Read Doyayo 1 KƆRƐŊGTU 12 Bible Online

1 KƆRƐŊGTU 12 - Doyayo bible

1 KƆRƐŊGTU 12

¹Yɛ̧ɛ̧dɛ mi wɛ, an hinyɔ gi seek Bɛt Mɔkilɔ gaasɛ, ha̧a̧mi an nɛ mɛɛ hinɔ bɛttɔnɔ.

²Nɛ yɔ nɛ da nɛ taanɛ Bɛt ɗɔbsig gɛ, nɛ yaarik zul nɛ gi rek a maakwɔd wɔ hi taa ya̧a̧book gɛ hi.

³Ya̧a̧nɛ gi ha̧a̧mi an nɛ mɛɛ bɛttɔnɔ a doo za taa an Bɛt Mɔkilɔ gi tasig kpoos du gi dɔgɔ: a Yeesu gi bootyayɔ! wɛɛ doo za ɗɛɛ an gi dɔgɔ a Yeesu gi Waar i gɛ be, gid taa hi Bɛt Mɔkilɔ yɔ raag gii gɛ.

⁴Bɛt Mɔkilɔ gaasɔ gi sɔmsɔm. Bɛt Mɔkilɔ gi gbunu gi gaak gaas wɔ sɛw.

⁵Woos gi sɔmsɔm, Waar Yeesu , Za̧a̧nyɔ wɛ gisig wooswooko gi gbunu.

⁶Bɛt Mɔkil woos gi sɔmsɔm, an gi woon hin gi ɗans Bɛt doodɔ wɔ hiya a hinyɔ gi gedu sɛw.

⁷Bɛt Mɔkilɔ gɔ mits doo yɔ gi sɛw hin a gi kpoos du an gi ɗaas dood sɛw.

⁸Bɛt Mɔkilɔ gi gaak dood zaadɛ gaasɔ: gɛ dɔgl hin-mɛɛkya dubti; zaabe gaasɔ gɛ dɔglmɛɛki, anyɔ Bɛt Mɔkilɔ gbuna bɔ gaage.

⁹A doo za, Bɛt Mɔkilɔ gbuna bɔ gaage Bɛt ɗɔbsigi; a doo za ge be, Bɛt Mɔkilɔ gbuna bɔ gaage gaasɔ wɔ gɛ an gi za̧a̧s doodɛ;

¹⁰a doo za ge, gaasɔ gɛ gɛrs wɔ zuunukɔ; a doo za ge be, gaasɔ gɛ Bɛtya̧a̧ɔkɛŋki; a doo za ge, gaasɔ gɛ Bɛt Mɔkilɔ an gi gɛ̧ɛ̧n mɔkilɔ zaadɛ; a doo za ge be, gaasɔ gɛ an gi booya̧a̧ hi ya̧a̧boon rɔ̀bɛ mɔkilyaadɛ za sɔmsɔm; a doo za ge be, gaasɔ gɛ an gi zɛ̧mr ya̧a̧boon rɔ̀b mɔkilya a dood ya̧a̧boon du sɛw an hi kɛmnɔ.

¹¹Bɛt Mɔkilɔ gbuna bɔ gii gi wook hin wɛrɛ sɛw gi gɛ̧ɛ̧sig dooyɔ gaasɔ gi sɛw anyɔ ha̧a̧ge.

¹²Ya̧a̧nɛ, nɛ mɛɛ a doo muulɔ gin muul dɛɛt kittɔnɔ, muul bɔ be, gi hin gbun kpɔd. Muul dɛɛt wɔ sɛw, hi ɔksɔ an hi wɛɛ muul gbunu. Kristu hɛw riitin an muul yɔ gin muul dɛɛt kittɔnɔ.

¹³Wɛɛ sɛw wɛ dag Bɛtmɛm bɔ hi Bɛt Mɔkil gbuna bɔ gii an wɛ wɛɛ muul gbunu. An zaadɛ hi gi Yahuduyaadɛ a wɛ teesdu si̧, wɛɛ zaadɛ be hi taa Yahudu-yaadɛ, zaadɛ hi gi gbaarɛ, zaadɛ be hi gin zulya̧ aakil du be, wɛ sɛw wɛ dag Mɔkil gbuna bɔ an gi guz a wɛ kpoos du.

¹⁴Yɔ anbɔ muul ɔ̄ks kimt gbun gɛ, gin muul dɛɛt zaadɛ kittɔnɔ.

¹⁵An dɔɔ raa: a yɔ be taa naan gɛ, be taa a muulɛ, yɔ anbɔ taa a muul ya?

¹⁶Wɛɛ an tɔn raa: a yɔ be taa lɔl gɛ, be taa a muulɛ, yɔ anbɔ taa a muul ya?

¹⁷An muul sɛw ginɛ lɔlɛ, tɔn yɔ gi ay? An ginɛ tɔn sɛw, gɔ̧ɔ̧s yɔ gi ay?

¹⁸Yɛrɛ Bɛt gbaa muul dɛɛt zaadɛ wɔ sɛw a muulɛ anyɔ ha̧a̧ge.

¹⁹An muul dɛɛt wɔ hi gi muul sɛw hi gi gbunu, muul yɔ gi ay?

²⁰Yɛrɛ muul dɛɛt hi gi kittɔnɔ a muulɛ, wɛɛ hi gi muul gbunu.

²¹Lɔl ɗɛ̄ɛ̄ an gi raa naanɛ a ha̧a̧be mɔɔ gɛ gɛ, wɛɛ zulɛ taa an gi raa dɔɔ a ha̧a̧be nɛɛ gɛ gɛ.

²²Nɛ yɛrɛ hinyɔ daarɔ, muul dɛɛt wɔ hi gi a muulɛ wɛ gihi seek an hi gi hɔntilyɔ hii gɔ ha̧a̧wɛ hii daarɔ.

²³Muul dɛɛt wɔ hā̧ā̧wɛ kaasi hi taa hinɗɔbt gɛ, wɛ ɗɔbsig hii gi daarɔ. Wɛɛ muul dɛɛt wɛ hi giwɛ seem ha̧a̧nuko, wɛ gihi kaŋkig rɔbtɔnɔ.

²⁴Muul dɛɛt wɔ hi riisɛ be, hi bɛ̄r an hi yaatihi gɛ. Bɛt sɔ̧mnt muulɛ an hi gaa muul dɛɛt wɔ hi taa hinɗɔbt gɛ gbɔlums gi daarɔ,

²⁵an bɔ gɛ̧ksil gi gi a muulɛ, wɛɛ an muul dɛɛt wɔ hi ootin rɔbtɔnɔ be.

²⁶Muul dɛɛt wɔ zaaɔ gi dag kosgumnɛ, muul dɛɛt wɔ sɛw hi guumɔ; gid hi ɗɔbs muul dɛɛ za gbunu, muul dɛɛt zaadɛ wɔ sɛw hi dag hat an giya.

²⁷Nɛɛ gi Kristu muulɔ, wɛɛ an bɔ sɛw gi muulɔ dɛɛto a gi muulɛ.

²⁸Bɛt yɛɛl gbaa tɔmsya wɔ hii a Yeesu fɔkya wɔ ɔksilya̧ bɔ gedu wɛɛ gbaa eesumɔ, ya̧a̧kɛŋkɔyaadɛ, taasumɔ, hingokya dubtɛ, kuudu, wɔ Bɛt gaahi gɛrsɛ, kuudu za̧a̧sig-yaadɛ, hinɗaakyaadɛ a zɛksil du, gbɔnɔ dorkyaadɛ an hi zuns dood Bɛt gbɔnɔ. Gbaa zaadɛ an hi boo ya̧a̧boon rɔ̀b mɔkilya sɔmsɔm.

²⁹Dood sɛw hi gi Yeesu tɔmsyaadɛ ya? Dood sɛw hi gi Bɛtya̧a̧kɛŋkyaadɛ ya? Dood sɛw hi gi hingokya dubtɛ ya? Bɛt gaa dood sɛw an hi gɔ gɛrs ya?

³⁰Bɛt gaa dood sɛw an hi gi doo za̧a̧sigya ya? Dood sɛw hi book ya̧a̧boon rɔ̀b mɔkilya sɔmsɔm ya? Dood sɛw hi gi an hi wɛɛn ya̧a̧boon wɔ sɔmsɔm ya?

³¹Yɔ anbɔ, i̧i̧yyin an nɛ dag gaas rɔbɛ wɔ hi daarlɛl hiya. Yɛrɛ ɔmi wɛɛ mi goksin gbɔnɔ rɔb yɔ bɛr gi daarlɛl sɛw.