Read Doyayo 1 KƆRƐŊGTU 6 Bible Online

1 KƆRƐŊGTU 6 - Doyayo bible

1 KƆRƐŊGTU 6

¹Gid zaa gbun a nɛ teesdu gin dɔgl hi naaza yɔ gi Yeesu fɔkya, taa an hoob gi ha̧a̧g dɔglɔ kaŋk a dood wɔ hi mɛɛ Bɛt gɛ hi muut du ya? Nɛ gi an gi kam nɛ a Bɛt doodɔ muutdu ma mi?

²Nɛ́ mɛ̄ɛ̄ a Bɛt doodɔ hí gbààs waal dɔgl gɛ ya? An nɛ gis waal dɔgl-gbaako, nɛ́ tuur dood hinmɛɛkya an nɛ gbɛɛr dɔgl dɛɛt gɛ ya?

³Nɛ́ mɛ̄ɛ̄ a wɛ́ gbààs Bɛt walɛsɛrɛ dɔgl gɛ ya? Gid wɛ́ gbààs Bɛt walɛsɛrɛ dɔglɛ, gi gis dɔgl wans waalya wɔ hii ya!

⁴An nɛ gin dɔgl anbɔ, nɔ nɛ kaŋk dɔglya̧ a dood waalduyaadɛ wɔ Yeesu fɔkya wɔ hi gihi seek an dood tɔsi nɛ zaŋ hi muutdu?

⁵Mi gisin dɔk hin yɛrɛ an mi gaanin seemɛ. Yɔ labɔ, doo za hinmɛɛkya taa a nɛ teesdu zaŋ an gi ɗɛɛ dɔgl gɛmsig ya?

⁶Nɔ zaa gi kaŋk naaza Yeesu fɔkya a dɔgl-gbɛɛrikya wɔ hi taa Yeesu fɔkya gɛ hi muutdu?

⁷Hi rɔbo, a̧a̧b gi nɛ teesdu anyɔ zaa gi kaŋk naaza a dɔgl-gbaak du. À nɛ mɔntin hin-a̧a̧b gɔ nɔ? Zaabe, hi loo hin nɛ luurɛ, nɛ mɔm yɔ gɔ nɔ?

⁸Yɛrɛ nɛ gi hin-a̧a̧b gɔko, nɛ gi hinwɔɔluko; yɔ hinyɔ daarɔ, nɛ gɔsig yɛ̧ɛ̧dɛ nɛ hii hin wɔrɔ hɛw!

⁹Nɛ́ mɛ̄ɛ̄ a dood ha̧a̧l wɔ hi taa Bɛt wáátɔ dak gɛ ya? Bɔnɛ maat zul nɛ! Dood nɛɛdkaatɛ ha̧a̧lɛ elikya wɛ, maak-fɔkya wɛ, mansgɔkya wɛ, walɛ mansgɔkya wɛ hi walɛ zaadɛ,

¹⁰luurɛ wɛ, hinɗɔkingoya wɛ, bumwɔnikya wɛ, dooniikya wɛ, tuslekya wɛ, dood wɔ hi wookhin anbɔ hí tāa Bɛt wáátɔ dako!

¹¹Amntɔnɔ, dood zaadɛ a nɛ teesdu hi ginɛ anbɔ. Yɛrɛ Bɛt da dokt kpoos nɛ, wɛɛ da wɛɛnin doodɔ gaatɛ hi dood rɔbɛ a gi muutdu, a Waar wɛ Yeesu Kristu nuŋg du hi Bɛt wɛ Mɔkil tɛŋk du.

¹²Nɛ raako a wi dag gbɔnɔ an wi woo hin sɛw. Hɔɔ, nɛ anbɔ. Wɛɛ hin sɛw ɗɛ̄ɛ̄ an gi ɗaasum gɛ be. Hɔɔ, hinlilk taaro, wɛɛ bɛ̄r an wɛ gaa zul wɛ a hinyɔ gi gedu sɛw an wɛ wɛɛ gbaarya̧ gɛ.

¹³Nɛ raako a Bɛt kim lees a buu dɔŋgo, wɛɛ kim buu a lees dɔŋg be. Nɛ yɔ anbɔ, ɔ̧tza Bɛt gi ha̧tir buu wɛ hi lees bɔ eer sɛw! Bɛt kı̄m muul wɛ an wɛ gɔn mans gɛ! Muul wɛ gis Waar Yeesu ɔ̧ɔ̧nɛ, Waar Yeesu be gis muul wɛ ɔ̧ɔ̧nɛ.

¹⁴Wɛɛ Bɛt yɔ rɛms Waar Yeesu a wɔrk du gi ɗundɔ, gi rɛms wɛɛ gɔ a wɔrk du hi tɛŋkɔ be.

¹⁵Nɛ mɛ̄ɛ̄ a muul nɛ wɔ gi Kristu muul dɛɛt ɔ̧ɔ̧n gɛ ya? Gi an mi loo Kristu muul dɛɛtɔ wɔ an hi wɛɛ niskaat ha̧a̧l muul dɛɛtɔ ya? Taa anbɔ zaŋ!

¹⁶Nɛ mɛ̄ɛ̄ a za̧a̧nyɔ ɔks gbunu hi nis kaati hi gitin muul gbun gɛ ya? Ya̧a̧nɛ Bɛt ɗɛɛrwol gi raa a dood eerɛ hi ɔksɔ hi wɛɛ muul gbunu.

¹⁷Yɛrɛ za̧a̧nyɔ ɔks gbunu hi Waar wɛ Yeesu hi gi mɔkil gbunu.

¹⁸Ya̧a̧nɛ, nɔ̀ɔn mansdɔglɛ. Hinha̧a̧l zaadɛ wɔ doo za gi gɔko, hinha̧a̧lɔ taa muulɔ ki̧i̧ko. Yɛrɛ za̧a̧nyɔ gɔ mansi, gɔ hinha̧a̧l a gi muulɛ.

¹⁹Nɛ mɛ̄ɛ̄ a muul nɛ gi an Bɛtluk gɛ ya? Bɛt Mɔkilɔ yɔ nɛ dag a Bɛt ge gi waak gedu ro! Nɛ taa nɛnɛ, nɛ gi Bɛt dood ɔ̧ɔ̧nɛ,

²⁰Bɛt zenɛ hi rɔɔs ɗɔbti, ya̧a̧nɛ. Yɔ anbɔ, sɔ̧ɔ̧n muul nɛ an wɔd hinɗɔbsingoya an nɛ ɗɔbsin Bɛto.