Read Doyayo 1 KƆRƐŊGTU 14 Bible Online

1 KƆRƐŊGTU 14 - Doyayo bible

1 KƆRƐŊGTU 14

¹Tɛn hato, nɛ wɛɛ nɛ i̧i̧y an nɛ dag Bɛt Mɔkil gaas wɔ, rɔbɔ an nɛ kɛm dɔgl a Bɛt ya̧a̧ du nɛ dɔgɔ .

²Ya̧a̧nɛ, za̧a̧nyɔ gi bookya̧a̧ hi ya̧a̧boon za rɔ̀b yɔ dag a Bɛt ge, bōōs dood gɛ, boos Bɛt ga; ya̧a̧nɛ doo za ɗɛ̄ɛ̄ an gi kɛmsig gɛ, wɛɛ gi book dɔglyɔ dood hi mɛɛ gɛ hi Bɛt Mɔkilɔ tɛŋkɔ.

³Za̧a̧nyɔ gi book dɔglyɔ dag a Bɛt ge be, gi boosig doodɛ an ɗɔbsigya̧ gi tɔɔ, gihi muul ɓaasugo, gihi rɔɔk be.

⁴Za̧a̧nyɔ gi bookya̧a̧ hi ya̧a̧boon za rɔ̀b mɔkilya yɔ dag a Bɛt ge gi boosig zul ɔ̧ɔ̧nɛ an ɗɔbsigɔ gi tɔɔ. Wɛɛ za̧a̧nyɔ kɛm hinza a Bɛt ya̧a̧ du gi dɔko, gi Yeesu fɔkya wɔ ɗaako an ɗɔbsigya̧ gi tɔɔ.

⁵Ha̧a̧m rɔbtɔnɔ an nɛ sɛw nɛ boo ya̧a̧boon rɔ̀b mɔkilyaadɛ, wɛɛ hinyɔ ha̧a̧mi gi daarɔ, ha̧a̧mi an nɛ dɔg hinyɔ nɛ kɛm a Bɛt ya̧a̧du gii rɔbɔ. Za̧a̧nyɔ gi dɔk hinyɔ kɛm a Bɛt ya̧a̧du gii gi ɗaasig Yeesu fɔkya wɔ gi daar za̧a̧nyɔ gi book ya̧a̧boon rɔ̀b mɔkilya, hinɔ gi taa an ya̧a̧boon rɔ̀b mɔkilya bookya bɔ gi zɛmrik dɔglɔ a dood ya̧a̧boon du gii gɛ. Za̧a̧nɔ gi bɛɛs Yeesu fɔkya wɔ hinyɔ boo tuusig a dood ya̧a̧boon du hi Bɛt Mɔkilɔ tɛŋkɔ, ɗaasihi gɔ ma ɓɔrɔ.

⁶Nɛ yɔ anbɔ, yɛ̧ɛ̧ mi hiya, à mi zaa a nɛɛge mi boosin ya̧a̧boon rɔ̀b mɔkilya, wɛɛ gid mi boosin hinɔ mi tutsin gɛ, zaabe hi hinza yɔ Bɛt mitsim mi dɔko, zaabe hi dɔglza hinmɛɛkya, zaabe hi dɔgl za yɔ mi dag a Bɛt ge, zaabe hi hinza gold, gi an mi ɗaasin ri ma nɔ?

⁷Mɔkin fɛ̧ɛ̧brɛ̧ɛ̧ dɔglɛ, zaabe ɗɛŋɗɛŋnɔɔ. An wɔdya̧ hi taan kol gɛ si̧, dɔglya̧ bɔ riitinu. Gɔ hi ulihi hi booko, à hi gels kaal rɔbtɔnɔ gɛ, gi an doo gi mɛɛ hinyɔ hi ɛɛnik ri ma nɔ?

⁸Wɛɛ à pɔ̧r booya̧a̧ zu̧u̧gilɛ, bɔ ɗɛɛ an gi gɛms gabs reki?

⁹Gbunɔ, nɛya nɛ gi book ya̧a̧boon rɔ̀b mɔkilya za nɛ wɛɛ nɛ tutsin dood hinɔ hi dɔgl yɔ gaasihi gɛ, yɔ hi mɛɛ hinyɔ nɛ dɔk ri? Nɛ nɛ book ma a zɛk du tɔs mi?

¹⁰Ya̧a̧boon hi kiitɔ a waal du, yɔ anbɔ ya̧a̧boon za gbun lɔ̄ɔ̄ bookɔ bɔ gaasugɔ gbɔnɔɔ gɛ.

¹¹Wɛɛ à mi mɛɛ ya̧a̧boon za bookɔ bɔ gaasugɔ gbɔnɔɔ gɛ be, nɛ mi gis za̧a̧n bɔ gim ya̧a̧ bɔ boonik rɔ̀bi ma mi! Wɛɛ za̧a̧nyɔ gim boonik ya̧a̧ bɔ gisim rɔ̀bi ma be mi?

¹²Gbunɔ, nɛya, anyɔ nɛ tɛk Bɛt Mɔkilɔ gaasɔ, i̧i̧n tɛŋk nɛ an nɛ dag gaas kit wɔ gɔ nɛ ɗans Yeesu fɔkya an ɗɔbsigya̧ gi tɔɔ gi rek doosɛ.

¹³Yɔ anbɔ za̧a̧nyɔ gi book ya̧a̧boon za rɔ̀b mɔkilya, zɔ̧ge an gi ɗɛɛ wɛɛnuko.

¹⁴Ya̧a̧nɛ, gid mi zɔ̧k Bɛt hi ya̧a̧boon za rɔ̀b mɔkilya, mɔkil mi kpoos du gi a zɔ̧k du, wɛɛ hinmɛɛk mi wōō hinza gɛ.

¹⁵Gi an mi woo nɔ? Mí zɔ̧bɔ hi mɔkil mi, mi wɛɛ mi zɔ̧bɔ hi hinmɛɛk mi hɛw; mi ɛɛhin hi mɔkil mi, mi wɛɛ mi ɛɛhin hi hinmɛɛk mi.

¹⁶An taa anbɔ gɛ, an mɔ gi baanik Bɛt hi mɔkili doo za yɔ mɛ̄ɛ̄dir Bɛt Mɔkil dɔgl gɛ yɔ ta̧a̧ ri: a hɔɔ, aanbɔ! a hinyɔ mɔ zɔ̧k hage, anyɔ mɛɛ hinyɔ mɔ dɔk gɛ?

¹⁷An mɔya mɔ gi zɔ̧k rɔbtɔnɔ si̧, giya tɔ̄ɔ̄ dag tɛŋk gedu gɛ.

¹⁸Mi baan Bɛt gbɔɔltɔnɔ anyɔ mi bookya̧a̧ zaadɛ rɔ̀bɛ mɔkilya mi daarin sɛw.

¹⁹Yɛrɛ a Yeesu fɔkya wɔ ɔksilya̧ bɔ gedu, ha̧a̧mi daarɔ an mi dɔg dɔgl nɔɔnɛ hi hinmɛɛk mi mi gogns dood zaadɛ hinɛ, hi anyɔ gɔ mi dɔg dɔgl duk kooblɛ hi ya̧a̧boon za rɔ̀bɛdɛ.

²⁰Yɛ̧ɛ̧dɛ mi wɛ, bɔnɛ mɔkhin an ya̧a̧mwaato. Wɛɛn an ya̧a̧mwaat wɔ hi taan ha̧a̧l gɛ a woos nɛ bɔ gedu. Mɔkinhin an dood gbɔlɛ.

²¹Hi bi̧i̧ a Bɛtmaakdɔgl ɗɛɛrwol du a Waar Bɛt raa: a bé boo dood wɛrɛ hi dood zaadɛ ya̧a̧boonɛ, hi dood zaadɛ rɔ̀bɛ ya̧a̧boonɛ, wɛɛ gɔ gi anbɔ si̧, taa an hi kɛmsibe.

²²Yɔ anbɔ ya̧a̧boon mɔkilya rɔ̀bi gi hinmɛɛnikyayɔ, taas wɔ hi gi Yeesu ɗɔbsugo, gis wɔ hi taa Yeesu ɗɔbsig gɛ ya̧a̧nɛ, dɔgl yɔ hi dag a Bɛt ge dɔkɔ gi hinmɛɛnikyayɔ, taas wɔ hi taa Yeesu ɗɔbsugo, gis wɔ hi gi Yeesu ɗɔbsig ya̧a̧nɛ.

²³Nɛ yɛrɛ a lɛlyɔ Yeesu fɔkya hi mɔks ge sɛw, gid hi sɛw hi gi book ya̧a̧boon rɔ̀b mɔkilya, wɔ hi mɛ̄ɛ̄ Bɛt dɔgl gɛ, zaabe wɔ hi taa Yeesu ɗɔbsig gɛ, hi zaa hi lako, yɔ hi rāāhi a hi yoo gɛ ya?

²⁴Wɛɛ an hi sɛw hi dɔk dɔgl yɔ hi dag a Bɛt ge, doo za yɔ taa Yeesu ɗɔbsig gɛ, zaabe za̧a̧nyɔ mɛ̄ɛ̄ Bɛt dɔgl gɛ gi tazɔ, dood sɛw hi zunsig hinha̧a̧lɔ gaattɔnɔ, hi gbaasig dɔglɛ,

²⁵dɔgl wɔ hi yaat nɛ a gi kpoos du hi midɔ, gii be yɔ wɛɛ yɔ zagl hi zulɔ a hi muutdu yɔ ɗɔbs Bɛto, yɔ dɔgɔ a Bɛt gi nɛ teesdu hi rɔbo.

²⁶Nɛ yɛrɛ, yɛ̧ɛ̧dɛ mi wɛ, gi an wɛ woo nɔ? Gɔ nɛ mɔksig an nɛ ɗɔbs Bɛto, bɔbe a nɛ teesdu gin hin-ɛɛnɛ, zaabe hingoki, zaabe hinza yɔ Bɛt mitsige a gɛrs du, zaabe ya̧a̧boon rɔ̀b mɔkilya, zaabe ya̧a̧boon rɔ̀b mɔkilya wɛɛnikɔ an dood hi kɛmɔ. Nɛ a hin wɔrɔ gedu sɛw, woon nɛ ɗaatinu an ɗɔbsig gi tɔɔ.

²⁷Doo gi gi book ya̧a̧boon za rɔ̀b mɔkilya, dood eerɛ zaabe taarɛ hi boo, wɛɛ taa an gi daar taarɛ, bɔbe gi yɛrɔ, doo za wɛɛg gi wɛɛn hinyɔ hi dɔko.

²⁸Doo za ya̧a̧wɛɛnikya gi taa gɛ, yɛ dood ya̧a̧boon rɔ̀bɛ mɔkilya wɔ hi kɔm hititi a Yeesu fɔkya wɔ ɔksilya̧ bɔ gedu, bɔbe gi boo gi kpoos du hi Bɛto.

²⁹Bɛtya̧a̧kɛŋkya wɔ ya̧nɛ doo eerɛ zaa taarɛ boohiya̧a̧, zaadɛ wɔ be hi dɛ̧ɛ̧t dɔglɔ kpoos du;

³⁰gid za̧a̧nyɔ gi ɗɔɔtugo gi gbɛn Bɛt gi mitsig hinza gɛrs du, za̧a̧n biitir bɔ yɛgi kɔm hititi.

³¹Ya̧a̧nɛ, nɛ sɛw nɛ ɗɛɛ hinyɔ nɛ dag a Bɛt ge fɔkɔ dɔk gbunu gbunu an dood sɛw hi lako hi sɛw hi dag tɛŋko.

³²Bɛtya̧a̧kɛŋkya wɔ mɔkilya̧ hi lagsig Bɛtya̧a̧kɛŋkya wɔ tɔnɛ.

³³Ya̧a̧nɛ, Bɛt taa doo zɛksilya, gi Bɛt boolumyayɔ. Anyɔ gi a Bɛt doodɔ gaatɛ wɔ hi teesdu a lɛlyɔ hi mɔksig ge sɛw,

³⁴yɛ nɛɛd hi kɔm hititi a lɛlyɔ Yeesu fɔkyaadɛ hi mɔks ge, hi gāāhi gbɔnɔ an hi booya̧a̧ a lɛlɔge gɛ. Yɛhi tiis zulya̧ wɛɛdisɛ an hinyɔ Bɛtmaakdɔglɔ raa hɛw.

³⁵Gi ha̧a̧hi an hi mɛɛ hinɔ, warihi walya̧ gii a raadu, ya̧a̧nɛ an nis gi booya̧a̧ a Yeesu fɔkyaadɛ lɛlyɔ hi mɔks ge, seemɛ.

³⁶Nɛ rɛ, Bɛtdɔglɔ tuuz a nɛ lɛl du ya? Zaabe, turs nɛɛ kpɔd ya?

³⁷Doo gi see zulɔ an Bɛtya̧a̧kɛŋkyayɔ, zaabe a be dag Bɛt Mɔkilɔ dagɔ, mɛksige a hinyɔ mi gisin bi̧i̧ko gi Waar Yeesu dɔgl ɔ̧ɔ̧nɛ.

³⁸Doo gi laks hin yɛrɛ tɔn gɛ, Bɛt taag seek be.

³⁹Yɔ anbɔ, yɛ̧ɛ̧dɛ mi wɛ, i̧i̧n tɛŋk nɛ a Bɛtya̧a̧kɛŋkɔ bɔ hi dɔkɔ bɔ gedu, bɔnɛ a̧a̧nihi ya̧a̧boon rɔ̀bɛ mɔkilya wɔ bookɔ.

⁴⁰Yɛrɛ an hin sɛw gi wooy rɔbtɔnɔ hi gbɔnɔ.