Read Doyayo ROMA 13 Bible Online

ROMA 13 - Doyayo bible

ROMA 13

¹Yɛ dood sɛw hi tiis zulya̧ a dood gbɔlɛ dɔŋdi. Ya̧a̧nɛ dood gbɔlɛ wɔ waar umsya̧ sɛw gi fu̧u̧zig a Bɛt ge, wɛɛ dood nabl wɔ sɛw hi dag tɛŋkya̧ a Bɛt ge.

²Yɔ anbɔ mɔ in hinyɔ za̧a̧n gbɔɔl bɔ raa, mɔ ɓaasig dɔglyɔ Bɛt raa giya. Wɛɛ dood wɔ hi ɓaak anbɔ lab hi kamsig zulya̧ dɔgl-gbaakyɔ.

³Za̧a̧nyɔ gi wook hin rɔbo hoob ɗɛɛ an gi ha̧a̧g dood gbɔlɛ gɛ, gɛ dood wɔ hi wook ha̧a̧lɛ. Gi ha̧a̧m an hoob gi ha̧a̧m dood gbɔlɛ gɛ, gɔm rɔbo hi baanumɔ.

⁴Dɔgl-gbɛɛrikya gi Bɛt woosɔya an gi gɔsum rɔbo. Gid mɔ gɔ ha̧a̧lɛ, hoob yɛgi ha̧a̧mɔge, ya̧a̧nɛ dāg tɛŋkɔ bɔ Bɛt gaag ya̧a̧rtɔs gɛ. Gi Bɛtwoosya an gi tuusin Bɛt nɔɔtigɔ gi ha̧a̧n za̧a̧nyɔ gɔ ha̧a̧l ya̧a̧rɛ.

⁵Yɔ anbɔ, gi an nɛ tiis zul nɛ a dood gbɔlɛ dɔŋdi, taa a Bɛt nɔɔtigɔ bɔ gi dɔŋg kpɔd, lab gɛ, nɛ mɔk an mɔkil yɔ nɛ kpoos du ha̧a̧g gi gin gbɔnɔ rɔb gaako.

⁶Hinɔ gii hɛw nɛ gi toostooko. Waar ɛ wɔ hi hi wookwoos bɔrɔ hi woosig Bɛt giya.

⁷Toosinɛhi hinyɔ hi gin fɔk sɛw. Toon toosɛ a za̧a̧nyɔ gi an nɛ tooge. Toon hinyɔ hi dɛ̧ɛ̧sin a za̧a̧nyɔ gi an nɛ tooge, gɔn hoobo a za̧a̧nyɔ gi an nɛ gɔsig hoob ge, ɗɔbsin za̧a̧nyɔ gi an nɛ ɗɔbsige.

⁸Bɔ doo gi fɔn belko, gɛ gɔ gi ha̧a̧tinnɛ. Ya̧a̧nɛ doo yɔ gig ha̧a̧k a naaza hi muulɛ gi wook hinyɔ Bɛtmaakdɔglɔ raa sɛw.

⁹Nɛ mɛɛ maakdɔgl wɔ: a bɔmɔ naamansi, bɔmɔ gbɔm zulɛ, bɔmɔ looluurɛ, bɔmɔ ɗɔkin hinɛ. Dɔgl wɛrɛ hi hin zaadɛ wɔ sɛw hi ɔks hi gi a dɔgl yɛrɛ gedu: a gi ha̧a̧mɔ namɔza an zul mɔ.

¹⁰Za̧a̧nyɔ ha̧a̧g naaza taasig hinha̧a̧l wooko. Yɔ anbɔ, gi gim ha̧a̧k a namɔza muulɛ, mɔ wook Bɛtmaakɔ sɛw.

¹¹Yɛrɛ ma nɛ mɛɛ ɔ̧tyɔ wɛ gi gedu ɓɔryɔ, nɛ mɛɛ a rɛŋkɔ yoom du riiri. Ya̧a̧nɛ, za̧a̧tig wɛ sɛ̧ɛ̧b daar ɔ̧tyɔ wɛ yɛɛl ɗɔbsig nɛ gedu daarɔ.

¹²Yɛms bul taalɔ, lɛlgaakil sɛ̧ɛ̧bɔ. Yɛwɛ bis lɛlwil woosɔ, yɛwɛ loo lɛlgaal nɔk wɔd wɔ naan du an wɛ ɗɛɛn lɛlwilɔ.

¹³Yɛwɛ ɛmb ɛmbil rɔb anyɔ gɔ wɛ ɛmbik lurk du, wɛ ɔɔ daŋkt ha̧a̧lɛ hi bum-wɔniki, mansnaak ha̧a̧lɛ, hi ɓi̧i̧limi, hi gbaani, hi ka̧a̧si.

¹⁴Hegin za̧a̧tig nɛ seg yɔ gi a Waar wɛ Yeesu Kristu ge an dimnaan yɔ nɛ hek muulɛ, wɛɛ bɔnɛ yaa kpoos nɛ a doo hɛbtdi muulɛ, an bɔnɛ fɔ ɗɔkumɔ.