Read Doyayo ROMA 6 Bible Online

ROMA 6 - Doyayo bible

ROMA 6

¹Yɛrɛ wɛ dɔg a nɔ? A wɛ waa a hinha̧a̧l du an Bɛt gɛmsilɔ gi tɔɔ gi daar ya?

²Taa anbɔ nɛ zaŋ! Wɛɛ yɔ wɛ wɔr a hinha̧a̧l gbaŋgi, gi an wɛ wɛɛ wɛ waak ri a hinha̧a̧l du nɔ?

³Nɛ mɛ̄ɛ̄ a wɛɛ sɛw yɔ wɛ loo Bɛtmɛm wɛ ɔks gbunu hi Yeesu Kristu, wɛ ɔks gbunu hi gii a wɔrkɔ bɔ wɔr gedu gɛ ya?

⁴Hi i̧i̧wɛ lɛlgbunu hi gii a Bɛtmɛm bɔ wɛ loo gedu, wɛ wɔr hi giya. Yɔ anbɔ anyɔ gii da rɛml gi ɗund a wɔrk du hi Baa wɛ Bɛt tɛŋkɔ gɛrsya bɔ, wɛɛ hɛw wɛ dag gbɔnɔ gɔ an wɛ ɛmb a za̧a̧tig ɛmbil seg rɔb bɔ gedu hi Bɛt tɛŋkɔ gɛrsya bɔ be.

⁵Gid wɛ ɔks wɛ pirk gbunu an tɛ̧ɛ̧ hi giya a wɔrk yɔ riitin hi ɔnɛ bɔ gedu, wɛ́ wɛɛ wɛ́ ɔks gɔ hi gii an gbuna bɔ a rɛmtig yɔ riitin an ɔnɛ bɔ gedu.

⁶Yɛwɛ mɛɛ a doo amnt bɔ gi wɛ muul du, da dooy a dɔ̧ɔ̧r ha hi giya an hinha̧a̧l muul bɔ tɛŋkɔ gi wagɔ, an bɔwɛ kɔm hinha̧a̧l gbaari.

⁷Ya̧a̧nɛ doo gi wɔrɔ, hinha̧a̧l tɛŋkɔ taa gi zulha ma, da̧a̧da̧.

⁸Yɛrɛ gid wɛ wɔr hi Kristu, wɛ gi ɗɔbsig a wɛ́ waa hi gii hɛw.

⁹Ya̧a̧nɛ, wɛ mɛɛ a Kristu yɔ rɛml a wɔrkɛ teesdu gi wɛɛz a za̧a̧tig du, taa zaa wɔrk nɛ zaŋ, wɔrk taan tɛŋk gi zulha ma.

¹⁰Yɔ wɔrɔ, wɔr gaatɔ gii dɔɔ gbunu a wɛ hinha̧a̧l dɔŋgo, hɔnɛyɔ wɛɛz a za̧a̧tig du be, gi za̧a̧k a Bɛt zulɛ.

¹¹Yɔ anbɔ nɛɛ hi zul nɛ hɛw, seen zul nɛ an nɛ wɔr a hinha̧a̧l gbaŋg sa̧a̧nɛ, wɛɛ nɛ gi za̧a̧tili a Bɛt zulɛ a Yeesu Kristu dɔŋgo.

¹²Bɔ hinha̧a̧l gi wɛɛsin waar a muul nɛ wɔrkil bɔ gedu an bɔnɛ fɔb ɗɔkumɔ wɔ.

¹³Bɔnɛ yaa naan a hinha̧a̧l du an wɔdyɔ gɔ hi woon ha̧a̧lɛ; yɛrɛ gaan zul nɛ a Bɛt ge an dood wɔ hi wɔrɔ hi wɛɛ hi wɛɛzɔ. Gaan muul nɛ sɛw a Bɛt woos du an wɔd hinrɔb woonikya.

¹⁴Àgiyɔ nɛ taa ma a maakdɔgl waabil du, nɛ waak a Bɛt gɛmsil du. Nɛ yɔ anbɔ, bɔnɛ ɔɔ hinha̧a̧l gi dag tɛŋk nɛ zulha.

¹⁵Nɛ anyɔ Bɛt maakdɔglɔ taan tɛŋk wɛ zulha, wɛ́ wɛɛ wɛ́ waak a Bɛt gɛmsil du, yɔ anbɔ gi an wɛ fɔb hinha̧a̧l gɔki ya? Taa nɛ anbɔ zaŋ!

¹⁶Nɛ mɛɛ a nɛ́ gaa doo za zul nɛ an gbaari an nɛ kɛmsig tɔnɛ, nɛ gi za̧a̧n bɔ gbaar ɔ̧ɔ̧nɛ. Zaabe nɛ gi hinha̧a̧lyɔ gi kaŋk doo a wɔrk du gbaar ɔ̧ɔ̧nɛ, zaabe nɛ fɔk Bɛto, nɛ gi dood riitɛ a Bɛt muutdu a tɔn nɛ kɛŋk bɔ gi dɔŋgo.

¹⁷Yɛrɛ wɛ baan Bɛto; anyɔ nɛ da nɛ ginɛ hinha̧a̧l gbaar gii si̧, yɛrɛ nɛ ta̧a̧ hinyɔ wi gogsin gbɔnɔɔ wɔ hi kpoos nɛ sɛw.

¹⁸Bɛt tuusin a hinha̧a̧l bɔ tɛŋkɔ gedu, yɛrɛ nɛ wɛɛ Bɛt woosyaadɛ an nɛ woo hinriiti.

¹⁹Mi bookya̧a̧ an doo gi booko a kpoos nɛ hɔntil bɔ gi dɔŋgo. Nɛ da nɛ gaak nɛ muul nɛ a libt du hi a hinha̧a̧l du an nɛ woo hinyɔ bɔbtɔ. Gbunɔ, ɓɔri ma gaan muul nɛ dɛɛt wɔ a Bɛt ge an hinrɔbwook gbaarɛ an nɛ wɛɛ dood gaatɛ a Bɛt muutdu.

²⁰Ya̧a̧nɛ, yɔ nɛ da nɛ gi hinha̧a̧l gbaarɛ, nɛ da nɛ́ mɛ̄ɛ̄ hinriit wook hinɔ gɛ.

²¹Woos nɛ wɔ nɛ da nɛ woo anbɔ nɛ dagn nɔ? Nɛ nɛ see nɛ dagnik seem ɓɔri ma mi? Hin wɔrɔ da̧a̧kya̧ sɛw gɛ wɔrko.

²²Yɛrɛ ɓɔryɔ, yɔ nɛ tuu a hinha̧a̧l du a aakil du nɛ wɛɛs Bɛt gbaarɛ ɔ̧ɔ̧, woos nɛ rɔb bɔ gin gaak gaatigi a Bɛt muutdu, wɛɛ yɔ̧ɔ̧sumɔ be gɛ za̧a̧tig faa.

²³Ya̧a̧nɛ hinha̧a̧l dɔɔrɔɔsɔ gɛ: wɔrko; Bɛt gaasɔ tɔs be gɛ: za̧a̧tig faa bɔ a Waar wɛ Yeesu Kristu ge.