɛ̧sin Bɛt doodɔ wɔ hi ha̧a̧kya̧a̧r rɔɔs nɛ. Zen rɔ̀bɛ rɔbtɔnɔ a nɛ raa du.

¹⁴Rɔbsin dood wɔ hi gin ya̧a̧kɛtingo, rɔbsinɛhi, bɔnɛ gɔsihi booto.

¹⁵Dagin hat hi dood wɔ hi gi hat dako, kaan hi dood wɔ hi kaako.

¹⁶Ɗɔɔtin nɛ gaatin boolum a nɛ tees du. Bɔnɛ pɛɛ zulɛ, ɔksin hi zultiisigya wɔ. Bɔnɛ see zul nɛ an nɛ gi hinmɛɛkya dubtɛyɔ.

¹⁷Doo gi gɔsin ha̧a̧lɛ bɔnɛ wɛɛnsig ha̧a̧lɛ. Tɛnɛ an nɛ gɔ hinyɔ bɛr gii a dood muutdu sɛw.

¹⁸Gi bɛrɔ, ɗɔɔtin rɔbtɔnɔ hi dood sɛw anyɔ nɛ ɗɛɛ sɛw.

¹⁹Bɔnɛ wɛns doo hin-a̧a̧bɔ yɔ woosinɛ, saammi rɔbɛ wɛ, ɔɔn Bɛt nɔɔtigɔ gi woos za̧a̧nɔ. Ya̧a̧nɛ hi bi̧i̧ a Bɛt ɗɛɛrwol du a Waar Bɛt raa: a bee be wɛnsihi a̧a̧bya̧, bee be gbaasihi dɔglɛ.

²⁰Yɛrɛ a̧a̧kil gi gi ha̧a̧k za̧a̧nyɔ gim lɔlhɛ̧ɛ̧nuko, gaamɔg leesɛ, mɛm gi gig ha̧a̧ko, gaamɔg gi yɔ̧; ya̧a̧nɛ anyɔ mɔ gisig wook anbɔ, mɔ gisig laa-ɛ̧ɛ̧k mɔksig zulha!

²¹Bɔmɔ ɔɔ ha̧a̧l gi ɗɛɛmɔ, ɗɛɛm ha̧a̧lɛ hi hin rɔbo.