Read Doyayo 1 KƆRƐŊGTU 13 Bible Online

1 KƆRƐŊGTU 13 - Doyayo bible

1 KƆRƐŊGTU 13

¹An mi gi book dood ya̧a̧boonɛ, hi Bɛt walɛsɛrɛ ya̧a̧boon sɛw, mi taan hat gɛ, mi gi an suml yɔ gɔ hi ɓaag gi boo giya, zaabe an ɓark booti tɔs.

²À mi gin tɛŋk an mi kɛm Bɛtya̧a̧ɔ mi mɛɛ dɔgl wɔ dood hi mɛ̄ɛ̄ nɛ gɛ sɛw, hi hinmɛɛk wɔ sɛw, à mi gin ɗɔbsig rɔbo an mi ha̧sin gol wɔ, mi wɛɛ mi taan hat gɛ, mi hintɔsyɔ.

³Wɛɛ an mi gɛ̧ɛ̧ rɔɔs mi sɛw an hi len ya̧a̧rya wɔ, wɛɛ an mi gaa muul mi hi dɔ̧ɔ̧s laadu a Yeesu dɔŋgo, gid mi taan hat gɛ, hinbɔ lab ɗɛ̄ɛ̄ an gi ɗaasim gɛ.

⁴Hat gi hinmɔŋkya, hat gi hinrɔbo, taan ka̧a̧si, gɔ pɛ̄ɛ̄ zul gɛ, taa zultɔɔsigya;

⁵hat gɔ gāā seem gɛ, taa niisya, taan nɔɔtigi, gɔ gbāā burs gɛ.

⁶Hat gɔ dāg hat a hinyɔ gɔ ha̧a̧l gedu gɛ, ɔnɛ gɔ dag hat a rɔb du.

⁷Hat gi yaatig hinyɔ bɛr gɛ dɔglɔ sɛw, gi ɗɔbsig hin sɛw, gi mɔkighin a hin sɛw ha, gi mɔŋkhin sɛw.

⁸Hat gɔ kūg gɛ. Dɔgl wɔ dood hi dag a Bɛt ge, ɔ̧tza hí da̧a̧. Ya̧a̧boon za rɔ̀bɛ mɔkilyaadɛ hi wagɔ. Hinmɛɛk wɔ hi wagɔ.

⁹Ya̧a̧nɛ hinmɛɛk wɛ gi hi welɔ, wɛɛ dɔgl yɔ wɛ kɛŋk a Bɛtya̧a̧ du wɛ kɛm hi wel be.

¹⁰Yɛrɛ hinyɔ gaa gi daarlɛl gɔ gi zaa, hinyɔ gi hi welɛ gi wagɔ.

¹¹Yɔ mi ginɛ ya̧a̧mi mi booya̧a̧ an ya̧a̧mi, mi kɛm nɛ hin an ya̧a̧mi, mi mɔk hin mi zul du an ya̧a̧mi; yɔ mi tuur waltɔ, mi ɔɔ ya̧a̧mdɔgl wɔ sɛw.

¹²Yɛrɛ nɛɛko wɛ seek daarugal du an lɛlwilɔ, gɔ gigi a ɔ̧tɔge wɛ́ gbɛn Bɛt muutdu hi muutdu. Nɛɛko mi mɛɛ bɛrkza kaasi, wɛɛ gɔ gigi a ɔ̧tɔge mí mɛɛ hin bɛttɔnɔ gi da̧a̧ anyɔ Bɛt mɛɛm nɛ bɛttɔnɔ gi da̧a̧ be.

¹³Yɛrɛ hin taarɛ wɔ hi waak gɛrɛ: ɗɔbsigi, mɔkil-gbaaki hi hato. Wɛɛ hinyɔ gi gbɔɔl gi daar wɛrɛ gɛ hato.