Read Doyayo 1 KƆRƐŊGTU 1 Bible Online

1 KƆRƐŊGTU 1 - Doyayo bible

1 KƆRƐŊGTU 1

¹Mii Pol , mii bi̧i̧ ɗɛɛrwol yɛrɛ. Mi gi Yeesu Kristu tɔmsɔya anyɔ ha̧a̧ Bɛto gi elimi. Mi boonɛ. Sa̧a̧m wɛ Sostenɛs yɔ gi fɔk Yeesu boonɛ hɛw.

²Wi bi̧i̧sig nɛɛ Bɛtfɔkya wɔ nɛ gi a Kɔrɛŋgtu. Anyɔ nɛ ɔks hi Yeesu Kristu nɛ wɛɛ Bɛt dood ɔnɛ, wɛɛ Bɛt elinɛ an nɛ wɛɛ doodɔ gaatɛ ɔksi hi dood zaadɛ wɔ hi elik Waar wɛ Yeesu Kristu nuŋgɔ a lɛl zaadɛ du sɛw. Gi Waar ya̧nɛ hi Waar wɛnɛ be.

³An Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi!

⁴Mi waak Bɛt baanik a nɛ zulha anyɔ gaanɛ gɛmsili a ɔksil nɛ bɔ hi Yeesu Kristu gedu.

⁵Anyɔ nɛ ɔks hi Waar Yeesu , nɛ dag rɔɔs mɔkilya gi a dɔgl du sɛw hi a hinmɛɛk du sɛw.

⁶Ya̧a̧nɛ, yɔ hi boosin Kristu dɔglɔ, hinyɔ dɔglɔ bɔ woo a nɛ teesdu zuun a gi rɔbo.

⁷Yɔ anbɔ, nɛ́ lɔ̄ɔ̄ Bɛt Mɔkil gaas za gɛ. Nɛ wɛɛ nɛ ook Waar wɛ Yeesu Kristu midzigɔ.

⁸Gii gi ɓaasinɛ gi tuur a ɔ̧tda̧a̧ki an bɔhi zol hin-a̧a̧bi a ɔ̧tyɔ Waar wɛ Yeesu Kristu gɔ gi gbaa dɔgl gedu.

⁹Bɛt yɔ elin a ɔksig bɔ gedu hi Waaɔ Waar wɛ Yeesu Kristu gi doo rɔbo; ya̧a̧luur hinɔ taa a ge.

¹⁰Yɛ̧ɛ̧dɛ mi wɛ, mi gin zɔ̧k hi tɛŋko a Waar wɛ Yeesu Kristu nuŋg du an nɛ wa̧a̧ ya̧a̧boon nɛ gbunu, wɛɛ bɔnɛ gbaa gɛ̧ksil nɛ tees du, nɛ ɔks rɔbtɔnɔ hi mɔkil nɛ gbunu hi kpoos nɛ gbunu.

¹¹Yɛ̧ɛ̧dɛ mi wɛ, mi lag hinza a nɛ zulha, Kolowus doodɔ hii raasimi a gbatins gi nɛ tees du.

¹²Ha̧a̧mi an mi raasin a nɛ book hin nɛ teesdu anyɔ lɛ: zaadɛ hi raako a be gihi Pol giya, zaadɛ be a be gihi Àpolos giya, zaadɛ a be gihi Piyɛr giya, wɛɛ zaadɛ a be gihi Kristu giya.

¹³Kristu gɛ̧ɛ̧y ya? Hi doosin Pol doos a dɔ̧ɔ̧r ha ya? Zaabe nɛ dag Bɛtmɛm a Pol nuŋg du ro ya?

¹⁴Mi baan Bɛto anyɔ mi hōtin doo za gbun nɛ teesdu Bɛtmɛm gɛ, gɛ Kirispus hi Gayus,

¹⁵an bɔ ɗoo za gi raa a be dag Bɛtmɛm a mi nuŋg du.

¹⁶Eh, hɔɔ rɔbo! mi hotin Estafanus doodɔ wɔ raa du Bɛtmɛmɛ. Hinyɔ zɛ̧ɛ̧rɔ, mí mɛ̄ɛ̄ a mi hōtin doo za Bɛtmɛm ma gɛ.

¹⁷Ya̧a̧nɛ, Kristu yāāzim an mi hotin doo Bɛtmɛm gɛ. Yaazim an mi dɔks dood Bɛt dɔglɔ, taa hi dood ya̧a̧boonya hinmɛɛkya dubti an bɔhi wɛɛn dɔgl yɔ raasɛ a Kristu wɔr a dɔ̧ɔ̧r muulɛ hintɔs.

¹⁸Kristu wɔrkɔ a dɔ̧ɔ̧r muul dɔgl yɔ gɔ hi dɔko, gis wɔ hi gi fɔk laazɛŋk gbɔnɔ an yooya̧a̧ dɔglɛ. Nɛ́ wɛ́ɛ́ yɔ wɛ gi a za̧a̧tig gbɔnɔ du be, wɛnɛ gisɛ Bɛt tɛŋk ɔ̧ɔ̧nɛ.

¹⁹Bɛt ɗɛɛrwolɔ raa a bé ha̧tir hinmɛɛkya dubtɛ wɔ hinmɛɛkya̧, be wɛɛ be wɛɛn hinya̧ mɛɛk bɔ hin tɔs.

²⁰Hinmɛɛkya dubt bɔ gi ay ma? Bɛtmaakdɔkya bɔ gi ay be? Hinfaakya bɔ a wɛl yɛrɛ gedu gi ay be? Bɛt zuun a hinmɛɛk dubt yɔ a waali gedu gi yooya̧a̧yɔ.

²¹Bɛt a̧a̧n hi hinmɛɛkɔ dubti an bɔ dood waal du hi mɛɛge hi hinmɛɛkya̧ dubti, har Bɛt ɔ̧nɛ an gi za̧a̧s wɔ hi ɗɔbsig a dɔglɔ wi dɔk yɔ kɔmsihi an yooya̧a̧ gedu.

²²Yahuduya wɔ ha̧a̧hi an hi sɔ̧ɔ̧ gɛrs kete ɓɔr hi ɔɔ ɗɔbsugo, wɛɛ Yonaniŋkoya wɔ be ha̧a̧hi an hi kɛm dɔgl hinmɛɛkya dubti.

²³Yɛrɛ wiya, wi gis dood dɔk Kristu yɔ hi doog a dɔ̧ɔ̧rha dɔglɔ. Dɔgl bɔ gis Yahuduya wɔ dɔɔsiŋk lɛlɛ, wɛɛ dɔ̧ɔ̧t dɔɔmɛ wɔ be, gisihi yooya̧a̧yɔ.

²⁴Yɛrɛ dood wɔ Bɛt elihi be, an hi gi Yahuduyaadɛ, zaabe dɔ̧ɔ̧t zaadɛ dɔɔmɛ, hi sɛw, Kristu wɛɛsihi Bɛt tɛŋkɔ hi hinmɛɛkɔ dubt giya.

²⁵Hinyɔ Bɛt gi mɔkugo kɔms dood yooya̧a̧yɔ, yɔ anbɔ daar dood hinmɛɛk dubtya̧ daarɔ; wɛɛ hinyɔ Bɛt gi wook be, dood hi seek hinɔ an hinhɔntilyɔ, yɔ anbɔ Bɛt hɔntilɔ daar dood tɛŋkya̧ daar be.

²⁶Yɛ̧ɛ̧dɛ mi wɛ, seenɛ, an nɛɛ yɔ Bɛt elinɛ, dood hinmɛɛkya dubtɛ a waali du hi tɔŋ a nɛ teesdu gɛ, dood tɛŋkya hi tɔŋ gɛ, dood nablɛ hi tɔŋ gɛ.

²⁷Yɛrɛ Bɛt sɛ̧ɛ̧ hinyoo a waal du an gi ha̧a̧n dood hinmɛɛkya dubtɛ wɔ seemɛ; Bɛt sɛ̧ɛ̧ hinhɔntil wɔ waal du an gi ha̧a̧n dood tɛŋkya wɔ seemɛ.

²⁸Wɛɛ Bɛt sɛ̧ɛ̧ hintɔs wɔ waal du hi hin zaadɛ wɔ dood hi gihi bɔ̧ɔ̧ko, hi hinwɔ hi taa hɛw gɛ an hi dag gbɔlumsɛ, an gi wɛɛ gi wɛɛn wɔ hi gihi seek an hinrɔbo hintɔs.

²⁹Yɔ anbɔ doo za ɗɛɛ an gi pɛɛ zulɔ a Bɛt muutdu gɛ.

³⁰Bɛt gii ɔksɛ hi Yeesu Kristu, Yeesu Kristu gii wɛɛsɛ ma hinmɛɛk wɛ dubti, gii wɛɛnɛ hinriiti a Bɛt muutdu, gii wɛɛnɛ Bɛt doodɔ, gii za̧a̧sɛ a hinha̧a̧l du.

³¹Anyɔ Bɛt ɗɛɛrwolɔ raa a an za̧a̧nyɔ ha̧a̧g an gi ɗɔbs zulɔ, ɗɔbsig a hinyɔ Waar Bɛt gɔsig gi dɔŋgo.