Read Doyayo 1 KƆRƐŊGTU 16 Bible Online

1 KƆRƐŊGTU 16 - Doyayo bible

1 KƆRƐŊGTU 16

¹An hinyɔ gi seek an hi mɔkts Bɛt doodɔ wɔ a Urusalima tusɛ, nɛɛ hɛw, woonɛ anyɔ mi da mi raas Yeesu fɔkya wɔ hi mɔksig lɛl sɔmsɔm a Galatiya dɔglɔ.

²A dimaas nuŋg sɛw, bɔbe gbaag tus yɔ dag kaasi anyɔ ɗɛɛ rɔbtɔnɔ lɛlɔ sɔm a nɛ lɛlɛ, an bɔnɛ oon tus mɔksig dɔgl zaak mi.

³Gɔ mi zaa, mi yaan dood wɔ nɛ herihi nɛ ta̧a̧ dɔglya̧ hi ɗɛɛrwoli an hi kam gaas nɛ bɔ a Urusalima.

⁴Hinɔ gi rii an mi rek hi zul mi, hi retin hi mii hɛw.

⁵Mi daak a Makeduniya an mi zɛ̧br Yeesu fɔkya wɔ hɔ. Gɔ gi kuudu, mi zaak a nɛɛge.

⁶Kinsa mi am a nɛɛge hɔ, zaabe ga̧a̧k gi zɛ̧m hɔ hɛw an kuudu nɛ ɔɔm kaŋk a lɛlyɔ gɔ mi rek ge.

⁷Ya̧a̧nɛ, hā̧a̧m an mi daa nɔɔha mi seen gɛ; Waar Yeesu gi gaam gbɔnɔ, mi mɔkig an mi waa hi nɛɛ gi am kaasi.

⁸Yɛrɛ mi ɗɔɔt hɛdi a Efesu gi tuur a Paŋtekosta naab du kete.

⁹Ya̧a̧nɛ Bɛt gborsim gbɔnɔ gbɔɔl yɔ woos gɔ gi rek doos gedu hi tɛŋko. Ya̧a̧-kɛtil miya wɔ hi gis gɔ kittɔnɔ be.

¹⁰Timɔte gɔ gi tuurɔ, oonɛg du an bɔgi ɗɔɔt nɛ teesdu hi hoobo, gi wook Waar Yeesu woosɔ an miya, ya̧a̧nɛ.

¹¹Bɔ doo gi seeg an hintɔs. Yaazinge rɔbtɔnɔ an gi zaa gi tuur a rniige, mi gig ooko hi yɛ̧ɛ̧dɛ mi Yeesu fɔkya wɔ.

¹²Gii yɛ̧ɛ̧wɛ Apolos be, mi zɔ̧g gbɔɔltɔnɔ an gi rek a nɛɛge hi yɛ̧ɛ̧dɛ Yeesu fɔkya zaadɛ wɔ. Yɛrɛ tā̧ā̧ an gi rek ɓɔri gɛ. Gɔ gi dag gbɔnɔ ro gi ɔɔ reko.

¹³Oonɛ waan ɗɔbsig hi kpoos nɛ gbunu, ɓaasin muul nɛ, dagin tɛŋko.

¹⁴An hinyɔ nɛ wook sɛw gi wooy hi Bɛt hat kpoosdu.

¹⁵Yɛ̧ɛ̧dɛ mi wɛ, mi wɛɛ mi gin dɔgl za gaak gɛrɛ ɓɛ. Nɛ mɛɛ a Estafanus raatɔ hii ɗɔbs Yeesu biitiri a Akaya. Hi gi woosig Bɛt doodɔ woosɛ hi kpoosya̧ sɛw.

¹⁶Nɛɛ hɛw, mi gin zɔ̧ko, kɛmsin dood wɔrɔ labɔ hi wɔ hi gi wooswootingo el tɔnɛ.

¹⁷Mi gi hat dak hi Estafanus, hi Fɔrtinatus hi Akayus zaakya̧ bɔ; hi gààmi hinyɔ nɛ ɗɛɛ gɛ anyɔ nɛ da nɛ zaa gɛ.

¹⁸Hi es mɔkil mi sob hi nɛnɛ hɛw. Mɛɛn ma dood wɔrɔ lab seekɔ du.

¹⁹Yeesu fɔkya wɔ hi mɔksig lɛl sɔmsɔm a Aaziya a hi boon du. Akilas hi nisɔ Piriskila hi Yeesu fɔkya wɔ hi mɔksig a hi raa du hi boom du gbɔɔltɔnɔ a Yeesu nuŋg du.

²⁰Yɛ̧ɛ̧dɛ Yeesu fɔkya wɔ sɛw hi boon du. Bootinnɛ bɛttɔnɔ hi yɛ̧ɛ̧dums hato.

²¹Mii Pol mi boonɛ. Mi bi̧i̧sin ɗɛɛrwol yɛrɛ hi naan miinɛ.

²²Doo gi hā̧a̧g Waar Yeesu gɛ, boot yɛgi gɔge. ꞋꞋMaranata! ꞋꞋ Raakɔ a Waar i, zaamɔ! Aanbɔ.

²³An Waar wɛ Yeesu gɛmsilɔ gi gi hi nɛya!

²⁴Ha̧a̧tig mi gi hi nɛɛ sɛw a ɔksil wɛ bɔ gedu hi Yeesu Kristu. Aanbɔ!